—Cristo kahonai abono adani Paulo.

Deus vaꞌora nanamithabiininivini hiꞌiki ida monina ijaꞌari vahoariha avigaꞌiariki kaho — avaabononi vaniꞌa bana.

2 Ijaꞌaria vanokivini vanofiki ida honai abono vakaijokavahaki kidikaꞌdaꞌdi kabadania kabadanijahakini.

3 Honai abono jahaki mani koda ho?

Ni-okavaꞌibodiki ida jahani jaharini hora avakavaꞌibodivaranivini.

Ni-okavaꞌibodiki jaboni ida vahoariha hora vara vavaniꞌavini,

jahani jaharini honai abono ohina.

Ni-hovani ni-vara ovaniꞌaki ida honai abono kabadania okabadanina jahani jaharini.

4 Okavaꞌibodivaraniki ida kodihojai,

ni-okaragaki ida badani asohiriki bada oniꞌaꞌiki.

Ovaꞌi bodinia badani asohiriki-ra okaragaravini kabaꞌi,

hojahi hojarihi ni-oogaki.

Deus vania biogaja ida kodihojai.

Ovari kaꞌoa bikaabokaki ida asohini asohirini bikahivini.

5 Akadikaꞌdaꞌdi Jesus joina viahania hariꞌa vara vavaniꞌajora ida honai abono kabadani asohiki asohirikia kabadanina.

Anokhava ida joina kamahini aogaja kaimoni.

Ovaria binanokiaki bana ida ijaꞌari vakadivaꞌibodivarani ahojaki,

nahina ijaꞌaria bikavaꞌinofinofiki vaꞌini bodinia.

Binanokiaki jaboni ida nahina kaimoni Deus kabadania kabadanini.

Oniania,

Deus vania vara biniꞌaja bana ida kidijaꞌari afohanana.

Kidibadani jahahi;

bivajahavini bikahihi.

6 Oigamina,

vara ovaniꞌavini hiki ida Apolo khama varani arihina,

aꞌonira okaꞌojomoꞌija kaimoni.

Onofiꞌiki ida varani arihina-ra avakamithavini,

avarigaja kaimoni hida athii jiriki nahina nini:

7 Avajahani vahoariha vajahana-ra aradamiki avavanihamanija koda?

Iniani.

Deus viaha ni-ijaꞌari hoariha-ra aradamiki.

Avavahojamanija koda ida nahina Deus aꞌonira noꞌaravini hiki?

Iniani.

Deus aꞌonira noꞌaꞌoamanija hahavi avavahojakia.

Deus kania avagahinahahaviꞌiki aꞌoni,

oniani ida nahina avavahojakia avaabononi avavaboraborahavini-ra najaharija.

8 Nahina hahavi Deua bivahojaki avakadimoni hini-ra avagathaniꞌiki avaabononi avavanihamanija koda?

Iniani.

Ni-avavahojahahavirihi ida.

Avakanahinaꞌahapikiki avaabononi avavanihamanija koda?

Iniani.

Avakanahinaꞌahapikirihi.

Avaabononi avaniꞌaꞌbadaraki aꞌoni:

—Ijaꞌari vavakaꞌdaꞌdiva arihiki hari Deus khama.

Ijaꞌari vavakaꞌdaꞌdiva vihiriha adani Paulo,

Apolo khama — avakhaniꞌbadaraki aꞌoni.

Ijaꞌari vavakaꞌdaꞌdiva avihija vaha;

khai onihi vaha.

Onofiꞌoamanija ida ijaꞌari vavakaꞌdaꞌdiva avihikaꞌoaꞌini,

kaꞌdaꞌdi arihija kaimoni jaboni avakadiania.

9 Cristo athi avaadahaoniva abono arihina kabaꞌi,

oabono okavaꞌibodivaranivini hiki ijaꞌari vavakaꞌdaꞌdiva fori ohirina.

Okhananavaki ada arabo kakaꞌdaꞌdini kidijaꞌari vaviaha.

Harivani Cristo athi avaadahaoniva abono aokasiagakaꞌoaki fori arihiki hari.

Ijaꞌari kaihiponahavahariki fori arihina,

haria avigarahavini.

Vanofiki vanivaha ida ijaꞌari vaipohiki vaviaha ariabinina-ra vavahonariahivini.

Vanofiki ida Deus ibavi kaijaꞌarini,

ijaꞌari araboa vahojaki vihiki ariabinina-ra vanokivini.

Nimania ida haria vakanabadanihaki fori vihina.

10 Hari.

Deu-ra vanofiriki haria vakavaꞌibodivaranivini hiki ida avaꞌihariki fori arihina Cristo-ra avakaijokavinia.

Aꞌonivani avaabononi avakavaꞌibodivaranivini hiki ida avarigahani Cristo kania avarajahamisini.

Hari.

Deu-ra vanofiriki haria vakavaꞌibodivaranivini hiki nahina arihirina.

Aꞌonivani avaabononi avakavaꞌibodivaranivini hiki ida kaꞌdaꞌdi avihini.

Hari.

Deu-ra vanofiriki haria vakaihiponiriki hari.

Aꞌonivani,

aꞌonira vavavaꞌihaki adani.

Nikia avaabononi avavaboraborahahi;

jahaki avavanihamania koda ida?

11 Aꞌaadahaonina vani avaiꞌamibakhiaja,

akanabidi akaaforabakhiaja,

akaimahabakhiaki ida makari ꞌboꞌda.

Haria vidafiabakhiaki adani.

Aribavirina aꞌaadahaoniki hari.

12 Mahi hahavi bada akhanikarahoki hari asaꞌa ariabono akavaꞌogajarihavini.

Hari.

Ijaꞌari varani jaharikia haria vakanavaranihahi;

vaathi agathanihi:

—Anofiki ida Deus aꞌonira kajoamoravini — vaꞌora aniꞌaki adani ijaꞌari.

Hari.

Ijaꞌari haria vanajahariharihi;

vaꞌora akaihamahiravini vani arihojahi.

13 Onii jaharikia haria vanaonivini kamahini,

vaathi agathanihi athii forakia.

Deu-ra vanofiriki haria vakavaꞌibodivaranivini hiki ida nahina karamonavahaki fori arihina,

nahina jahajanariki hokahiki kaimoni fori arihinia.

14 Aꞌonira okajirihivini hiki hida oathi aꞌonira okaꞌojomoꞌija kaimoni.

Kodisai fori avihiki aꞌoni.

Aꞌonira onakaidivaꞌoamanija.

Avavaꞌini-ra oanaipahihivini kaimoni hirihi ida oathi onajiriki.

15 Varajomavaharina kabaꞌi adani aꞌonira vakaꞌojomoꞌiki,

hovani ohoarana avakadiabiꞌi fori ohiki ho.

Homiroꞌa aꞌonira okanamonivini hiki ida Jesus Cristo monina jahaki,

avavahojaja kaimoni ida avakadimahi jaꞌdini kidiania avarakaramisija kaimoni,

oniani ida avakadiabiꞌia oabono onaonivini hija.

16 Aꞌonira okanikhariadanokivini hiki kodihojai-ra avakabanafoja kaimoni.

17 Okaronaki ada Timóteo avakadiania okhana aꞌonira kakodiara kaimoni,

kodihojai-ra avakabanafoja kaimoni.

Kodisai fori hiki jaboni ada Timóteo.

Bivakaijokajahakiki ada Cristo.

Oathi-ra naabaki jaboni ada.

Onakaidivaki ada.

Aꞌonira navaꞌihokiki bana ada Timóteo ojomoꞌihi kavaranihia vara vaꞌora oaniꞌaoniꞌiki adani Jesus Cristo kaijaꞌari avajoronioniki.

Kodivarani hiki afobakhia vakadiania,

ijaꞌari Cristo kania akaramisiki niha ninini ida kidihojai jaꞌdini.

18 Ijaꞌari vahoarahanana avakadiania vahojaki ookhariki hora vavanihavini avakadiania,

oniani ida vaabono vavaboraborahavini hija.

19 Deus ookhana-ra nofihi;

jorakia ookhahi avakadiania.

Oogaki bana ida vaabono vavaboraborahaki vakadiꞌogahai danoki kaꞌoa hini kaꞌoa hirini vavahojaki.

Ni-arajomaki ida vakadivarani Deus danona-ra vavahojavini-ra vakahivini.

Onofiki ida onokivini vavahojavini vavahojaravini.

20 Ni-arajomaki ida ijaꞌari kavarani Deua kidimahi bivakaꞌdaꞌdivini-ra kahivini.

Deus ijaꞌari-ra vakaꞌdaꞌdihi;

Deus danona nokiahi ijaꞌari kania.

21 Nahina mani ida avanofija?

Aꞌonira onavanavanahavini kamahini avanofimanija ida athii khanakia aꞌonira vara oniꞌavini?

Avanofimanija ida athii forakia aꞌonira vara oniꞌavini,

aꞌonira onakaidivavini-ra onanokiavini?