2 CORÍNTIOS
Pauloa bikaronaꞌianaki ida athi kapapirani Corinto sidaji kaijaꞌarini vakadiania
1
Hovani Paulo ho.
Deua binofiki ida Jesus Cristo athi avaadahaoniva abono ohina.
Arigamina Timóteo jaboni kodiania hojaki.
Binofiki ida aꞌonira okajirihivini jaboni.
Aꞌonivani avajoronibakhiaki Corinto sidajia,
Jesus kaijaꞌari avakadimoni hida papira onajiriꞌiki.
Vaꞌora okajirihivini hiki hida oathi jaboni Jesus kaijaꞌari Acaia kaarabonia avajoronionibakhiaki.
2 Vara vaꞌora oniꞌaki adani akadiabiꞌi Deus,
akadikaꞌdaꞌdi Jesus Cristo khama avakadimoni,
aꞌonira vakajoamorara kaimoni,
aꞌonira vanoꞌaki adani jaboni vaꞌi jahajahania.
Pauloa khai biniꞌaki ada Deus
3 Deu-ra aniꞌabakhiava:
—Deus,
khai aniꞌaki ida ijahani.
Ira akanamasiviki hari.
Jahaki ida kadahojai ijaꞌari-ra ivaꞌadibakhiavini — aniꞌabakhiava ada Deus.
Jesus Cristo kaabiꞌi ada.
KidiDeus ada.
Akadikaꞌdaꞌdi kaꞌoa ada Jesus.
Deus kahojai ida ijaꞌari vaꞌini rogo iniki-ra kajoamorabakhiavini.
4 Nahina jahariki akadiania namithaki,
avaꞌi rogo inini vani Deus haria kajoamoraja.
Vahoariha vakadiania jaboni namithaki ida nahina jahariki.
Harifori vihiki adani.
Deus haria kajoamoravini mani ida vahoariha-ra vaꞌora akajoamoravini-ra aogavini hija.
Akaabokaki ida vaꞌora akajoamoravini Deus haria kajoamoravini fori hini.
5 Jaharihariꞌiki ada Cristo afobakhia.
Harivani jaboni ajaharihariki hari,
ovari fori arihina.
Jahariharina vani Deua bikajoamorajahakiꞌara ada.
Cristo kania aakaramisina vani nahina jahariki namithaꞌina akadiania,
Deus haria kajoamoravini afojahaki jaboni.
6 Aꞌonira akanamonivini hiki ida Deus aꞌonira kajoamoravini,
aꞌonira akavaꞌijoavini varani hini,
oniani ida vahoariha haria vanajahariharivini hija.
Ajahariharina vani Deus haria kajoamoraja.
Aꞌonivani avajahariharini kamahini Deus aꞌonira kajoamoraki bana aꞌoni jaboni,
haria kajoamoravini fori hikia.
Avakavaꞌipahinirihi;
Deus aꞌonira noꞌaki bana aꞌoni danona,
avakaabokaja kaimoni ida avajahariharini,
akaabokaki fori hini.
7 Akajariꞌdarihi ida avakavaꞌipahiniravini.
Kaaraki ida aꞌonira avakaijokavini.
Avajahariharini fori hiki bana ida ajahariharina,
oniania Deus danona-ra avagathaniki aꞌoni,
agathanivini vani fori hini.
8 Arigamina,
onofiki ida aꞌonira anavaꞌihokivini Ásia kaarabonia namithaꞌikia Timóteo khama akadiania.
Ajaharihariꞌoamaniꞌia.
Daji karaho khanani arafiaki fori hiꞌiki ida namithaꞌiki akadiania,
oniani ida ahokina-ra anokhajanaravini hija.
9 Ariabono akavaꞌibodivaranivini hiꞌiki ida ijaꞌari abinini-ra vavahonariahivini fori arihiꞌina.
Nimania ida namithaꞌiki akadiania haria kaꞌojomoꞌija kaimoni ida ariabono avakaijokaravini.
Jahaki ida Deu-ra avakaijokavini.
Ovari ijaꞌari abiniꞌiki-ra anahokiꞌiki ada.
10-11 Apohimajana vani haria akavaꞌijoaꞌara ada.
Haria akavaꞌijoaꞌianaki bana ada.
Deu-ra avakanikhariavinia haria avakakodiavini oadani,
asia Deus haria akavaꞌijoavini-ra anokhahahaꞌoadahaki hari.
Ijaꞌari vaipohiki haria vakanikhariabakhiaki Deua kania haria akavaꞌijoara kaimoni.
Deus aꞌonira noꞌavini hiki bana ida avakadikanikhari,
oniani ida amonina-ra mitha vaniꞌaki Deu-ra khai vaniꞌavini hija.
Vakhaniki bana adani:
—Jahaꞌoamanira ada Deus.
Paulo-ra vaꞌora kajoamoraꞌiki ada.
Aabosiꞌiki ida Paulo aadahaonina-ra nofivini
12 Aogaki ida hojai Deua binofikia akahojaiꞌina avakadiania,
vahoariha vakadiania jaboni,
oniani ida ariabono khai aniꞌavini hija.
Hojai Deua binofikia akahojaina mani ida avaꞌi kaabanahahani haria osaniravini hija.
Ni-korijanahia akavaraniki.
Kaꞌoa hiki ida akadivarani,
akadibadani hiki.
Nimania ida hojai Deua bivajahaki.
Ni-avaꞌahaki ida ogahai araboa kamaꞌdaki haria bananivini.
Avaꞌahaki ida Deus haria kajoamoravini,
haria bananivini.
13-14 Ariathi kapapirani-ra akaronaꞌiki hari avakadiania,
vada avaniꞌahi;
jorakia avarigahi ida nahina nini.
Kabaꞌi,
ni-nahina arihina-ra avarigajahakiki kaho.
Onofiki ida haria avarigajahakivini bana.
Oniaroa,
akadikaꞌdaꞌdi Jesus Cristo joina kamahini khai avaniꞌaki bana ida ajahana,
avajahani-ra khai aniꞌavini vani fori hini bana.
15 Oabono oniꞌahi:
Jesus kaijaꞌari Corinto sidajia vahojakia avigajahakiki ida kodivaꞌibodivarani nahina nini.
Oniaroa,
ꞌbamija vaꞌora onavanavanahaki bana adani.
ꞌBamija vaꞌora okajoamoravini vaꞌora onofiki adani — oniki ho,
aꞌonira okavaꞌibodivaranivini.
16 Onofiꞌiki vanivaha ida aꞌonira onavanavanahavini Macedônia kaarabonia ookhana.
Onofiꞌiki jaboni ida oajoina aꞌonira onokiꞌianavini.
Oniania avakaabokaꞌia ida hora avakakodiavini Judéia kaarabonia oajoina.
Nimania ida okavaꞌibodivaraniꞌimidiaki.
17 Hari.
Oabono onavaꞌisohivini naothinia oanaabosiki ida kodivaꞌibodivarani.
Oabono oniꞌahi:
Jokoa ookharihi.
Nikia okavaranina kabaꞌi,
ijaꞌari abononi navaꞌiponiꞌimariniki fori ohirihi.
Okavaꞌibodivaranivini kabaꞌi ida iniani,
jokoa ijaꞌari-ra oniꞌarihi haꞌa.
Niki ida ijaꞌari Deu-ra ogariki vakaijokariki athini.
18 Kaꞌoa hiki ida Deus athi,
onivani fori hija hida varani aꞌonira onavaꞌiponivini hiꞌiki.
Okavaꞌibodivaranivini kabaꞌi ida iniani,
jokoa haꞌa onirihi.
19 Silas,
Timóteo arihina aꞌonira akanamonivini hiꞌiki ida Jesus Cristo varani hina,
Deus kaisai hina.
Deus ni-haria navaꞌiponiꞌimariniki Cristo monina.
Cristoa biniꞌahi haꞌa,
jokoa bianahoariharihi ida.
Ni-iniani biniꞌaki.
20 Jesus Cristo-ra avakaijokahi;
nahina hahavi Deus haria navaꞌiponivini hiki Cristoa binanamithaki akadiania.
—Jesus,
nahina Deua binofiki-ra inamonahaꞌiki i — akhanihi,
Deu-ra khai aniꞌavini.
21 Deus vani haria anigahivini hija ida Cristo kania aakaramisijabanana,
aꞌonivani harivani jaboni.
Deus vani haria anahoariharibanija kidimoni arihina.
22 Kidiani arihina mani ida haria karajomivini hiꞌia.
Kidirajomi hiki ida Maꞌonahai Jahaki ibavina avaꞌi bodinia,
aogaja kaimoni ida nahina hahavi haria kaibavijahahivini hiki agahinana hiki bana.
23 Hari.
Vara onina Deus viaha,
ovaria biogaki hida kodivaꞌibodivarani.
Jokoa korijanahia okavaranirihi.
Corinto sidajia hora rakhariki athii khanakia aꞌonira vara oniꞌaria kaimoni.
Aꞌonira ovaꞌadivini-ra onofiki ho,
oniani ida papira hoariha-ra okaronavini hiꞌia avakadiania ookhana viahania.
24 Ni-anofiki ida aꞌonira ahonariavini nahina-ra avakajariꞌdaravini.
Aogaki ida Jesu-ra avavakaijokajahakivini avarakaramisini kidiania.
Anofiki ida bada akhanijabanana,
aꞌbaꞌdija kaimoni ida avakadikhaiini.