GÁLATAS
Pauloa bikaronaki ida athi kapapirani Galácia kaaraboni kaijaꞌarini vakadiania
Pauloa bikaronaki ida athi kapapirani
1
1-2 Hovani Paulo onajirija hida papira.
Jesus Cristo kaijaꞌari Galácia kaarabonia avahojaki avakadimoni hida oathi kapapirani okaronaki.
Aꞌonivaniti.
Aꞌonira vakaꞌivanitiki hadani arigamina kodiania vahojaki,
hihadani Jesu-ra vanofijahakiꞌiki hadani.
Deus vani hora vahonariaja Jesus Cristo khama monina jahaki avaadahaoniva abono ohina.
Ni-ijaꞌari hora honariarihi.
Ni-ijaꞌari hora karonarihi.
Jesus Cristo vani adani hora vakaronaꞌara kidiabiꞌi khama.
Deua bianahokiꞌiki ada kidisai Jesus abiniꞌina naothinia.
3 Onofiki mahi hahavi aꞌonira vakajoamoravini adani Deus akadiabiꞌi,
akadikaꞌdaꞌdi Jesus Cristo khama,
aꞌonira vanoꞌahaꞌoadahaki adani vaꞌi jahajahania.
4 Deus akadiabiꞌia binofiꞌiki ida Cristo abiniꞌina akadimoni hina,
bianija kaimoni ida akadihojai asohirikia akahojaina.
Cristoa binofiki ida haria akavaꞌijoavini Jahari avaꞌi-ra nahonariahihijanaria kaimoni,
oniani ida abiniꞌina abono-ra vaꞌahavini hija.
5 Khai aniꞌahahaꞌoadahava ida Deus jahana arafiaki mahi hahavi.
Nimania hida Deua binofiki.
Jesus monina jahaki sohiki Pauloa vara bivaniꞌaꞌiki
6 Ovaꞌi-ra kadi hiki ida jorakia aꞌonira nagathogathoꞌiki-ra avakavaꞌipahinijorakiꞌavini.
Ovaria bikaronaꞌiki ada Cristo aꞌonira kajoamorara kaimoni.
Avanofiki ida moni jahaki hoariha-ra avanaabavini.
7 Ni-hojaki ida Cristo monina jahaki hoariha.
Vahojaki adani ijaꞌari avakadiania avakadivaꞌibodivarani-ra avanaabosiki kaimoni,
oniani ida avavaꞌini-ra kosakhamaja.
Vanofiki ida Cristo monina sohiki-ra avanahoarihavini,
sohijanaria kaimoni ida Cristo monina.
8 Deua bihonariaki bana ida ijaꞌari Jesus monina jahaki-ra anahoarihaki Ibavi Jaharikaꞌoakia okhani.
Ijaꞌari hana hini vahabini,
harivani vahabini,
Deus ibavi kaijaꞌarinia vahabini bianahoarihaki ida Cristo monina jahaki,
Deua binaabosiki ida monina anahoarihani hiki nahina jaharikia.
9 Akadivarania aꞌonira anavaꞌisohiꞌboꞌdaꞌiki hari,
aꞌonira anavaꞌisohiꞌianaki bana hari.
Ijaꞌaria bianahoarihahi ida Jesus Cristo monina jahaki aꞌonira ananamithavini hiꞌiki,
okhaki bana ida ijaꞌari Ibavi Jaharikaꞌoakia.
10 Onofiki ida Deus vara hora vaniꞌavini:
—Jahaki ida Paulo kabadani,
asohiki ida kidivarani — nimania ida Deus vaꞌi-ra khai oniꞌavini-ra onofivini.
Jokoa oabono oniꞌarihi:
—Onofiki ida ijaꞌari vavaꞌi-ra khai oniꞌavini,
oniani ida varani vavajahaki kaꞌoa vaꞌora vara oniꞌavini hija.
Jokoa kodikaabanahi-ra vakamithariha adani,
vavajahariki ida — onija vaha;
ni-Cristo kahonai abono ohirihi vaha.
Paulo abono-ra vara vaniꞌaꞌiki
11 Oigamina,
avarigavini onofiki ida Jesus varani hina jahaki.
Ni-ijaꞌaria vanakamaꞌdaki ida monina jahaki.
Deus vania binakamaꞌdaja ida.
12 Ni-ijaꞌari hora kanamonivini hiki ida Jesus monina jahaki kodimoni hini.
Ni-ijaꞌari hora kaꞌojomoꞌivini hiki jaboni.
Jesus Cristo vani ada hora anigahiꞌara varani hina.
13 Avakamithaꞌiki ida varani ohina mahi ꞌboꞌdakari judeus kaijaꞌari avikhananavaki vakadihojaia okahojaina jaboni.
Cristo Deus kaisai hina-ra okajariꞌdavini kari vaꞌora onajahariharibakhiadanokiki adani Jesus Cristo kaijaꞌari,
vaꞌora onofiki vaꞌora onihimavini.
14 Imakhinava ohina kari kodijaꞌari vakadiania ohojaꞌiki ho.
Onofijahakiꞌiki ida akadijaꞌari avikhananavaki vakadihojaia okahojaina.
Deus kavaꞌisohihi jiriki ida vahojana hija.
Akadijaꞌari Deus kavaꞌisohihi-ra vanaabavini vani hovani onofivini arafiakaꞌoaja ida.
15 Deus hora kajoamoravini vani oꞌbanana viahania hora nagathogathoꞌara ada.
Okarahoꞌina,
hora baranahaꞌiki ada,
kidihonai abono ohija kaimoni.
16 Deua binofiki ida kidisaia hora nanokiahivini,
vaꞌora onanamithara kaimoni adani judeus kaijaꞌari vihiriki Jesus monina jahakia.
Ni-Jesus kaijaꞌari-ra vaꞌora onakoꞌdiki hora vakaꞌojomoꞌiki kaimoni.
17 Ni-vaꞌora onavanavanahaki adani Jesus athi avavaadahaoniva abono Jerusaléa vahojaki.
Jesus vaꞌora karonaꞌiki adani vaꞌoaniaro miroꞌa,
hora karonavini viahania Deus athi-ra avaadahaonija kaimoni.
Oniaroa,
vaꞌora onokiravini vani Arábia kaarabonia ookhaꞌimidiaꞌia,
naothinia oajoiꞌihi Damasco sidajia.
18 Badara ahoarabakosiki radahani ookhaꞌihi Jerusaléa,
oogara kaimoni ada Pedro.
15 mahi ipohini ohojaꞌihi kidiania.
19 Onokiꞌaha ada jaboni Tiago.
Akadikaꞌdaꞌdi Jesus kakajoꞌo ada.
Jesus athi avavaadahaoniva abono vahoariha ni-vaꞌora onokiꞌiaki kaho.
20 Deua biogaki hida oathi onajiriꞌiki kaꞌoa hini.
21 Hari.
Judéia kaarabonia ai ohina naothinia Síria kaaraboni maina ookhaꞌihi.
Cilícia kaarabonia jaboni oaꞌaadahaoniꞌihi.
22 Oniaro kari ni-hora vanokiꞌiaki kaho adani Jesus Cristo kaijaꞌari Judéia kaarabonia vahojaki.
23 Vakamithaꞌihi ida vahoariha vara hora vavaniꞌabakhiaꞌavini:
—Mahi ꞌboꞌdakari haria najahariharibakhiaꞌiki ada Paulo.
Jesus monina-ra nihimavini-ra nofiki ada.
Hidakabaꞌi Pauloa binamoniꞌiki ida Jesus athi akajariꞌdariki — vakhaniꞌaha adani Jesus kaijaꞌari Judéia kaarabonia vahojaki.
24 Oniania vaabono vakaniꞌakhamaꞌaha:
—Jahaꞌoamanira ada Deus.
Paulo-ra kajoamoravini mani ida Cristo-ra kajariꞌdajanaravini hija,
oniani ida Cristo varani hina-ra vara vaniꞌabakhiavini hiꞌia — vakhaniꞌaha afobakhia.