Paulo vaꞌora nokiꞌiki adani Jesus athi avaadahaoniva abono
2
Hari.
14 badara ipohini radahaꞌihi,
ookhaꞌianahi Jerusaléa.
Barnabé hora vaipohihaꞌiki.
Arigamina Tito oniki-ra oavikhaꞌihi jaboni.
2 Deus ookhana-ra honariavini hora arakhaꞌiki Jerusaléa.
Aakhanoꞌihi,
Jesus Cristo kaijaꞌari vanavaꞌisohiva abono vakadiania akajoronikosoaꞌihi.
Vahoariha ni-vahojaki akadiania.
Jesus Cristo kaijaꞌari vanavaꞌisohiva abono-ra vaꞌora onavaꞌisohivini hiꞌiki ida kodivarani vara ovaniꞌabakhiaꞌiki judeus kaijaꞌari vihiriki vakadiania.
Ni-onofiki ida kodibadani akamadani akadijaꞌari vihiriki vakadiania.
Jesus kavaranihia okavaranina-ra vavajaharara vaha;
kodibadani akamadamanihi vaha.
Ni-onofiki jaboni ida akamadani kodibadani bada oniꞌaꞌiki kaimoni akadijaꞌari vihiriki vakadiania.
Hari.
Kodiꞌojomoꞌihi kavaranihi asohini vani-ra vakahiha adani Jesus Cristo kaijaꞌari vanavaꞌisohiva abono.
3 Akadiania hojaha ada oipohina Titoa oniki.
Grécia kaaraboni kaijaꞌarini ada.
Judeus kaijaꞌari hirina mani ida siikosida karajomihi-ra vahojaravini hija.
Jesus Cristo kaijaꞌari vanavaꞌisohiva abono ni-vavamakhaniki hida Tito karajomirina.
Ni-vavahonariahiki karajomina.
4 Vahoariha vania vanofiha karajomina.
Jesus Cristo kaijaꞌari vahararana vahojaki adani Cristo kaijaꞌari vihina-ra vakahiꞌimariniki.
Vaꞌora akaboaꞌiravini kabaꞌi,
aviꞌoiꞌaha ahararana,
vakamithaja kaimoni ida akadivarani.
Vanofiki ida akadihojai jaꞌdini-ra avigavini,
haria avanaathidanoararira kaimoni siikosida karajomihi-ra akavaꞌipahinivinia.
Jesus Cristo kania aajahamisijahakina mani ida siikosida karajomihi-ra avakaajijanaravini hija.
Siikosida karajomihi-ra akavaꞌipahinivini mani ida gathaki fori haria nihajanarija.
Cristo kaijaꞌari vihina-ra vakahiꞌimarinikia vanofiki ida gathaki fori arihiꞌianana.
5 Ni-anofipaꞌitxijanaki ida vakadivarani anaabavini.
Vakadivarani anaabaja vaha;
ni-Jesus varani hina asohiki-ra avakamithaki vaha.
6 Hari.
Ajoronina kabaꞌi Jesus Cristo kaijaꞌari vanavaꞌisohiva abono hora vaniꞌahi:
—Asohiki ida Jesus monina jahaki iananamithaoniꞌiki.
Iogahahaviꞌiki ida.
Ni-hojaki ida ariathi hoariha ira anavaꞌisohivini hiki kaimoni — vakhaniꞌaha.
Jesus Cristo kaijaꞌari-ra vaꞌora vanavaꞌisohivini onokivini mani ida ijaꞌari vanavaꞌisohiva abonoa vaꞌora onaonivini hija.
Ni-okavaꞌibodiki ida ijaꞌari hana hini hoariha-ra vakaꞌdaꞌdiki hoariha-ra vakaꞌdaꞌdiriki.
Hovani vada oniꞌaꞌiki ida ijaꞌari kabadani.
Deus vania biogaja ida ijaꞌari vaꞌini bodinia vara nini,
oniani ida ijaꞌari jahani jaharini,
asohini,
asohirini-ra ogavini hija.
Hari.
Jesus Cristo kaijaꞌari vanavaꞌisohiva abonoa ni-vanahoarihaki ida Jesus monina vara ovaniꞌabakhiaꞌiki.
Asohini vakahiki ida kodivarani.
7 Vaꞌoaniaroa avigaki ida Deus haria honariaꞌavini,
Pedro khama,
Jesus monina jahaki-ra vara avaniꞌavini.
Avigaki ida judeus kaijaꞌari vihiriki vakadiania hora karonavini.
Avigaki jaboni ida akadijaꞌari vakadiania Pedro-ra karonavini.
8 Deus vani hora honariaja athi oavaadahaonivini judeus kaijaꞌari vihiriki vakadiania ookhana.
Onivani fori hira ada Pedro Deua bihonariavini athi avaadahaonina hina judeus kaijaꞌari vakadiania.
Deus haria kajoamoravini mani ida kidibadani danoki bada aniꞌabakhiavini hija.
9 Vahoariha vaꞌora vanaonivini adani Pedro,
Tiago,
João vihiki,
Jesus Cristo kaijaꞌari vanavaꞌisohiva abono.
Pedroa avigaꞌiki ida Deus hora nagathogathoꞌavini,
judeus kaijaꞌari vihiriki-ra vaꞌora oanavaꞌisohionija kaimoni Jesus monina jahakia.
Ariabono akaniꞌakhamaꞌihi Pedro,
Tiago,
João vihiki khama:
—Paulo,
Barnabé aꞌonivani,
Deus aꞌonira nofiki aꞌoni Jesus monina jahakia vaꞌora avaranavaꞌisohionira kaimoni adani akadijaꞌari vihiriki.
Pedro ivani,
Deus ira nofiki i,
vaꞌora ianavaꞌisohionira kaimoni adani akadijaꞌari.
Ariabono aakanajahamisikhamavini mani ida asaꞌa-ra vaagathivini hija.
10 Pedro haria vaniꞌaꞌaha:
—Vahojaki adani arigamina ahararana vakanahinariki.
Vaꞌora vakajoamora bana,
vaꞌora vanoꞌa bana vakainamokia — haria vaniꞌaha.
—Hai.
Onofiki ida vakanahinariki-ra vaꞌora okajoamorabakhiavini — onihi.
Pauloa bikaabaniki ada Pedro
11 Hari.
Antioquia sidajia ohojaꞌina kari khaꞌaha ada Pedro.
Ni-asohipaꞌitxiki ida kidibadani akadiania,
oniani ida vahoariha vaviaha okaabanivini hija.
Nimania bana hida Pedro kabadani asohiriki varani hini.
12 Hari.
Jesus Cristo kaijaꞌari vakadihojai jahaki ida viꞌbaijabanana,
judeus kaijaꞌari judeus kaijaꞌari vihiriki khama.
Pedro jaboni,
kaikahiꞌaha,
ꞌbaiꞌaha vakadiania.
Hari.
Pedro vakadiania vakaikahiꞌaha adani judeus kaijaꞌari Tiago vaꞌora karonaꞌiki.
Vaꞌoaniaroa vanofiki vaꞌora vakarajomivini adani judeus kaijaꞌari vihiriki siikosida rajomia.
Tiago vaꞌora karonaꞌiki vakaikahina naothinia kidijaꞌari kaꞌoa kania ꞌbaiꞌaha ada Pedro,
ni-ꞌbaijabanaki judeus kaijaꞌari vihiriki vakadiania.
Vakaikahiki-ra vaꞌora finivini mani ida noꞌbaijanarina hija kidijaꞌari vihiriki vakadiania.
Pedro vaꞌora finivini hiki kajaꞌoriana vihina adani rajomi-ra vanofiki.
Ni-asohiki ida vaꞌora finivini,
ni-jahaki ida judeus kaijaꞌari vihiriki-ra vaꞌora kavaꞌipahinivini ada Pedro.
13 Jesus kaijaꞌari vahoariha vanokiꞌihi ida Pedro ꞌbaijanarina judeus kaijaꞌari vihiriki vakadiania.
Vaꞌoaniaro maina vanofijanarihi ida viꞌbaina judeus kaijaꞌari vihiriki vakadiania,
Cristo kaijaꞌari vihina kabaꞌi.
Vakaikahiki-ra vaꞌora vifinivini mani ida vakadijaꞌari vihiriki vakadiania viꞌbaina-ra vanofijanaravini hija.
Barnabé jaboni vakadiania ꞌbaina-ra kavaꞌipahiniꞌiki ofiniꞌina.
Avigavini kabaꞌi ida asohirini,
vaofiniraraoniꞌina mani ida vaꞌora vakavaꞌipahinivini hiꞌia.
14 Hari.
Okamithaꞌihi ida viꞌbaijabanajanarina varani hini,
ni-ovajahaki ida akadijaꞌari vihiriki-ra vakavaꞌipahiniꞌavini.
Ni-nini asohiki ida Jesus monina jahaki varani hini,
oniani ida Pedro-ra okaabanivini hiꞌia.
Vahoariha akadiania vajoroniki ariathi-ra vakamithara kaimoni,
onihahi:
—Pedro,
ivani judeus kaijaꞌari ihini kabaꞌi,
judeus kaijaꞌari vakadihojaia ikahojaijanarihi.
Judeus kaijaꞌari hiriki fori ihiꞌiki i.
Jahapaꞌitxirihi ida judeus kaijaꞌari vihiriki akadijaꞌari kakaajia vakahojaina-ra inofivini — Pedro-ra okaabanivini oniꞌaha.
Deus vaꞌora kapoariki adani Jesu-ra vakajariꞌdariki
15 Judeus kaijaꞌari adani akadiabiꞌi,
akadiamia vihiki,
oniani hida jaboni judeus kaijaꞌari haria nihaja.
Hojai jahariki namonahava abonoa akadijaꞌari vaꞌora vanaonibakhiaki adani akadijaꞌari vihiriki.
16 Hari.
Aogaki ida Jesu-ra vakaijokaki Deua bikapoarivini,
ajahamisija kaimoni kidiania.
Jesu-ra vakaijokavini mani ida Deua bikapoarivini hija,
kidimahi sohikaꞌoani bikahivini hija jaboni.
Ni-Deus vaꞌora kapoariki adani vahoariha Jesu-ra vakajariꞌdaki.
Jahaki ida Deus kavaꞌisohihi jiriki,
kabaꞌi,
ni-Deus vaꞌora kapoariki adani kidivaꞌisohihi jiriki naabani vihiki.
Harivani,
akhanina vani jaboni,
avakaijokaꞌara ada Jesus Cristo.
Kidiania ariabono gahinai anihavini mani ida Deus haria kapoarivini hiꞌia,
akadimahi sohikaꞌoani Deua bikahivini hija.
Kidivaꞌisohihi jiriki anaabavini oadani,
ni-Deus haria kapoariki.
Ijaꞌari Deus kavaꞌisohihi jiriki-ra naabavini kabaꞌi,
ni-Deua binaabosiki ida vaꞌisohihi-ra vanaabavini,
ni-bikapoariki kidiania ajahamisija kaimoni.
17 Deus haria kapoarivini-ra anofivini vani Cristo kania ariabono gahinai anihaja.
Kidivaꞌisohihi aragaribakhiaꞌavini mani ida hojai jahariki namonahava abono arihina-ra akahivini hija.
Hojai jahariki namonahava abono arihina,
judeus kaijaꞌari vihiriki fori arihiki hari.
Jesua biakodiamanija koda ida hojai asohirikia akahojaina?
Iniani.
Ni-binofipaꞌitxiki ida hojai Deua bivajahariki.
18 Kodivarani hibakhiaki ida Deus ijaꞌari Jesu-ra vakaijokaki-ra kapoarivini.
Ni-bikapoariki ida kidivaꞌisohihi jiriki nasohirini hiki.
Jokoa oanahoarihapaꞌitxirihi hida varani.
Jokoa oniharihi:
Bada aniꞌaꞌianava hida Deus kavaꞌisohihi mahija haria kapoarivini.
Asohija vaha hida varani;
ni-vaꞌisohihi jiriki-ra akavaꞌipahinivini asohiki vaha.
19 Vaꞌisohihi jiriki-ra oragaribakhiavini mani ida oabiniꞌiki fori hora nihaja.
Oabiniꞌiki fori ohiꞌina,
oniani ida vaꞌisohihi jiriki hora kaabokajanaravini hija.
Namithaꞌiki hida kodiania,
oajahamisija kaimoni Deus kania.
Cristo abiniꞌina vani ava akasanakhamaki kania,
oabiniꞌiki fori ohiꞌina kidiania.
20 Kodiani hijanarihi ida kodimahi araboja ovahojaki.
Cristo kamahi ida ovaꞌi bodinia hojaja.
Ovahojaꞌiki ida mahi jaꞌdini Cristo hora noꞌavini hiꞌiki.
Cristo kodimahi jaꞌdini-ra honariavini vani Deus kaisai kaꞌoa-ra ovakaijokahaꞌoadahaja.
Ovari hora nakaidivaꞌiki ho,
abiniꞌina abono-ra vaꞌahavini kodimoni hiꞌina.
21 Ni-okajoniki ida Deus hora kajoamoravini.
Jesu-ra ovakaijokavini mani ida hora akavaꞌijoavini hija Jahari saꞌa kabodinia.
Deua bikapoarija vaha ida ijaꞌari kidivaꞌisohihi jiriki naabani hiki;
ni-nahina kaimoni vaha abiniꞌiki ada Cristo akadimoni hina.