Abraão Deu-ra kajariꞌdaravini
3
Aꞌonivani Galácia kaaraboni kaijaꞌarini,
avavaꞌini bajadidiꞌoamanija!
Hoariha aꞌonira kaijorahaki aꞌoni vahabini.
Avanokiravini kabaꞌi ada Jesus Cristo abiniꞌina ava akasanakhamakia,
aꞌonira vara oniꞌavini vani avakanokhohakhohara ada.
2 Hora nanamitha bana:
Deus kavaꞌisohihi jiriki-ra avanofivini oadani,
Deua bikaronamanira koda ada Maꞌonahai Jahaki aꞌonira aviꞌonanira kaimoni?
Iniani.
Jesus monina jahaki-ra avakamithahi,
kidiania avaabononi gahinai avanihahi,
oniani ida Maꞌonahai Jahaki Deua bikaronavini hiꞌia aꞌonira aviꞌonanira kaimoni.
3 Jesu-ra avanofibiininivini Maꞌonahai Jahaki aꞌonira bananiꞌiki aꞌoni.
Naothinia avanofiꞌianamania koda ida avakaijoꞌaꞌianavini vaꞌisohihi jiriki-ra avanaabaꞌianavini?
Niki vania koda ijaꞌari-ra kapoariki avavanihara ada Deus?
Iniani.
Paꞌitxi oamani ida avakadivaꞌibodivarani.
4 Vaꞌisohihi jiriki-ra avanofiꞌianavini mani ida Jesu-ra avakavaꞌipahinivini hija.
Jesu-ra avanofibiininivini,
aꞌonira vanajaharihariꞌiki adani Jesu-ra vakajariꞌdaki.
Jesu-ra avakavaꞌipahinihi;
avajaharihariꞌimarinihi.
Okajariꞌdaki ida Jesu-ra avakavaꞌipahinivini-ra avanofivini.
5 Ni-Deus vaꞌora naabosiki adani kidivaꞌisohihi naabani vihiki,
Maꞌonahai Jahaki-ra karonavini vakadiania.
Ni-Deus vaꞌora naabosiki adani kidivaꞌisohihi naabani vihiki badani danokia.
Hari.
Jesus monina jahaki-ra avakamithavini,
avakajariꞌdarihi jaboni,
oniani ida Deus kidibadani danoki-ra nabadanivini hija,
Maꞌonahai Jahakia aꞌonira noꞌavini hija jaboni.
6 Abraão ꞌboꞌdakari ovari miroꞌa ni-Deu-ra kajariꞌdaki.
Deus athi kapapirania hojaki ida Abraão varani hina:
“Abraão Deu-ra vakaijokavini mani ida
kidimahi sohikaꞌoani
Deua bikahivini hija,
oniani ida Abraão-ra
kapoarivini hija.”
Nimania hida Deus athi.
7 Onofiki ida Deus athi-ra avarigavini.
Deus vaꞌora naonivini adani ijaꞌari vakaijokana vihiki,
Abraão kahanodi vanamitharonisiagaki,
Abraão Deu-ra vakaijokavini vani fori vihina.
8 Hojaꞌboꞌdaki ida athii Deus athi kapapirania:
“Deus vaꞌora kapoariki bana adani judeus kaijaꞌari
vihiriki vakaijokana vihiki.
Vakadimahi sohikaꞌoani vani Deus vaꞌora kahira bana adani.”
Niki ida athii.
Deua bivavaꞌisohihijoraki ida moni jahaki Abraãoa bikamithaki kaimoni.
Biniꞌaha:
“Abraão,
hora ivakaijokavini mani ida
arabo hahavi kaijaꞌarini-ra
vaꞌora okajoamoravini hija bana.”
Niha ada Deus.
9 Abraão Deus athi-ra kajariꞌdaravini mani ida Deua bikajoamoravini hija.
Onivani fori vihira adani ijaꞌari hahavi Deus athi-ra vakajariꞌdariki vaꞌora kajoamoravini.
Abraão-ra kajoamoravini vani fori vihira jaboni adani vaꞌora kajoamoraki.
10 Hari.
Asohipaꞌitxirihi ida vahoariha vakadivarani:
—Deus kavaꞌisohihi jiriki-ra anaabaꞌava mahija haria kapoarivini,
akadimahi sohikaꞌoani-ra kahira kaimoni ada Deus — vakhaniꞌimariniꞌiki adani.
Vanaabavini vakahivini kabaꞌi,
ni-vanaabajahakiꞌiaki kaho.
Vanaabaravini mani ida Deus jaharikia vaꞌora arakhavini hija.
Nimania bana hida athii Deus athi kapapirania hojaki:
“Vaꞌisohihi jiriki hoarani-ra ragarihi ida ijaꞌari;
Deus jaharikia biarakhaki ida bana,
bigathanija kaimoni ida hojai asohiriki abosini.”
Nimania ida Deus athi jirikia vara bivaniꞌaꞌiki.
Ni-vaꞌisohihi jiriki-ra naabahahaviki ida ijaꞌari afohaꞌoadaha.
11 Avakavaꞌibodivaraniki hida athii,
aogaki ida ijaꞌari hahavi Deus kavaꞌisohihi jiriki-ra varagarivini,
oniani ida Deus vaꞌora kapoariravini hija.
Deus athi kapapirania hojaki hida athii:
“Deua bikapoariki ida ijaꞌari vakaijokana hiki,
kidimahi sohikaꞌoani
bikahiki ida,
oniani ida kidimahi
anokhomiriki-ra
vahojavini hija.”
Nihi ida athii.
12 Ijaꞌari Deus kavaꞌisohihi-ra naabavini fori hirihi ida ijaꞌari Deu-ra vakaijokavini.
Deus athi kapapirani haria navaꞌisohivini hiki:
“Ijaꞌaria binaabahahaviki ida honari Deus kavaꞌisohihi jiriki kania hojaki,
ni-hoaranija biragariki,
oniani ida kidimahi
anokhomiriki-ra
vahojavini hija.”
13 Cristo vani ada Deus kavaꞌisohihi jiriki-ra kaabokaꞌara.
Binaabajahakivini kabaꞌi ida vaꞌisohihi jiriki,
jaharikia okhaꞌiki ada Cristo.
Vaꞌisohihi jiriki-ra vanaabariki vakadimoni ida nahina jahariki Cristoa bigathaniꞌiki.
Akadimoni kamari ida anaabariki abosini.
Cristo haria akavaꞌijoaꞌiki hari.
Deus athi kapapirania hojaki hida athii:
“Deus jaharikia biarakhaki ida ijaꞌari
ava akasanakhamakia
ahorivanani abinini.”
Nihi ida athii.
Onivani fori hiꞌara ada Cristo hojaꞌina ava akasanakhamaki kania.
Bigathaniꞌiki ida akadihojai asohiriki abosini.
14 ꞌBoꞌdakari Deua biniꞌaha ada Abraão kohana:
—Hora ivakaijokaꞌavini mani ida judeus kaijaꞌari vihiriki-ra vaꞌora okajoamoravini hija bana — niha ada Deus.
Oniania abiniꞌaha ada Jesus Cristo judeus kaijaꞌari vihiriki vakadimoni hina jaboni,
vagathanija kaimoni ida Deus Abraão-ra vara niꞌaꞌboꞌdavini hiꞌiki.
Nini vani harivani afohahavi Cristo-ra avakaijokahi;
agahinahi jaboni Maꞌonahai Jahaki Deua biniꞌaꞌikia.
Deus kavaꞌiponahi aꞌboꞌdaki
15 Oigamina,
aꞌonira onavaꞌisohivini hiki bana hida arihojana.
Ijaꞌari viꞌbamiki vaabono vakanavaꞌisohikhamaꞌimidiavini hiki ida vanofiki.
Vanajirihi ida vakadivarani papira.
Papira athini anokhominia vanajiriki ida vaonina.
Vaonina-ra vanajirivini hiki kaaraja kaimoni hida vakadivarani,
vakajonijanaria kaimoni ida vakadivaꞌiponahi aꞌboꞌdaki vaabono vakanavaꞌisohikhamavini hiꞌiki.
Ni-ijaꞌari hoariha bikaabokaki ida vakadivarani bianahoarihavini.
16 Hari.
Mahi ꞌboꞌdakari Deua binamonahaꞌiki ida kidivaꞌiponahi aꞌboꞌdaki.
Abraão kohana,
kidihanodi hoarana avijavaronisiagaki khama vakadimoni ida Deus kavaꞌiponahi aꞌboꞌdaki.
Abraão kahanodi vavijavaronisiagaki afohahavi vakadimoni hirihi ida Deus kavaꞌiponahi aꞌboꞌdaki.
Hoarana vani ada Deua vara bivaniꞌaꞌara athi kapapirania.
Hiꞌada Abraão kahanodi avijavaronisiagaki hoarana onina Cristo.
17 Kodivarani hiki ida Deus kavaꞌiponahi aꞌboꞌdaki Deus Abraão-ra navaꞌisohiꞌboꞌdavini hiꞌiki.
Niha ada Deus:
—Abraão,
Deus ohina mani ida ira onavaꞌiponiꞌimariniravini hija bana.
Hari.
Radahaꞌiki ida badara îpohiki.
430 badara ipohini radahani Deus Moisé-ra noꞌaꞌaha vaꞌisohihi jirikia.
Ni-Deua bikavaꞌipahiniki ida kidivaꞌiponahi aꞌboꞌdaki,
ni-kidivaꞌisohihi jirikia bianahoarihaki ida kidivaꞌiponahi aꞌboꞌdaki Abraão kohana-ra niꞌaꞌboꞌdavini hiꞌiki.
18 Vaꞌisohihi jiriki-ra anaabavini abosini hirihi ida Deus haria noꞌavini hija.
Anaabavini abosini hija vaha;
ni-Deus haria honariaki vaha avakaijokavinia.
Deus Abraão-ra navaꞌiponiꞌavini mani ida binoꞌavini hiꞌia.
19 Aꞌonira onavaꞌisohivini hiki ida nahina kaimoni Deus vaꞌora honariavini vaꞌisohihi jiriki-ra vanaabavinia.
Deus vaꞌora navaꞌisohiꞌiki adani judeus kaijaꞌari vaꞌisohihi jirikia,
ijaꞌari avigaja kaimoni ida badani,
hojai,
varani hiki Deua bivajahariki,
avigaja kaimoni jaboni ida hojai asohiriki nahina hini.
Judeus kaijaꞌaria vavahojaki ida vaꞌisohihi jiriki Deus vaꞌora navaꞌisohiꞌboꞌdavini hiꞌiki.
Kaikahirina oadani ada Cristo,
hojaki ida vaꞌisohihi jiriki ijaꞌaria vanaababakhiaki kaimoni.
Cristo oniki ada Abraão kohana kahanodi avijavaronisiagaki hoarana.
Kidimoni ida Deus kavaꞌiponahi aꞌboꞌdaki.
Vaꞌisohihi jiriki-ra vavaꞌisohihivini kari Deus vaꞌora karonaꞌiki adani ibavi kaijaꞌarini Moisés kohana-ra vanavaꞌisohira kaimoni.
Ijaꞌari nasohiva abono ada Moisés.
Moisés imidia bikamithaki ida vaꞌisohihi kavaranihi,
binajiriꞌihi,
vaꞌora navaꞌisohiꞌaha adani judeus kaijaꞌari.
20 Hari.
Deus vaꞌiponahi aꞌboꞌdaki-ra vavaꞌisohihivini kari ni-Deua bikaronaki ada ibavi kaijaꞌarini.
Deus hoarana binavaꞌisohiꞌiki ada Abraão kidivaꞌiponahi aꞌboꞌdakia,
binakamaꞌdaꞌiki ida jaboni.
Deua binofiki ida Abraão-ra kajoamoravini,
oniani ida bikajoamoravini hiꞌia.
Isai akadavaꞌani fori hiki ida Deus kavaꞌisohihi jiriki
21 Hari.
Deua bivavaꞌisohihivini kari ida kidivaꞌisohihi jiriki,
ni-bikajonipaꞌitxiki ida kidivaꞌiponahi aꞌboꞌdaki.
Deua biogaki ida akaabokaravini kidivaꞌisohihi jiriki anaabavini.
Vaꞌisohihi jirikia ni-bikaabokaki ida ijaꞌari kamahi-ra nasohikaꞌoavini Deus viaha.
Bikaabokaja vaha;
binasohikaꞌoamanihi vaha,
oniani ida Deus haria kapoariravini hija,
ni-kidiania aajahamisiki.
22 Nimania hida athii Deus athi kapapirania hojaki:
Ijaꞌari hahavi Jahari kabadania vakabadanibakhiaki.
Ni-hojaki ida ijaꞌari hoarani hojai asohirikia kahojairiki.
Vaabono avakavaꞌijoavini-ra vakaabokaravini mani ida gathaki fori vaꞌora nihaja.
Vakhanina vani vahojahahavira adani.
Hari.
Oniaroa,
Deus Jesus Cristo-ra vavakaijokaꞌiki-ra vaꞌora noꞌavini hiki bana ida vaꞌora navaꞌiponiꞌboꞌdavini hiꞌiki.
Jesu-ra vakajariꞌdaravini mani ida Deus kavaꞌiponahi-ra vagathanivini hija bana.
23 Hari.
Kaikahirina oadani ada Cristo,
ni-Deua binanamithaꞌiaki kaho ida Cristo-ra vakaijokaki varani hini.
Oniaro kari Deus kavaꞌisohihi jirikia biakadavaꞌaki fori hiki ida ijaꞌari gathaki fori hiki.
24 Isai vaitxanava fori vihiki adani Cristo-ra avigaꞌiariki.
Isai akadavaꞌava abono fori hiki ida Deus kavaꞌisohihi jiriki,
bibananija kaimoni ida ijaꞌari Cristo kania.
Oniaroa,
Cristo-ra avakaijokaꞌavini vani Deus akadimahi-ra najahakaꞌoaꞌia.
25 Jesus Cristo-ra avakaijokaꞌavini mani ida vaꞌisohihi jiriki haria akadavaꞌavini-ra anofijanaravini hija.
26 Kidiania avaabononi gahinai avanihaꞌavini mani ida Deus kaisai aꞌonira nihaꞌia,
oniani ida Jesus Cristo kania haria anakaramisija.
27 Cristo kania avaabononi gahinai avanihavini vani avikanaꞌia.
Avikanaꞌini mani ida Cristo kania aꞌonira anakaramisiꞌia.
Cristo-ra avakaimahaki fori avihiꞌiki aꞌoni,
ovari fori avihija kaimoni.
28 Oniani ida Cristo kania haria nahojaja judeus kaijaꞌari judeus kaijaꞌari hiriki,
honai abono gathaki ijaꞌari gathariki,
makhira gamo arihiki.
Harivani hahavi hoarani fori arihiki hari Cristo kania aakaramisina.
29 Cristo kaijaꞌari avihihi,
oniani ida Abraão kohana kahanodi vanamitharonisiagaki aꞌonira nihaja.
Avagathaniki bana jaboni ida Deus kavaꞌiponahi aꞌboꞌdaki bivavaꞌisohihiꞌiki.