2 Onofiki mahi hahavi aꞌonira vakajoamoravini adani Deus akadiabiꞌi,

akadikaꞌdaꞌdi Jesus Cristo khama,

aꞌonira vanoꞌahaꞌoadahavini vaꞌi jahajahania.

3 Jakaho khai aniꞌava ida Deus jahana.

Akadikaꞌdaꞌdi Jesus Cristo kaDeus ada Deus,

kidiabiꞌi jaboni ada.

Jesus Cristo kania aakaramisina mani ida Deus haria kajoamoravini hija,

haria noꞌavini hija kidiꞌogahai danoki hahavi jahakia.

Deus kania khaki ida hahavi jahaki haria noꞌavini hiki,

oniani ida Deu-ra khai aniꞌavini hija.

4 Hahavi-ra namonahavini viahania Deus haria nagathogathoꞌiki hari,

Cristo kania aakaramisija kaimoni,

kidijaꞌari arihija kaimoni.

Deua binofiki ida ajahakaꞌoana-ra nokivini hojai jaharikia akahojaijanarina,

oniani ida haria nagathogathovini hija.

5 Deus haria nakaidivavini mani ida kidisai arihina-ra nofivini hija.

Jesus Cristo haria kajoamoravini mani ida Deus kaisai haria nihaja.

Nimania ida Deua bikavaꞌibodivaranijoraꞌiki binofiki akadimoni hini,

oniani ida Deus vaꞌi-ra khai niꞌaja.

6 Deu-ra aniꞌava:

—Deus,

ijahaki i akadimoni ihini.

Akadihojai jaharini kabaꞌi haria ikajoamoraꞌiki i,

haria ikapoariꞌiki i jaboni.

Ni-abosiki ida haria ikajoamoravini.

Inakaidivaki ada kadaisai Jesus.

Khai ira aniꞌavini hiki ida Jesu-ra ikaronavini haria akavaꞌijoara kaimoni.

Jahaꞌoamanija ida haria kajoamoravini — Deu-ra aniꞌava.

7 Cristo abiniꞌina vani ahovariꞌia ida amana,

gathaki fori arihijanaria kaimoni.

Nimania ida Deua binaꞌbiraꞌiki hojai asohirikia akabadanibakhiana,

ni-bikavaꞌihokijanaki.

Nimania ida Deus jahana arafiaki haria kajoamoraꞌiki.

8 Ni-akaabokaki ida Deu-ra anaabosivini haria kajoamoravinia.

Arafiaꞌoamanija ida kidiajoamorahi akadiania.

Deua biogahahaviki ida ogavahaki kaimoni.

Bada biniꞌaꞌiki ida bikavaꞌibodivaranihahaviki,

9 oniania Deus haria kanamonivini hiꞌihi ida kidivaꞌibodivarani ijaꞌaria avigaꞌiariki.

Deus abono-ra niꞌaꞌboꞌdaꞌaha:

—Cristo vania bada biniꞌaja bana ida kodivaꞌibodivarani — nihi ida Deus athi ijaꞌaria avigaꞌiariki kaho.

10 Deua binofiki ida kidiamonahi hahavi Cristo hoarana bivakaꞌdaꞌdivini,

Cristoa bianajahamisijahakiki ida hahavi nama hojaki,

araboa hojaki jaboni,

biakadavaꞌajahakija kaimoni.

Deus abono-ra navaꞌisohijoravini hiꞌiki ida mahi Cristoa biananokhomija kaimoni ida badani Deua binofiki.

11-12 Deua bikavaꞌibodivaranijoraki ida nahina binofiki namithaki kaimoni,

oniani ida binofivini kamahini nanamithani hija.

Hahavi kamaꞌdani kari Deus haria kavaꞌibodivaranijoraꞌiki hari.

Haria nagathogathoꞌaha kidijaꞌari kaꞌoa arihija kaimoni.

Haria nagathogathovini hiꞌiki Cristo kania aakaramisija kaimoni.

Nimania ida Deua binofiki akadimoni hini,

jahana danona khai aniꞌahahaꞌoadahara kaimoni.

Harimiroꞌa judeus kaijaꞌari arihiki,

anokhaꞌiki ada Cristo khana haria kajoamorara kaimoni.

13 Aꞌonivani jaboni judeus kaijaꞌari avihiriki,

avakamithaꞌiki ida varani jahaki,

Cristoa binofiki ida aꞌonira akavaꞌijoavini.

Avakamithahi ida Cristo varani hina,

avarigahi ida kaꞌoa hini,

avakajariꞌdarihi,

avaabononi gahinai avanihahi kidiania.

Cristo-ra avakajariꞌdaravini mani ida Deus Maꞌonahai Jahaki-ra karonavini hija avakadiania afohanana.

Deus kaijaꞌari avihini karajomini ada Maꞌonahai Jahaki avakadiania hojana.

Nimania ida Deua bivavaꞌisohihijoraꞌiki Maꞌonahai Jahaki-ra karonavini kidijaꞌari vakadimoni.

14 Aogaki ida Maꞌonahai Jahaki-ra agathaniꞌavini,

oniani ida Deus athi kaꞌoa hini-ra aogavini hija.

Haria noꞌavini hiki bana ida haria navaꞌiponijoravini hiꞌiki.

Haria noꞌaki bana ada mahi jahakaꞌoakia.

Ni-agathaki fori arihijanarihi,

oniani ida Deu-ra khai aniꞌavini-ra najahaja.

Jahaꞌoamanija ida Deus jahana,

vagana,

danona hiki.

15 Okamithaꞌiki ida vahoariha vara aꞌonira vavaniꞌabakhiavini.

Vakadivarani hiki ida Jesus Cristo-ra avavakaijokavini,

kidiania avaabononi gahinai avanihaꞌavini.

Vaꞌora avanakaidivaki adani arigamina hahavi Cristo kaniaja.

16 Varani avihini-ra okamithavini vani Deu-ra vara oniꞌabakhiaja:

—Deus,

jahaki ida vaꞌora ikajoamoravini adani kadaijaꞌari Éfeso sidajia vahojaki — onibakhiaꞌiki ho.

Mahi hahavi Deu-ra okanikhariabakhiaꞌiki ho avakadimoni.

17 Oniꞌaha:

—Deus,

ivani akadikaꞌdaꞌdi Jesus Cristo kaDeus i.

Ivani akadiabiꞌi i.

Arafiaki ida ijahani,

idanoni,

ivagani hiki.

Akadiabiꞌi,

onofiki ida arigamina vakadiania Maꞌonahai Jahaki-ra ikaronavini.

Deus,

onofiki ida Maꞌonahai Jahaki vaꞌora anigahivini bana kadaꞌogahaia.

Vaꞌora nanokiahivinihi jaboni ida ihojani niha ninini,

ira avigajahakira kaimoni.

18 Deus,

onofiki ida vakadivaꞌibodivarani inavagavini,

avigaja kaimoni ida nahina-ra vanaviahanokhavini kadania,

nahina kaimoni hini ida vaꞌora ibaranahavini hiki.

Jahaꞌoamanija ida nahina hahavi inaibavijahaꞌiki kadaijaꞌari hahavi vagahinana hiki kaimoni.

Onofiki ida avigavini.

19-20 Deus,

onofiki jaboni ida avigavini idanoni arafiaki hojani ira vakajariꞌdariki vakadiania,

vaꞌora kakodiaki kaimoni — nimania ida Deu-ra okanikhariabakhiavini hiki avakadimoni.

Cristo abinina naothinia Deus danona arafiaki vania bianahokiꞌara ada,

biavikasiꞌaha ada Cristo Deus pitana aniaja nama kaꞌdaꞌdi kaꞌoa hiꞌina kaimoni.

Nimania hida Deus danona akadiania hojaki haria kajoamoraki kaimoni.

21 Cristo vaꞌora vakaꞌdaꞌdiki adani ijaꞌari hahavi vanokiariki nama vahojaki.

Deus ibavi kaijaꞌarini vihiki adani vahoariha.

Jahari kaijaꞌari vihiki adani vahoariha.

Kaꞌdaꞌdi vihina kabaꞌi,

Cristo vaꞌora vakaꞌdaꞌdiki adani.

Vadanona kabaꞌi,

Cristo vaꞌora kaabokaki adani.

Ijaꞌari vanokiariki vahoariha-ra vaꞌora vahonariavini kabaꞌi,

Cristo vaꞌora honariafiahaki adani jaboni.

Cristo athi-ra vanaabahahaviki adani.

Joirina oadani ada Cristo,

ovari hoarana kaꞌdaꞌdi hiki ada.

Joina naothinia ovani oa ada kaꞌdaꞌdi hira.

Ni-hojaki ada kaꞌdaꞌdi hoariha Cristo fori hiki.

Jesus onina jahani vahoariha hahavi vaonina-ra aradakarahoki.

22 Deua bihonariaki ada Cristo kidiamonahi hahavi vakaꞌdaꞌdini hina,

athi vanaabara kaimoni.

Jesus Cristo kaijaꞌari arihina mani ida haria honariafiahavini hija jaboni.

Ovani ada akadikaꞌdaꞌdi hira.

23 Harivani Cristo abono hahavi niha nini arihiki hari.

Harivani Cristo abono hahavi-ra anahihaviki hari.

Cristo vania bana binahihavija ida kidiamonahi hahavi ibavi hahavia hojaki.