Ariabono aakodiakhamaꞌava
6
Oigamina,
avanokiki vahabini ida Jesus kaijaꞌaria bada biniꞌavini Deua bivajahariki badani.
Aꞌonivani Maꞌonahai Jahaki avavaꞌini-ra nahonariahihihahaꞌoadahaki aꞌoni,
vanavaꞌisohi bana vajaforia ida ijaꞌari mahija badani Deua bivajahariki-ra kavaꞌipahinivini.
Arigamina-ra avakaabanivini vani hariꞌa avavaꞌini bodinia avaabononi vavaboraboraha.
Avaabononi avakadavaꞌajahaki mahija Jahari kakaborohirohi-ra avanaabaravini jaboni.
2 Avaabononi vaakodiakhama bana.
Akhanina vani Cristo kavaꞌisohihi-ra anaabaja.
3 Ijaꞌari abononi niꞌaꞌimarinihi:
—Jahaki ida ijaꞌari navaꞌisohiva abono ohina.
Oogaki ida vahoariha-ra vaꞌora onavaꞌisohivini — abononi niꞌaꞌimarinihi.
Kaꞌoa hiki bivanihavini ida kidivaꞌibodivarani.
4 Aꞌonira onavaꞌisohiki bana aꞌoni.
Vakavaꞌibodivaraniꞌa afohanana bana ida avakadihojai,
avakadibadani,
avakadivarani hiki,
avarigaja kaimoni ida asohini asohirini,
jahani jaharini.
Jahani avakaragahi;
avaabononi khai vaniꞌa bana avakadihojaia.
Jaharini avakaragahi;
hariꞌa avaabononi khai vaniꞌa.
Hariꞌa vada vaniꞌa ida hoariha kahojai,
kidivarani,
kidibadani hiki mahija avaabononi avakavarajomikhamaravini,
avarigaja kaimoni ida hana hini jahani aradahaki.
5 Ijaꞌari oniani oa afohanana bikaibaꞌiki ida daini fori hiki kidihojai.
6 Avakadinahina jahaki pitahania vanoꞌa bana ida ijaꞌari aꞌonira kaꞌojomoꞌiki Jesus monina jahakia.
7 Ni-ijaꞌaria bikaabokaki ida Deu-ra korijanahavini.
Deua biogariki bivanihahi,
oniani oa abononi korijanahaja ida ijaꞌari.
Rakhajahi ꞌbaꞌdani fori hiki ida ijaꞌari kahojai.
Nahina kabaꞌbaꞌdahi-ra rakhaihi;
namithahi.
Hojai jahakia kabadanihi;
nahina jahaki namithaki kidiania.
Hojai jaharikia kabadanihi;
nahina jahariki namithahi kidiania.
8 Kidirakhajahi ꞌbaꞌdani fori hihi ida kidivaꞌinofinofi jahariki,
oniani ida Ibavi Jaharikaꞌoakia arakhani hija bana.
Kidirakhajahi abani fori hiki ida.
Hari.
Kidirakhajahi ꞌbaꞌdani fori hihi ida Maꞌonahai Jahakia bivajahaki,
oniani ida kidimahi jaꞌdini anokhomiriki-ra gathanivini hija.
Kidirakhajahi abani fori hiki ida.
9 Hariꞌa avakaitapia ida badani jahakia avakabadanini.
Rakhajahi ꞌbaꞌdani jahaki fori hiki ida hoariha-ra akajoamoravini.
Hojai jahaki-ra akavaꞌipahinirihi;
hojai jahaki abosini-ra agathanihi,
rakhajahi abani aꞌbaꞌdini fori hihi.
10 Jahaki ida ijaꞌari hahavi-ra aakodiavini.
Vaꞌora aakodiaꞌimidiava adani arigamina,
Jesus Cristo kaniaja.
Naothinia vaꞌora aakodiaki bana adani Jesu-ra avigariki jaboni.
Pauloa binaꞌdiahiꞌiki ida papira athini
11 Hovani onamonahaja ida papira jirini anokhomiꞌini.
Vada vaniꞌa hida jirini naꞌbahaki onamonahaꞌiki.
12 Hari.
Vara vaꞌora ovaniꞌaꞌianaki adani siikosida karajomihi-ra vanofiki.
Judeus kaijaꞌari avihirini kabaꞌi,
vanofiki ida aꞌonira vahonariavini siikosida karajomihia avakarajomini.
Vanofiki ida judeus kaijaꞌari vahoariha-ra vaꞌora vananokiahivini siikosida karajomihi-ra vakavaꞌipahiniravinia,
vaabono vavaboraborahara kaimoni.
Siikosida karajomihi-ra vakavaꞌipahinira vaha;
vahoariha vaꞌora vanajahariharimaniha vaha.
Vara vavaniꞌavini kabaꞌi ida Cristo monina ava akasanakhamakia abiniꞌina,
asia vanofiki ida Cristo-ra vavakaijokaki-ra vaꞌora vakarajomivini.
13 Vaꞌisohihi jiriki pitahani paꞌitxi ida siikosida karajomihi varani hini.
Siikosida rajomi-ra vanofivini kabaꞌi,
ni-vanaabahahaviki ida honari jiriki Deua bivavaꞌisohihiꞌboꞌdaꞌiki.
Vanofiki ida aꞌonira vakarajomivini vaabono vavaboraborahara kaimoni vahoariha vaviaha.
14 Hovani khai oniꞌaki ida akadikaꞌdaꞌdi Jesus Cristo abiniꞌina ava akasanakhamakia.
Cristo abiniꞌiki kodimoni,
oniani ida Jesu-ra avigariki vakadihojai-ra onofijanaravini hija.
Onofijanaravini mani ida Jesu-ra avigariki hora vanofijanaravini hija.
Kodimoni hini abaꞌoꞌiki fori hiki ida vakadihojai,
oniani ida abaꞌoki fori hora nihaja vakadimoni.
15 Ni-jahaki ni-jahariki ida makhira bivahojaravini siikosida karajomihi.
Ni-Deua vada biniꞌajanaki ida rajomi.
Ijaꞌari kamahi oavani ida vada biniꞌaꞌia.
Ijaꞌari kamahi jaꞌdini vani-ra nofira ada Deus.
16 Deu-ra oniꞌahi:
—Vaꞌora noꞌa afohaꞌoadaha vaꞌi jahajahania adani ijaꞌari vakadimahi ianajaꞌdiꞌiki.
Kadaijaꞌari hahavi-ra vaꞌora vaꞌadi bana — Deu-ra oniꞌaꞌiki ho.
17 Hariꞌa ovaꞌi-ra vakaiꞌdokajana rajomi kavaranihia.
Jesus kahonai abono ohina mani ida vahoariha hora vidavini hiꞌia.
Cristo kaijaꞌari ohina karajomini hida dafi ohina siini aihotani ibavini oasafi namania.
18 Onofiki ida Jesus Cristo aꞌonira kajoamoravini afohaꞌoadaha.
Akadikaꞌdaꞌdi ada Jesus.
Oigamina aꞌoni.
Hari ida vani oamani kodivarani anokhomiꞌini.
Paulo athi hida.