Vagathariha adani Jesus Cristo kaijaꞌari
5
Hari.
Cristo vani haria akavaꞌijoaꞌia,
oniani ida honai abono gathaki haria nihajanarija.
Kidiania ariabono gahinai anihavini mani ida haria kajoamoravini hiꞌia,
gathaki arihijanaria kaimoni.
Vaꞌisohihi jiriki-ra avanofiꞌianahi;
honai abono gathaki avihiꞌianaki bana aꞌoni.
Hariꞌa avaabononi vavaꞌaha agithiki fori avihini.
2 Mitha vaniꞌa hida oathi.
Hovani Paulo ooniki ho,
aꞌonira vara oniꞌaja.
Avanofiki ida siikosida karajomihi-ra avavahojavini;
ni-Cristoa bikaabokaki bana ida aꞌonira kajoamoravini,
ni-nahina kaimoni Cristo abiniꞌiki avakadimoni hina.
3 Okaabaniꞌianaki bana ada makhira hana hina siikosida karajomihi-ra nofiki.
Ni-siikosida karajomihi arajomaki Deus ijaꞌari-ra kapoarija kaimoni.
Deua bikapoariki bana ida ijaꞌari kidivaꞌisohihi jiriki hahavi naabani hiki.
Vaꞌisohihi hoarani-ra ragarihi;
ni-Deua biakariakaki,
ni-bikapoariki jaboni.
4 Aꞌonivani Deus kavaꞌisohihi jiriki-ra avanofiki,
mitha vaniꞌa.
Avakaijoꞌavini oadani ida vaꞌisohihi jiriki-ra avanaabavini,
Deus aꞌonira kapoarija kaimoni,
avaabononi avaravaꞌboaꞌiki fori avihiki aꞌoni Cristo kania.
Ni-Deus aꞌonira kajoamoraki.
5 Harivani aogaki ida vaꞌisohihi jiriki-ra anaabavini-ra akaabokaravini.
Anokhaki ida Deus haria kapoarivini kamahini.
Cristo kania ariabono gahinai anihaꞌavini mani ida Deus Maꞌonahana Jahaki danoki akadimahi-ra nasohikaꞌoavini-ra anokhavini hija.
6 Hari.
Cristo kania aakaramisina vani ni-makhaniki ida siikosida karajomihi-ra avahojavini avahojaravini.
Deua vada biniꞌaꞌiki ida akadimahi,
binofiki ida Jesu-ra avakaijokavini.
Binofiki jaboni ida vahoariha-ra vaꞌora anakaidivavini.
7 Kaꞌoa hiki hida Jesus Cristo monina jahaki aꞌonira onanamithavini hiꞌiki.
Avakamithabiininivini,
avanaabajahakiꞌiki ida.
Hoariha kavarani-ra avakamithavini mani ida moni jahaki asohiki-ra avakavaꞌipahinivini hiꞌia.
8 Nihaniki vania hoariha aꞌonira korijanahavini,
avakavaꞌipahinija ida moni jahaki asohiki?
Ni-Deus aꞌonira korijanaharihi.
Ovani ada aꞌonira kaboaꞌira kidiania avarikhaja kaimoni.
9 Nimania hida rajomi kavaranihi:
“Pão-ra kanathoramananiki paꞌitxia bikanathoramananiki ida pão kaimani hahavi.”
Vakhaniha adani ijaꞌari.
10 Aꞌonira okavaꞌibodivaranivini hiki ida asia Cristo-ra avanofivini.
Cristo kania aakaramisina mani ida oabono oniꞌavini hija:
—Oathi-ra vakamithavini mani bana ida varani asohiki-ra vanofiꞌianavini hija.
Vanofijanariki ida bana hoariha kakorijanahi — nimania ida aꞌonira okavaꞌibodivaranivini.
Ni-oogaki ada makhira hana hina avavaꞌini-ra kosakhamaki.
Oogaki ida Deua jaharikia biarakhavini bana.
11 Hari.
Oigamina,
makhira karajomina-ra ovahonariahija vaha;
ni-hora vanajaharihariki vaha adani siikosida karajomihi-ra vanofiki.
Siikosida karajomihi-ra okavaꞌipahinivini mani ida hora vanajahariharivini hija.
Cristo ava akasanakhamakia abiniꞌikia okavaraniꞌihi;
ni-vaꞌora onaihamahiꞌiki kodivarania.
12 Vaꞌora onofiki adani siikosida karajomihia avavaꞌini-ra vakosakhamaki vakananafa akaꞌboakaꞌoani vanivaha.
13 Aꞌonivani oigamina,
Deus aꞌonira kaboaꞌiꞌiki aꞌoni avaragithijanaria kaimoni.
Deus kavaꞌisohihi jiriki-ra avakavaꞌipahiniꞌavini kabaꞌi,
hariꞌa vavaꞌahajana bana ida avakadivaꞌinofinofi jahariki avavaꞌini-ra nahonariahihivini.
Hariꞌa bada vaniꞌajana ida hojai asohiriki avanofiꞌiki Jesu-ra avarigaravini kari.
Ijaꞌari-ra anakaidivava ariabono aakajoamorakhamava bana,
ariabono aakodiakhamava bana jaboni.
14 Nimania hida Deus athi:
“Iabononi inakaidivavini vani fori vaꞌora niha
vaꞌoani ijaꞌari hahavi.”
Hihida vaꞌisohihi hoarani-ra avanaabahi;
Deus kavaꞌisohihi hahavi oamani ida avanaabaja.
15 Tapoꞌija vaabono vakanakaidivakhamaravini mani ida vaabono vakaananikhamavini hija,
vaabono vakanihimakhamavini hija jaboni.
Avaabononi avakavaꞌigairi bana.
Tapoꞌija fori avihihi;
avaimani-ra avakanaꞌbanakhamahi;
avaabononi avakanihimakhamahi bana.
Ijaꞌari kahojai ꞌboꞌda varani hini
16 Hari.
Mitha vaniꞌajahaki bana hida oathi.
Vavaꞌaha bana ada Maꞌonahai Jahaki avavaꞌini-ra nahonariahihivini afohaꞌoadaha mahija hojai Deua bivajahaki-ra avavahojavini.
Hariꞌa vakavaꞌinofinofi bana ida badani asohiriki kaipahivahaki.
17 Avakadivaꞌinofinofi ajaꞌdirikia bikaimajahariki ida nahina Maꞌonahai Jahakia bivajahaki.
Maꞌonahai Jahakia bikaimajahariki ida nahina avakadivaꞌinofinofi ajaꞌdirikia bivajahaki.
Ni-vaabono vaakaimajahakhamaki adani Maꞌonahai Jahaki,
ijaꞌari kamahi ꞌboꞌda khama,
oniania Maꞌonahai Jahaki avavaꞌini-ra nahonariahihivini,
ni-avakaabokaki ida badani asohiriki avakadivaꞌinofinofia bivajahaki.
18 Maꞌonahai Jahaki aꞌonira bananihi;
avakadimoni hirihi ida Deus kavaꞌisohihi jiriki.
19 Aꞌonira onavaꞌisohivini hiki ida hojai ijaꞌari kamahi ajaꞌdirikia bikavaꞌinofinofibakhiaki.
Makhira biviꞌomaki ida hoariha kagamo.
Gamoa biviꞌomaki ada hoariha kamakhira.
Makhira kidigamo hiriki khama vaabono vakaviꞌomakhamaki.
Ijaꞌari vajaharina-ra avakanabadakhamaki badani karamonavahakia.
Ijaꞌari vakadihojai asohiriki kaipahivahaki.
20 Vakavaihinikaki ida deus amovana,
vakadideus kaimoni hini.
Ijaꞌaria bikaijorahaki ida hoariha.
Ijaꞌari abononi kanapohimajakhamavini-ra nofiki.
Ijaꞌari abononi akanaathidanoararikhamaki.
Ijaꞌaria bikaihamahiki ida hoariha.
Ijaꞌaria biakaraganahaki ida hoariha.
Oniani kaꞌoa abononi nakaidivaki,
ni-hoariha-ra nakaidivaki.
Ijaꞌari abononi kanahoarihakhamavini hiki abononi kakariakakhamaravini.
21 Biakabaiki ida hoariha kanahina.
Kakavinofiki.
Kahanona kabaꞌi arafiaki ida kidibadani asohiriki ihinika kania.
Binaabiniki ida hoariha.
Hojai asohiriki hoariha fori hikia kahojaiki ida ijaꞌari.
Nimania ida hojai ijaꞌari kamahi ajaꞌdirikia bikavaꞌinofinofibakhiavini arafiaki.
Aꞌonira okaabaniꞌianaki ho.
Jokoa Deua bikapoaririhi ida ijaꞌari nikia kahojaiki.
Kidijaꞌari vihirina mani ida kidiania vaꞌora arakharija.
Ni-vaꞌora vakaꞌdaꞌdiki ada Deus,
ni-vagahinaki bana Deus kanahina.
Ijaꞌari kahojai jaꞌdini varani hini
22 Hari.
Maꞌonahai Jahaki vania binamonahaja ida ijaꞌari kahojai jaꞌdini avijavani.
Ihiꞌai jahaki aꞌdihani fori hiki ida Maꞌonahai Jahaki kabadani avaꞌi bodinia avijavani.
Maꞌonahai Jahaki ijaꞌari vaꞌini-ra nahonariahihivini,
nimania hida ijaꞌari kahojai.
Ijaꞌaria binakaidivaki ida hoariha.
Khaii nijahakiki ida ijaꞌari.
Vaꞌini jahajahaꞌihi ida ijaꞌari.
Biakaihamahijorakiravini vani binokhahi ida hoariha.
Bivaꞌadiki ida hoariha.
Bikajoamoraki ida hoariha.
Ni-athini-ra anahoarihaki,
bada biniꞌaꞌoamanija ida biniꞌaꞌiki.
23 Ni-abononi vaboraborahaki.
Kaborohirohi hini kabaꞌi,
vaꞌini kaabanahahamanihi.
Nimania ida ijaꞌari kahojai jaꞌdini Deua bivajahaki.
Ni-nahina bikaabaniki ida ijaꞌari nikia kahojaiki.
Nimania jaboni ida vaꞌisohihi jiriki athini.
24 Jesus Cristo kaijaꞌaria vakavaꞌipahinikaꞌoaꞌiki ida vakadivaꞌinofinofi jahariki,
vakadimahi ajaꞌdiriki vavaꞌi binahonariahihijanaria kaimoni.
25 Maꞌonahai Jahaki haria noꞌaꞌiki hari akadimahi jaꞌdinia.
Ovaria bihonariabakhiaki ida jaboni akadimahi jaꞌdini.
26 Ni-jahaki ida ijaꞌari abononi vaboraborahavini.
Ni-jahaki ida hoariha-ra anaihamahivini.
Ni-jahaki ida ariabono akanaabakhamavini.