Ijaꞌari maꞌonahani ahokiꞌini varani hini hida
2
Hari.
Oniaroa,
mahi ꞌboꞌdakari Cristo-ra avarigaravini kari hojai asohirikia avakahojaibakhiaꞌiki aꞌoni.
Ni-avanaabaki ida Deus aꞌonira honariavini hiki,
oniani ida avamaꞌonahani-ra naabinija.
Hokini kabaꞌi ida ijaꞌari,
abaꞌoki fori hiki ida maꞌonahani.
Nimania ida ijaꞌari.
Ni-bikaabokaki ida Deus athi-ra naabavini.
2 Oniaro kari jahariꞌoamanija ida avakadihojai.
Ijaꞌari Deu-ra nofipaꞌitxiriki vakadihojai jaharini vani fori hija ida avakadihojai jaharini jaboni.
Avanaabaꞌiki jaboni ida Jahari athi.
Ovari vaꞌora vakaꞌdaꞌdiki adani kidijaꞌari vajahariki vanokiariki nama jararinia vahojaki.
Ovari vavaꞌi binahonariahihiki adani ijaꞌari Deus athi-ra vanaabariki araboja.
3 Cristo-ra aogaravini kari vaꞌoaniaro fori arihiꞌoamaniꞌia.
Bada aniꞌabakhiaꞌiki ida akadimahi ꞌboꞌda bikavaꞌinofinofiki.
Nahina hahavi avajahaki,
jaharini kabaꞌi,
bada aniꞌaki.
Nahina akavaꞌibodivaraniki,
jaharini kabaꞌi,
bada aniꞌaki jaboni.
Ijaꞌari hahavi vakadivaꞌinofinofi jaharini fori hiki jaboni ida akadivaꞌinofinofi jaharini mahi ꞌboꞌdakari.
Deua bikaihamahiki ida hojai asohiriki,
oniani ida jaharikia ijaꞌari hahavi-ra arakhavini hija bana.
Oniaro kari akadimoni jaboni ida Ibavi Jaharikaꞌoakia aokhana.
4 Hari.
Deus hojana hiki ida ijaꞌari-ra vaꞌadivini-ra nofivini,
ijaꞌari-ra nakaidivahaꞌoadahavini jaboni.
5 Deus athi-ra anaabaravini mani ida amaꞌonahana-ra naabinija.
Amaꞌonahana abaꞌoki fori hini oadani Deus haria vaꞌadihi,
bianahokiꞌihi ida amaꞌonahana.
Binakamaꞌdaꞌiki ida akadimahi jaꞌdini Cristo kania aakaramisiꞌina.
Deus vani haria kajoamoraꞌia.
Ni-avaabononi avarakavaꞌijoavini-ra avakaabokaki.
Deus vani aꞌonira akavaꞌijoaja.
6 Deus Cristo-ra anahokiꞌavini vani haria anahokiꞌara ada jaboni Jesus Cristo kania.
Kidiania aakaramisina mani ida kaꞌdaꞌdi haria nihaꞌia nama Cristo kania.
7 Nimania ida Deus kabadani jahaki akadiania,
ijaꞌari hahavi vanamithaꞌiarikia avigaja kaimoni ida Deus ijaꞌari-ra kajoamorajahakivini.
Ijaꞌaria bikavaꞌibodivaranihi ida Jesus Cristo haria nakaidivavini niha ninini,
biogamanihi ida karahoni Deus ijaꞌari-ra kajoamoravini jaboni.
8 Deua binofiki ida aꞌonira vaꞌadivini,
oniani ida aꞌonira akavaꞌijoavini hija.
Deu-ra avavakaijokaꞌavini mani ida aꞌonira akavaꞌijoavini hija.
Ni-avakadibadani jahaki abosini hirihi hida aꞌonira akavaꞌijoavini.
Deus oavani aꞌonira akavaꞌijoaꞌia.
9 Avakadibadani jahaki abosini hirihi ida aꞌonira akavaꞌijoavini Deus ibavia avarikhaja kaimoni.
Ni-asohiki ida ijaꞌari abononi vaboraborahavini kavaranihia abononi akavaꞌijoavini.
10 Deus vania binamonahaꞌia ida akadimahi jaꞌdini,
Cristo kania aakaramisija kaimoni,
arihokina oadani bada aniꞌaja kaimoni ida badani jahaki.
Deua binaibavijahajoraꞌiki ida badani jahaki hahavi akadimoni afohanana bada aniꞌaki kaimoni.
Cristo kania aakaramisiki hari
11 Aꞌonivani judeus kaijaꞌari avihiriki,
vara aꞌonira oniꞌaki bana ho.
Judeus kaijaꞌari aꞌonira vanaonivini ijaꞌari siikosida vakarajomiriki.
Deus kaijaꞌari avihirini-ra vakahibakhiaki adani.
Vaꞌoaniaro vaabono vaniꞌavini:
—Harivani aogaki ada Deus,
kidijaꞌari arihiki hari.
Avahojaki ida siikosida karajomihi aasafi namania — vakhaniki adani.
Aꞌonivani judeus kaijaꞌari avihiriki,
vakavaꞌihoki bana ida Cristo-ra avarigaravini kari avahojani niha ninini.
12 Mahi ꞌboꞌdakari ni-avarigaki ada Cristo.
Ni-Deus vaꞌora nagathogathoki adani judeus kaijaꞌari vihiriki,
kidijaꞌari vihira kaimoni,
oniani ida arabo hoariha kaijaꞌarini fori aꞌonira nihaja.
Mahi ꞌboꞌdakari Deus vaꞌora navaꞌisohiꞌiki adani judeus kaijaꞌari kidivaꞌiponahi aꞌboꞌdakia,
vaꞌora navaꞌiponiꞌboꞌdavini hiꞌiki jaboni ida vaꞌora kajoamorabakhiavini.
Aꞌonivani judeus kaijaꞌari avihiriki,
avakadimoni hirihi hida Deus kavaꞌiponahi aꞌboꞌdaki.
Ni-nahina Deus aꞌonira navaꞌiponiꞌboꞌdarihi.
Ni-avanokhaki ida nahina jahaki Deus aꞌonira noꞌavini kaimoni avahokini oadani,
avaabinini naothinia jaboni.
Ni-avarigaki ada Deus hojana hojarina.
Nimania ida avakadimahi Cristo-ra avarigaravini kari.
13 ꞌBoꞌdakari Deus napaja nina avahojaꞌiki fori avihiki aꞌoni.
Hari maha.
Cristo kania avarakaramisiꞌiki aꞌoni.
Ava akasanakhamakia Cristo amana ahovariꞌiki.
Abiniꞌina avakadimoni,
oniani ida Deus kania aꞌonira namaakariꞌia.
14 Judeus kaijaꞌari,
judeus kaijaꞌari vihiriki vakadihamahia vaabono vakatokifiaki fori vihiki adani,
oniani ida vaabono vakanahoarihakhamavini hija.
Cristo abiniꞌina vani binathararaja ida toki fori hiki,
oniani ida vaabono avaakakariakakhamavini hija.
Cristo vani haria anariakaꞌia judeus kaijaꞌari,
judeus kaijaꞌari vihiriki khama vaabono vakaihamahikhamajanarara kaimoni.
Cristo vani nação hoarani vaꞌora nihara adani judeus kaijaꞌari,
judeus kaijaꞌari vihiriki khama.
15 Cristo vania binihimaꞌia ida Deus kavaꞌisohihi jiriki Moisé-ra noꞌaꞌboꞌdavini hiꞌiki.
Cristoa binihimaꞌiki ida honari ꞌboꞌda,
kaaji hiki vanaababakhiaꞌiki,
binamonahaja kaimoni ida nação hoarani jaꞌdini,
nações ꞌbamiki vihijanarara kaimoni adani judeus kaijaꞌari,
judeus kaijaꞌari vihiriki.
Cristo igamina adani kidijaꞌari,
kidiania avaajahamisiꞌiki adani,
oniani ida vaabono vakanofikhamajahakivini hija.
16 Ava akasanakhamakia abiniꞌiki ada Cristo,
binihimaꞌiki ida vaabono vakaimajahakhamaravini.
Ava akasanakhamaki kania Cristo vaꞌora akanariakakhamaꞌaha adani judeus kaijaꞌari,
judeus kaijaꞌari vihiriki abonoi hoarani fori vihiꞌara kaimoni,
Cristo vaꞌora avajoiꞌiki adani Deus kania,
avaajahamisira kaimoni.
17 Hari.
Khaꞌaha ada Cristo ijaꞌari vakadiania vaꞌora kanamonira kaimoni monina jahakia,
judeus kaijaꞌari,
judeus kaijaꞌari vihiriki vaabono avaakakariakakhamara kaimoni.
Judeus kaijaꞌari avihiriki,
ꞌboꞌdakari Deus kania napaja avahojaki fori avihiꞌiki aꞌoni,
avakadimoni hida Cristo monina jahaki.
Judeus kaijaꞌari aꞌoni,
kidiania maakarina avahojaki fori avihiꞌiki aꞌoni,
avakadimoni jaboni hida Cristo monina jahaki.
18 Cristo vaꞌora akavaꞌijoaꞌiki adani nofina vihiki.
Harivani afohahavi judeus kaijaꞌari arihina,
judeus kaijaꞌari arihirina,
oniani ida Maꞌonahai Jahaki akadiabiꞌi-ra anamaakarivinia haria kakodiavini hija,
vara akhanija kaimoni akadiabiꞌi nama hojaki khama.
19 Aꞌonivani judeus kaijaꞌari avihiriki aꞌoni,
ni-arabo hoariha kaijaꞌarini fori avihijanarihi,
ni-ijaꞌari vaꞌora aogariki haria vanavanavanahaki fori avihijanarihi.
Deus kaijaꞌari arigamina aꞌoni,
Deus kaisai avihiki aꞌoni,
hari fori avihiki aꞌoni.
20 Jaꞌdi kagorahi fori avihiki aꞌoni.
Nami khorahaki bodinia gora naboꞌania hojaki ida jaꞌdi naꞌbahaki gora dadani kaimoni.
Jesus Cristo varani hina-ra avavaadahaoniki,
Deus athi namoniva abono khama jaꞌdi naꞌbahaki fori vihiki adani.
Aꞌonivani jaꞌdi pitahani fori avihiki aꞌoni.
Vanamana avahojaki aꞌoni.
Jesus Cristo jaꞌdi karaho naibavivahani sohiki fori hiki ada.
21 Cristo vania bianajahamisihahaviki fori hiki ida jaꞌdi pitahani,
gora kaaraki kaimoni.
Harivani jaꞌdi pitahani Cristoa bianaroisiki fori arihiki hari.
Deus kaimoni hida gora.
Nimania hida Deus haria kavarajomivini.
22 Aꞌonivani judeus kaijaꞌari avihiriki,
harivani judeus kaijaꞌari arihiki khama gora hoarani fori arihiki hari.
Cristoa binaibaviki fori hiki ida jaꞌdi pitahani hahavi ibavinia gora amonahani kaimoni.
Jesus haria najoronimisihahaviki hari.
Deus Maꞌonahana Jahaki ibavina kaimoni ida gora.
Akadiania hojaki ada Maꞌonahai Jahaki.