Bada niki ada Paulo judeus kaijaꞌari vihiriki vakadiania
3
Hari.
Deus vaꞌora najoronimisihahaviki fori vihiki adani judeus kaijaꞌari,
judeus kaijaꞌari vihiriki,
oniani ida Deu-ra okanikhariabakhiavini hija avakadimoni.
Judeus kaijaꞌari vihiriki-ra vara vaꞌora oniꞌavini hiki ida Cristo monina jahaki.
Cadeia hora avibaivini hiki ida Jesus Cristo kabadani abono ohina.
2 Oogaki ida varani ohina-ra avakamithaꞌavini.
Deus hora kajoamorajahakivini mani ida kidibadania hora noꞌavini hija.
Kodibadani hiki judeus kaijaꞌari vihiriki vakadiania athi oavaadahaonivini aꞌonira kajoamoraja kaimoni.
3 Deus vani hora nanamithavini hiꞌia ida kidivaꞌibodivarani,
oogaja kaimoni ida badani namithaꞌiariki Deua bada biniꞌaki kaimoni.
Ijaꞌari vahoariha ni-avigaki ida varani Deus hora navaꞌisohijoravini hiꞌiki.
Onajiriꞌiki hida Deus hora navaꞌisohivini hiꞌiki varani paꞌitxi.
4 Mitha avaniꞌajahakihi ida hihida papira onajiriꞌiki athini;
avarigahi ida Deus kavaꞌibodivarani ahojaki nahina hini hora nanamithajoravini hiꞌiki.
5 Mahi ꞌboꞌdakari ni-Deus ijaꞌari-ra kanamonijoravini hiki ida kidivaꞌibodivarani ahojaki bada biniꞌaki kaimoni.
Athi avavaadahaoniva abono,
athi namoniva abono vihiki vani adani Deus Maꞌonahana Jahaki vaꞌora kanamonivini hiꞌia.
Vaꞌoaniaro Deus vaꞌora aniꞌiki adani kidibadani abono vihira kaimoni.
6 Deus kavaꞌibodivarani ahojaki hida Cristo monina jahaki.
Judeus kaijaꞌari vihirikia vakajariꞌdarihi ida Cristo monina,
vagahinaha jaboni Deua bivavaꞌisohihijoraꞌikia.
Judeus kaijaꞌari vakadimoni jaboni ida.
Cristo abono niha nini hahavi adani jaboni.
Vagahinaꞌbamakhamaki bana adani nahina hahavi Deus vaꞌora navaꞌiponijoravini hiꞌikia.
Jesus Cristo vania bada biniꞌaꞌia ida Deua bivavaꞌisohihijoraꞌiki.
7 Jesus Cristo kabadani abono ho.
Kodibadani hiki ida monina jahaki oanamonionivini.
Deus hora honariavini hiꞌiki hida badani,
oniani ida hora kajoamoravini hija,
hora noꞌavini hija jaboni danona okaabokaja kaimoni ida kidibadani.
8 Cristo-ra oogaravini kari kidijaꞌari vaꞌora onajaharihariꞌiki ho,
oniani ida nahina ohirina-ra okahivini hija.
Deus kaijaꞌari vahoariha fori ohirihi.
Kabaꞌi,
jahaki ada Deus kodimoni hina.
Hora noꞌaꞌiki hada hihida badania,
judeus kaijaꞌari vihiriki-ra vaꞌora oakanamonionivini Cristo varani hina,
avigaja kaimoni ida Cristo jahana arafiaki.
9 Kodibadani jaboni ida ijaꞌari-ra onavaꞌisohivini Deus kavaꞌibodivarani ahojaꞌiki niha ninini bada biniꞌavini.
Deus ovani kaꞌoa hahavi-ra namonahaꞌiki.
Badara ipohiki bianahojaꞌiki ida kidivaꞌibodivarani bada biniꞌaꞌiariki.
10 Ni-ijaꞌari,
ni-Deus ibavi kaijaꞌarini vadanoki,
ni-kaꞌdaꞌdi vahoariha vanokiariki nama vahojaki vihikia avigaꞌiaki ida Deus kavaꞌibodivarani ahojaki.
Ni-Deus vaꞌora nanamithavini hiki ida kidivaꞌibodivarani ahojaki.
Jesus Cristo kaijaꞌari vani adani Deus vaꞌora nanamithaꞌara.
Jesus Cristo kaijaꞌari vaꞌora vananokiahiki adani ijaꞌari vanokiariki nama vakadihojai jahakia,
oniani ida Deus aagahai danoki niha ninini ijaꞌari vanokiarikia avigavini hiꞌia.
Kahoariharihakhamaki ida Deus aagahai nokiani jahaki ipohiki.
11 Hahavi amonahani viahania Deus abono-ra navaꞌibodivaranijoravini hiꞌiki ida badani jahaki akadikaꞌdaꞌdi Jesus Cristoa bada biniꞌaki kaimoni,
oniani ida Deua binofiki-ra bada niꞌavini hiꞌia.
12 Cristo-ra avakaijokavini mani ida Deu-ra anamaakarivini-ra akaabokavini hija.
Cristo kania aajahamisina mani ida Deu-ra anamaakarivini-ra afiniravini hija.
Aogaki ida haria gathanivini.
13 Hari.
Jaharikia hora avarakhavini kabaꞌi adani Cristo-ra vavajahariki,
hariꞌa Cristo-ra vakavaꞌipahini avavaꞌini khaii nirini.
Jahaki ida avakavaꞌibodivaranivini:
—Pauloa ni-bivamakhaniki ida imana ꞌbanani akadimoni hina,
akamithaja kaimoni ida Cristo monina.
Cristo ijaꞌari-ra nakaidivaki
14 Hari.
Okavaꞌibodivaraniki ida akadiabiꞌi nama hojakia bada biniꞌaꞌiki badani akadimoni,
oniani hida viaha hora nakajoꞌathararija,
vara oniꞌara kaimoni.
15 Ovania binakamaꞌdaja ida ijaꞌari hahavi nama hojaki,
araboa hojaki hiki jaboni,
oniani ida akadiabiꞌi nihana hija.
16 Deu-ra vara oniꞌaki ho avakadimoni:
—Deus,
ivani kaꞌoa idanoki i,
ijahaki i,
ikaabokaki ida hahavi inofiki.
Vaꞌora noꞌa bana adani kadaijaꞌari Éfeso sidajia vahojaki idanonia vavaꞌi bodinia.
Onofiki ada Maꞌonahai Jahaki vakadiania ibavina vavaꞌi bodinia,
danoja kaimoni ida ira vavakaijokavini.
17 Onofiki ida Cristo hojahahaꞌoadahana vakaijokana vihiki vavaꞌi bodinia.
Hari.
Abihiaki ida gora avani khorahani;
kaaraki ida gora.
Onivani fori hija ida vavaꞌi bodini vara nini kaarani onofivini,
vaabono vakanakaidivakhamara kaimoni,
ira vanakaidivara kaimoni jaboni — nimania ida Deu-ra okanikhariavini athini avakadimoni.
18 Onofiki ada Cristo hojana avavaꞌini bodinia,
avarigaja kaimoni ida nihafori hini ahapini Cristo aꞌonira nakaidivavini.
Onofiki ida Cristo aꞌonira nakaidivavini-ra avarigajabanavini afojahaki Deus kaijaꞌari hahavi khama.
Karahoni arafiaki ida haria nakaidivavini.
Ni-akaabokaki ida haria nakaidivavini niha fori hini ahapini aogavini.
Rajomavahariki ida haria nakaidivavini rabodini,
oadani,
namahini,
bihiani hiki.
Ni-akaabokaki ida Cristo haria nakaidivavini ahapini-ra akavaꞌibodivaranivini.
19 Avarigahahaviravini kabaꞌi,
onofiki ida aꞌonivani oa avarigajahakivini,
oniani ida Deus kahojai hahavi-ra avakadiania nahojaja.
20 Khai aniꞌava ada Deus.
Ovaria bikaabokaki ida nahina binofiki.
Deus danona akadiania hojani mani ida akanikhariavini hikia haria noꞌavini-ra anarafiaja.
Aradahaki ida akavaꞌibodivaranikia haria noꞌavini jaboni.
21 Jahaki ida harivani hahavi Deus jahana-ra khai aniꞌavini.
Jesus Cristo kania aajahamisina mani ida Deus jahana,
danona,
vagana hiki-ra khai aniꞌavini-ra najahaja.
Ni-anokhomiki hida mahi Cristo kaijaꞌari avikhananavaki,
vaabiniꞌiariki,
vanamitharonisiagaki vihiki Deus jahana-ra khai vaniꞌahahaꞌoadahavini.
Nimania hida Deua binofiki.