2 Avavaꞌini joko inirini vani hoariha kavaꞌisohihi-ra vakapoari bana.

Athii forakia vahoariha-ra vara vaniꞌa bana.

Ijaꞌari-ra vaꞌora avakaabanihi;

vajaforia vaꞌora vanavaꞌisohi bana.

Vaꞌora vanakaidivajahaki bana adani ijaꞌari vahoariha,

vakadihojai avarakaitapiajorakiravini.

3 Maꞌonahai Jahaki aꞌonira akanakaramisikhamaki aꞌoni,

ijaꞌari hoarani fori avihija kaimoni.

Avaabononi vanadano bana mahija avaabononi avakanakaramisikhamahaꞌoadahavini.

4 Cristo abono niha nini hahavi arihiki hari.

Hoarani ida abono.

Hoarana ada Maꞌonahai Jahaki akadiania hojananaki.

Hoarani ida nahina anokhahahaꞌoadahaki Deus haria kaibavijahahivini hiki,

oniani ida Deus haria kaboaꞌivini hija agathanija kaimoni.

5 Hoarana ada akadikaꞌdaꞌdi Jesus Cristo,

kidiania ariabono gahinai anihavini hiki haria akavaꞌijoahananara kaimoni.

Hoarani ida kanai karajomihi Cristo kaijaꞌari arihija kaimoni.

6 Hojaki ada Deus hoarana,

kidijaꞌari hahavi vakadiabiꞌi ada.

Bivakaꞌdaꞌdiki ida hahavi hojaki.

Bada biniꞌaki ida kidibadani kidiamonahi hahavi kania.

Ibavi hahavia hojaki ada Deus.

7 Harivani agathaniꞌiki ida Cristo aagahai danoki paꞌitxi hoarahanana biravinaꞌiki.

Badani hana hini-ra bada aniꞌavini-ra nofiha;

biravinahi ida danona pitahani itxani hoarahanana,

akaabokaja kaimoni ida badani binofiki,

8 oniani ida Deus athi kapapirania athii haria navaꞌisohijoravini hija:

9 Aꞌonira onavaꞌisohivini hiki hida varani “okasiꞌiki ada ovari”.

Arabo vania ogariꞌimidiara ada ovari.

Arabo naboꞌania ogariꞌaha kaꞌdamahaꞌina.

10 Hiꞌo ogariꞌiki okasiꞌiki jaboni.

Ibavi hahavi namanija okasioniꞌiki ada.

Deus kania okasiꞌiki ada,

bivakaꞌdaꞌdija kaimoni ida nahina hahavi ibavi hahavia hojaki.

11 Ovari Cristoa “bikaronarariki ida kidiꞌogahai danoki ipohiki kidijaꞌari vakadiania.”

Ovari vaꞌora aaniꞌaha adani kidijaꞌari vaipohiriki,

vaꞌora noꞌaꞌaha jaboni kidiꞌogahai danokia,

vakaabokaja kaimoni hida monina avavaadahaonivini.

Cristo vaꞌora aaniꞌiki adani kidijaꞌari vahoariha,

vaꞌora noꞌavini hiꞌiki ida kidiꞌogahai hoariha danoki jaboni,

vakaabokaja kaimoni hida Deus athi-ra vanamonivini.

Cristo vaꞌora aaniꞌiki adani kidijaꞌari vahoariha vaꞌora noꞌaꞌiki jaboni adani ogahai hoariha danokia,

vara vaꞌora vaniꞌara kaimoni adani Cristo-ra avigaꞌiariki,

vanofija kaimoni ida vaabono gahinai vanihavini kidiania.

Cristo vaꞌora aaniꞌiki adani kidijaꞌari vahoariha,

vaꞌora noꞌaꞌiki jaboni adani ogahai hoariha danokia,

vaꞌora akadavaꞌara kaimoni adani kidijaꞌari.

Vaꞌora noꞌavini hiꞌiki jaboni adani kidijaꞌari vahoariha kidiꞌogahai hoariha danokia Jesus kaijaꞌari kaꞌojomoꞌiva abono vihira kaimoni.

12 Vaꞌora noꞌahahaviki adani kidijaꞌari kidiꞌogahai danoki hoarahanana,

vakaabokaja kaimoni ida badani Cristo vaꞌora honariafiahavini hiꞌiki afohanana.

Nimania ida Cristo abono niha nini hahavi avijavani.

13 Ariabono aakodiakhamavini mani ida ijaꞌari hoarani fori haria nihaja.

Cristo kania aakaramisijabanaki bana hari ajariꞌdarina,

aogajabanahahaviki jaboni ida Deus kaisai danona akadiania.

Ajariꞌdarina avijavani aꞌdiahini kamahini,

ijaꞌari kidiavijava akhanomiki fori arihiki bana hari.

Cristo kahojai jahakia akahojairina oadani,

ni-aꞌdiahiki kaho ida ajariꞌdarina avijavani.

Deua binofiki ida akadiavijava akhanomini,

Cristo kavijava akhanomini fori hini.

14 Akhanina vani isai fori arihijanarija.

Isaia bikamithahi ida korijanahi athini,

ni-bikajariꞌdaki,

ni-bikavaꞌibodivaraniki kaꞌoa hini kaꞌoa hirini.

Ni-Deua binofiki ida isai kavaꞌibodivarani fori arihina.

Hari.

Korijanahi abonoa vanofiki ida vahoariha-ra vakaborovini Deus kahagihi-ra varagarira kaimoni.

Ahofiahi fori hiki ida vakadikorijanahi athini.

Ijaꞌaria bikajariꞌdarihi ida vakadiꞌojomoꞌihi kavaranihi asohiriki,

kanava sirisirikia biakarojafianakhamaki fori hihi.

Kanava komini kanaꞌbahakia bikosonasonafariki fori hihi jaboni.

15 Ni-nini jahaki ida arihojana afojana.

Jahaki ida ariabono akanakaidivakhamavini varani kaꞌoa hinia akavaranina.

Nimania hida arihojana.

Ariavijavahi;

ijaꞌari kidiavijava akhanomiki fori arihihi,

akadikaꞌdaꞌdi Cristo fori arihija kaimoni.

16 Hari.

Haria okavarajomiki bana hari ijaꞌari abononia.

Akaꞌdaꞌdi vania binagiragiraja ida ariabono hahavi niha nini.

Ariabohana vania bianakaraja hida ajarona,

arimana hiki.

Ariabono,

ajarona akarahani hahavi jahahi;

giragirajahakihi ida ijaꞌari.

Jaroni hahavi jahahi;

abononi,

jaroni hiki hahavi avijavahi.

Harivani Cristo abono,

jarona hahavi niha nini arihiki hari.

Akadikaꞌdaꞌdi ada ovari,

avaꞌi-ra nahonariahihiki ada.

Cristo haria najoronimisiki fori arihiki hari,

aasohimisija kaimoni.

Ariabono aakodiakhamahahavihi;

danohi ida Cristo abono niha nini hahavi.

Ariabono akanakaidivakhamahahavihi;

avijavahi ida Cristo abono hahavi.

17 Hari.

Vara aꞌonira oniꞌavini hiki bana ida varani akadikaꞌdaꞌdi hora honariavini hiꞌiki.

Hariꞌa Deu-ra vanofiriki vakadihojaia vakahojai bana.

Ni-nahina jahaki kaimoni hirihi ida vakadivaꞌibodivarani.

18 Bakibakinia adahai fori hiki ida vakadivaꞌibodivarani.

Ni-vanofipaꞌitxiki ida Deus athi nahina hini-ra avigavini.

Ni-vakapoaripaꞌitxiki ida mahi jaꞌdini Deus ijaꞌari-ra noꞌavini hiki.

Avigahariki adani.

Morobohariki fori vihiki jaboni adani.

19 Vakadihojai jahariki ni-vavaꞌi anaipahihipaꞌitxijanani hiki.

Imai sadoni kodo inini fori hiki ida vavaꞌi bodini vara nini.

Vaabono vakavaꞌahakhamavini gamo makhira vihiki vajaharina-ra avakanabadakhamavini.

Bada vaniꞌabakhiaki ida hojai asohiriki kaipahivahaki.

Ni-vavaꞌi kaabanahahapaꞌitxiki,

khai vaniꞌaki ida vakadihojai jahariki.

20 Hari.

Cristo kahojai hirihi ida vakadihojai hiki.

Ni-niki ida avakaꞌojomoꞌiꞌiki Cristo kahojai.

21 Oogaki ida Cristo varani hina-ra avakamithaꞌavini.

Jesus kania avarajahamisini mani ida Jesus varani hina asohiki-ra avakaꞌojomoꞌivini hiꞌia.

22 Hari oniania,

vakavaꞌipahinikaꞌoaꞌa ida avakadimahi ꞌboꞌda ajaꞌdiriki mahija avakadihojai asohirikia avakahojaijanaravini.

Avakadivaꞌinofinofi jahariki aꞌonira kaboroborobakhiaꞌiki aꞌoni.

Nahina jahariki-ra avakavaꞌibodivaranihi;

vajaforia avakadimahi-ra najaharihi.

23 Vavaꞌaha bana ada Cristo avakadimahi-ra anajaꞌdihaꞌoadahavini.

Bianajaꞌdiki ida avakadivaꞌibodivarani jaboni.

24 Avakadihojai jaꞌdinia vakahojaihaꞌoadahaꞌa bana.

Deua binamonahaꞌiki ida avakadimahi jaꞌdini,

kidimahi jahaki fori hija kaimoni.

Deus kahojaia avakahojaihi;

avananokiahi ida Deus kamahi jahaki asohiki kaꞌoa hiki.

25 Hari.

Hariꞌa korijanahia vakavaranijana bana.

Vara vaꞌora vaniꞌa bana adani avaigamini Jesus kaniaja varani kaꞌoa hinia.

Cristo abono niha nini hahavi afohanana avihiki aꞌoni.

26 Hoariha-ra avakaihamahihi;

hariꞌa hojai asohirikia vakahojaiꞌa bana.

Hariꞌa mahi oadani avavaꞌini jokojokova bana.

Avavadini viahania vanasohi bana ida nahina aꞌonira naihamahiki.

27 Hariꞌa vakavaꞌihokihaꞌoadaha bana mahija Jahari aꞌonira kaborovini-ra avanaabaravini.

28 Onavaꞌisohiki bana ida ijaꞌari kaboꞌdinofiki,

kidihojai-ra kavaꞌipahinikaꞌoaja kaimoni.

Hariꞌa boꞌdiajana.

Jahaki ida kaboꞌdinofiki kidibadani kaꞌoa abosinia abononi kaijahitavini,

binakarahohi jaboni ida kidibadani,

vaꞌora kajoamorara kaimoni adani vakanahinariki kidibadani abosini ahabarinia.

29 Hariꞌa athii ijaꞌari-ra najaharikia vaathijanava.

Vara vavaniꞌa ida athii jahaki,

vahoariha-ra vaꞌora avakakodiaja kaimoni,

athii vavaꞌi najahajahani hiki,

avijavaja kaimoni ida Deu-ra vavakaijokavini.

Vaꞌora vakajoamora adani vahoariha avakadivarania.

30 Athii jahariki-ra vara avavaniꞌahi;

Deus Maꞌonahana Jahaki-ra avaranavaꞌirogonihi.

Hariꞌa nikia vakavarani.

Deua binaibavihananaki ada Maꞌonahai Jahaki avavaꞌini bodinia,

kidijaꞌari avihini karajomini kaimoni.

Hojaha ada Maꞌonahai Jahaki avavaꞌini bodinia;

avarigahi ida Deus avakadimahi-ra najahakaꞌoavini bana.

Khaki bana ida mahi Deus aꞌonira akavaꞌijoavini kamahini bana,

gathaki fori avihijanaria kaimoni.

31 Vakavaꞌipahinikaꞌoa bana ida vaꞌi bodini joko inini,

ihamahi jaboni mahija vahoariha-ra vaꞌora avarakariakakaꞌoaꞌavini.

Vakavaꞌipahinikaꞌoa bana jaboni hida vahoariha-ra avakaimajaharavini.

Hariꞌa avakamadiani vabodiꞌbaraꞌbara bana.

Hariꞌa hoariha-ra onii jaharikia vanoꞌajana.

Hariꞌa hoariha-ra avanajahariharivini-ra vanofijana bana.

Nimania ida hojai jahariki avakavaꞌipahinikaꞌoaki kaimoni.

32 Aꞌonira onavaꞌisohivini hiki bana ida hojai jahaki Deua binofiki.

Vakajoamorajahaki bana ida hoariha.

Athii forakia vakavaraniꞌa bana vahoariha vakadiania.

Avaabononi avakakariakakhamaꞌa bana mahija hoariha kabadani avavajahariki-ra avakavaꞌihokijanaravini.

Abiniꞌiki ada Cristo avakadimoni hina,

Deus aꞌonira akariakaja kaimoni,

bikavaꞌihokijanaria kaimoni jaboni ida avakadihojai asohiriki.