Deus kaijaꞌari hahavi Filipos sidajia avahojaki,

Jesus Cristo kania avarajahamisiki avakadimoni hida oathi kapapirani.

Cristo kaijaꞌari navaꞌisohiva abono,

Cristo kaijaꞌari vakadikakodiahi abono vihiki khama avakadimoni jaboni hida papira athini.

2 Onofiki mahi hahavi aꞌonira vakajoamoravini adani Deus akadiabiꞌi,

akadikaꞌdaꞌdi Jesus Cristo khama,

aꞌonira vanoꞌahaꞌoadahavini vaꞌi jahajahania.

3 Aꞌonira okavaꞌibodivaranibakhiavini vani Deu-ra oniꞌabakhiaja:

—Jahaki ida kadaijaꞌari Filipos sidajia vahojaki-ra vaꞌora ikajoamorabakhiavini — onibakhiaki ho.

4 Deu-ra vara oniꞌavini hiki avakadimoni hahavi,

khai oniꞌiki ho.

5 Filipos sidajia ookhabiininina vani hora avakakodiahaꞌoadahavini hija ida Jesus monina-ra oanamonionivini kabadanihi,

asia hora avakakodiaki aꞌoni,

oniani ida Deu-ra khai oniꞌabakhiavini hija.

6 Deua binakamaꞌdaꞌiki ida kidibadani jahaki avavaꞌini bodinia.

Oogaki ida,

aꞌdiahirini oadani,

Deus bada nihahaꞌoadahana.

Jesus Cristo joina kamahini vani binaꞌdiahija bana ida kidibadani jahaki avakadiania.

7 Aꞌonira onofijahakihaꞌoadahaki ho.

Kodibadani-ra avakakodiabakhiavini mani ida aꞌonira onofijahakivini-ra anasohija.

Deus hora kajoamoravini mani ida kidibadania hora noꞌavini hija,

monina oanamonionira kaimoni.

Cadeia ohojarina oadani,

vaꞌora onavaꞌisohijahakiꞌiki adani vajariꞌdaki,

avigaja kaimoni ida Cristo monina kaꞌoa hini.

Vaꞌora onavaꞌisohijahakiꞌiki adani vajariꞌdariki,

danoja kaimoni ida vavaꞌi bodini vara nini.

Cadeia ohojarina oadani,

hora avakakodiaꞌiki aꞌoni,

hora avakajoamoraki aꞌoni jaboni.

Cadeia ohojaꞌina kabaꞌi asia hora avakakodiaki aꞌoni,

hora avakajoamoraki aꞌoni.

8 Deua biogaki hida varani kaꞌoa hini,

Jesus Cristo aꞌonira nakaidivavini vani fori hiki ida aꞌonira onakaidivavini jaboni.

Kidiania khaki ida ovaꞌi bodinia khaii onina okamithaki avakadimoni.

9 Deu-ra okanikhariabakhiaki ho avakadimoni:

—Deus,

onofiki ida vaabono vakanofikhamavini avijavani afohaꞌoadaha,

avijavaja kaimoni ida nahina kaꞌoa hini-ra avigavini.

Onofiki jaboni ida vakadiꞌogahai sohikaꞌoani avijavani,

10 avigaja kaimoni ida nahina hahavi asohiki jahaki-ra vanagathogathovini.

Oniaroa,

Cristo joina kamahini hojai asohiki kaꞌoa vakadiania hojaki bana,

ni-nahina vavaꞌi bianaipahihijanaki bana.

11 Jesus Cristo vania bianaabosiꞌia ida vakadihojai,

sohikaꞌoaja kaimoni,

oniani ida ijahani idanoni ivagani hiki-ra nanokiaja vakadiania,

ira khai vaniꞌara kaimoni — nimania hida Deu-ra vara oniꞌavini athini avakadimoni.

12 Oigamina,

avarigavini onofiki ida namithaꞌiki kodiania,

ijaꞌari Jesus monina-ra vakamithavini-ra anaꞌbaꞌdiꞌiki.

13 Hora avibaiꞌiki adani sorara cadeia.

Arabo ipohiki kakaꞌdaꞌdini gorana karaho kahojaki ida cadeia.

Odabohana ohojaꞌiki ho.

Arabo kakaꞌdaꞌdini kasorara hahavi,

ijaꞌari vahoariha vaipohiki khama avigaki hida omonina.

Avigaki ida cadeia hora avibaivini hiki Cristo kahonai abono ohina.

14 Cadeia ohojana mani ida Cristo kaijaꞌari vahoariha vaipohiki-ra vaꞌora naimahidarija,

oniani ida Deu-ra vavakaijokavini hija,

vaipahihirina Deus monina-ra vara vavaniꞌavini khai vakhaniꞌaha,

ni-vaofinijanaki.

15 Kaꞌoa hiki ida Cristo kaijaꞌari varani vihina.

Vahoariha vaipohiriki hora avakabaivini,

vavajahaki ida ijaꞌari abononi akanaathidanoararikhamavini,

oniani ida Cristo monina-ra vara vavaniꞌavini hija.

Asohini kabaꞌi ida Cristo monina-ra vara vavaniꞌavini,

vakadihojai vani hida asohirija.

Vahoariha vani adani Cristo monina-ra vara vavaniꞌaha afojahaki.

Cristo-ra vanakaidivavini mani ida monina avananamithaonivini hija.

16 Hora vanakaidivavini mani ida Cristo monina-ra vara vavaniꞌavini hija.

Vaꞌoaniaroa avigaki ida Deus hora honariavini Cristo-ra avigariki-ra vaꞌora onavaꞌisohivini Cristo monina jahakia,

avigaja kaimoni ida kaꞌoa hini.

17 Hari.

Cristo monina-ra vanamonivini kabaꞌi adani hora avakabaiki,

ni-Cristo-ra vanofijahakiki.

Ijaꞌari vahoariha vaꞌora vanofivini kaimoni mani ida Cristo monina-ra vara vavaniꞌavini hija.

Hora vakavaꞌibodivaranivini:

—Jakaho Cristo monina-ra anamoniva mahija vahoariha Paulo-ra vanajahariharivini arafiavini cadeia hojana kabaꞌi — vakhaniha.

18 Ni-okavaꞌibodiki ida vakadivaꞌibodivarani jahariki.

Asohirihi ida hora avakabaivini.

Asohirihi jaboni ida ijaꞌari abononi akanaathidanoararikhamavini-ra vavajahavini,

kabaꞌi khai oniꞌaki ida Cristo monina-ra vara vavaniꞌavini.

Khai oniꞌaki jaboni ida vahoariha hora vanofiki Cristo monina-ra vara vavaniꞌavini.

19 Deu-ra avakanikhariavini hiki ida cadeia ookhaonanina,

oniani ida Deus hora akavaꞌijoavini-ra oogavini hija.

Jesus Cristo Maꞌonahana hora kajoamorabakhiavini mani ida ookhaonanina-ra oogavini hija.

20 Onofiꞌoamanija ida Deus hora honariavini hiki-ra okavaꞌipahiniravini.

Onofihahaꞌoadahaki ida oofinirina ohojana,

bada oniꞌaja kaimoni ida Deus hora honariavini hiki.

Hidakabaꞌi jaboni onofiki ida vara onina ijaꞌari-ra vaꞌora ofiniravini.

Ohokina oadani onofiki ida ijaꞌari-ra vaꞌora onavaꞌibodivaranivini Cristo jahana.

Hora vanaabinivini kamahini vaꞌora onofiki adani oabinina-ra vanokiki Cristo danona-ra vakavaꞌibodivaranivini.

21 Aꞌonira onavaꞌisohivini hiki ida nahina kaimoni ohokina.

Okavaꞌibodivaraniki ida kodimahi Cristo kaimoni hini.

Oabinina kamahini aꞌbaꞌdiki ida Cristo-ra onofijahakivini onamaakarivini.

22 Oabinijorakirihi;

asia Cristo kabadania okabadanihi kidimoni.

Onagathogathoja vaha ida hana hini jahaki;

ni-oogaki vaha ida oabinina,

oabinirina-ra onagathogathovini.

23 Ovaꞌi-ra karakhakhamaki hida.

Onofiꞌoamanija ida hidiaja kodimahi-ra onahojahaꞌavini,

Cristo kania ookhaꞌia kaimoni.

Nimania hida kodimoni hini jahaki.

24 Jahaꞌoamanija ida avakadimoni hidiaja oabinijorakirina.

25 Aꞌonira oakodiavini-ra onofiki ho asia,

oniani ida kodimahi hidiaja anokhomijorakirini-ra oogavini hija.

Onofiki ida aꞌonira oakodiavini avajariꞌdarini avijavaja kaimoni.

Onofiki jaboni ida Cristo-ra khai avaniꞌavini avijavani.

26 Aꞌonira onavanavanahaꞌianavini kamahini khai avaniꞌaꞌianaki bana ida Cristo kabadania okabadaniꞌianana avakadimoni.

Cristo-ra khai avaniꞌavini hiki kidiania avarakaramisini.

27 Cristo varani hina haria navaꞌisohivini hiki ida hojai Cristoa binofikia akahojaina,

oniani ida Cristo kahojaia avakahojaihaꞌoadahani-ra najahaja.

Aꞌonira onavanavanahavini-ra onofivini kabaꞌi,

ni-oogaki kaho ida avakadiania ookhana ookharina.

Ookhana ookharina kabaꞌi,

onofiki ida Jesu-ra avakavaꞌipahiniravini varani hini-ra okamithavini.

Nahina Cristoa binofiki vanofihahavi bana.

Okamithavini onofiki jaboni ida avahihavini avaradodojabanaki fori avihini Jesu-ra avakajariꞌdaravini,

vahoariha vakajariꞌdaria kaimoni ida Cristo monina kaꞌoa hini.

28 Hariꞌa vaꞌora vifinipaꞌitxi bana adani ijaꞌari aꞌonira vanapohimajavini-ra vanofiki.

Hariꞌa vaꞌora vakaipahi.

Avaofinirini-ra vanokiha;

avigahi ida Deus kania avakamadana.

Avigaki jaboni ida Deus aꞌonira akavaꞌijoavini bana kidiania.

Avadanodanoki fori avihini vani Deus aꞌonira kananamajaja bana,

vaꞌora kananaboꞌajaki bana adani Cristo-ra vakajariꞌdaki.

Nimania ida Deua binofiki.

29 Deus aꞌonira nagathogathovini hiki bada avaniꞌaja kaimoni ida Cristo kabadani,

Cristo-ra avakabadanija kaimoni.

Deua binofiki ida Cristo-ra avavakaijokavini,

binofiki jaboni ida aꞌonira vanaimaꞌbanabakhiavini avakapoarivini Cristo kaimoni.

30 Kodidanodanoi fori hiki ida Cristo monina-ra oanamonionivini,

Cristo-ra vavajaharikia vanofiravini kabaꞌi.

Avakadidanodanoi fori hiki ida kodidanodanoi.

Avakadiania ohojana kari avanokiꞌiki ida odanodanoki fori ohina.

Avakamithaꞌiki ida varani ohina asia odanodanoki fori ohina.