2 Deus kaijaꞌari Colossos sidajia avahojaki avakadimoni hida oathi.

Aꞌonivani avanofihahaꞌoadahaki ada Jesus Cristo.

Arigamina aꞌoni.

Onofiki ida Deus akadiabiꞌi aꞌonira kajoamorahaꞌoadahavini,

aꞌonira noꞌahaꞌoadahavini jaboni vaꞌi jahajahania.

3-4 Deu-ra vara aniꞌabakhiavini avakadimoni.

Aniꞌaha:

—Deus,

ivani ijahaki i,

vaꞌora ikajoamorajahakiki adani arigamina Colossos sidajia vahojaki — akhanihi.

Akadikaꞌdaꞌdi Jesus Cristo kaabiꞌi ada Deus.

Akamithaꞌiki ida varani avihini Jesus Cristo-ra avavakaijokajahakivini,

athi avanaabavini,

vaꞌora avanakaidivavini jaboni adani Deus kaijaꞌari hahavi.

5 Kaꞌoa hiki ida Jesus monina jahaki.

Hoariha aꞌonira kanamonibiininivini vani avakamithaja ida varani Deus kidinahina jahaki-ra naibavijahajoravini vakaijokana vihiki vakadimoni.

Deus kania nama hojaki ida aꞌonira kaibavijahahijoravini hiki.

Deus kanahina jahaki-ra avanokhahi,

oniani ida Jesus Cristo-ra avavakaijokavini hija,

kidijaꞌari hahavi vaꞌora avanakaidivavini hija jaboni.

6 Arabo hahavia ibavi hahavi ijaꞌaria vara vavaniꞌaki ida Jesus monina jahaki.

Ijaꞌari vahoariha vakamithahi,

Deus vaꞌora kajoamoraꞌaha adani Jesu-ra vanofiki,

vakadihojai binajahaꞌiki jaboni.

Aꞌonivani jaboni Deus ijaꞌari-ra kajoamoravini varani hini-ra avakamithabiininiꞌihi;

kaꞌoa hini avarigahi,

oniani ida avanofivini hija.

7 Hari.

Cristo kahonai abono hada arigamina Epafras oniki.

Anakaidivaki hada.

Bada biniꞌajahakiki ida badani Cristoa binofiki bada biniꞌaki kaimoni.

Haria kakodiavini ijaꞌari-ra akanamonivini,

oniani ida avakadiania arakhana hija.

Ovari aꞌonira nanamithabiininivini hiꞌiki ida Deus ijaꞌari-ra kajoamoravini-ra nofivini.

8 Joiꞌaha ada Epafras akadiania,

haria nanamithaꞌaha:

—Maꞌonahai Jahaki vaꞌora kakodiaki adani Deus kaijaꞌari Colossos sidajia vahojaki,

oniani ida Cristo kaijaꞌari hahavi-ra vaꞌora vanakaidivavini hija — haria niꞌaꞌiki hada Epafras.

9 Varani avihini-ra akamithabiininivini vani Deu-ra akanikhariavini kamaꞌdaꞌihi avakadimoni afobakhia.

Deu-ra aniꞌabakhiaꞌiki hari:

—Deus,

vaꞌora navaꞌisohihahavi bana adani arigamina nahina inofiki vakadiania.

Vaꞌora anigahi kadaꞌogahaia.

Anofiki ida Maꞌonahai Jahaki nahina inofiki-ra obaivini vavaꞌi bodinia.

Anofiki ida nahina kaimoni hini avigavini badani ivajahaki — nimania ida Deu-ra akanikhariabakhiavini athini aꞌonira kajoamorara kaimoni.

10 Deus aꞌonira kajoamorahi;

avakaabokahi ida hojai jahaki Deua binofiki;

bada avaniꞌahahaꞌoadahahi jaboni ida badani Deua bivajahaki.

Avaranaipohihi jaboni ida hojai jahaki,

avijavahi jaboni ida Deu-ra avarigavini,

Deu-ra avavavaꞌihavini.

11 Deua bikaabokaki ida nahina hahavi binofiki.

Arafiaki ida danona jahaki,

oniani ida Deus avajariꞌdarini-ra nadanovini-ra anofivini hija.

Anofiki ida jaboni avavaꞌini bodinia aꞌonira noꞌavini danona avakaabokaja kaimoni ida aꞌonira vanajaharihariki-ra avarakaihamahiravini.

12 Hari.

Jahaki ida khai avakhanihaꞌoadahani,

Deu-ra avaniꞌavini:

—Deus,

ivani ijahaki i.

Haria ikajoamoravini mani ida kadahojai jahakia akahojaina-ra akaabokavini hija.

Kadanahina jahakia vaꞌora ikaibavijahahiꞌiki adani kadaijaꞌari hojai jahakia vakahojaiꞌiki.

Anokhaki ida agahinana hini jaboni — nimania ida Deu-ra khai avaniꞌavini athini hini jahaki.

Ijaꞌari Deua bivakaꞌdaꞌdiki hojai jahakia kahojaini mani ida vagaki kania hojaki fori nihani hija.

13 Ni-akaabokaki ida ariabono akavaꞌijoavini Jahari kabadani-ra akavaꞌipahinija kaimoni.

Deus vani haria akavaꞌijoaꞌia Jahari saꞌa kabodinia haria saarivini,

joma bakibakini fori hikia arihojajanaria kaimoni.

Deus haria obaiꞌiki hari Cristo saꞌa kabodinia haria vakaꞌdaꞌdira kaimoni.

Deua binakaidivaki ada kidisai Cristoa oniki.

14 Jahari kahofiahi fori hiki kania Cristo haria aaniꞌiki hari.

Cristo haria akavaꞌijoavini mani ida Deus akadihojai asohiriki-ra naꞌbirahahavivini hiꞌia.

15 Deus hojana Cristo hojana hiki jaboni.

Cristo hojana binanokiaki ida Deus hojana niha ninini.

Ijaꞌaria vanokiꞌiki ada Cristo,

ni-vakaabokaki ida Deu-ra vanokivini.

Deus kaisai hoarana ada Cristo.

Ovari Deus kamonahi hahavi-ra vakaꞌdaꞌdiki ada.

16 Deua binakamaꞌdaꞌiki ida hahavi hojaꞌiki.

Deus,

Cristo khama vanamonahaꞌiki ida hahavi nama hojaꞌiki,

araboa hojaꞌiki hiki.

Vanamonahahahaviꞌiki ida nahina nokiaꞌiki,

nokiariki hiki jaboni.

Deus,

Cristo khama vaꞌora vanamonahaꞌiki adani ijaꞌari hahavi vanokiariki nama vahojaki.

Deus ibavi kaijaꞌarini vihiki adani vahoariha.

Jahari kaijaꞌari vihiki adani vahoariha.

Vaꞌora vahonariabakhiaki adani ijaꞌari.

Vadanona kabaꞌi Cristo vaꞌora kaabokaki adani.

Kaꞌdaꞌdi vihina kabaꞌi Cristo vaꞌora vakaꞌdaꞌdiki adani.

Deus Cristo-ra kakodiavini hiki ida hahavi-ra namonahavini.

Cristo kaimoni ida hahavi Deua binamonahaꞌiki.

17 Hahavi amonahani viahania hojaꞌboꞌdaꞌiki ada Cristo.

Cristo kidiamonahi hahavi-ra anajahamisiꞌiki,

binaibavihahaviꞌiki ida amonahaꞌiki ibavi hahavia hojani sohija kaimoni.

Asia binadadahi ida kidiamonahi.

18 Cristo vaꞌora vakaꞌdaꞌdiki adani kidijaꞌari.

Kaꞌdaꞌdi ada ovari.

Cristo abono niha nini hahavi adani kidijaꞌari.

Cristoa binakamaꞌdaꞌiki ida kidijaꞌari vakadimahi.

Vaꞌora nahokiki adani.

Abinina naothinia Deua bianahokiꞌiki ada kidisai hoarana.

Bianahokiꞌavini mani ida Cristo hoarana-ra kaꞌdaꞌdi nihaꞌia,

oniani ida Cristo kidiamonahi hahavi-ra vahonariahivini hiꞌia.

19 Vaꞌi bodini vara niꞌaha ada Deus:

—Onofiki ada kodisai hofori hina.

Onofiki ada kodisai kodihojai fori hina — niha ada Deus.

20 Vaꞌi bodini vara niꞌaha ada Deus:

—Ijaꞌari oathi-ra vanaabaravini mani ida kodiamonahi hahavi khama ariabono aakariakakhamaravini hija.

Kodisai-ra oakodiavini hiki bana ida haria avakariakavini.

Abiniki bana ada kodisai ava akasanakhamakia vakadimoni hina.

Amana ahovariki vakadimoni,

oniani ida hora anaariakaja bana — niha ada Deus.

Cristo abinirina oadani,

ni-Deua biakariakaki ida kidiamonahi hahavi nama hojaki,

araboa hojaki hiki.

Cristo abiniꞌina mani ida Deus kidiamonahi hahavi khama vaabono avakakariakakhamavini hiꞌia.

21 Cristo-ra avarigaravini kari Deus kavaꞌahi avihini-ra avanofirihi.

Jaharikaꞌoaki ida avakadibadani,

avakadihojai,

avakadivaꞌibodivarani hiki,

oniani ida Deu-ra avakaimajahapaꞌitxiravini hija.

22 Hari maha.

Cristo abiniꞌina mani ida Deus aꞌonira akariakavini-ra kaabokavini hiꞌia,

kidivaꞌahi avihiꞌiki aꞌoni.

Kidivaꞌahi avihini-ra nofiki ada Deus,

aꞌonira avikhara kaimoni kidiania.

Binofiki ida nahina jahariki aniani avakadiania,

binofiki ida avakadihojai-ra najahavini,

kidiania avakaikahini kamahini avajahakaꞌoaja kaimoni.

Ni-hojaki ida nahina aꞌonira osaniki kaimoni.

23 Hariꞌa bana vakavaꞌipahini ida Jesus athi-ra avanaabahahaꞌoadahavini avajariꞌdarini.

Kaaraki ida gora avani hodi abihiakia arokhojahaki.

Onivani fori hiva bana ida avajariꞌdarini kaarani,

Deus kania avarikhani-ra avanokhavini oadani.

Jesus monina jahaki-ra avakamithaꞌavini vani kamaꞌdaꞌia ida avarikhani-ra avanokhavini.

Hariꞌa bana avanokhavini vakavaꞌipahini.

Jesus kahonai abono ho.

Kodibadani hiki ida monina jahaki oanamonionivini.

Hovani,

vahoariha khama arabo hahavi kaijaꞌarini-ra vaꞌora aakanamonionivini hiki ida Jesus varani hina.

24 Hari.

Jesus monina jahaki-ra oanamonionivini mani ida vahoariha hora vanaimaꞌbanavini hija.

Ojahariharina avakadimoni ohina,

oniani ida khai hora niꞌaja.

Anokhomiꞌiarihi kaho ida Cristo imana ꞌbanani kidijaꞌari vakadimoni.

Cristo abono niha nini hahavi adani kidijaꞌari.

Vakadimoni ida imana ꞌbanani asia Cristoa bikamithaki.

Oakodiaki ida Cristo imana ꞌbanani-ra oananokhomivini kidijaꞌari vakadimoni.

25 Deus hora niꞌahi:

—Paulo,

kodihonai abono i.

Kadabadani kaimoni ida Cristo kaijaꞌari-ra iakodiavini — niha ada Deus.

Hora honariavini hiki aꞌonira oakodiavini.

Binofiki ida athi hahavia kidijaꞌari-ra vaꞌora oakanamonionivini.

26 Jesus Cristo kharina oadani,

ni-Deua binanamithaꞌiaki kaho ida Cristo monina jahaki,

ni-ijaꞌaria avigaꞌiaki kaho.

Badara îpohiki ogavahaꞌiarini ida Cristo monina jahaki.

Hari,

ogavahaꞌiki ida.

Deus vani vaꞌora kanamoniꞌaha adani kidijaꞌari.

27 Deua binofiki ida athi ogavahaꞌini,

binofiki ida kidijaꞌaria avigaꞌavini.

Binofiki bana ida ijaꞌari hahavia avigavini.

Jahaꞌoamanija ida athi khai niꞌavahani.

Nimania bana hida athii ijaꞌaria avigajorariki:

28 Oniaroa,

harivani vara avaniꞌabakhiaki hida Cristo varani hina ijaꞌari hahavia vakamithaja kaimoni.

Anagathogathoki ida varani asohiki,

ogavahaki vara avaniꞌaki kaimoni.

Vaꞌora akaabanibakhiaha adani ijaꞌari hahavi,

vakavaꞌipahinija kaimoni ida hojai Deua bivajahariki.

Vaꞌora akaꞌojomoꞌibakhiaha jaboni Deus athi hahavia.

Deus viaha arihojahahavina kamahini,

onofiki ida Deu-ra oniꞌavini:

—Deus,

hihadani ijaꞌari iathinia vaꞌora onavaꞌisohibakhiaꞌiki hadani.

Kadahojaia vakahojaijahakiki hadani iathini-ra vanaabaꞌiki.

Cristo kania avajahamisiki hadani — Deus kania arihojaꞌina kamahini onofiki ida onina.

29 Karahoki hida kodibadani Deus athi-ra oanamonionivini.

Obadanina oadodohaꞌoadahahi,

ijaꞌari hahavia vakamithaja kaimoni ida Deus athi.

Cristo hora noꞌahaꞌoadahaki ho danona karahoa,

oniani ida kidibadani okaabokavini hija.

Bada onina oadani ovaꞌi bodinia hora nadanovini.