2 Onofiki ida aꞌonira oakodiavini,

vaꞌoaniaro vaꞌora oakodiaki jaboni,

khai avakhanijahakija kaimoni avavaꞌini bodinia avaofiniria kaimoni.

Aꞌonira oakodiavini hiki avaabononi avakanakaidivakhamaja kaimoni.

Avakhanini vani Deus athi kaꞌoa hini-ra avarigajahakija.

Ni-avavaꞌini akaraꞌbanahanakhamaki.

Jahaki ida avakadimoni Deus athi asohiki-ra avakajariꞌdaravini,

avarigaja kaimoni ida Deus athi ijaꞌaria avigajorariki.

Cristo monina jahaki ida athi ijaꞌari hahavia avigajorariki.

3 Ni-aogapaꞌitxiki ida hahavi Deua biogaki.

Ni-aogapaꞌitxiki jaboni ida nahina Deua bikavaꞌibodivaraniki.

Nahina kaidivaki ogavahariki fori hiki ida Deus aagahai.

Cristo vani ijaꞌari-ra anigahivini hija ida Deus aagahai ogavahariki,

binanamithaki ida Deua bivajahaki bivajahariki hiki.

4 Aꞌonira onavaꞌisohivini hiki hida varani asohiki,

avakajariꞌdaja kaimoni ida vahoariha vakadiꞌaathidanoarari athini asohiriki.

Ni-onofiki ida vakadiꞌaathidanoarari athini asohiriki-ra kaꞌoa avavanihavini.

Kamithavahani jahani kabaꞌi ida vakadivarani,

ni-asohiki.

5 Napaja ohojana kabaꞌi,

aꞌonira okavaꞌibodivaranibakhiaki ho.

Avakadiania ohojaki fori ohiki ho.

Khai oniꞌaki ida avaabononi avakakakodiakhamahaꞌoadahavini,

kaaraki ida Cristo-ra avavakaijokavini.

6 Jesus Cristo-ra avagathaniꞌavini mani ida avakadikaꞌdaꞌdi nihana hiꞌia.

Kidiania avajahamisihahavi bana.

7 Ava avijavani fori hiki ida avakadimahi.

Abihiahi ida ava ꞌdamani abohani nami imani bodinia;

avijavajahakihi ida ava.

Onivani fori vihiꞌa bana Cristo kani aꞌoni avakadimahi avijavaꞌava.

Gora-ra avanamonahavini vani fori hija ida avakadimahi.

Abihiahi ida gora avani nami imani bodinia;

kaaraki ida gora avanamonahaki.

Cristo-ra vanofijahakiꞌa,

athi vanaabaꞌa mahija gora avani nami imani bodinia abihiaki hojani fori avihiꞌavini.

Nimania ida Cristo-ra avavakaijokavini-ra avanadanovini vahoariha aꞌonira vakaꞌojomoꞌivini hiꞌiki.

Cristo-ra khai vaniꞌakarahovinihi bana ida aꞌonira kajoamorahaꞌoadahavini.

8 Avaabononi avakavaꞌigairi bana mahija vahoariha vakadiꞌaathidanoarari athini asohiriki-ra avakajariꞌdavini.

Aathidanoarari athini asohiriki ijaꞌaria binaabahi;

kaꞌdaꞌdi kahonai abono kapavakarivahaki fori hiꞌianahi ida ijaꞌari.

Ni-nahina jahakia ijaꞌari vahoariha-ra vakaꞌojomoꞌiki vakadivarani asohirikia.

Ijaꞌari aagahai oamani ida vakadivarani asohiriki.

Ijaꞌari avikhananavaki vania vara vavaniꞌabiininija ida varani asohiriki ijaꞌaria vakaꞌojomoꞌiꞌiki kaimoni.

Jahari kahonai abono vanokiariki ijaꞌari vavaꞌi-ra vanahonariahihiki vakadivarani hiki jaboni ida varani asohiriki.

Cristo aagahai hirihi ida vakadivarani asohiriki.

9 Ijaꞌari vahararana nokiana kari ada Cristo,

Deus kahojai hahavia kahojaiki ada.

10 Cristo kania avarakaramisini mani ida Cristo kamahi jahakia aꞌonira noꞌavini hija.

Cristo danona vahoariha vadanona-ra aradaki.

Cristo vani vavaꞌi binahonariahihira adani maꞌonahai vanokiariki vadanoki nama vahojaki.

Kaꞌdaꞌdi vihina vani ijaꞌari vavaꞌi-ra vanahonariahihira adani.

11 Cristo kania avarakaramisini mani ida siikosida karajomihia aꞌonira kanarajomija.

Judeus kaijaꞌari vaꞌora vakarajominanaki adani makhira isani siikosida karajomihia,

Deus kaijaꞌari vihina avigavahara kaimoni.

Ni-niki ida Cristo kidijaꞌari-ra karajomivini.

Cristoa biavaꞌboaꞌiki fori hiki ida hojai jahariki,

avavaꞌini-ra nahonariahihijanaria kaimoni,

avaꞌaihotara kaimoni.

12 Cristo abiniꞌina naothinia kaꞌdamahaꞌiki.

Avikanaꞌini kari vani avakaꞌdamahaꞌiki fori avihiꞌia Cristo kania.

Ihimiꞌiki ida avakadimahi ꞌboꞌda.

Kaꞌdamahana naothinia ahokiꞌaha ada Cristo.

Deus danona vania bianahokiꞌara ada.

Avikanaꞌini vani avarahokiꞌiki fori avihiꞌia Cristo kania.

Kamaꞌdaꞌihi ida avakadimahi jaꞌdini kidiania.

Deus danona-ra avakajariꞌdaravini mani ida avakadimahi jaꞌdini-ra nakamaꞌdaja.

13 Cristo-ra avarigaravini kari hojai asohirikia avakahojaibakhiani mani ida avamaꞌonahani-ra naabiniki fori nihaja.

Judeus kaijaꞌari avihirini mani ida siikosida karajomihia aꞌonira kanarajomirija.

Deus athi-ra avanaabaravini mani ida avamaꞌonahani-ra naabiniki fori nihaja jaboni.

Hari maha.

Cristo-ra avanofiꞌavini vani Deua bianahokiꞌia ida avamaꞌonahani.

Deus Cristo-ra anahokiꞌavini vani fori hija ida aꞌonira anahokiꞌavini jaboni Cristo kania.

Deua binaꞌbiraꞌiki jaboni ida avakadihojai asohiriki bada avaniꞌaꞌiki,

aꞌonira akariakaꞌara kaimoni.

14 ꞌBoꞌdakari nihaꞌaha ada Deus:

—Hojai asohiriki abosini mani ida jaharikia ijaꞌari-ra oarakhavini hija — niha ada Deus.

Deus kania hojaki ida papira ijaꞌari hojai asohirikia vakabadanibakhiaki vakapapirana,

vagathanija kaimoni ida abosini nahina jaharikia.

Cristo abiniꞌiki akadimoni,

oniani ida Deus akadihojai asohiriki abosiꞌiariki kapapirani-ra naꞌbiravini hija.

Deua bianatamisiꞌiki fori hiki ida akadihojai asohiriki abosiꞌiariki jiriki papira Cristoa bivaabiniꞌiki ibavinia ava akasanakhamaki kania.

Pohimajaꞌaha ada Cristo akadimoni,

agathanijanaria kaimoni ida akadihojai asohiriki abosini.

15 Ava akasanakhamakia Cristo hojaꞌina bisaariꞌiki ida Jahari,

kaꞌdaꞌdi vanokiariki nama vahojaki,

nahina hoariha danoki nama hojaki vakadisaꞌai.

Binihimaꞌihi ida vadanona ijaꞌari vavaꞌi-ra vanahonariahihijanarara kaimoni.

Hari.

Ijaꞌari vaipohiki vaviaha Cristo vaꞌora nanokiaki adani Jahari,

kidijaꞌari vihiki vakasaꞌairiki,

vadanoriki.

Vidabohaki fori vihiki adani.

Vaahona vaꞌora honariaha vaadahasiagaha naothia.

Nimania ida Cristo danona vaꞌora akananaboꞌajararivini vahoariha vada vaꞌora vaniꞌara kaimoni.

16 Vahoariha aꞌonira vakaabaniki vahabini bana aꞌoni:

—Kaaji hiki bana oni ꞌbai,

hariꞌa vaha.

Kaaji hiki bana oni aviꞌaviki,

hariꞌa viꞌavi.

Kaaji hiki hida mahi,

hariꞌa bada vakhani hidakabaꞌi.

Masiko jaꞌdi nokiana vani vanamonaha bana ida masiko jaꞌdi kaihinikani.

Akoiri kamahini hariꞌa bada vakhani — onivani fori hija ida vakadikaabanahi athini.

Hariꞌa bana vakadikaabanahi vakamithaꞌa.

17 Niki vania akahojaija Cristo-ra aogavini viahania.

Cristo amokhinina viaha okhananavaki fori hiki ida judeus kaijaꞌari vakadikaaji.

Khaꞌaha ada Cristo,

avisoniꞌihi ida amokhinina.

Ni-nahina kaimoni hojajanaki ida vakadikaaji,

oniani ida vakadikaabanahi akamithajanaravini hija.

18 Aꞌonira vaniꞌaki vahabini bana adani kaaji-ra vanofiki:

—Kaaji-ra avakavaꞌipahinihi;

jaharikia Deus aꞌonira arakhahi;

ni-avagathaniki jaboni bana ida Deus aꞌonira kaibavijahahivini hiki — vakhaniha.

Vakajariꞌda bana ida varani asohiriki.

Aꞌonira niꞌaki bana vahabini jaboni ada aꞌonira korijanahaki:

—Hovani oogaki ida Deua binofiki.

Hora nanokiahibakhiavini hiki ida vadami fori hiki,

oniani ida kodiꞌogahai avakadiꞌogahai-ra aradavini hija.

Vadami fori hiki-ra avanokiravini mani ida Deua binofiki-ra avarigaravini hija.

Jahaki ida Deus ibavi kaijaꞌarini-ra vaꞌora avakanamasivivini,

Deu-ra avakanamasivivini fori hini — nimania ida kidivarani aꞌonira korijanahaꞌiki.

Kidihojai jahakaꞌoaki abono-ra vanihavini mani ida nahina hirini-ra kahivini hija.

Abononi vaboraborahaꞌoamanija ida.

Deus kavaꞌibodivarani hirihi ida kidivaꞌibodivarani.

19 Ni-Cristo kania akaramisijanaki ida aꞌonira korijanahaki.

Kaꞌdaꞌdi kaꞌoa ada Cristo.

Kidijaꞌari hahavi kakaꞌdaꞌdi ada.

Cristo abono niha nini hahavi adani kidijaꞌari.

Ijaꞌari jaroni akarahani,

abohani hikia bianakarananaki ida imani,

jaroni hiki.

ꞌBaia binavijavavini mani ida nadanoni hija.

Onivani fori hija ida Cristo kidijaꞌari-ra vakaꞌdaꞌdivini.

Cristo vaꞌora nadanovini,

vaꞌora navijavavini.

Nimania ida Deua binofiki Cristo abono avijavani hihavini.

20-21 Cristo abiniꞌina mani ida avakadimahi ꞌboꞌda-ra anaabosiꞌia mahi jaꞌdinia.

Avakadimahi ꞌboꞌda ihimiꞌini mani ida Jahari kabadani abono avavaꞌini-ra vanahonariahihijanaravini hija,

oniani ida aꞌonira anaihotaꞌia.

Ni-asohiki ida Deu-ra avigariki vakadihojaia avakahojaijanani.

Ni-asohiki ida vakadikaaji avavakaajijanavini.

Vakadivarani ida aꞌonira vakaabanivini:

—Hariꞌa vakaabada oni hiꞌoni.

Hariꞌa vakaijoꞌa oni hiꞌoni.

Hariꞌa vaha oni hiꞌoni — aꞌonira vaniꞌaha.

Ni-asohiki ida vakadikaabanahi avanaabavini.

22 Ni-hojaki ida nahina havahariki,

nahina aviꞌaviki hiki kaaji hiki kaimoni.

Ni-aꞌboꞌdaki ida nahina vakadikaaji hiki vavakaajiki.

Ijaꞌaria vanakamaꞌdaꞌiki ida kaaji-ra vara vavaniꞌavini.

Ijaꞌaria vanakamaꞌdaꞌiki jaboni ida vakadivaꞌisohihi.

Nirihi ida Deus athi.

23 Avigahadoroki ijaꞌari vaꞌora vavanihaki adani kaaji kavaranihi-ra vara vavaniꞌaki.

Vakhaniha adani avigahaꞌbadaraki:

—Vaꞌora vakanamasivi bana adani Deus ibavi kaijaꞌarini Deu-ra avakanamasivivini vani fori vaniha — vakhaniha.

Vakadihojai jahakaꞌoaki vaabono vavanihavini mani ida nahina vihirina-ra vakahivini hija.

—Ariabono akavaiꞌamihava,

ariabono adava aimana ꞌbanaja kaimoni mahija Jahari kakaborohirohi-ra anaabaravini — vakhaniha jaboni.

Ni-asohiki ida vakadiꞌojomoꞌihi athini.

Ijaꞌari abononi naimaꞌbanahi;

asia bikavaꞌinofinofihi ida hojai asohiriki kaipahivahaki;

ni-kidivaꞌinofinofi-ra nadabaki.