Deus pitana aniaja vithiꞌaha ada Cristo kaꞌdaꞌdi kavithi ibavini iꞌoarinia.

Jahakaꞌoaki ida ijaꞌari Deus kania vahojaki vakadimahi.

Deus kahojai jahakia vakahojaiki adani kidijaꞌari.

Vanofidoro bana ida vaꞌoaniaro nama vahojaki vakadihojai jahakia avakahojaini.

2 Vakavaꞌibodivaranibakhia bana ida nahina nama hojaki avakadimoni.

Hariꞌa bana nahina hidiaja hojaki-ra vakavaꞌibodivaranihaꞌoadaha.

3 Abaꞌoki fori hiki ida avakadimahi ꞌboꞌda.

Ahojaki ida avakadimahi jaꞌdini Cristo kania.

Deus kania akaramisiki ada Cristo.

Ovaria biakadavaꞌaki ida avakadimahi jaꞌdini.

4 Nokiaꞌianana kamahini ada Cristo hidiaja joina,

avahojaki bana aꞌoni jaboni kidiania.

Cristo jahana arafiaki nokiani kamahini avavahojaki bana jaboni ida Cristo vagana,

danona,

jahana hiki.

5 Hari.

Vanihimakaꞌoa bana ida avakadivaꞌinofinofi jahariki mahija avakavaꞌipahinikaꞌoaꞌavini.

Nimania hida ijaꞌari kavaꞌinofinofi jahariki:

Makhira kidigamo hiriki khama vaabono vakaviꞌomakhamaki.

Gamo,

makhira vihiki vajaharina-ra avakanabadakhamaki.

Bikavaꞌinofinofiki ida badani asohiriki kaipahivahaki.

Binofiki ida badani karamonavahaki.

Ijaꞌari akabajahakia bikavaꞌibodivaranihaꞌoadahaki ida kidinahina aꞌbaꞌdini arafiani,

oniani ida kidinahina-ra kidideus vanihavini hija.

Deus amovana-ra kanamasiviki fori hiki ida ijaꞌari.

6 Nimania ida Deus athi-ra vanaabariki vakadihojai jahariki.

Deus vakadihojai bikaihamahivini mani ida nahina jaharikia vaꞌora arakhavini hija bana.

7 Mahi ꞌboꞌdakari Deu-ra avarigaravini kari aꞌonivani jaboni avavaꞌinia khai avaniꞌaꞌiki ida hojai jahariki nikia avakahojaini.

Hojai jahariki avavaꞌini-ra nahonariahihibakhiaꞌiki aꞌoni.

8 Hari maha.

Vakavaꞌipahinikaꞌoaꞌa bana ida hojai jahariki.

Hariꞌa vaihamahijana.

Vakavaꞌipahinikaꞌoaꞌa ida avakadivaꞌinofinofi kaipahivahaki.

Hariꞌa bana vakavaꞌibodivarani ida vahoariha-ra avanajahariharivini-ra avanofivini.

Hariꞌa varani jaharikia hoariha-ra vara vaniꞌa.

Hariꞌa varani karamonavahakia vahoariha-ra avanavaꞌiꞌaipahihi.

Ni-avaathini hini jahaki ida varani jahariki.

9 Hariꞌa avaabononi vaakorijanahakhamajana bana.

Avakavaꞌipahinikaꞌoaꞌiki ida avakadimahi ꞌboꞌda ajaꞌdiriki.

Avaaniꞌiki ida avakadihojai ꞌboꞌda jahariki,

ijaꞌari kidimakari makamakaki-ra aniꞌiki fori avihiꞌiki aꞌoni.

10 Avakaimahaꞌiki fori hiki ida avakadimahi jaꞌdini.

Avakadihojai jaꞌdinia avakahojaiꞌiki aꞌoni.

Deua binamonahaꞌiki ida avakadimahi jaꞌdini.

Binajahahahaꞌoadahaki ida jaboni,

vajaforia kidihojai jahakia avakahojaija kaimoni,

avijavaja kaimoni ida Deu-ra avarigajahakivini.

11 Akadivaꞌibodivarani jaꞌdini ida Cristo hoarana akadikaꞌdaꞌdi hina,

haria honariara kaimoni.

Ovari hoarana ada kidijaꞌari hahavi vavaꞌi bodinia hojara.

Akhanina vani ni-hojajanaki ida judeus kaijaꞌari,

judeus kaijaꞌari hiriki,

makhira siikosida karajomiki makhira siikosida karajomiriki,

arabo hoariha kaijaꞌarini,

ijaꞌari ogavahariki,

honai abono kapavakarivahaki,

honai abono hiriki.

Ni-nikia akavaꞌibodivaranina jahajanaki.

Harivani hahavi hoarani fori arihiki hari Cristo kania aakaramisina.

12 Aꞌonivani Deus kani aꞌoni.

Deus aꞌonira nakaidivaki aꞌoni,

aꞌonira nagathogathoꞌiki ada,

kidijaꞌari avihija kaimoni.

Nimania bana hida hojai jaꞌdini,

makari jaꞌdini fori hiki avakaimahaki kaimoni.

Vakajoamorajahaki bana ida hoariha.

Badani jahakia vakabadaniꞌa vahoariha vakadiania.

Avaihamahirini vani hoariha kavaꞌisohihi-ra vakapoari bana.

Ijaꞌari-ra vaꞌora avakaabanihi;

vajaforia vaꞌora vanavaꞌisohi bana.

Hariꞌa bana vahoariha-ra vaꞌora avakaihamahijoraki.

13 Hariꞌa jorakia hoariha-ra vakaꞌdaꞌdigaria bana.

Hariꞌa vakadihojai avakaitapia bana.

Avaabononi avakakariakakhamajoraki bana mahija avakadiꞌaathidanoarari-ra avarakavaꞌiꞌbirinijorakivini.

Cristoa binaꞌbiraki ida avakadibadani jaharikaꞌoaki,

aꞌonira akariakaki ada jaboni.

Cristo aꞌonira akariakavini vani fori vihi,

vahoariha-ra avarakariakavini.

14 Hihida vaꞌisohihi-ra avanaabahi;

jahahi ida avakadihojai.

Onofiki ida avaabononi avakanakaidivakhamajahakivini jaboni.

Ijaꞌari ajahamisiki fori hiki ida abononi kanakaidivakhamajahakiꞌavini.

15 Cristo aꞌonira noꞌabakhiavini vaꞌi jahajahania avakadivaꞌibodivarani-ra vasohija kaimoni.

Deus aꞌonira kaboaꞌinanaki aꞌoni avaabononi avakanakaramisikhamaja kaimoni abonoi hoarani fori avihija kaimoni,

avavaꞌini jahajahani aꞌonira bananija kaimoni.

Deu-ra khai avaniꞌavinia vakahojaiꞌa bana.

16 Vavaꞌaha bana ida Cristo monina jahaki hahavi avavaꞌini bodinia ibavini mahija Cristo kahojai jahakia avakahojaivini.

Avarigahahi avaabononi vaakaꞌojomoꞌikhama bana,

avaabononi vakaabanikhama bana jaboni.

Vaahia bana Deus athi kapapirania moro kahojakia.

Vaahia jaboni bana moro Jesu-ra khai avaniꞌavini.

Khai vaniꞌa bana ada Deus.

Khai vaniꞌa bana ida Deus aꞌonira kajoamorabakhiavini,

kidinahina jahakia aꞌonira noꞌabakhiavini jaboni.

17 Avakadikaꞌdaꞌdi ada Jesus.

Badani hana hinia avakabadanihi,

vanajaha bana ida badani mahija Jesua bivajahavini.

Vara avakhanini vani jaboni,

vara vavaniꞌa bana ida varani jahaki mahija Jesua bivajahavini.

Deu-ra vaniꞌabakhia bana:

—Akadiabiꞌi,

ijahaki i akadimoni ihini.

Jesu-ra ikaronaꞌiki i,

haria kajoamorara kaimoni — vakhani bana.

18 Hari.

Vara vaꞌora oniꞌaki adani gamo vakamakhiraki.

Vanaabaꞌa bana ida avakadimakhira vaathi afohanana.

Jesua binofiki ida avakadimakhira aꞌonira vavakaꞌdaꞌdivini.

19 Vara vaꞌora oniꞌaki adani makhira vaagamohananaki.

Vaꞌora vanakaidivaꞌa afohanana adani avakadigamo.

Hariꞌa athii khanakia vaꞌora avakaraganaha adani avakadigamo vavaꞌi ami aniꞌakarahoni hiki.

20 Vara vaꞌora oniꞌaki adani isai,

imakhinava,

imaꞌinavi vihiki.

Vanaabaꞌa bana ida avakadiabiꞌi,

avakadiamia vara aꞌonira vaniꞌavini.

Nimania ida Deua binofiki.

21 Vara vaꞌora oniꞌaki adani isai vakadiabiꞌi,

vakadiamia vihiki.

Hariꞌa vaꞌora avanavaꞌiꞌaitapia bana mahija vakadikhaiini avanadabaravini.

22 Vara vaꞌora oniꞌaki adani kaꞌdaꞌdi kahonai abono vakapavakarivahaki.

Avakadikaꞌdaꞌdi aꞌonira vakapavakariꞌiki aꞌoni afohanana.

Vanaabahahaꞌoadaha bana ida vaathi hahavi.

Avanofiki ida avakadikaꞌdaꞌdi khai aꞌonira vaniꞌavini afohanana,

oniani ida vada aꞌonira vaniꞌavini vakadihonari avanaabavini hija.

Jahaki ida vada aꞌonira vaniꞌaravini jaboni vakadihonari avanaabavini.

Hariꞌa avakadikaꞌdaꞌdi-ra vavavaꞌijahaꞌimarini bana.

Vanofi bana ida vakadihonari avanaabavini.

Avakadikaꞌdaꞌdi Jesu-ra avavavaꞌihahi,

oniani ida avakadikaꞌdaꞌdi araboa vahojaki vaathi-ra avanaabavini-ra najahaja.

23 Badani hana hinia avakabadanihi;

Deua binofihi ida avaradodoki fori avihini bada avakhanini.

Avakadikaꞌdaꞌdi kaꞌoa kaimoni hirihi ida avakadibadani.

Cristo kaimoni jaboni ida badani.

24 Avarigaki ida avakadikaꞌdaꞌdi Cristo aꞌonira noꞌavini hiki avakadibadani abosini.

Cristo vaꞌora noꞌaꞌiki bana adani kidijaꞌari hahavi vaꞌora kaibavijahahivini hiꞌikia.

Cristo kaꞌoa avakakaꞌdaꞌdiki aꞌoni,

kidimoni ida avakadibadani hahavi.

Ovaria binaabosiki bana ida avakadibadani jahaki kidinahina jahakia.

25 Cristoa binaabosiki jaboni ida badani jaharikaꞌoakia ijaꞌari vakabadaniki nahina jaharikia.

Ni-Deus vaꞌora kavaꞌibodivaraniki bana adani ijaꞌari hana vihina kaꞌdaꞌdi,

hana vihina honai abono,

vakadibadani abosini kamahini.

Deua biogananaki ida ijaꞌari vakadibadani jahaki jahariki vaꞌora naabosira kaimoni.