2 Hari.

Deu-ra vara vaniꞌahahaꞌoadaha bana.

Hariꞌa bana vakavaꞌipahini ida Deu-ra avakanikhariadanokivini hiki mahija avanokhahahaꞌoadahakia avagahinavini.

Deu-ra vara avaniꞌavini vani khai vaniꞌa jaboni ida aꞌonira noꞌavini hiꞌiki.

3 Deu-ra vakanikharia bana jaboni akadimoni.

Deu-ra vaniꞌa bana:

—Deus,

vaꞌora kajoamora bana adani Paulo mahija ibavi ipohikia iathini-ra avanamonionivini.

Vaꞌora kajoamora bana mahija vahoariha vaꞌora vanadabaravini.

Pauloa vanofiki ida ijaꞌari vaipohiki Cristo monina-ra vakamithavini.

Ni-avigaꞌiaki ida Cristo monina — Deu-ra avakanikhariavini vakhani bana akadimoni.

Cristo monina-ra oanamonioniꞌavini mani ida cadeia hora avibaivini hija.

4 Deu-ra vakanikharia kodimoni mahija Cristo monina-ra vara ovaniꞌajahakivini,

vakamithava avigajahakija kaimoni ida Deus vaꞌora navaꞌisohivini hiꞌiki nahina hini.

Nimania ida Deua binofiki athi oanamonionivini.

5 Vakavaꞌibodivaranijahaki ida Cristo-ra vakajariꞌdaki-ra vaꞌora avanaibavijahavini mahija Cristo-ra vanofivini.

Vara vaꞌora avaniꞌavini-ra vavaꞌahaha;

vara vaꞌora vaniꞌa Cristo monina jahakia.

6 Athii forakia vara vaꞌora vaniꞌa bana.

Vara vavaniꞌa ida varani jahaki mahija mitha vakhanina-ra vanofivini.

Onofiki ida varani asohiki-ra avarigavini vakadinaꞌdohi avagathanihananavini.

7 Arigamina Tíquico aꞌonira nanamithaki bana aꞌoni omonina.

Anakaidivaki hada.

Ni-bikavaꞌipahinipaꞌitxiki ida Cristo kabadani.

Haria kakodiabakhiaki ada Tíquico ijaꞌari-ra aakanamonionivinia.

8 Okaronaki bana hada avakadiania varani arihina hahavia aꞌonira nanamithara kaimoni,

khai avaniꞌaja kaimoni hida akadimahi jahani hojani.

9 Okhaki bana hada Onésimo jaboni Tíquico-ra vaipohihavini.

Jesu-ra kajariꞌdariha ada arigamina Onésimo.

Ni-bikavaꞌipahinipaꞌitxiki ida Deua binofiki.

Anakaidivaki hada jaboni.

Avaipohini hada.

Onésimo,

Tíquico khama aꞌonira vanavaꞌisohihavini hiki ida hahavi namithaꞌiki hida akadiania.

10 Arigamina Aristarco aꞌonira kaꞌivanitiki aꞌoni.

Cadeia aagaakosoaꞌiki hari,

Aristarco khama.

Marcos jaboni aꞌonira kaꞌivanitiki aꞌoni.

Barnabé kajavi hada Marcos.

Hoariha aꞌonira navaꞌisohivini hiꞌiki hada Marcos ajoina kaikahina avakadiania,

avagathanijahakira kaimoni.

11 Josué jaboni aꞌonira kaꞌivanitiki aꞌoni.

Josué onina hoariha Justo.

Cristo-ra vakajariꞌdariha adani Aristarco,

Marcos,

Justo vihiki.

Judeus kaijaꞌari hadani makhira avahoarabakosiki.

Judeus kaijaꞌari vahoariha Cristo-ra vakajariꞌdariki ni-hora vaakodiaki.

Vaꞌoaniaro avahoarabakosiki kaꞌoa vani hadani hora vaakodiara,

Deus ijaꞌari hahavi-ra vakaꞌdaꞌdivini varani hini-ra vara avaaniꞌaja kaimoni.

Jahaki ida hora vaakodiajahakivini.

12 Epafras jaboni aꞌonira kaꞌivanitiki aꞌoni.

Avaipohini hada.

Jesus Cristo kahonai abono jaboni hada.

Epafra bikanikhariadanokiki ada Deus afobakhia aꞌonira kajoamorara kaimoni.

Biniꞌabakhiaha:

—Deus,

vaꞌora nadano bana adani arigamina Colossos sidajia vahojaki mahija vajariꞌdaravini.

Vaꞌora kajoamora bana mahija vakadihojai jahaki avijavajahakivini mahija iathini-ra vakajariꞌdaravini.

Deus,

onofiki ida vanokhahahaꞌoadahavini badani inofikia vakabadanina — nimania ida Epafras Deu-ra kanikhariahaꞌoadahavini athini avakadimoni.

13 Onokiꞌiki hada Epafras bada nina avakadimoni adodoki fori hina avajariꞌdarini-ra nadanora kaimoni.

Epafras vaꞌora kakodiaꞌiki adani Laodicéia sidaji kaijaꞌarini,

Hierápolis sidaji kaijaꞌarini jaboni vajariꞌdarara kaimoni.

14 Hari.

Lucas,

Demas khama,

aꞌonira vakaꞌivanitiki jaboni aꞌoni.

Akadimédico hada Lucas,

anakaidivaki hada.

15 Vaꞌora vakaꞌivaniti bana adani arigamina Laodicéia vahojaki akadimoni.

Vakaꞌivaniti jaboni bana ida Ninfa.

Vaꞌora vakaꞌivaniti jaboni adani arigamina Ninfa gorania vajoronibakhiaki Deu-ra khai vaniꞌara kaimoni.

16 Vara avavaniꞌavini vanaꞌbara bana hida oathi onajiriki mahija mitha avaniꞌahahavivini.

Avakamithavini naothinia vakarona bana hida oathi kapapirani Laodicéia sidajia mahija Jesus Cristo kaijaꞌari vahoariha vakamithavini jaboni.

Onajiriki hida papira hoariha Jesus Cristo kaijaꞌari Laodicéia sidajia vahojaki vakadimoni jaboni.

Oathi kapapirani jiriki-ra mitha vaniꞌavini naothinia vakaronaꞌianaki bana ida oathi kapapirani avakadimoni avakamithaja kaimoni.

Akabosikhamaja kaimoni hida oathi kapapirani ꞌbamiki.

17 Vanavaꞌisohi bana ada Arquipo,

biananokhomija kaimoni ida badani bikapoariꞌiki.

Deus kabadani ida bada biniꞌaja.

18 Hovani oananokhomiꞌia hida jirihi.

Hovani Paulo ho aꞌonira okaꞌivanitija.

Hariꞌa bana avakavaꞌiꞌbirini hida cadeia ohojana osaꞌa kodabohani.

Onofiki ida Deus aꞌonira kajoamorahahavivini.

Hari ida vani oamani Paulo athi anokhomiꞌini.