2 Evódia,

Síntique khama,

vara aꞌonira oniꞌaki bana ho.

Jesus kaijaꞌari avihiki aꞌoni.

Aꞌonira okanikhariavini hiꞌiki ida avaabononi avakanajahamisikhamaꞌianavini.

3 Hari.

Ivani jaboni kodivaꞌahi,

Jesus kabadania akabadaniꞌiki hari.

Onofiki vaꞌora iakodiavini vaꞌoani gamo viꞌbamiki vaabono avakakariakakhamara kaimoni.

Avakadiania ohojana kari hivaꞌoani gamo viꞌbamiki,

Clemente,

oipohina vahoariha vihiki bada akhaniꞌiki hari.

Karahoꞌiki ida akadibadani Jesus monina-ra anamonioniꞌavini.

Deus kania hojaki ida ijaꞌari mahi ajaꞌdikia gahinaꞌiki onini hahavi kapapirani.

4 Cristo kania avarakaramisini vani khai vakhanihaꞌoadahaꞌa bana.

Vara ovaniꞌaꞌianahi;

khai vakhanihaꞌoadahaꞌa.

5 Vaꞌora vanakaidivajahaki bana adani vahoariha.

Jorakia joiki bana ada akadikaꞌdaꞌdi Jesus.

6 Hariꞌa avakavaꞌisokoni ida nahina avakavaꞌibodivaraniki.

Deu-ra vara avaniꞌavini vani vakanikharia bana ida avakainamoki.

Deu-ra avakanikhariavini vani khai vaniꞌa bana ida aꞌonira kajoamorabakhiavini,

7 oniani ida vaꞌi jahajahania Deus aꞌonira noꞌavini hija.

Ijaꞌaria bikavaꞌibodivaranivini kabaꞌi ida vaꞌi jahajahani,

ni-bikaabokaki ida biogavini.

Ogavahariki ida.

Jesus Cristo kania avarakaramisini vani avakadivaꞌijahajahai avakadivaꞌibodivarani-ra nasohija bana.

8 Oigamina,

oananokhomiki bana hida kodivarani.

Vakavaꞌibodivaranihaꞌoadaha bana ida nahina jahaki,

Deua bivajahaki.

Vakavaꞌibodivarani bana ida varani kaꞌoa hini,

ijaꞌaria bikaimajahaki.

Vakavaꞌibodivarani jaboni ida varani asohiki kabodihadihariki varani asohirikia.

Vakavaꞌibodivarani jaboni bana ida varani asohiki ijaꞌaria vavajahaki,

khai vaniꞌaki.

Nimania ida avakadivaꞌibodivarani afohaꞌoadaha Deua bivajahaki.

9 Avakamithaꞌiki ida kodivarani,

avanokiꞌiki jaboni ida kodihojai.

Vakavaꞌihoki bana ida aꞌonira onavaꞌisohibakhiavini hiꞌiki.

Bada vaniꞌabakhia bana ida hojai aꞌonira okaꞌojomoꞌivini hiꞌiki jaboni,

oniani ida Deu-ra nahojaja avakadiania.

Ovari aꞌonira noꞌaki vaꞌi jahajahania.

10 Cristo kania oakaramisina mani ida khai hora niꞌaja.

Karahoꞌoamanija ida kodikhaiini.

Khai hora niꞌaki ida hora avakajoamoravini-ra avakaabokaꞌianavini.

Masiko ipohiki vani avakaabokarija ida hora avakajoamoravini.

Kodivarani hirihi ida hora avakavaꞌihokijanaravini.

Hora avanakaidivavini kabaꞌi,

masiko ipohikia ni-avakaabokajanaki ida hora avakakaronavini.

11 Kodivarani hirihi ida ijaꞌari hora akavaꞌiꞌbirinivini hora vanofijanaravini.

Oabono okaꞌojomoꞌivini hiki ida ovahojaki-ra ovaabisakariravini.

12 Oogaki ida kodinahina-ra okainamovini niha ninini.

Oogaki jaboni ida kodinahina ahabarini-ra ovahojavini niha ninini.

Kodinahina-ra ovahojavini,

kodinahina-ra ovahojaravini,

oabono okaꞌojomoꞌivini ovaꞌi-ra najahaꞌiki.

Mahi hana hini,

ibavi hana hinia ohojana ovaꞌi jahaꞌiki ho.

Oakharina,

ovaiꞌamina,

okanahinaꞌahapikina,

okanahinarina asia ovaꞌi jahaki ho afohaꞌoadaha.

13 Cristo danona hora noꞌavini mani ida nahina hahavi kodiania namithaki-ra okaabokavini hija.

14 Nahina jahariki namithabakhiani kabaꞌi kodiania,

ovajahaki ida hora avakajoamorabakhiavini.

15 Aꞌonivani,

kodivaꞌahi,

Filipos sidajia avahojaki,

avakavaꞌihokiki ida Macedônia kaarabonia ai ohiꞌina.

Avarigaki ida Jesus monina-ra oanamonionibiininivini avakadiania,

hora avakajoamoraꞌiki aꞌoni.

Jesus Cristo kaijaꞌari vahoariha ni-hora vanoꞌaꞌiki jiniroa.

Aꞌonivani kaꞌoa avakaronabakhiaꞌiki ida jiniro.

Hovani aꞌonira okajoamoraꞌiki ho jaboni.

16 Tessalônica sidajia ohojana kari jiniro-ra okainamohi,

ꞌbamija hora avakakaronaꞌiki aꞌoni.

17 Khai oniꞌavini kabaꞌi ida hora avanoꞌabakhiavini,

khai oniꞌavini arafiaki ida Deus aꞌonira naabosivini hora avakajoamoravinia.

Onofiki ida hora avakajoamoravini,

Deua bianaꞌbaꞌdija kaimoni ida abosini.

18 Hihida oathi kapapirani onajiriki,

aꞌonira onavaꞌisohivini hiki ida nahina hahavi avakaronaꞌiki ogathaniꞌiki.

Ahabariꞌiki ida.

Epafroditoa bivikhaꞌiki ida hora avanoꞌahahavivini hiꞌiki,

oniani ida nahina-ra okainamojanaravini hija.

Mitxaki ida misai jahani ijaꞌari Deu-ra vakanavaꞌigavini hiꞌiki.

Deua bikapoariki ida vakanavaꞌigavini,

bivajahaki ida.

Onivani fori hija ida hora avakanavaꞌigavini jiniroa,

Deua bivajahavini jaboni.

19 Nahina jahaki,

kaidivaki hahavi-ra vahojaki ada Deus.

Jesus Cristo kania avarakaramisini mani ida avakainamokia akadiDeus aꞌonira noꞌahahavivini hija bana.

20 Jahaꞌoamanira ada Deus akadiabiꞌi.

Mahi hahavi khai aniꞌahahaꞌoadahava.

Mahi anokhomirikia Deus jahana-ra khai aniꞌavini jahaki hari.

Nimania hida onofiki.

21 Vaꞌora akaꞌivanitihananaki adani Deus kaijaꞌari avajahamisiki Jesus Cristo kania.

Oigamina kodiania vahojaki aꞌonira vakaꞌivanitiki hadani jaboni.

22 Deus kaijaꞌari hahavi akadiania vahojaki aꞌonira vakaꞌivanitiki hadani,

hihadani arigamina arabo kakaꞌdaꞌdini gorana bodinia bada vakhaniki aꞌonira vakaꞌivanitiki hadani jaboni.

23 Onofiki ida akadikaꞌdaꞌdi Jesus Cristo aꞌonira kajoamorahaꞌoadahavini afohahavi.

Hari ida vani oamani Paulo athi anokhomiꞌini.