2 Vaꞌora avakavaꞌigairi bana adani makhira hojai jaharikia vakahojaiki.

Vajahariꞌoamanira adani.

Vanofiki ida vahoariha vaasafi namani-ra avanahadovini.

3 Vakhaniꞌimariniha adani makhira:

—Aasafi namania siikosida karajomihi-ra avahojavini mani ida Deus haria akavaꞌijoavini hija bana — vakhaniꞌimariniki adani.

Siikosida karajomihi-ra vavahojavini kabaꞌi,

ni-Deus kaijaꞌari vihiriha adani.

Harivani avahojaki ida siikosida karajomihi hoariha asohiki avaꞌi bodinia.

Cristo-ra avakaijokavini mani ida siikosida karajomihi asohikia haria kanarajomija.

Siikosida karajomihi asohiki-ra avahojavini mani ida Deu-ra akanamasivivinia Maꞌonahai Jahaki haria kakodiavini hija.

Ariabono khai aniꞌavini hiki jaboni ida Jesus Cristo kania aajahamisina.

Aasafi namania siikosida karajomihi-ra avahojavini kabaꞌi,

ni-avakaijokajanaki ida rajomi Deus haria akavaꞌijoaja kaimoni.

4 Asohija vaha hida siikosida karajomihi-ra ovakaijokavini;

okaabokahi vaha ida ovakaijokavini.

Cristo-ra oogaravini kari hovani onofivini arafiakaꞌoaki ida Deus kavaꞌisohihi jiriki,

rajomi,

kaaji hiki.

Akadijaꞌari kahojai hojai niki-ra onofivini aradahaki ho.

Ijaꞌari hojai niki ꞌboꞌda-ra vakaijokaki asia ohija vaha;

okaabokamanihi vaha ovakaijokavini.

5 Otanana kari mahi 8 hiki ipohini-ra ovahojavini siikosida karajomihia hora vakarajomiꞌiki adani.

Israel kaijaꞌari adani kodiabiꞌi,

kodiamia vihiki.

Kodiꞌarahoda okhananavaki ada Israel kohana kaisai Benjamim kohana oniki.

Kodijaꞌari avikhananavaki ni-vakamakhiraki,

ni-vaagamoki adani arabo hoariha kaijaꞌarini,

oniani ida judeus kaijaꞌari kaꞌoa hora nihaja,

oniani ida hebreu athinia haria naathija.

Farisio ohina kari ovakaijokaꞌiki ida Deus kavaꞌisohihi jiriki,

akadijaꞌari avikhananavaki vakadihojai,

vakadikaaji hiki.

6 Onofikarahoki ida Jesus Cristo kaijaꞌari-ra vaꞌora onihimavini.

Deua binofiki ovanihavini,

oniani ida vaꞌora onajahariharibakhiavini hija.

Deus kodihojai sohikaꞌoani-ra kahivini-ra onofivini mani ida kidivaꞌisohihi jiriki hahavi onaabavini oadodoki fori hora nihaja.

Ijaꞌaria bikaabokaja vaha ida Deus kavaꞌisohihi jiriki-ra naabavini;

onaabahahavimanihi vaha.

Ni-ijaꞌari hora avanaathidanoararivini hiki ida Deus kavaꞌisohihi-ra oragarivini.

7 Hari.

Cristo-ra oogaravini kari onakaidivaꞌiki ida Deus kavaꞌisohihi-ra onaabavini.

Onakaidivaki jaboni ida Israel kaijaꞌari ohina,

kaaji-ra ovakaajivini,

siikosida karajomihi-ra ovahojavini jaboni.

Kodihojai hora kakodiaki oabono ovanihavini mani ida Deus hora kapoariki oabono ovanihavini hija.

Hari.

Nimania hida kodivaꞌibodivarani ꞌboꞌdakari.

Cristo hora akavaꞌijoavini naothinia ni-onakaidivajanaki ida nahina ꞌboꞌdakari onakaidivaꞌiki.

Oogaꞌiki ida kodihojai ꞌboꞌda onakaidivaꞌiki hora kakodiapaꞌitxiravini.

8 Kodihojai,

nahina hahavi hoariha-ra ovakaijokaꞌiki,

ni-onakaidivajanaki.

Deus hora akavaꞌijoavini kaimoni hirihi ida,

oniani ida onakaidivapaꞌitxijanaravini hija.

Okavaꞌipahinikaꞌoaꞌiki ida,

ni-nahina kaimoni ovakaijokajanaki.

Cristo maina ada ovakaijokaꞌara.

Ovakaijokavini arafiaki ida Jesus Cristo ovaꞌi-ra nahonariahihivini,

kodikaꞌdaꞌdi hira kaimoni.

Onahokahiꞌiki ida nahina hahavi ovakaijokaꞌiki,

ogahinaja kaimoni Cristo hora kaibavijahahivini hiꞌikia kidiania.

9 Onofiki ida Cristo kania oakaramisijahakiꞌina.

Cristo-ra oogajoraravini Deus kavaꞌisohihi jiriki-ra onaabavini hiki Deus kodimahi sohikaꞌoani-ra kahivini-ra onofivini.

Deus kavaꞌisohihi jiriki-ra onaabavini kabaꞌi,

ni-Deus kodihojai sohikaꞌoani-ra kahiki.

Cristo kania oabono gahinai onihaꞌavini vani Deus kodimahi sohikaꞌoani-ra kahiꞌia,

kidiania oakaramisijahakiꞌiki ho.

Deus kodimahi sohikaꞌoani-ra kahivini hiki Cristo-ra ovakaijokaꞌavini.

10 Onofidoroki ida Cristo-ra oogavini kidiania oajahamisikaꞌoaꞌina.

Onofiki ida Deus danona Cristo-ra anahokiꞌiki ovaꞌi-ra nahonariahihivini.

Cristo imana ꞌbanani-ra kapoarivini vani onofija jaboni hida oimana ꞌbanani-ra okapoarivini Cristo fori ohija kaimoni.

Abono-ra vaꞌahaꞌiki ada Cristo abiniꞌina,

ovari fori ohija kaimoni jaboni oabono ovaꞌahavini-ra onofivini,

11 oniani ida oabinina kamahini Deus hora anahokiꞌianavini-ra onokhavini hija.

12 Hari.

Ni-oabono okavaꞌibodivaranivini hiki ida hojai jahakaꞌoaki-ra oragarijanaravini,

ni-onasohikaꞌoaꞌiaki kaho.

Ni-kodihojai jahaki avijavaki akhanomiꞌiaki kaho.

Oadodona okiꞌdarahaki fori ohiki ho,

okaitoniaja kaimoni ida Deus hora niꞌajoravini hiki-ra ogathanivini.

Jesus Cristo hora gathanivini hiki ogathanija kaimoni ida hora kaibavijahahivini hiki.

13 Oigamina,

ni-okavaꞌibodivaraniki ida Deus hora noꞌavini hiki kaimonia ogahinana kaho.

Ijaꞌari kiꞌdarahani vada niribanirini fori ohiki ho.

Ni-okavaꞌibodivaranijanaki ida hahavi okavaꞌipahiniꞌiki,

omathaja hojaki fori hiꞌiki ida.

Ijaꞌari adodoni kiꞌdarahaki saꞌani aakhananavaki fori ohina,

okaitoniaja kaimoni ida Deus hora kaibavijahahivini hiꞌiki oviaha.

Nimania hida hihida kodibadani okiꞌdarahaki fori ohina.

14 Kiꞌdarahihi ibavini kania oasohimihi,

oasokoki fori ohiki ho okiꞌdarahana,

ogathanija kaimoni ida Deus hora kaibavijahahivini hiki.

Deus hora kaboaꞌiꞌihi,

ogathanija kaimoni ida mahi jaꞌdini anokhomiriki oajahamisiꞌina Jesus Cristo kania.

15 Nimania hida akavaꞌibodivaranivini jahaki,

harivani ajariꞌdarina avijavani akhanomini amaakariki hari.

Vahoariha avakadiania vahojaki vakadivaꞌibodivarani vahabini akadivaꞌibodivarani fori hirihi.

Deus vaꞌora kakodiaki bana adani,

vanasohija kaimoni ida vakadivaꞌibodivarani.

16 Hihavirini kabaꞌi ida akadivaꞌibodivarani,

hojai jahaki avakaꞌojomoꞌiꞌikia vakahojaihaꞌoadahaꞌa.

17 Oigamina,

kodihojai-ra vakabanafohahavi bana,

nahina bada oniꞌaki,

bada vaniꞌa jaboni.

Vada vaꞌora vaniꞌa bana adani haria vakabanafojahakiꞌiki,

avakabanafoja kaimoni ida vakadihojai.

18 Hihida varani aꞌonira onavaꞌisohibakhiaꞌiki ho,

oasarana aꞌonira onavaꞌisohiꞌianaki bana ho.

Vara vaꞌora oniꞌaki adani Cristo kahojai-ra vakajoniki.

Vavajahariki ida Cristo abiniꞌina varani hini vakadimoni ava akasanakhamakia.

19 Vakadideus fori hiki ida vakadiꞌbai,

vakadinahina hiki-ra vakavaꞌinofinofivini khai vaniꞌavini,

oniani ida Ibavi Jaharikaꞌoaki kania vaꞌora arakhaja bana.

Vaabono vavaboraborahavini hiki ida badani kaipahivahakia vakabadanibakhiana.

Vakavaꞌibodivaranihaꞌoadahaki ida nahina araboja hojaki vanofiki vakadimoni hini vaabinirina oadani.

Ni-vakavaꞌibodivaraniki ida vakadimahi niha ninini vaabinina naothinia.

20 Harivani aribavi kaꞌoa kaimoni ida Deus ibavi nama hojaki.

Namajaja khana anaviahanokhaꞌiki ada haria akavaꞌijoaꞌiki,

akadikaꞌdaꞌdi Jesus Cristo.

21 Cristo ariabono,

aasafi,

ajarona hiki-ra anajaꞌdiki bana.

Hidiaja arihojana oadani,

ni-aꞌboꞌdaki ida aasafi,

abiniki bana ida.

Cristo ahokiꞌina naothinia jahaki,

danoki,

aꞌboꞌdaki ida abono,

asafi,

jarona hiki.

Cristo ogahai danoki-ra vahojavini mani ida nahina hahavi amonahaꞌiki-ra honariavini-ra kaabokavini hija.

Cristo kaꞌogahai danokia bianahoarihaki jaboni bana ida ariabono,

aasafi,

ajarona hiki,

kidiani fori hija kaimoni,

abinijanarini.