Nimania bana hida Cristo abono-ra kavaꞌibodivaranivini
2
Cristo kania avarakaramisijahakini mani ida avavaꞌini bodini-ra nadanoja.
Cristo aꞌonira nofijahakivini mani ida avavaꞌini-ra najahaja.
Maꞌonahai Jahaki ibaviha avakadiania,
oniani ida avaabononi avakakajoamorakhamavini hija,
avaabononi avakanakaidivakhamavini hija jaboni.
Kaꞌoa hiki hida varani,
2 oniani ida aꞌonira okanikhariavini hija kodikhaiini-ra avaranaꞌbaꞌdivini.
Onofiki ida avakadivaꞌibodivarani-ra avaranajahamisivini aꞌbaꞌdini.
Onofiki ida avaabononi avakanakaidivakhamavini-ra avaranajahamisivini jaboni.
Ijaꞌari hoarani kavaꞌibodivarani fori hiva bana ida avakadivaꞌibodivarani afohahavi.
Nimania bana ida avakadihojai kodikhaiini-ra anaꞌbaꞌdivini.
3 Avakavaꞌibodivaranivini kabaꞌi ida avanofiki afohanana,
hariꞌa avakavaꞌiꞌbirini bana ida hoariha nahina bivajahaki jaboni.
Avakadibadania avakabadanihi,
hariꞌa vakavaꞌinofinofi bana ida avakadibadani jahani arafiani-ra vakahivini.
Avaabononi vakavaꞌibodivarani bana afohanana hoariha kakodiava abono avihinia.
Vakavaꞌibodivarani bana ida vahoariha vajahana avajahani-ra aradavini.
4 Vakavaꞌibodivaranibakhia bana ida nahina hoariha bivajahaki bivajahariki.
Hariꞌa aꞌonivani kaꞌoa avaabononi vakavaꞌibodivaranihaꞌoadaha nahina avanofikia afohanana.
5 Cristo kavaꞌibodivarani fori vaniha oni avakadivaꞌibodivarani jaboni.
Nimania bana hida Jesus Cristo abono-ra kavaꞌibodivaranivini:
6 Kamaꞌdani kaꞌoa Cristo Deus kahojaia kahojaihaꞌoadahaki.
Kabaꞌi,
ni-Cristo abono-ra niꞌaki:
“Deus ohina mani ida
makhira ohina-ra
onofiravini hija bana.”
Ni-niki ida kidivaꞌibodivarani.
7 Oniaroa Cristoa binahojahaꞌihi ida nahina hahavi Deus kania bivahojaki.
Honai abono hiꞌaha ada Cristo.
Deus hina kabaꞌi,
isai ihiꞌaha ꞌbanaꞌaha,
tanaꞌaha,
avijavaꞌaha,
makhira hiꞌina nokiaꞌaha.
8 Ni-abono-ra vaboraborahaki Deus hina.
Kidiabiꞌi Deus kahonai abono hiꞌina,
binaabahahaꞌoadahahi ida Deua binofiki.
Abinina Deua binofiha,
abinimaniꞌaha ava
akasanakhamakia.
9 Cristo abiniꞌina abono-ra
vaꞌahavini mani ida
Deua biakaboaꞌisivini hiꞌia kidiania namajaja.
Kaꞌdaꞌdi danoki hina Deua bikaboaꞌiꞌaha ꞌdihana
vithina.
Ni-hojaki ida ijaꞌari hoariha danoki,
jahaki,
ovari fori hiki,
oniani ida akadikaꞌdaꞌdi Jesus Cristo onina
jahani-ra anarafiaja.
10 Ijaꞌari,
nahina hahavi hiki nama vahojaki,
ijaꞌari,
nahina hahavi hiki araboa vahojaki,
ijaꞌari hahavi kohana vaibavia vahojaki
vakajoꞌathararihahaviki bana adani Jesus viaha.
11 Athii ꞌbarakia vakhanihahaviki bana adani:
“Hahavi kakaꞌdaꞌdi kaꞌoa hada Jesus Cristo.”
Jesus nahina hahavi kakaꞌdaꞌdi hina-ra vakahivini vani vanamonija ida Deus jahana,
danona,
vagana hiki.
Ovari Jesus kaabiꞌi ada.
Joma bakibakini-ra navagaki fori vihiki adani Cristo kaijaꞌari
12 Kodivaꞌahi,
aꞌonira onofijahakiki aꞌoni.
Avakadiania ohojaꞌina oathi-ra avanaabahahaꞌoadahaꞌiki aꞌoni.
Ohojarina kabaꞌi avakadiania,
onofiki ida oathi-ra avanaabajahakivini asia.
Deu-ra avavavaꞌihavini vani vanofijahaki ida athi avanaabavini.
Deu-ra avifinivini vanamonaha bana ida binofiki mahija aꞌonira akavaꞌijoavini avarananokhomivini.
13 Deus vania bada biniꞌahahaꞌoadahaja ida kidibadani avavaꞌini bodinia,
avanamonahaja kaimoni ida badani binofiki,
avakavaꞌibodivaranija kaimoni jaboni ida vaꞌi bodini vara nini binofiki.
14 Hariꞌa vahoariha-ra vakaꞌdaꞌdigariabakhia.
Hariꞌa avaabononi avakanaathidanoararikhama jaboni
15 mahija avakadihojai jahani asohivini,
Deus kaisai jahakaꞌoaki avihija kaimoni.
Ijaꞌari hojai karamonavahakia vakahojaiki vahararana avahojaki aꞌoni.
Jahari kabadania vakabadanibakhiaki adani.
Boviria binavagajahakiki ida joma bakibakini.
Jesus ijaꞌari kamahi-ra anajaꞌdivini kavaranihi-ra vara avavaniꞌavini vani boviri vagana fori avihiꞌiki aꞌoni,
16 oniani ida ijaꞌari Deu-ra avigariki hojai asohiki-ra vanokivini hija.
Avanaabajahakiki ida aꞌonira onavaꞌisohivini hiꞌiki,
Cristo joina kamahini,
Cristo viaha oabono khai oniꞌaki bana ho avakadihojai jahakia.
Hora nakoikarahoꞌiki ida kodibadani avakadimoni,
oadodoꞌoamaniꞌia.
Avajahani nokiani kamahini vani bada oniꞌimarinirina-ra oogaki ho.
17 Hora vanaabiniki vahabini bana adani.
Oabono okavarajomivini hiki ida igitha abononi ijaꞌari Deu-ra vakanavaꞌigavini.
Ahovariꞌiki ida igitha amani.
Onivani fori hija bana vahabini ida oabinina Deus kaimoni ohina.
Deu-ra avavakaijokavini mani ida jaboni Deu-ra avakanavaꞌigavini hija avakadinahina avanakaidivakia.
Hora vanaabiniha;
khai onihi.
Onofiki ida avakadiania khai akhanijabanana.
18 Aꞌonivani khai avakhanini vani onofija ida khai avakhanijabanani jaboni kodiania.
Timóteo, Epafrodito varani vihina hida
19 Akadikaꞌdaꞌdi Jesua binofihi ida Timóteo-ra okaronavini avakadiania;
okaronaha.
Kodiania joina vani hora nanamithavini hija bana ida varani avihini,
khai oniꞌaja kaimoni ida avamonini.
20 Timóteo hoarana hofori hiki,
bikavaꞌibodivaraniki ida kodivaꞌibodivarani.
Aꞌonira nakaidivaꞌoamanira ada.
Binofiki ida aꞌonira kakodiavini.
21 Vahoariha vani adani vaabono vaakodiavini-ra vanofihananaha.
Ni-vanofiki ida Jesus Cristo-ra vaakodiavini.
22 Avarigaꞌiki ida niha ninini Timóteo hora kakodiajahakivini afohaꞌoadaha.
Onakaidivaki ida kidibadani.
Isai,
kidiabiꞌi khama bada vakhanijabanaki fori hiki ida Timóteo hora kakodiavini Jesus monina-ra aanamonionivinia.
23 Onofiki ida Timóteo-ra okaronajorakivini avakadiania.
Ni-oogaki kaho ida hora vanaabinivini hora vanaabiniravini.
Oogavini kamahini okaronaki bana ada.
24 Okajariꞌdarihi ida Jesua binofivini aꞌonira onavanavanahajorakivini jaboni.
25 Okavaꞌibodivaraniꞌiki jaboni ida jahaki arigamina Epafrodito-ra okaronavini ajoina avakadiania.
Avakaronaꞌiki ada kodiania hora kajoamorara kaimoni.
Kodikakodiahi abono ada.
Jesu-ra vavajaharikia vanofiki ida akadibadani-ra vanadabavini,
hora kakodiaꞌiki ada Epafrodito.
26 Aꞌonira kavaꞌibodikarahovini vani binofija ida aꞌonira nokihahaviꞌianavini.
Epafroditoa bikamithaꞌiki ida kavamonina varani hini joiribaniꞌini.
Kavamonikarahona avarigavini mani ida aꞌonira kavaꞌibodivini hija.
27 Kaꞌoa ida varani hina.
Karahoꞌoamaniꞌia ida kidikavamoni.
Abinikamariꞌiki ada.
Deua bivaꞌadiꞌiki ada,
oniani ida anaihotana hiꞌia.
Hora vaꞌadiki ada jaboni,
okamitharia kaimoni ida ovaꞌi mokara nini arafiani.
Abinira vaha;
ovaꞌi mokara nimanihi vaha.
28 Oniani ida avakadiania Epafrodito-ra okaronajorakivini-ra onofivini hija.
Avanokiꞌianavini vani khai avaniꞌaꞌianaja kaimoni ida avakadiania ajoina,
oniani ida ovaꞌi soko inini-ra nafaiinija bana.
29 Jesus ipohina hina mani ida avaigamini nihana hija.
Kaikahina vani vagathanijahaki bana khai avaniꞌavini.
Vanakaidiva bana.
Vaꞌora vanakaidiva jaboni adani avaigamini vahoariha vakadihojai jahaki Epafrodito kahojai jahaki fori hiki.
30 Hora kakodiavini hiꞌiki ida akiroꞌina abinikamariꞌina.
Badani Cristoa binofikia kabadanina mani ida naabinikamarina hija.
Hora avakakodiavini-ra avakaabokaravini mani ida Epafrodito hora kakodiavini hija.