2-3 Deus kavaꞌisohihi jirikia hojaki hida honari:

4 Isai vakadiabiꞌi,

vakadiamia,

vara aꞌonira oniꞌaki bana ho.

Hariꞌa vaꞌora vakajaꞌoriahaꞌoadaha adani avakadisai afohanana mahija vavaꞌi aitapiaravini.

Vaꞌora avarakadavaꞌavini vani vaꞌora vakaꞌojomoꞌi hojai jahaki Cristoa binofikia,

vaꞌora vakaabanijahaki jaboni bana.

5 Kaꞌdaꞌdi kahonai abono kapavakarivahaki,

vara aꞌonira oniꞌaki bana ho jaboni.

Avakadikaꞌdaꞌdi aꞌonira vakapavakariꞌiki aꞌoni.

Vaꞌora avavavaꞌihavini vani vanaabahahaꞌoadaha ida avakadikaꞌdaꞌdi vaathi hahavi afohanana.

Vaꞌora vifini jaboni bana.

Hariꞌa avakadikaꞌdaꞌdi vavaꞌi-ra vavajahaꞌimarini.

Cristo kaimoni badania avakabadanini vani fori hiva ida badani avakadikaꞌdaꞌdi-ra avakabadanivini.

6 Avanofiki ida avakadikaꞌdaꞌdi khai aꞌonira vaniꞌavini afohanana,

oniani ida vada aꞌonira vaniꞌavini vakadihonari avanaabavini hija.

Jahaki ida vada aꞌonira vaniꞌaravini jaboni vakadihonari avanaabavini.

Cristo kahonai abono aꞌoni,

oniani ida badani Deua binofikia aꞌonira kanabadanija,

avakajoniravini adodoki fori vihiꞌa bana.

7 Avakadikaꞌdaꞌdi kabadania avakabadanihi;

khai vakhanihaꞌoadaha bana bada avakhanini.

Avakadikaꞌdaꞌdi kaꞌoa kaimoni hirihi ida avakadibadani.

Avakadikaꞌdaꞌdi Cristo kaimoni jaboni ida badani.

8 Vakavaꞌihoki bana hida varani.

Cristo vaꞌora noꞌaki bana adani ijaꞌari hahavi vakadibadani jahaki abosinia.

Vaꞌora noꞌaki bana adani kaꞌdaꞌdi kahonai abono kapavakarivahaki vakadibadani abosinia.

Vaꞌora noꞌaki jaboni bana adani honai abono vakadikaꞌdaꞌdi vakadibadani abosinia.

9 Honai abono kapavakarivahaki vakadikaꞌdaꞌdi,

vara aꞌonira oniꞌaki bana ho jaboni.

Vaꞌora vanaibavijahajahaki bana adani avakadihonai abono.

Hariꞌa vaꞌora vanajarajaraha vaꞌora avakajaꞌoriavini vaꞌora avanajahariharivini.

Vakavaꞌibodivaraniꞌa bana ada avakadihonai abono vakadikaꞌdaꞌdi kaꞌoa nama hojaki.

Ovari Cristo avakadikaꞌdaꞌdi jaboni ada.

Aꞌonivani,

avakadihonai abono khama kidihonai abono avihihahaviki aꞌoni.

Ni-Deus vaꞌora kavaꞌibodivaraniki bana adani ijaꞌari hana vihina kaꞌdaꞌdi,

hana vihina honai abono,

vakadihojai abosini kamahini.

Deua biogahananaki ida ijaꞌari vakadibadani jahaki jahariki,

vaꞌora naabosira kaimoni.

10 Hari.

Jesus kania avarakaramisini vani vagathani bana ida Deus danona mahija avadanoꞌavini.

11 Aꞌonira okavarajomivini hiki ada sorara makari ꞌdakhaki-ra kaimahaki,

hoariha kasaꞌaia bianakhararara kaimoni.

Sorara makari ꞌdakhaki-ra vakaimahavini fori vihiꞌa.

Deus aꞌonira noꞌavini-ra vakaimahaꞌa bana mahija avaabononi avanadanovini,

oniani ida Jahari aꞌonira kaboroborovini-ra kaabokaravini hija.

12 Ni-vaꞌora asakaki fori vihiki adani ijaꞌari vahoariha.

Jahari kaijaꞌari vanokiariki vadanoki vani adani vaꞌora asakaki fori vihira.

Anofiki ida vaꞌora anihimavini.

Nama jararinia vaibaviki adani ijaꞌari vanokiariki vajahariki.

Vaꞌora vavakaꞌdaꞌdiki adani makhira,

gamo vihiki arabo hahavia vahojaki.

Jahari,

kidijaꞌari khama vaꞌora vanavaꞌihonariahihiki adani ijaꞌari bakibakiki fori hikia vaadahaki.

Jaharia binabakibakiki fori hiki ida ibavi hahavi.

13 Oniani ida aꞌonira ohonariavini hija makari ꞌdakhaki fori hiki-ra avakaimahavinia.

Deus aꞌonira noꞌavini hiki bana ida danona.

Khaki bana ida mahi jaharikaꞌoaki,

Jahari,

kidijaꞌari khama aꞌonira vakaboroborovini kamahini.

Vakadisaꞌai fori hiki ida vakadikaborohirohi.

Vanofiki ida aꞌonira vanadanodanoki fori vihina,

aꞌonira avarokojohoki fori vihina jaboni.

Avakaabokaki ida avaadaririni.

Aꞌonira vakaboroborovini oadani,

hariꞌa vakapoari ida vanofiki,

vakavaꞌiradaadaa bana.

Vaꞌora avanadanodanovini oadani avigaakosoani vaꞌdakha bana,

ni-avaradaripaꞌitxiki,

ni-avarajoꞌohaki.

14 Avaabononi vanaibavijaha bana mahija sorara makari ꞌdakhaki-ra kaimahavini fori avihivini.

Sorara jararia kidicinturão-ra nakaramisivini vani fori hija ida Deus athi kaꞌoa hini-ra vara avavaniꞌavini.

Vara vavaniꞌa bana ida athi.

Sorara makhoꞌini akaꞌoahani ꞌdakhaki-ra kaimahavini vani fori hija ida hojai jahakaꞌoakia avakahojaihaꞌoadahani.

Hojai jahakaꞌoakia vakahojaiꞌa bana.

15 Sorara kidisapato-ra kakaꞌdamahavini fori hija ida avaabononi avanaibavijahavini Jesus monina-ra avaranamonionija kaimoni.

Jesus monina-ra avanamonioni bana mahija Jesus monina-ra vakapoariki Deus vavaꞌi binajahajahavini.

16 Sorara viaha kidiꞌakaꞌoahi ꞌdakhaki-ra gathivini vani fori hija ida Deu-ra avavakaijokavini.

Deu-ra vavakaijokahaꞌoadaha bana,

athi vakapoarihaꞌoadaha jaboni.

Sorara viaha bigathihahaꞌoadahavini binahojaki ida kidiꞌakaꞌoahi ꞌdakhaki abono-ra akaꞌoahavini,

oniani ida hoariha kasaꞌai,

abiha kahaꞌdiki kihiki-ra agathanivini hija.

Kidiꞌakaꞌoahia bikanamokhiki ida abiha kahaꞌdiki.

Deu-ra avavakaijokahi;

sorara kidiꞌakaꞌoahia abono-ra akaꞌoahavini fori avihihi.

Ni-Jahari kasaꞌai aꞌonira kaitoniaki.

17 Sorara sapiva kaꞌdakhaki-ra kakaꞌdaꞌdihavini vani fori hija ida Deus aꞌonira akavaꞌijoavini-ra avakapoarivini.

Vakapoari bana ida Deus aꞌonira akavaꞌijoavini afohaꞌoadaha.

Sorara kasaꞌai fori hiki ida Deus athi Maꞌonahai Jahaki aꞌonira navaꞌisohivini hiki.

Vakapoari bana hida Deus athi mahija Jahari-ra avakavasaꞌaivini hini.

18 Makari ꞌdakhaki fori hiki-ra avakaimahavini oadani Deu-ra vakanikharia bana mahija aꞌonira kakodiavini.

Badani hana hinia avakabadanihi;

Deu-ra vara vaniꞌahaꞌoadaha bana.

Vavaꞌaha bana ada Maꞌonahai Jahaki aꞌonira kakodiavini Deu-ra vara avaniꞌavinia.

Avaabononi avakavaꞌigairi bana.

Hariꞌa bana vakavaꞌipahiniꞌa ida Deu-ra avakanikhariavini.

Deu-ra vakanikharia bana kidijaꞌari hahavi-ra vaꞌora kajoamoravinia.

19 Deu-ra vakanikharia bana jaboni hora kajoamorara kaimoni.

Deu-ra vaniꞌa bana:

—Deus,

anofiki ida Paulo-ra inavaꞌisohibakhiavini vara vaꞌora niꞌara kaimoni adani ira avigariki.

Ikajoamora bana ada Paulo mahija kidivarani kamithani vihiki-ra vaꞌora finiravini.

Anofiki ida Paulo vaꞌora navaꞌisohijahakivini Jesus monina nahina hini ijaꞌaria avigaꞌiarikia — nimania hida Deu-ra avakanikhariavini athini kodimoni.

20 Jesus Cristo hora honariavini hiki monina vara ovaniꞌabakhiavini,

ijaꞌari vaipohikia vakamithaja kaimoni.

Monina oanamonioniꞌavini mani ida cadeia Jesu-ra vanofiriki hora avibaivini hiꞌia.

Deu-ra vara vaniꞌa bana kodimoni mahija vaꞌora ofiniravini Jesus monina-ra onamonivini.

21-22 Arigamina Tíquico aꞌonira nanamithaki bana aꞌoni omonina.

Onakaidivaki hada arigamina.

Ni-bikavaꞌipahinipaꞌitxiki ida Cristo kabadani.

Okaronaki bana hada avakadiania,

varani arihina hahavia aꞌonira nanamithara kaimoni,

khai avaniꞌaja kaimoni hida akadimahi jahani hojani.

23 Vara vaꞌora oniꞌaki adani akadiabiꞌi,

akadikaꞌdaꞌdi Jesus Cristo vihiki avakadimoni.

—Deus,

vaꞌora noꞌa bana adani arigamina hahavi Cristo kaniaja vaꞌi jahajahania.

Onofiki ida vaabono vakanakaidivakhamajahakivini.

Onofiki ida ira vakajariꞌdaravini,

ira vavakaijokavini jaboni.

24 Onofiki ida vaꞌora ikajoamorahaꞌoadahavini adani akadikaꞌdaꞌdi Jesus Cristo-ra vanakaidivaki afohaꞌoadaha mahi anokhomirikia — nimania hida Deu-ra okanikhariavini athini.