Deus kahojaia vakahojaiꞌa bana
5
Hari.
Deus kaisai avihiꞌiki aꞌoni,
aꞌonira nakaidivaki ada.
Isai kidiabiꞌi kahojai-ra kabanafovini vani fori vihiꞌa.
Deus kahojai-ra vakabanafoꞌa mahija ovari fori avihivini.
2 Cristo haria nakaidivavini vani fori vaꞌora vaniha adani bana vahoariha vaꞌora avanakaidivavini.
Cristo haria nakaidivavini mani ida naabinina hiꞌia akadimoni,
haria akavaꞌijoara kaimoni.
Deu-ra khai niꞌaki ida Cristo abiniꞌina akadimoni hiꞌina.
Ijaꞌari Deu-ra vakanavaꞌigavini igitha abononi ahaꞌdiki,
misai mitxaki hikia Deu-ra khai vaniꞌara kaimoni.
Ijaꞌari Deu-ra kanavaꞌigavini vani fori hija ida Cristo kabadani akadimoni,
oniani ida Deu-ra khai niꞌaꞌia.
3 Deus kaijaꞌari aꞌoni,
oniani ida Jahari kabadani-ra avakavaꞌipahinikaꞌoavini-ra najahaja.
Hariꞌa makhira kidigamo hiriki khama vaabono vakaviꞌomakhamava.
Hariꞌa gamo,
makhira vihiki vajaharina-ra avakanabadakhamava.
Hariꞌa hoariha kanahina-ra avakabai.
Ni-jahapaꞌitxiki ida hojai nikia avakahojaini,
vahoariha aꞌonira vakanavaraniharia kaimoni.
4 Hariꞌa varani ihivadi hojakaꞌoari jahariki-ra vara vavaniꞌa.
Hariꞌa jaboni varani karamonavahakia vakavarani,
ijaꞌari-ra anavaꞌiꞌaipahihiki.
Varani kaimajahavahariki ida varani niki.
Ni-nikia avakavaranini asohiki.
Hari.
Varani jahaki kaꞌoa vania avakavaranini jahaja.
Jahaki ida Deus aꞌonira kajoamoravini kavaranihi kaꞌoa avakavaranini,
Deu-ra khai avaniꞌavini.
5 Avigajahaki bana,
Deus,
Cristo khama vakadijaꞌari hirihi ida Jahari kabadani-ra nofiki.
Ni-vaꞌora vavakaꞌdaꞌdiki adani makhira kidigamo hiriki khama vaabono vakaviꞌomakhamaki.
Ni-vaꞌora vavakaꞌdaꞌdiki adani gamo makhira vihiki vajaharina-ra avakanabadakhamaki.
Ni-vavakaꞌdaꞌdiki jaboni ida ijaꞌari hoariha kanahina-ra akabaiki.
Ijaꞌari akabajahakia bikavaꞌinofinofiki ida kidinahina aꞌbaꞌdini arafiani,
oniani ida kidinahina-ra kidideus nihavini hija.
Deus amovana-ra kanamasiviki fori hiki ida ijaꞌari.
Hari.
Deus,
Cristo khama ijaꞌari-ra vavakaꞌdaꞌdivini ibavinia ni-vahojaki bana adani hojai nikia vakahojaiki.
Ni-vagahinaki jaboni Deus ijaꞌari-ra kaibavijahahivini hikia.
Cristoa binavagaki fori hiki ida kidijaꞌari vakadimahi
6 Vakajariꞌda bana ida korijanahi ijaꞌari aꞌonira vara vaniꞌavini hiki,
makhanirini vakahiki ida Jahari kabadani.
Jahari kabadani vara ovaniꞌaꞌikia vakabadanibakhiaki adani Deus athi-ra vanaabariki.
Deua bikaihamahiki ida vakadihojai,
oniani ida jaharikia Deus vaꞌora arakhavini hija bana.
7 Avakaraꞌo bana ijaꞌari aꞌonira vakorijanahaki Jahari kabadania vakabadaniki vahararana.
Ni-nahina kaimoni hiꞌadani ijaꞌari vahararana avahojaki.
8 Deu-ra avarigaravini kari aꞌonivani jaboni nikia avakahojaiꞌiki aꞌoni.
Avakavaꞌibodivaraniꞌiki ida Jahari kavaꞌibodivarani,
oniani ida joma bakibakinia avaadahaki fori aꞌonira nihaꞌia.
Hari maha.
Deus kaijaꞌari avihiꞌini mani ida mahi vagania avaadahaꞌiki fori aꞌonira nihaꞌia.
Mahi vagani kania vahojahahaꞌoadaha bana.
9 Nimania hida bana ijaꞌari mahi vagakia adahaki fori hiki kahojai.
Bikajoamoraki ida hoariha,
bada biniꞌaki ida hojai asohiki jahaki.
Vara bivaniꞌaki ida varani kaꞌoa hini.
Mahi vagania adahani mani ida kidihojai jahaki ihiꞌai aꞌdini anosoroniki fori nihani hija.
10 Avaabononi vakaꞌojomoꞌi bana hojai Deu-ra khai niꞌakia.
11 Hari.
Joma bakibakinia vaadahaki fori vihiki adani ijaꞌari Deus athi-ra vakajoniki.
Vakadibadani ni-avakadimoni hini jahaki.
Mahi vagani kania vaꞌora vavikha bana mahija hojai asohiriki-ra avigavini.
12 Ijaꞌaria vara bivaniꞌahi ida vakadibadani ahojaki,
vaꞌi-ra anaipahihiki.
13 Vagani kania hojaki ida ijaꞌari kahojai,
vagania binanokiaki ida nahina hahavi jahaki jahariki.
14 Bakibakiki kania vagaꞌiki ida vagani,
avisoniꞌiki ida bakibakini.
Nimania hida athii papira hojaki:
“Ivani,
ivadiki fori ihiki i.
Inokhoni aforaꞌava bana.
Abiniki fori hiki ida
imaꞌonahani.
Ahokiꞌa bana
mahija Cristo kadamahi-ra
najahaꞌavini.”
Nimania ida ijaꞌari athini.
15 Avaabononi avakavaꞌigairi bana avakadihojaia avakahojaini.
Hariꞌa Cristo-ra avigariki vakadihojaia vakahojai.
Ijaꞌari avigahaki vakadihojaia vakahojai bana.
16 Ibavi hahavia nokiaki ida Jahari kahojai.
Hariꞌa avanakavithimaki fori hiva ida avakadimahi.
Bada vaniꞌa ida badani jahaki Deua binofiki bada avaniꞌavini.
17 Hariꞌa vaꞌihariki fori vihi bana.
Avarigavini vanofi bana ida badani hana hinia avakabadanini Deua binofiki.
18 Hariꞌa vakahano bana.
Avakahanohi;
avakadimahi-ra najaharihi.
Hariꞌa avavaꞌini-ra nahonariahihiva ida ijaꞌari-ra nakahanoki.
Vavaꞌaha bana ada Maꞌonahai Jahaki avavaꞌini-ra nahonariahihivini.
19 Avakadiania vara vavaniꞌa bana ada Deus.
Vara vavaniꞌa bana ida Deus athi papira moroa kahojaki,
moro kahoariha Jesu-ra khai avaniꞌavini kamoroni.
Maꞌonahai Jahaki avavaꞌini-ra nahonariahihivini vani vaahia bana mahija Deu-ra khai avaniꞌavini avakadimoro kaathia.
Vakanamonaha bana ada moro.
Avakadimoro kaathi hiva ida Deus aꞌonira kajoamorabakhiaꞌavini.
20 Deu-ra vaniꞌabakhia bana:
—Akadiabiꞌi,
akadikaꞌdaꞌdi hiki ada Jesus Cristo,
oniani ida vara ira aniꞌavini hija.
Jahaki ida nahina hahavi ikaronaꞌiki akadiania.
Ivani ijahaki i akadimoni ihini.
Ivani akadiDeus i,
akadiabiꞌi jaboni i,
oniani ida haria iakadavaꞌajahakivini hija afohaꞌoadaha — Deu-ra vaniꞌa bana.
21 Cristo-ra avavavaꞌihavini mani ida avaabononi avakanavaꞌisohikhamavini-ra avanaabavini hija.
Paulo vaꞌora navaꞌisohiki adani makhira, vakadigamo vihiki
22 Gamo vakamakhiraki,
vara aꞌonira oniꞌaki bana ho.
Vanaaba bana ida avakadimakhira vaathi afohanana.
Cristo athi-ra avanaabavini vani fori vaniha ida avakadimakhira vaathi-ra avanaabavini jaboni afohanana.
23 Cristo haria vakaꞌdaꞌdivini vani fori hiki ida makhira kidigamo-ra vakaꞌdaꞌdihananavini jahani jaboni.
Cristo vaꞌora akavaꞌijoaꞌiki adani kidijaꞌari.
Kidijaꞌari arihiki hari.
Cristo abono arihiki hari jaboni.
24 Cristo athi-ra anaabavini vani fori vihira adani gamo vakadimakhira vaathi-ra vanaabavini afohanana jahani jaboni.
25 Makhira vaagamohananaki,
vara aꞌonira oniꞌaki ho.
Cristo haria nakaidivaki hari.
Kidijaꞌari hari.
Abono-ra vaꞌahaꞌiki ada abiniꞌina akadimoni,
onivani fori vihiva adani makhira vakadigamo-ra vanakaidivahananavini.
26 Cristo abono-ra vaꞌahaꞌiki abiniꞌina kidijaꞌari arihija kaimoni.
Binofiki ida Deu-ra kanavaꞌigavini arihina.
Cristo Deu-ra kanavaꞌigavini viahania vaꞌora sokoꞌimidiaki fori vihiki adani kidijaꞌari afohanana paha bodinia,
kanai karajomihia.
Kidivarani vani vaꞌora najahakaꞌoara adani.
Vakhanina vani Cristo Deu-ra kanavaꞌigavini vihira adani.
27 Joina kamahini Cristoa binofiki ida kidijaꞌari vajahakaꞌoana-ra gathanivini,
hojai jahakaꞌoakia vakahojaina.
Maisa kidigamo-ra gathanivini fori arihina.
Cristo kaimoni arihihahaviki hari.
Haria nofivini ajahakaꞌoana.
Adojodojoki fori arihirihi,
aꞌdaniki fori arihirihi jaboni,
ramaramahaki fori arihirihi jaboni.
Ajahakaꞌoana vani Cristo haria nofija haria gathanivini kidijaꞌari arihija kaimoni joina kamahini.
28 Makhira avaabononi avanakaidivavini vani fori vaꞌora vaniha bana adani avakadigamo.
Makhira kidigamo-ra nakaidivaha;
abono-ra nakaidivaha jaboni.
29 Ni-ijaꞌaria bikaimajahariki ida abononi.
Binakaidivaki ida.
Binoꞌbaiki ida abononi,
biakadavaꞌaki ida jaboni.
Onivani fori vihira adani Cristo kaijaꞌari jaboni,
vaꞌora akadavaꞌavini.
30 Cristo abono niha nini hahavi hari.
31 Deus athi kapapirania hojaki hida athii:
“Kidigamo-ra anakaravini mani ida makhira
kidiamia,
kidiabiꞌi vihiki-ra vaꞌora aakaraꞌovini hija.
Makhira,
kidigamo khama avakarana viahania
viꞌbamiha.
Avaakaraꞌina naothinia
ijaꞌari hoarani fori
vihina vahojaꞌaha,
kidigamo khama.”
Niki hida Deus athi.
32 Ijaꞌaria vakamithavini kabaꞌi,
ni-avigahahaviki hida varani nahina hini.
Deus haria navaꞌisohijahakivini hiꞌiki ida makhira,
kidigamo khama varani vihina,
vara bivaniꞌaki jaboni ida Jesus Cristo kidijaꞌari khama varani vihina niha vakhanikhanina.
Ijaꞌari hoarani fori hiki ada Cristo kidijaꞌari khama.
33 Deus vara aꞌonira niꞌavini jaboni.
Binofiki ida makhira kidigamo-ra nakaidivavini,
abono-ra nakaidivavini vani fori hini afohanana.
Deus vaꞌora nofiki jaboni adani gamo vakadimakhira-ra vavaꞌihavini-ra avigavini.