Jiniro kavagahinaivahani varani hini
16
Hari.
Vara ovaniꞌaki bana ida jiniro hora avananaꞌdohivini hiꞌiki avakadijirihia.
Avanajoronibakhiaki ida jiniro vaꞌora avakajoamorara kaimoni adani Deus kaijaꞌari Judéia kaarabonia vahojaki.
Vaꞌora onavaꞌisohiꞌiki adani Jesus kaijaꞌari avajoronioniki Galácia kaarabonia hihida varania.
Onivani fori hija ida bana onofiki bada avaniꞌavini jaboni.
2 Onofiki ida domingo hahavi jiniro-ra avaranahoariharibanivini.
Paꞌitxiki ida ijaꞌari kajiniro,
bianahoariharibanihi ida jiniro paꞌitxi bikavagahinaiki kaimoni.
Doronihi ida kidijiniro,
bianahoariharibanihi ida kidijiniro pitani doroniki bikavagahinaiki kaimoni.
Niki vania vakahojai bana afohanana.
Vanajoronihanana bana ida avakadijiniro avaranahoarihaꞌiki.
Avakadiania okaikahina kamahini onofiki ida jiniro joronini hihavini.
3 Onofiki ida vaꞌora avanagathogathovini makhira jiniro avakavagahinaiꞌiki-ra avavikhaki kaimoni.
Vaꞌora avanoꞌavini hiki bana ida avaathini kapapirani Deus kaijaꞌari Jerusaléa vahojaki vaꞌora avigara kaimoni adani makhira vaꞌora avanagathogathoꞌiki.
Avakadiania okaikahina vani vaꞌora okaronara bana adani avakadigahinai-ra avavikhaki.
4 Jahaki vahabini bana ida ookhana jaboni Jerusaléa.
Ookhahi;
hora vavaipohihaki adani.
Pauloa bivavaꞌisohihijoraki ida adahana
5 Hari.
Onofiki bana ida Macedônia kaarabonia oaꞌaadahaonina okafianina afoꞌimidia.
Naothinia avakadiania ookhaki ho.
6 Avakadiania ohojaki vahabini bana ho mahi ipohikia.
Pahakari ni-gira onijanaki vahabini.
Naothinia avakaabokaki bana ida hora avakajoamoravini hora avakaronavini oanikhahaki ibavia.
7 Ni-onofiki ida jorakia oradahana avakadiania mahi ipohirikia ohojaja kaimoni.
Deua bivaꞌahahi;
onofihi ida masiko ipohiki ohojana,
oniani ida jorakia hora arakharija.
8 Kaikahirini oadani ida Pentecostes kaihinikani kamahini,
onofiki hida Éfeso sidajia ohojana,
naothinia ai ohiki bana ho.
9 Hihida Éfeso sidajia ohojana oadani okaabokabakhiaki ida ijaꞌari vaipohiki-ra vaꞌora okanamonivini Jesus monina.
Vanaabavini vanofiki hida Jesus athi.
Vahoariha vani adani kodibadani-ra vakanajajorivini-ra vanofibakhiara.
10 Hari.
Kaikahiki vahabini bana ada Timóteo avakadiania.
Kaikahiha;
vagathanijahaki bana mahija aꞌonira kaimaforavini.
Hofori hina,
bada biniꞌahahaꞌoadahaki ida akadikaꞌdaꞌdi Jesus kabadani.
11 Hariꞌa vakaihiponiri bana ada Timóteo.
Vaakodia bana ida kidiadahai makhaniria kaimoni mahija kodiania joivini.
Vaꞌora onaviahanokhaki adani Timóteo,
arigamina vahoariha vihiki vakaikahina.
12 Vara ovaniꞌaki bana ada arigamina Apolo.
Oniꞌabakhiaha ada Apolo:
—Arigamina vahoariha vaꞌora vanavanavanahavini adani Jesus kaijaꞌari Corinto sidajia vahojaki.
Jahaki ida vaꞌora ivaipohihavini — onibakhiaki ho.
Ni-binofiki ida jorakia vaꞌora vaipohihavini.
Bikaabokavini kamahini bona aꞌonira navanavanahaha.
Paulo athi anokhomini hida
13 Hari.
Avaabononi avakavaꞌigairi bana.
Vanadano bana ida Cristo-ra avavakaijokavini.
Hariꞌa vaofini bana.
Vavaꞌaha bana ada Cristo avajariꞌdarini-ra nadanovini.
14 Nahina hahavia avakabadanihi,
avakavaranihi;
vaꞌora vanakaidiva bana adani vahoariha.
15-16 Vaꞌora avarigaki adani Estéfanas,
gorana kaijaꞌarini khama.
Vaꞌoaniaro miroꞌa Jesus kania vaabono gahinai vanihaꞌavini Acaia kaarabonia.
Vaabono vavaniꞌahivini hiki ida Jesus kaijaꞌari-ra vaꞌora vakajoamorabakhiavini.
Oigamina,
vavaꞌaha bana ida aꞌonira vavakaꞌdaꞌdivini.
Onofiki ida Estéfanas athi-ra avanaabavini.
Vanaabaꞌa jaboni ida vahoariha Estéfanas vakadiania bada vakhaniki vaathi.
17 Khai oniꞌaꞌiki ida Estéfanas,
Fortunato,
Acaico vihiki kodiania vakaikahiꞌina.
Kodiania avahojarini mani ida hora avakakodiavini-ra avakaabokaravini hija,
vaꞌoaniaro hora vaakodiaꞌiki.
18 Ovaꞌi-ra vanajahajahaꞌiki adani.
Oogaki ida avavaꞌini-ra vanajahajahaꞌavini jaboni.
Jahaki ida ijaꞌari vaꞌoaniaro fori vihiki vaathi-ra mitha avaniꞌavini.
19 Hari.
Jesus kaijaꞌari Ásia kaarabonia avajoronionibakhiaki aꞌonira vakaꞌivanitiki.
Aꞌonira vakaꞌivanitiki jaboni adani Áquila,
Priscila,
Jesus kaijaꞌari vagorana vajoronibakhiaki.
Vanofiki ida Jesus aꞌonira anajahamisivini.
20 Oigamina,
kodiania vahojaki aꞌonira vakaꞌivanitiki hadani jaboni.
Cristo kaijaꞌari aꞌoni.
Avaabononi avakanakaidivakhamajahakivini-ra vananokia bana.
21 Hovani Paulo onajirija hida oathi anokhomini osaꞌa.
Aꞌonira okaꞌivanitiki aꞌoni jaboni.
22 Deus vaꞌora naimaꞌbanaki bana adani Jesu-ra vakajariꞌdaki Ibavi Jaharikaꞌoakia.
Maranatá ariathia — Akadikaꞌdaꞌdi kaꞌoa,
khaꞌa bana — niki hida.
23 Onofiki ida akadikaꞌdaꞌdi Jesus aꞌonira kajoamorabakhiavini.
24 Aꞌonira onakaidivahahaviki ho.
Jesus Cristo haria kanakaramisikhamaki hari.
Hari ida vani oamani Paulo athi anokhomini.