Cristo ahokiꞌina varani hini
15
Hari.
Oigamina,
onofiki ida Cristo monina jahaki aꞌonira onavaꞌihokivini.
Aꞌonira onanamithavini hiꞌiki ida moni jahaki avakapoariꞌiki.
Moni jahakia bianasohimisiꞌiki ida Cristo-ra avavakaijokavini.
2 Moni jahaki-ra avakajariꞌdaravini mani ida Deus aꞌonira akavaꞌijoavini hija bana.
Avakavaꞌipahinirihi ida moni jahaki aꞌonira onavaꞌisohivini hiꞌiki;
Deus aꞌonira akavaꞌijoahi.
Avakavaꞌipahinihi;
ni-nahina kaimoni Cristo-ra avavakaijokaki.
3 Aꞌonira onavaꞌisohivini hiꞌiki ida moni jahaki okamithaꞌiki.
Deua binofiꞌoamanija ida monina aogajahakivini.
Nimania bana hida moni Deus athi kapapirania hojaki:
Abiniꞌiki ada Cristo binaꞌbiraja kaimoni ida akadihojai asohiriki.
4 Kaꞌdamahaꞌiki ada.
Mahi ahoarabakosiki radahani naothinia Deua bianahokiꞌiki ada.
Onivani fori hija ida namithaꞌiki Cristo kania,
Deus athi kapapirani jirikia bivavaꞌisohihiki.
5 Abono-ra nanokiaꞌaha Pedro kania naothinia athi avaadahaoniva abono 12 vihiki vaipohina vakadiania abono-ra nanokiaꞌaha.
6 Naothinia abono-ra nanokiaꞌaha kidipohi vahoariha 500 vihiki vakadiania vanokihahaviꞌaha.
Asia vahokiki adani vaipohiki nokina vihiꞌiki.
Vahoarahanana vani vaabiniꞌara adani ijaꞌari.
7 Naothinia Jesus abono-ra nanokiaꞌaha Tiago kania.
Naothinia athi avaadahaoniva abono hahavi vakadiania abono-ra nanokiaꞌaha.
8 Vaꞌoaniaro hahavia vanokivini naothinia homaina onokiꞌaha.
Kodiania abono-ra nanokiaꞌaha.
Isai ꞌbanani kamasikoni hiriki vani oꞌbanaꞌiki fori ohiꞌia.
Onokharavini vani jorakia kodiania abono-ra nanokiaꞌara ada.
9 Cristo athi avaadahaoniva abono hahavi hora avaradamiki.
Deus kaijaꞌari-ra vaꞌora onajaharihariꞌavini mani ida Cristo athi avaadahaoniva abonoa hora vanaonivini-ra najaharija.
10 Deus hora kajoamoravini mani ida nahina hora nihaꞌia hidakabaꞌi.
Ni-hora kajoamoraꞌimariniki.
Hora kajoamorajahakivini mani ida kidibadania oabono onadanovini hija.
Kodibadani ipohinia biaradaki ida Cristo athi avaadahaoniva abono vahoariha vakadibadani Deus kaimoni.
Ni-hovani oa bada oniꞌaki.
Deus kodiania hojana mani ida hora nikia kanabadanija.
11 Hari.
Avakamithaꞌiki ida Cristo monina jahakia okavaranina.
Avakamithaꞌiki jaboni ida moni jahaki Cristo athi avaadahaoniva abono vahoariha vakadivarani.
Kodivarani vakadivarani fori hiki Cristo monina jahakia akavaraniki hari.
Onivani fori hija ida jaboni Cristo monina avakajariꞌdariki.
Avahokiki bana adani Cristo kaijaꞌari
12 Hari.
Akadivarani hiki ida Cristo abiniꞌina naothinia ahokiꞌina.
Avakadiania vahojaki adani ijaꞌari vahoarahanana,
vakadivarani hiki ida ijaꞌari abinini naothinia ni-nihanikia ahokijanarini,
ni-kidimahi ajaꞌdini vakahiki.
Ni-asohipaꞌitxiki ida vakadivarani.
13 Kaꞌoa hija vaha ida vakadivarani;
ni-Deua bianahokiꞌiki vaha ada Cristo.
14 Cristo abiniꞌina naothinia Deua bianahokirara vaha;
ni-hojaki vaha ida moni jahakia akavaranina.
Ni-hojaki vaha ida avavakaijokavini.
15 Deus Cristo-ra anahokirara vaha;
Deus varani hina-ra vara avaniꞌaꞌbadaramanihi vaha.
Akadivarani hiki ida Cristo-ra anahokiꞌavini.
Kaꞌoa hija vaha ida ijaꞌari abiniꞌiki ahokijanarini;
ni-Deua bianahokiki vaha ada Cristo.
16 Ijaꞌari abiniꞌiki ahokirija vaha;
ni-Deua bianahokiki vaha ada Cristo.
17 Cristo-ra anahokirara vaha ada Deus;
ni-avakajariꞌdaki vaha ida moni kaꞌoa hiriki.
Ni-nahina kaimoni hiki vaha ida Cristo-ra avavakaijokavini,
asia avakadihojai asohiriki hojahi vaha avakadiania.
18 Cristo ahokirara vaha;
ni-vaꞌora akavaꞌijoaꞌiki vaha adani vakaijokana vihiki vaabiniꞌiki Ibavi Jaharikaꞌoakia avikharara kaimoni.
19 Anokhaki hida Cristo haria akavaꞌijoavini ariabinirina oadani.
Anokhaki jaboni ida haria akavaꞌijoavini ariabiniꞌina naothinia.
Cristo haria akavaꞌijoavini-ra kaabokarija vaha ariabiniꞌina naothinia;
ijaꞌari khaii niriki fori arihimanihi vaha.
Arafiaja vaha ida akadikhaiiniri arihokina oadani hidiaja.
20 Hari.
Kaꞌoa hiki ida moni Deus Cristo-ra anahokivini.
Bianahokivini mani hida Deus vaabiniꞌiki-ra vaꞌora anahokivini-ra aogajahakivini hija.
21 Makhira hoarana binakamaꞌdaꞌiki ida ijaꞌari hahavi hoarahananani abinini.
Onivani fori hija ida makhira hoariha binakamaꞌdavini ijaꞌari abinini naothinia ahokiꞌini.
22 Adão kaijaꞌari vanamitharonisiagaki vihina mani ida ijaꞌari hahavi vahoarahanana-ra vaꞌora naabinija.
Onivani fori hija ida ijaꞌari ahokiꞌini abinini naothinia.
Cristo kaijaꞌari vihina mani ida kidijaꞌari hahavi-ra vaꞌora anahokija.
23 Deua bikavaꞌibodivaranijoraꞌiki ida ijaꞌari avahokina hana hina miroꞌa,
hana vihina avahokironisiagaki.
Cristo miroꞌa Deua bianahokiꞌiki.
Cristo joina kamahini kidijaꞌari maina adani Deus vaꞌora anahokira bana.
24 Hari.
Oniaroa,
khaki bana ida mahi anokhomini kamahini.
Cristoa binihimakaꞌoaki bana ida Jahari,
kidibadani abono vanokiariki vihiki vadanona,
hivaꞌoani ijaꞌari araboa vahojaki vavaꞌi-ra vanahonariahihiki,
ijaꞌari-ra vavakaꞌdaꞌdiki,
ijaꞌari-ra vakaabokaki.
Vadanona binihimakaꞌoavini naothinia Cristo Deu-ra niꞌaki bana:
—Biꞌi,
kadania oarakhaki bana hida nahina hahavi,
ijaꞌari hahavi vihiki-ra vaꞌora ovakaꞌdaꞌdivini,
ivakaꞌdaꞌdija kaimoni.
25 Deus vaꞌora avadadamiki bana adani Cristo-ra vanofiriki hahavi,
vakaabokajanaria kaimoni ida athi vakajonivini.
Vaꞌora obaiki fori vihiki adani Cristo ꞌdama kanaboꞌania.
Ni-nahina-ra vakaabokajanaki.
Vaꞌora avadadamiravini oadani,
Deua binofiki ida Cristo vaꞌora vakaꞌdaꞌdivini.
Deus vaꞌora avadadamihahavivini naothinia asia kaꞌdaꞌdi hihahaꞌoadahaki ada Cristo Deus kania.
26 Cristo-ra nofiriki hoarana hojaroniki,
Abinia oniki ada.
Deua binihimakaꞌoaki bana ada aforonisiaga.
27 Hojaki hida athii Deus athi kapapirania:
“Deua biobaiki bana ida nahina hahavi Cristo ꞌdama kanaboꞌania,
hahavi-ra avadadamivini ada Cristo.”
Deua biniꞌavini kabaꞌi ida “nahina hahavi”,
Deus ni-hojaki Cristo ꞌdama kanaboꞌania.
Aogaki ida Deus hahavi-ra obaivini Cristo ꞌdama kanaboꞌania Cristoa bivakaꞌdaꞌdija kaimoni.
28 Hari.
Deus Cristo-ra noꞌavini hiki ida hahavi hojaki bivakaꞌdaꞌdija kaimoni.
Naothinia Cristo,
Deus kaisai hina biniꞌaki bana ada Deus:
“Biꞌi,
ivani hora inoꞌavini hiꞌia ida hahavi hojaki
ovakaꞌdaꞌdija kaimoni.
Onofiki ida hora
ivakaꞌdaꞌdivini.”
Niki bana ada.
Oniaroa,
Deus oavani vaꞌora vakaꞌdaꞌdira adani ijaꞌari hahavi,
nahina hahavi hiki afohaꞌoadaha.
29 Hari.
Vakhaniki adani vahoarahanana avakadiania:
—Ijaꞌari abiniꞌini naothinia ni-ahokijanaki — vakhaniki adani.
Kaꞌoa hija vaha ida vakadivarani;
ni-nahina kaimoni vikanaki vaha ijaꞌari vaabiniꞌiki vakadimoni vihina.
Niha vaꞌora vaniꞌaꞌaki koda adani vaabiniꞌiki-ra vaꞌora vakajoamoravini?
30 Hari.
Haria vara ovaniꞌaki bana ho jaboni.
Ijaꞌari abinini naothinia ahokijanarija vaha;
nahina mani ida mahi oadani vahoariha haria vanaabinikamarivini-ra avaꞌahavini hija?
31 Oigamina,
khai aꞌonira oniꞌavini hiki ida akadikaꞌdaꞌdi Jesus Cristo kania avarajahamisini,
oniani ida aꞌonira onavaꞌisohivini hija,
mahi hahavi oabinikamarina afobakhia.
32 Opohimajakamarina ijaꞌari jomahi hiihiha khama abononi kanadanodanokhamavini fori ohina.
Nimania hida kodimahi Éfeso sidajia ohojana.
Asohija vaha hida varani ijaꞌari abiniꞌini ahokijanarini;
ni-nahina kaimoni vahoariha hora vanaabinikamarivini-ra ovaꞌahaki vaha.
Vakhaniha adani Deu-ra vanofiriki afobakhia:
“Ipohijanarihi hida akadimahi hidiaja.
Aꞌbaina arafiava,
kavi-ra aꞌavivini arafiava,
bada aniꞌavini arafiava
ida hojai
akavaꞌinofinofikârahoki.”
— Vakhaniꞌimariniha.
33 Hariꞌa bana vahoariha aꞌonira vakorijanahava.
Vaꞌora avavaipohihaki adani ijaꞌari hojai asohirikia vakahojaiki,
avakadihojai jahaki-ra vanihimaki bana adani.
34 Vakavaꞌibodivaranihanana bana ida avakadihojai mahija hojai asohiriki-ra avakavaꞌipahinikaꞌoavini.
Avahararania vahojaki adani Deu-ra avigariki.
Onofiki hida kodikaabanahi avavaꞌini-ra anaipahihivini.
Ijaꞌari asafini, imani, abononi ahokini naothinia varani hini
35 Hari.
Vahoariha vanaꞌdohiꞌiki:
—Nihaniki vania Deua bianahokija ida ijaꞌari abiniꞌiki?
Niha ninimania ida ijaꞌari ahokiꞌiki asafini,
imani,
abononi nokiani?
36 Ijaꞌari vaꞌihariki fori hiki kanaꞌdohi hida.
Hari.
Okavarajomiki bana ida ijaꞌari ahokiꞌini abononi baꞌbaꞌda rakhajahaki movaꞌiki fori hini.
Araboa baꞌbaꞌda rakhajahavahaki ihimiꞌiki,
abinini fori hiꞌiki ida.
Abinirini oadani,
ni-movaki ida baꞌbaꞌda rakhajahavahaki araboa.
Baꞌbaꞌda abiniꞌiki movaꞌiki ida.
37 Arakhaiki ida baꞌbaꞌda kaꞌoa,
trigo ꞌbaꞌdani,
rakhajahi ꞌbaꞌdani hoariha arakhaiki.
Ni-arakhaiki ida avani avijavaꞌiki.
38 Deua bikahinanikaki ida rakhajahi ꞌbaꞌdani avania.
Bikavaꞌibodivaranijoraꞌiki ida avani niha ninini binofiki.
Trigo avani fori kihiriki ida jaroꞌoa kaavani.
Barasia kaahoni fori hirihi ida baꞌbaꞌda hoariha ahoni.
Deua binahoarihananaki ida baꞌbaꞌda avani hoariha afohanana.
Rakhajahavahaki ꞌbaꞌdani,
avani,
ahoni,
avaafani hiki,
ijaꞌari abononi niha nini hahavi fori hiki ida.
39 Ni-hoarani hiki ida nahina hokiki imani.
Hoarihaki ida ijaꞌari imani.
Hoarihaki ida igitha imani.
Hoarihaki ida igitha raboki imani.
Hoarihaki ida abaisana imana.
40 Nama hojaki ida ijaꞌari,
safini,
masiko,
boviri hiki.
Araboa hojaki ida ijaꞌari,
nahina hoariha hiki.
Nahina nama hojaki nokiani jahani fori hirihi ida nahina araboa hojaki nokiani jahani.
41 Safini nokiana jahani fori hirihi ida masiko nokiana jahani.
Hoarihaki ida boviri nokiana jahani.
Ni-boviri hoariha nokiana fori hiriha ada boviri hoariha.
Ipohiki ida boviri nokiana jahani.
Ipohiki jaboni ida ijaꞌari nokiani afohanana nama.
42 Nimania bana ida ijaꞌari abiniꞌiki abaꞌoni Deua bianahokivini kamahini.
Ijaꞌari abaꞌoni kaꞌdamahani baꞌbaꞌda rakhajahavahaki fori hiki ida.
Ihimiki bana ida.
Deus ijaꞌari abaꞌoni-ra anahokivini kamahini,
ni-ihimijanaki bana ida ijaꞌari abiniꞌiki asafini,
imani hiki.
43 Abaꞌoi kaꞌdamahani,
ni-nokiani jahaki.
Deua bianahokivini kamahini,
jahani arafiaki bana ida nokiani.
Abaꞌoi kaꞌdamahahi,
ni-danoki.
Deua bianahokivini kamahini,
danoki ida ijaꞌari ahokiki abononi.
44 Hojaki ida imai ijaꞌari araboa vaibavikia vavahojaki.
Hojaki jaboni ida imai hoariha ijaꞌari nama vaibavikia vavahojaki.
Ijaꞌari abiniꞌini kamahini bivahojaki ida imai ijaꞌari araboa ibavikia bivahojaki.
Ijaꞌari ahokini kamahini bivahojaki ida imai ijaꞌari nama ibavikia bivahojaki.
45 Hojaki hida athi Deus athi kapapirania:
“Deus makhira miroꞌa-ra
namonahavini kari,
binamonahaꞌiki ada Adão
ijaꞌari hiꞌina hokiꞌina.”
Adão naothi ajaꞌdini ada Jesus.
Jesus Maꞌonahai hina bianahokiki ida hahavi abiniꞌiki.
46 Ijaꞌari araboja hojakia bivahojaꞌimidiaki ida imai araboa amonahaꞌiki.
Abiniꞌini ahokiꞌini naothinia ijaꞌari nama hojaki imani maina amonahaki ida.
47 Namia Deua binamonahaꞌiki ada makhira ovari miroꞌa.
Kamaꞌdaꞌiki ida kidimahi araboja.
Adão naothi ajaꞌdini vani ada nama ibavina khaꞌara.
48 Ijaꞌari araboa vaibaviki vaimana fori hiki ida makhira ovari miroꞌa amonahaꞌiki imana.
Nami vania amonahaja ida.
Harivani Cristo kaijaꞌari arihina nama arihojana kamahini,
ovari nama khaki imana fori hiki bana ida arimana.
49 Asia makhira ovari miroꞌa namia amonahaki fori arihiki hari.
Makhira nama khaki fori arihiki bana hari.
50 Oigamina,
aꞌonira onavaꞌisohivini hiki bana hida kodivarani nahina nini.
Avahojavini oadani hida arimana,
ariamana hiki,
ni-akaabokaki ida Deus haria kaibavijahahivini hiki-ra agathanivini nama,
ijaꞌari hahavi-ra vakaꞌdaꞌdivini ibavinia.
Ariabinina vani ihimija bana hida aasafi,
arimana hiki.
Ni-arimana araboa kamaꞌdaꞌikia bikaabokaki ida nahina ihimiki-ra gathanivini nama.
51-52 Mitha vaniꞌa bana hida varani ijaꞌari avigariki.
Ni-ariabinihahaviki bana.
Hoaranija ithoroniki bana ida trombeta.
Jorakia agathanihahaviki bana ida aasafi,
arimana jaꞌdini.
Nokhoi rabi niꞌani vani fori hija ida jorakia.
Ithoki bana ida trombeta,
avahokiki bana adani ijaꞌari vaabiniꞌiki,
ni-vakaabokaki ida vaabiniꞌianana afojana.
Harivani asia araboa arihokina agathaniki bana ida aasafi,
arimana jaꞌdini aabosiꞌini.
53 Hari.
Ahoarihaki bana ida nahina abinini-ra kaabokaki,
bikaabokajanaria kaimoni ida abinijanarini.
Ahoarihaki bana ida nahina ihimini-ra kaabokaki,
bikaabokajanaria kaimoni ida ihimijanarini.
54 Namithani kamahini akadiania,
ajaꞌdiki bana ida aasafi arimana hiki abinijanaria kaimoni.
Aabosiki bana ida arimana makari ꞌboꞌda ihimiki fori hini,
makari jaꞌdini ihimiriki fori hikia.
Namithaki bana jaboni hida athi Deus athi kapapirania hojaki:
“Ihimiki ada Abinia oniki,
ni-nahina-ra
kaabokajanaki.
55 Abinia ioniki,
ihimikaꞌoaꞌiki ida idanoni.
Ni-ikaabokajanaki ida ijaꞌari-ra inapohimajavini.”
56 Ijaꞌari hojai asohirikia vakahojaina mani ida Abinia oniki vaꞌora napohimajavini vaꞌora kaabokavini hija.
Ijaꞌaria vakaabokariki ida Deus kavaꞌisohihi jiriki-ra vanaabahahavivini afohaꞌoadaha,
oniani ida hojai asohiriki danoni vaꞌora kaabokavini hija.
57 Khai aniꞌava ada Deus.
Akadikaꞌdaꞌdi Jesus Cristo haria kajoamoravini mani ida nahina hahavi Jaharia bivakaꞌdaꞌdiki-ra akananaboꞌajavini-ra akaabokavini hija.
58 Hari.
Oniaroa,
oigamina,
kaaraki fori vihiꞌa.
Hariꞌa noranoraki fori vihi.
Hariꞌa Cristo-ra vakavaꞌipahini bana.
Bada vaniꞌahahaꞌoadaha bana ida badani Deus aꞌonira honariavini hiꞌiki.
Badani binofikia avakabadanihi;
bada avakhaniꞌimarinini-ra avarigahi.