Deus aagahai danoki varani hini hida
14
Hari.
Avaabononi vanadano bana mahija hoariha-ra avanakaidivavini.
Vakavaꞌinofinofi bana ida Deus aagahai danoki hahavi.
Avakavaꞌinofinofivini arafiava bana ida varani namithaꞌiariki Deus aꞌonira kanamonivini hiꞌikia avakavaranini.
2 Ijaꞌari athii ogavahariki-ra dionivini vani vara biniꞌara ada Deus.
Ni-ijaꞌari-ra vara niꞌaki.
Ijaꞌaria vakamithavini kabaꞌi,
ni-avigaki ida athii nahina nini.
Ijaꞌari athii ogavahariki-ra dionivini,
Maꞌonahai Jahakia biakodiavini mani ida moni kaꞌoa hini vahoariha avigariki-ra vara vaniꞌavini hija.
3 Ijaꞌari hoariha bikaabokaki ida varani namithaꞌiariki Deua bikanamonivini hiꞌikia kavaranini.
Oniania vaꞌora vara niꞌaki adani ijaꞌari vahoariha,
kaaraja kaimoni ida Cristo-ra vakajariꞌdaravini,
avijavaja kaimoni jaboni ida Cristo-ra vavakaijokavini,
ijaꞌari vaabono vakanajahamisikhamara kaimoni jaboni kidivarania.
4 Hari.
Ijaꞌaria bidionihi ida athii ogavahariki;
abononi kakodiavini hiki ida Cristo-ra kajariꞌdaravini avijavani.
Ijaꞌaria binamonihi ida Deus athi;
Jesus Cristo kaijaꞌari hahavi vajoroniki-ra vaꞌora kakodiahi,
Cristo-ra vakajariꞌdaravini avijavahi jaboni.
5 Onofiki ida aꞌonivani hahavi athii ogavahariki-ra avidionivini-ra avakaabokavini.
Onofivini arafiaki ida Deus aagahai danoki hoariha-ra avavahojavini,
avakaabokaja kaimoni ida varani namithaꞌiariki Deus aꞌonira kanamonivini hiꞌikia avakavaranini.
Jahani arafiaki ida ijaꞌari varani namithaꞌiariki Deua bikanamonivini hiꞌikia kavaranini.
Jahani kabaꞌi ida ijaꞌari athii ogavahariki-ra dionivini,
Deus athi vahoariha avigariki-ra namonivinia biaradaki ida.
Avahararania hojaki ida ijaꞌari athii ogavahariki athii ogavahaki-ra arakakosivini-ra kaabokaki,
jahaki ida athii nahina hinia vaꞌora navaꞌisohivini Jesus Cristo kaijaꞌari vajoroniki vakadimoni vaꞌora kakodiara kaimoni.
6 Oigamina,
avakadiania ohojaꞌianana kamahini athii ogavahariki-ra odionihi;
ni-aꞌonira oakodiaki avajariꞌdarini avijavania.
Ovikhahi ida varani Deus hora kanamonivini hiꞌiki,
bona aꞌonira oakodiahi.
Ovikhahi ida ogahai avarigariki;
bona avarigavinia aꞌonira oakodiahi.
Onamonihi ida Deus athi,
bona aꞌonira oakodiahi.
Ovikhahi ida ojomoꞌihi athini bona aꞌonira oakodiahi jaboni.
Athii ogavahariki-ra odionihi;
ni-aꞌonira oakodiaki.
7 Okavarajomiki bana ida ijaꞌari athini nahina ithoki fori hini.
Hokirihi ida afoꞌafo,
nahina hoariha hiki ijaꞌaria binaꞌithoki.
Ijaꞌaria binasohirihi ida ithohi;
ni-vahoariha avakogaki ada moro hana kihina bikanaꞌithoꞌiki.
8 Hari.
Sorara binaꞌithovini hiki ida kidiꞌithohi ipohina-ra vaꞌora baranahavini hini vaabono avakavaꞌijoara kaimoni.
Sorara binasohirihi ida ithohi,
ni-ipohina avigaki ida vaꞌora baranahavini.
9 Onivani fori hija ida athii ogavahariki-ra avidionivini.
Avidionihi ida athii vahoariha avigariki,
ijaꞌaria vakamithahi;
ni-avigaki nahina hini ida avakadivarani.
Avisoniki ida avakadivarani bana.
10 Arabo hahavi kaijaꞌarinia vidioniki ida vaathi ipohiki afohanana.
Arabo kaijaꞌarinia biogaki ida kidiarabo kaijaꞌarini athini,
biogaki ida hoariha kavarani nahina hini.
11 Hari.
Mitha oniꞌahi ida arabo hoariha kaijaꞌarini athinia varavarani,
ni-oogaki ida nahina hini hora vara niꞌavini hiki.
Okavaꞌibodivaraniki ida arabo hoariha kaijaꞌarini hini.
Hora kavaꞌibodivaraniki jaboni arabo hoariha kaijaꞌarini ohina.
12 Hari.
Nimania ida ogahai danoki ijaꞌari athii ogavahariki-ra dionivini.
Avakavaꞌinofinofiki ida Deus aagahai danoki Maꞌonahai Jahakia bikavagahinaiꞌiki.
Avanofivini arafiava bana ida Deus aagahai danoki Jesus Cristo kaijaꞌari hahavi-ra vaꞌora kakodiaki,
avijavaja kaimoni ida Cristo-ra vavakaijokavini.
13 Vara oniꞌaki ida ijaꞌari athii ogavahariki-ra dionivini-ra kaabokaki.
Deu-ra kanikharia bana mahija athii ogavahariki idioniꞌiki athii ogavahaki-ra iarakakosivini-ra ikaabokavini,
mitha vakhanikia avigaja kaimoni ida athii nahina nini.
14 Athii ogavahariki-ra odionivini oadani,
omaꞌonahana Deu-ra vara niꞌahi.
Kodivaꞌibodivarania ni-biogaki ida nahina odioniki.
15 Nahina koda ida onamonahaja?
Jahaki ida athii ogavahariki-ra odionivini,
Deu-ra vara niꞌaja kaimoni ida omaꞌonahana.
Jahaki ida jaboni oathi oogaki-ra odionivini,
oogaja kaimoni ida nahina kodivaꞌibodivarani Deu-ra vara oniꞌavini hiki.
Jahaki ida athii ogavaharikia oahiana,
Deu-ra khai niꞌaja kaimoni ida omaꞌonahana.
Jahaki jaboni ida oathi oogakia oahiana,
oakavaꞌibodivaranira kaimoni ada kodimoro kaathi nahina khanina.
16 Vahoariha vajoroniki avakadiania Deu-ra khai iniꞌavini athii ogavaharikia,
ijaꞌari mitha nikia ni-biogaki ida kadavarani nahina nini.
Ni-bigathaniki ida iathini:
—Hai oamani!
Nimania ida Deua binofiki — ni-nikia kavaraniki.
17 Jahani kabaꞌi ida iathini Deu-ra khai iniꞌavini,
ni-iakodiaki ida hoariha Cristo-ra vakaijokavinia.
18 Hari.
Deu-ra khai oniꞌavini hiki ida athii ogavahariki-ra okaabokavini arafiani.
Odionivini vahoariha vidionivini-ra aradaki.
19 Hari.
Cristo kaijaꞌari vajoroniki vakadiania ohojana,
ni-onofiki ida athii ogavahariki-ra odionivini.
Onofiki ida athii avigaki-ra odionivini.
Odioniki ida varani paꞌitxi kaꞌoa athii avigakia vaꞌora okaꞌojomoꞌira kaimoni,
bona avigahi nahina nini.
Odionihi ida varani oadaki athii avigarikia,
ni-vaꞌora okaꞌojomoꞌiki.
20 Oigamina,
hariꞌa isai paꞌitxi kavaꞌibodivarani fori hiva bana ida avakadivaꞌibodivarani.
Isai tanani ni-hojai jaharikia kahojaiki.
Vaꞌoaniaroa fori vihiꞌa bana.
Hari.
Hariꞌa isai kavaꞌibodivarani avijavaꞌiariki fori vihi bana.
Ijaꞌari karaho kavaꞌibodivarani vani fori vihi bana.
21 Deus athi kapapirania hojaꞌboꞌdaꞌiki hida Deus kavaꞌisohihi:
“Vaꞌora okaronaki bana adani ijaꞌari athii
ogavahariki-ra vidioniki
kodijaꞌari vakadiania,
vara vaꞌora oniꞌara
kaimoni.
Arabo hoariha kaijaꞌarini vaathia vara vaꞌora
oniꞌavini kabaꞌi,
ni-oathi-ra mitha vaniꞌaki adani kodijaꞌari.”
Niha ada Deus.
Okavarajomiki ida Israel kaijaꞌari vakadiania namithaꞌboꞌdaꞌiki,
ijaꞌari athii ogavahariki-ra dionivini hidakabaꞌi.
22 Deu-ra avigariki vakadimoni ida athii ogavahariki-ra mitha vaniꞌavini,
avigaja kaimoni ida Deus aagahai danoki kaꞌoa hini.
Deus kaijaꞌaria avigajoraꞌiki ida kaꞌoa hini.
Deu-ra vanofiki vakadimoni ida varani namithaꞌiariki Deus vaꞌora kanamonivini hiꞌikia vakavaranina.
Mitha vaniꞌavini,
avigaja kaimoni ida Deus aagahai danoki kaꞌoa hini.
Ni-varani namithaꞌiarikia Deus vaꞌora nanokiahiki adani nofina vihiriki,
avigaja kaimoni ida Deus aagahai danoki kaꞌoa hini.
23 Hari.
Jesus Cristo kaijaꞌari hahavi vajoronina kamahini avikhajakosiki vahabini bana adani Deu-ra avigariki,
Cristo-ra avigajaꞌdiniki vihiki.
Vakamithahi ida athii ogavahariki-ra avidionivini afohahavi,
avakabajadini-ra vakahiki bana adani.
24 Hari.
Okhajakosiki vahabini bana ida Cristo-ra ogariki,
Cristo-ra ogajaꞌdiniki avakadiania.
Okhajakosihi;
bikamithamahahi ida varani Deus aꞌonira kanamonivini hiꞌikia avakavaranini;
biogahi Deus athi hini.
Okhajakosihi;
kidibadani ahojaki varani hini-ra kamithahi.
Varani kaꞌoa hini-ra ogavini mani ida kidihojai asohirikia abononi kaꞌdaꞌdigariavini hija.
25 Bikamithaki ida kidivaꞌibodivarani ahojaki avananamithavini,
oniani ida Deus aꞌonira navaꞌisohivini-ra ogavini hija.
Kajoꞌatharariꞌini biniꞌaha:
—Deus,
ira okanamasiviki i.
Ivani idanokaꞌoaki i.
Iogahahaviki ida kodihojai — Deu-ra niꞌavini.
Aꞌonira niꞌavini jaboni:
—Kaꞌoa hiki ida Deus avakadiania hojana — niki bana ida ijaꞌari.
Jesus Cristo kaijaꞌari vajoronina varani hini
26 Oigamina,
aꞌonira onavaꞌisohivini hiki bana ida Deu-ra avakanamasivijahakivini niha ninini jahani.
Avajoronini vani ahiaja ida hoariha Deus kamoroa,
hoariha vajoroniki-ra vaꞌora kaꞌojomoꞌiki,
hoariha bivavaꞌisohihiki ida Deua bianigahivini hiꞌiki,
hoariha bidioniki ida athii ogavahariki,
hoariha bivavaꞌisohihiki ida athii nahina nini bikahivini.
Avakadivarani afohanana vaꞌora kakodiaki adani Jesus Cristo kaijaꞌari vajoroniki Cristo-ra vavakaijokavini avijavania.
27 Ijaꞌaria vanofiki ida athii ogavahariki-ra vidionivini,
arajomaki ida ijaꞌari viꞌbamiki ijaꞌari avahoarabakosiki kaꞌoa.
Ijaꞌari hoariha bivavaꞌisohihiki ida athii ogavahariki nahina nini.
28 Avajoronini kania hojarihi ida ijaꞌari athii ogavahariki nahina nini-ra vavaꞌisohihivini-ra kaabokaki,
jakaho viso niva ida athii ogavahariki-ra dioniki.
Jahaki ida ijaꞌari abononi vara niꞌavini,
Deu-ra vara niꞌavini jaboni vaꞌini bodinia.
29 Hari.
Vaꞌora vavaꞌaha bana adani Deus vara nina-ra vakamithaꞌiki aꞌonira vanavaꞌisohivini varani namithaꞌiariki afonana.
Jahaki ida ijaꞌari viꞌbamiki ijaꞌari avahoarabakosiki vakamithaꞌiki-ra vara vavaniꞌavini.
Vara vavaniꞌavini naothinia vahoariha vajoronikia vakavaꞌibodivaraniva ida moni vakamithaꞌiki Deus kania khani kharini.
30 Hari.
Ijaꞌari vara nini oadani hoariha maakarinia vithikia bikamithahi ida Deus vara nina vaꞌini bodinia.
Jahaki ida ijaꞌari hoariha miroꞌa vara niki viso nini,
hoariha maina binanamithaja kaimoni ida Deua biniꞌavini hiꞌiki.
31 Jahaki ida aꞌonivani hahavi Deus athi-ra vara avavaniꞌavini.
Ijaꞌari hoarahanana bivavaꞌisohihiki ida moni Deua binavaꞌisohivini hiꞌiki,
oniani ida avakaꞌojomoꞌihahavivini hija.
Avaabononi avakakakodiakhamaki aꞌoni,
Deus kania avaabononi avakanakaramisikhamavini.
32 Ijaꞌari Deus aagahai danoki-ra vahojakia bikaabokaki ida Deus monina kavaranini,
bikaabokaki jaboni ida viso nini.
Maꞌonahai Jahakia ni-biavadadamiki ida ijaꞌari.
33 Avajoronini kamahini Deua ni-binofiki ida ijaꞌari kavarani arafiaki kasokosokokhamaki.
Binofiki ida avaꞌi jahajahani aajahamisina vahoariha vakadiania.
Nini vani Deua binofija ida kidijaꞌari hahavi vajoronina kamahini.
34 Cristo kaijaꞌari vajoronina vani viso vakhanina jahara adani gamo.
Ni-avaꞌahaki ida vara vakhanina.
Akadijaꞌari vakadivaꞌisohihi jirikia bivaꞌaharihi jaboni ida gamo makhira-ra vakaꞌdaꞌdivini.
35 Gamoa vanofihi ida nahina-ra avigavini,
jahaki ida vakadimakhira-ra vaꞌora vananaꞌdohivini vagorana bodinia.
Kaipahivahaki ida gamo vavaravaraki Cristo kaijaꞌari vajoroniki vahararana.
36 Deus kavarani ni-kamaꞌdaki avakadiania.
Ni-aꞌonivani kaꞌoa avakamithaꞌiki ida Deus kavarani.
Vaibavi hoariha kaijaꞌarinia vakamithaꞌiki jaboni ida.
Ni-asohihahaviki ida avakadihojai avajoronini kania.
37 Ijaꞌari abononi kavaꞌibodivaranivini hiki Deus athi namoniva abono hini,
bivahojaki ida Deus aagahai danoki.
Oniania jahaki jaboni ida bikavaꞌibodivaranivini Deus kahonari hida aꞌonira okajirihivini hija.
38 Ijaꞌaria bikajonihi hida oathi,
vakajoni bana ida ijaꞌari.