Hojai jahani arafiaki hida hoariha-ra anakaidivavini
13
Ijaꞌari-ra anakaidivarihi;
saa niꞌoamanihi ida athii ogavahariki-ra adionivini.
Ni-nahina kaimoni arabo ipohiki kaijaꞌarini vaathi-ra adioniki afonana.
Ni-nahina kaimoni jaboni Deus ibavi kaijaꞌarini vaathi-ra adioniki,
anakaidivaravini oadani ida ijaꞌari hoariha.
Sino ithoni ꞌbaraki fori hiki ida athii adioniki.
2 Ijaꞌari-ra anakaidivaravini oadani,
ni-nahina kaimoni hiki ida varani namithaꞌiariki Deus haria kanamonivini hikia akavaranina.
Ijaꞌari-ra anakaidivaravini oadani,
ni-nahina kaimoni ida nahina hahavi ahojaki-ra aogavini.
Ijaꞌari-ra anakaidivaravini oadani,
ni-nahina kaimoni ida nahina hahavi ogavahaki-ra aogavini.
Deu-ra avakaijokavini arafiahi,
akaabokaja kaimoni ida arabo namahiki aibavini,
ijaꞌari-ra anakaidivarihi;
ni-nahina arihiki.
3 Ijaꞌari-ra anakaidivaravini oadani anoꞌahahavivini hihi ida akadinahina,
ni-nahina agahinaki Deus kania.
Ijaꞌari-ra anakaidivaravini oadani,
ariabono avaꞌahahi siho kabodinia aahaꞌdina hoariha-ra akavaꞌijoaja kaimoni,
ni-nahina agahinaki Deus kania.
4 Ijaꞌari-ra anakaidivahi;
ni-jorakia aakaihamahiki,
anaibavijahajahakihi.
Ijaꞌari-ra anakaidivahi;
ni-kidinahina aakabaiki,
ni-ariabono avaboraborahaki,
ni-ajahana hoariha jahani-ra aradavini-ra akavaꞌibodivaraniki.
5 Ijaꞌari-ra anakaidivahi;
ni-akavaꞌiꞌiriniki,
ni-ariabono kaꞌoa-ra akavaꞌibodivaraniki.
Ijaꞌari-ra anakaidivahi;
ni-kidihojai avaꞌi-ra joko aniꞌaki,
ni-avaꞌi-ra fai aniꞌaki,
ni-akaitapiaki jaboni.
6 Ijaꞌari-ra anakaidivahi;
ni-khai aniꞌaki ida kidihojai asohiriki.
Khai aniꞌaki ida nahina jahaki kaꞌoa kahojaini.
7 Ijaꞌari,
Deus hiki-ra anakaidivahi;
ni-akavaꞌipahinipaꞌitxiki,
avakaijokahaꞌoadahaha.
Ni-anokhomiki ida anokhavini,
ni-avaꞌi vida vidahaki.
8 Ijaꞌari,
Deus hiki-ra anakaidivadorohi;
anakaidivahaꞌoadahahi.
Ni-anokhomiki ida anakaidavavini.
Anokhomiki bana ida Deus aagahai danoki ijaꞌaria vavahojaki.
Anokhomiki bana ida varani jaꞌdini Deus athi namoniva abono vakadivarani hiki.
Anokhomiki bana ida athii ogavahariki ijaꞌaria vidioniki.
Anokhomiki bana ida ogahai Deus ijaꞌari-ra anigahivini hiki.
9 Ni-aogahahaviki ida ogahai Deus ijaꞌari-ra anigahivini hiki.
Ni-aogahahaviki ida varani jaꞌdini Deua vara bivaniꞌaki.
Hihavirihi ida Deus aagahai danoki ijaꞌaria bivahojaki.
10 Hihaviki ida Cristo aagahai.
Khaꞌianana naothinia hojajanarihi bana ida ogahai hihaviriki avahojaki.
Hihavimanihi ida kidijaꞌari vakadiꞌogahai.
11 Hari.
Isai ohina kari isai kavarania okavaraniꞌiki ho,
isai kavaꞌibodivarani ida kodivaꞌibodivarani,
isai kahojaia okahojaiꞌiki ho.
Hari.
Okarahoꞌina ni-nahina kaimoni ohojana hijanaki ida isai kavaꞌibodivarani,
kahojai hiki.
Onivani fori hija hida ijaꞌari hidiaja araboja kavaꞌibodivarani isai kavaꞌibodivarani fori hini.
12 Hari.
Hidiaja arihojana oadani paha ijaꞌari abononi nokifarijahakiriki fori hiki ida akadivaꞌibodivarani.
Ni-aogajahakiki hidiaja.
Deus kania arihojana kamahini hahavi-ra anokijahakihi,
ijaꞌari maakaria vaabono vakanokikhamaki arihihi.
Hihavirihi ida akadiꞌogahai hidiaja arihojana oadani.
Deus kania arihojana vani bana hihavija ida akadiꞌogahai.
Hidakabaꞌi Deus haria ogajahakiki hari.
Onivani fori hija bana ida Deu-ra aogavini.
13 Arihojana oadani hidiaja Deu-ra avakaijokahi.
Anaviahanokhaki ida kidiania arihojana.
Hoariha-ra anakaidivahi.
Jahaki ida Deu-ra avakaijokavini.
Jahaki ida anaviahanokhavini.
Jahani arafiaki ida vahoariha-ra vaꞌora anakaidivavini.