Deus aagahai danoki Maꞌonahai Jahakia bikavagahinaiki
12
Vara aꞌonira oniꞌavini hiki bana ida Deus aagahai danoki varani hini,
avakadinaꞌdohi-ra ogathanivini.
Maꞌonahai Jahakia bikavagahinaiki ida Deus aagahai danoki.
Oigamina,
avarigavini onofiki hida varani.
2 Avarigaki ida Cristo kaijaꞌari avihirini kari deus amovana vahokiriki vaipohiki-ra avavakaijokavini.
Maꞌonahai jahariki aꞌonira vibananivini mani ida deus amovana-ra avakanamasivivini hija,
oniani ida aꞌonira anakamadaꞌia Deus kahagihia.
3 Hari.
Onofiki ida maꞌonahai ijaꞌari vaꞌini-ra nahonariahihiki hana hini jahaki jahariki-ra avarigavini.
Deus Maꞌonahana Jahaki ijaꞌari vaꞌini-ra nahonariahihivini oadani ni-ijaꞌaria bikaabokaki ida Jesu-ra kanavaranihavini varani jaharikia.
Ijaꞌaria ni-bikaabokaki jaboni ida Jesu-ra kidikaꞌdaꞌdia naonivini Maꞌonahai Jahakia vaꞌini binahonariahihiravini oadani.
4 Hojaki ida Deus aagahai danoki ipohiki.
Deus aagahai danoki hoarani ni-Deus aagahai danoki hoariha fori hiki.
Hoarana ada Maꞌonahai Jahaki.
Ovari Deus aagahai danokia haria noꞌaꞌiki.
5 Ipohiki ida badani Deua binofikia akabadanina kidimoni.
Kidibadani hoarani ni-kidibadani hoariha fori hiki.
Hoarana ada akadikaꞌdaꞌdi Jesus.
Kidimoni ida akadibadani.
6 Hoarani hirihi ida kidiꞌogahai danoki Deua bikavagahinaiꞌiki.
Deus aagahai danoki ijaꞌari hoarania bivahojaki,
ni-Deus aagahai danoki ijaꞌari hoariha bivahojaki fori hiki.
Hoarana ada Deus.
Ovari vaꞌora noꞌahananaki adani kidijaꞌari ogahai danoki vakainamokia,
bada vaniꞌaja kaimoni ida vaꞌora honariavini hiꞌiki.
7 Deua binanokiaki ada Maꞌonahai Jahaki avaꞌi bodinia ibavina afohanana,
haria noꞌahananaꞌiki ada Deus aagahai danokia,
vaꞌora aakodiara kaimoni adani Cristo kaijaꞌari hahavi.
8 Maꞌonahai Jahakia binoꞌaki ida ijaꞌari hoariha kidiꞌogahai danokia,
oniani ida Deus kavaꞌibodivarani nahina hini-ra vara vaniꞌavini hija.
Maꞌonahai Jahakia binoꞌaki ida ijaꞌari hoariha Deus aagahai danoki hoariha,
oniani ida varani namithaꞌiariki vahoariha avigaꞌiariki-ra vara vaniꞌavini hija.
Ipohini kabaꞌi ida kidiꞌogahai danoki,
hoarana ada Maꞌonahai Jahaki.
9 Maꞌonahai Jahaki vania binoꞌaja ida ijaꞌari hoariha Deus aagahai danoki hoariha,
bikaabokaja kaimoni ida Cristo-ra vakaijokavini arafiani.
Binoꞌaꞌihi ida ijaꞌari hoariha Deus aagahai danoki hoariha,
bikaabokaja kaimoni ida ijaꞌari vakavamoniki-ra vaꞌora anaihotabakhiavini.
Ipohini kabaꞌi ida kidiꞌogahai danoki,
hoarana ada Maꞌonahai Jahaki.
10 Maꞌonahai Jahakia binoꞌaki ida ijaꞌari hoariha Deus aagahai danoki hoariha,
bikaabokaja kaimoni ida Deus kabadani danokia kabadanini.
Maꞌonahai Jahakia binoꞌaki ida ijaꞌari hoariha Deus aagahai danoki hoariha,
bikaabokaja kaimoni vara bivaniꞌavini ida moni jaꞌdini Deua binavaꞌisohivini hiki.
Maꞌonahai Jahakia binoꞌaki ida ijaꞌari hoariha Deus aagahai danoki hoariha,
bikaabokaja kaimoni ida maꞌonahai-ra ogavini hana hini Deus kania khaki,
khariki.
Maꞌonahai Jahakia binoꞌaki ida ijaꞌari hoariha Deus aagahai danoki hoariha,
bikaabokaja kaimoni ida athii ogavahariki-ra dionivini.
Maꞌonahai Jahakia binoꞌaki ida jaboni ijaꞌari hoariha Deus aagahai danoki hoariha,
bikaabokaja kaimoni ida athii ogavahariki-ra vavaꞌisohihivini nahina hini.
11 Hari.
Hoarana ada Maꞌonahai Jahaki.
Vaꞌora noꞌahananaki adani Cristo kaijaꞌari Deus aagahai danoki ipohikia.
Ogahai danoki hana hini-ra kavagahinaivini-ra nofiha;
bikavagahinaihi.
Cristo abono varani hini hida
12 Hari.
Vaꞌora okavarajomiki adani Cristo kaijaꞌari Cristo abono hoarani vihina,
abono niha nini ipohini.
Ipohini kabaꞌi ida abono niha nini,
hoarani ida abono.
13 Harivani Cristo kaijaꞌari hahavi hari.
Judeus kaijaꞌari arihina,
judeus kaijaꞌari arihirina,
honai abono kapavakarivahaki arihina,
honai abono kapavakarivahariki arihina,
akanahahaviꞌiki hari.
Kanai karajomihia Maꞌonahai Jahaki haria karajomivini Cristo abono hoarani haria nihaki.
Deua bikaronaꞌiki ada Maꞌonahai Jahaki hoarana avaꞌi bodinia ibavira kaimoni afohanana.
14 Hoarani hirihi ida ijaꞌari abononi niha nini.
Ipohiki ida.
Cristo kaijaꞌari hoarani saꞌa fori kihiki,
hoariha ꞌdama fori kihiki,
hoariha morobo fori hiki,
onivani fori vihira adani Cristo kaijaꞌari afohanana.
15 Cristo kaijaꞌari Cristo ꞌdama fori kihikia biniꞌaja vaha:
—Saꞌai ohirina mani ida abonoi niha nini hora niharija.
— Asohirihi ida nikia kavaranini.
Asia abonoi niha nini kihiki ida ꞌdamai.
16 Cristo kaijaꞌari Cristo morobo fori hikia biniꞌaja vaha:
—Nokhoi ꞌbaꞌdani ohirina mani ida abonoi niha nini hora niharija.
— Asohirihi ida nikia kavaranini.
Asia abonoi niha nini ida moroboi.
17 Abono hahavi nokhoi ꞌbaꞌdani hija vaha;
ni-bikaabokaki ida nahina-ra kamithavini.
Abono hahavi moroboi hija vaha;
ni-bikaabokaki ida nahina-ra ramosivini.
18 Hari.
Deua binaibaviꞌiki ida abononi niha nini hahavi ibavini abonoi kania.
Ibavini hana hini-ra nofihi;
binaibavihi ida abononi niha nini.
Nini vani jaboni Deus vaꞌora naibavira adani Cristo kaijaꞌari hahavi Cristo abono hoarani vaꞌora nihara kaimoni.
19 Abonoi niha nini hoarani kaꞌoa hija vaha;
ni-hojaki vaha ida abononi.
20 Hari.
Hojaki ida abonoi niha nini ipohiki.
Hoarani kaꞌoa ida abonoi.
21 Nokhoi ꞌbaꞌdani saꞌai-ra kaniꞌaja vaha:
—Ni-ikahojani-ra okanofiki abonoi kania.
— Asohirihi ida nikia kavaranini.
Kaꞌdaꞌdi ꞌdamai-ra kaniꞌaja vaha jaboni:
—Ni-ikahojani-ra okanofiki abonoi kania.
— Asohirihi ida nikia kavaranini.
Nimania ida jaboni Cristo kaijaꞌari hoariha-ra kaihiponiravini asohirini.
22 Deus vania binamonahaꞌia ida abonoi niha nini hahavi.
Akavaꞌibodivaraniki vahabini ida ariabono niha nini hoarani danorini.
Danorini kabaꞌi,
hojarihi;
abinihahavihi ida abonoi.
23 Hojaki ida ariabono niha nini ijaꞌaria binokivini bikaipahiki,
oniani ida haria kanamakarija.
Ariabono niha nini hoariha nokiani jaharini-ra akavaꞌibodivaranihi,
oniani ida akadavaꞌajahakivini hija.
24 Ni-kamakariki ida ariabono niha nini nokiani jahaki kani.
Ni-nahina kaimoni binihaki.
Deus vania bianakaramisijahakija ida ariabono niha nini hahavi,
niha ninini binofivini ibavinia.
Bikahinanikajahakiki ida kaipahivahaki kani.
25 Ni-akapitakhamaki ida abonoi.
Abonoi niha nini hahavi abononi kanofikhamajahakiki ida,
abononi kakakodiakhamajahakiki ida jaboni.
26 Ariabono niha nini hoarania bikamithahi ida imani ꞌbanani,
ariabono niha nini hahavia bikamithaki ida.
Ijaꞌaria vara bivaniꞌaki ida ariabono niha nini hoarani jahani,
ariabono niha nini hahavia khai biniꞌaki ida.
27 Hari.
Harivani hahavi Cristo abono hari.
Cristo abono niha nini afohanana hari.
28 Deua binagathogathoꞌiki ida ibavi Jesus Cristo kaijaꞌari vahararana arihojaja kaimoni.
Vaꞌora naibaviꞌimidiaki adani Cristo athi avaadahaoniva abono.
Naothinia vaꞌora naibaviki adani Deus athi namoniva abono.
Naothinia vaꞌora naibaviki adani Jesus kaijaꞌari kaꞌojomoꞌiva abono.
Naothinia vaꞌora naibaviki adani Deus kabadani danoki-ra vakaabokaki.
Naothinia vaꞌora naibaviki adani kavamoniki-ra avanaihotavini-ra vakaabokaki.
Naothinia vaꞌora naibaviki adani hoariha kakodiava abono,
hoariha nasohiva abono.
Naothinia vaꞌora naibaviki adani athii ogavahariki-ra vidioniki.
29 Ni-Cristo kaijaꞌari hahavi athi avaadahaoniva abono vihiki,
ni-hahavi Deus athi namoniva abono vihiki,
ni-hahavi Jesus kaijaꞌari kaꞌojomoꞌiva abono vihiki.
Ni-Cristo kaijaꞌari hahavia vakaabokaki ida Deus kabadani danoki-ra bada vaniꞌavini.
30 Ni-Cristo kaijaꞌari hahavia vakaabokaki ida vakavamoniki-ra vaꞌora avanaihotavini,
ni-hahavia vakaabokaki ida athii ogavahariki-ra vidionivini,
ni-hahavia vakaabokaki ida athi ogavahariki-ra vavavaꞌisohihivini nahina hini.
31 Vakavaꞌinofinofi bana ida Deus aagahai danoki jahani arafiaki.
Jahani kabaꞌi ida ogahai danoki-ra avavahojavini,
jahani arafiaki hida hihida hojai aꞌonira onavaꞌisohivini hiki bana.