2
Oniania oabono oniꞌahi:
Jokoa ookhaꞌianarihi avakadiania,
ni-onofiki ida avavaꞌini-ra mokara oniꞌaꞌianavini.
2 Aꞌonivani ovaꞌi-ra khai avaniꞌaki aꞌoni.
Ookhahi;
avavaꞌini-ra mokara oniꞌahi.
Ni-ovaꞌi-ra khai avaniꞌaki bana jaboni.
3 Onofirihi ida jorakia aꞌonira onavanavanahaꞌianavini,
oniani ida oathi kapapirani hoariha aꞌonira oakaronavini hiꞌia.
Aꞌonira onokijoraja vaha;
ovaꞌi mokara nimanihi vaha.
Ni-onofiki ida ovaꞌi-ra mokara avaniꞌavini.
Onofiki bana ida ovaꞌi-ra khai avaniꞌavini.
Oogahi ida khaii onina,
bona khaii avakhanihahavihi.
4 Aꞌonira okajirihivini vani ovaꞌi rogo inini arafiaja,
ovaꞌi soko inini,
oasarakarahona.
Avavaꞌini-ra mokara oniꞌavini kaimoni hirihi ida aꞌonira okajirihivini.
Onofiꞌiki ida aꞌonira onakaidivavini arafiani-ra avarigavini.
Aakariakavahaki ada makhira kidihojai asohiriki
5 Avahoarahanana avavaꞌini rogo iniꞌiki aꞌoni.
Ni-hovani kaꞌoa ovaꞌi-ra rogo aniꞌaki ada hiꞌada makhira.
Avavaꞌini vani ida rogo bianiꞌaja jaboni.
Onofirihi ida athii khanaki arafiakia makhira-ra vara oniꞌavini.
6 Arajomaki ida kidihojai asohiriki abosini ijaꞌari vaipohiki avahararania vanaabosiꞌavini,
avakadiania akaraꞌoꞌina.
7 Hari.
Jahaki bana ida avarakariakavini kidihojai asohiriki avarakavaꞌiꞌbirinivini,
vaꞌi mokara nini karaho faiini-ra kaimoni.
Ni-jahaki ida vaꞌi khaii nirini arafiani,
oniani ida asia avanakaidivavini-ra ogavini hija bana.
8 Vara vaniꞌa bana ada hiꞌada makhira,
avanakaidivavini avakahivini.
9 Oathi kapapirania aꞌonira okajirihivini hiꞌiki aꞌonira okaijoꞌavini kaimoni ida.
Oogavini onofiꞌiki ida oathi hahavi-ra avanaabavini afobakhia.
10-11 Ijaꞌari kahojai asohiriki-ra avarakavaꞌiꞌbirinivini,
avarakariakahi,
hovani jaboni oakariakaki ida.
Ni-oogaki ida nahina hojaki,
oakavaꞌiꞌbiriniki kaimoni.
Makhira-ra aakariakarihi;
Satanás haria kaabokahi.
Aogaki ida haria kaboroborovini-ra nofivini.
Cristo viaha oakariakaki ada makhira aꞌonira oakodiaja kaimoni.
Mahi ipohiriki Paulo hojaꞌiki Trôade sidajia
12 Hari.
Trôade sidaji-ra oanikhahaꞌihi Jesus Cristo monina jahaki-ra onamonija kaimoni.
Okaikahina viahania akadikaꞌdaꞌdi Jesua binaibavijahaꞌiki ida kidibadani kodibadani kaimoni.
Okaikahina vani vaꞌora okaragaꞌara adani ijaꞌari vaipohiki kodivarani-ra vakamithavini-ra vanofiki.
13 Trôade sidajia arigamina Tito-ra okaragaravini mani ida oakavidakarahovini hija.
Oniania sidaji kaijaꞌarini-ra vaꞌora okaaminaꞌihi.
Macedônia kaaraboni maina-ra oanikhahaꞌihi.
Cristo haria bananiki hari
14 Khai aniꞌava ada Deus.
Cristo kania aakaramisina vani Deus haria bananihahaꞌoadahaja.
Cristoa binadabakaꞌoaꞌiki ida Jahari kabadani.
Haria saariꞌiki ada Jahari saꞌa kabodinia,
Cristo kania ariadahajabanaja kaimoni.
Nahina mitxaki fori hiki ida Cristo monina jahaki.
Deus haria honariavini mani ida Cristo monina-ra akanarafarakhamaja ibavi hahavia,
oniani ida ibavi ipohikia jahani akanamitxakhamana hija.
15 Hari.
Cristoa bikavagahinaiki fori hiꞌiki ida incenso mitxaki Deus viaha.
Harivani incenso mitxaki arihiki hari.
Aꞌaadahaonina vani akamitxakhamaja ida ijaꞌari hahavi vakadiania.
Ijaꞌari Deus vaꞌora akavaꞌijoaki vakadiania,
ijaꞌari Deus kania avakamadaki vakadiania,
akarafarakhamaki jaboni ida mitxaki.
16 Ijaꞌari Deus kania avakamadakia vavaꞌbaxaki fori hiki ida Cristo monina jahaki.
Moni-ra vakajonivini mani ida vaꞌora naabinija bana.
Hari.
Ijaꞌari Deus vaꞌora akavaꞌijoakia vavamitxaki fori hiki ida Cristo monina jahaki.
Vaꞌora nahokiki bana ida moni.
Ni-ijaꞌari kaꞌoa bikaabokaki ida Jesus monina-ra akanarafarakhamavini.
17 Deus vani haria kakodiaja.
Cristo-ra vanofiꞌbadarakia ni-vakaabokaki hida badani.
Ijaꞌari inisika kaidivariki-ra pavakari vanihaki fori vihiki adani.
Vanofiꞌbadaraki ida jiniro vagahinana.
Cristo monina-ra avaadahaoniꞌbadaraki fori arihirihi.
Deus vani haria karonaꞌia Cristo monina-ra aavaadahaonija kaimoni.
Cristo kahonai abono arihina mani ida Deus haria bananivini hija.