Deus kavaꞌiponahi jaꞌdini kavaranihi
3
Cristo athi aavaadahaoniva abono arihiki hari.
Nikia akavaranina ni-ariabono avaboraborahaki.
Aꞌonivani haria avarigaki.
Ni-nahina kaimoni varani arihina jiriki-ra avikhaki avakadiania,
avarigaja kaimoni ida Cristo athi aavaadahaoniva abono kaꞌoa arihina.
Cristo athi avaadahaoniva abono vahoariha vahabini varani vihina jiriki-ra vavaadahaki.
Ni-nahina kaimoni papira niki-ra avanajiriki jaboni aavikhaki kaimoni,
Cristo kaijaꞌari avajoronioniki vahoariha vakadiania.
Vaꞌoaniaro haria avigajahakiki jaboni.
2 Aꞌonivani akadipapira jiriki fori avihiki aꞌoni avaꞌi bodinia.
Aꞌaadahaonina vani ijaꞌari hahavia mitha vaniꞌaja ida varani avihini,
avigahi ida kaꞌoa hini Cristo haria karonaꞌavini avakadiania.
3 Akadipapira jiriki fori avihiki aꞌoni.
Cristo haria honariavini hiki ida anajirivini.
Ni-sidaꞌia jiriki ida Cristo athi.
Ni-aꞌboꞌdaki ada sidaꞌi.
Deus hokiki Maꞌonahana vania Cristoa binajirija ida.
Ni-binajiriki ida athi jaꞌdi namania.
Kidijaꞌari vavaꞌi bodini vania binajirija ida hojai jaꞌdini binofiki.
4 Cristo haria kakodiavini hiki Deu-ra avakaijokavini,
oniani ida athii avaadahaoniva abono kaꞌoa arihina-ra aogavini hija.
5 Ni-ariabono avaboraborahaki akadiꞌogahaia.
Ni-harivani kaꞌoa akaabokaki hida Deus kabadania akabadanina.
Deus vani ada haria kakodiara,
akaabokaja kaimoni ida kidibadani.
6 Haria kakodiavini hiki akaabokaja kaimoni ida vaꞌiponahi jaꞌdini-ra vara avaniꞌavini.
Deus kavaꞌisohihi ꞌboꞌda jiriki fori hirihi ida kidivaꞌiponahi jaꞌdini.
Maꞌonahai Jahaki avaꞌi-ra nahonariahihivini mani ida vaꞌiponahi jaꞌdini athini-ra anaabavini hija.
Vaꞌisohihi ꞌboꞌda jirikia ni-bikaabokaki ida ijaꞌari-ra nahokihahaꞌoadahavini.
Ijaꞌaria biragarivini mani ida naabinini hija bana.
Maꞌonahai Jahaki vani ada ijaꞌari-ra nahokihahaꞌoadahara Deus kania.
7-8 Jaꞌdi namania kiorariki ida Deus kavaꞌisohihi jiriki oniaro miroꞌa.
Deus jaꞌdi jiriki-ra arakhavini kari Moisés kania,
nokiaꞌiki ida Deus jahana vagaki.
Deus Moisés maakarina hojana vani kamaꞌdaja ida Moisés kohana nokho vagaꞌini.
Okharafonina vani ihimiraraoniꞌihi ida Moisés nokho vagani.
Kabaꞌi,
Israel kaijaꞌaria ni-vakaabokaki ida vagani karaho-ra vada vaniꞌavini.
Deus kidivaꞌisohihi jiriki-ra karonavini kari,
ijaꞌari athi naabani vihiriki vaabiniꞌiki-ra vavaꞌisohihijoraki.
Bikaronavini kari vani nokiakarahoja ida Deus jahana vagani.
Deus kavaꞌiponahi jaꞌdini Maꞌonahai Jahakia binakamaꞌdavini kari,
nokiaꞌianani arafiaki ida Deus jahana vagani.
9 Jahaki ida vaꞌisohihi jiriki Deua bikavagahinaiꞌboꞌdaꞌiki.
Jahani arafiaki ida vaꞌiponahi jaꞌdini.
Ijaꞌaria biragarihi ida vaꞌisohihi ꞌboꞌda,
biragarivini abosini ida abini.
Ijaꞌaria bivakaijokahi ida vaꞌiponahi jaꞌdini,
Cristoa binasohikaꞌoahi.
10 ꞌBoꞌdakari vagaki fori hiki ida vaꞌisohihi ꞌboꞌda jahani.
Vaꞌiponahi jaꞌdini vagania biaradavini mani ida vaꞌisohihi jiriki ꞌboꞌda vagani-ra nanokiajanarija.
11 Hojahahaꞌoadaharihi ida vaꞌisohihi jiriki ꞌboꞌda.
Vaꞌiponahi jaꞌdini aꞌboꞌdaki vani ida hojahahaꞌoadahaja,
oniani ida vaꞌiponahi jaꞌdini aꞌboꞌdaki jahani vaꞌisohihi jiriki jahani-ra aradamivini hija.
12 Aogaki ida nahina anaviahanokhaki kaꞌoa hini,
oniani ida vara avaniꞌavini akaipahiravini hija.
13 Moisés kohana fori arihirihi.
Ovari nokho-ra karahobaꞌiki makaria Israel kaijaꞌaria vanokiria kaimoni ida nokho vagani ihimiraraoniꞌini ihimiꞌini.
14 Oniaro kari Israel kaijaꞌari kohana ni-avigajahakiki ida Deus kavaꞌiponahi oniaro miroꞌa nahina nini.
Hidakabaꞌi asia vakhaniki adani Israel kaijaꞌari vanamitharonisiagaki.
Vada vaniꞌabakhiavini kabaꞌi ida Deus kavaꞌiponahi oniaro miroꞌa jiriki,
ni-avigaki nahina nini.
Makari fori hiki vakadivaꞌibodivarani bikarahobavini,
oniani ida Deus athi-ra avigavini-ra vakaabokaravini hija.
Cristo kania ijaꞌari abononi gahinai nihavini vani aniaja ida makari fori hiki.
15 Hidakabaꞌi asia Israel kaijaꞌaria vakamithaki ida vaꞌiponahi oniaro miroꞌa Deus Moisé-ra noꞌavini hiꞌiki,
makari fori hikia bikarahobaki ida vakadivaꞌibodivarani.
Makari fori hiki ida nahina Deu-ra avigavini nadabani hiki.
16 Deus athi kapapirania hojaki hida Moisés kohana varani hina:
“Kidikaꞌdaꞌdi kaꞌoa kania maakariꞌaha,
Moiséa bianiꞌihi ida makari nokho karahobani hiki.”
Niki ida athii.
Onivani fori hija ida makari fori hiki aniani hidakabaꞌi.
Kaꞌdaꞌdi kaꞌoa kania ijaꞌari maakarihi;
aniahi ida makari fori hiki.
17 Hihida papira jirini athini hada kaꞌdaꞌdi kaꞌoa.
Maꞌonahai Jahaki-ra vara vaniꞌaki hida papira athini.
Maꞌonahai Jahaki avaꞌi-ra nahonariahihihi;
ni-nahina haria gathijanarihi.
Aꞌaihotaꞌiki hari.
18 Ijaꞌari vanokho karahobariki fori arihiki hari.
Vada aniꞌajahakiki ida akadikaꞌdaꞌdi jahana vagaki.
Hikori fori arihina vani nokiaja ida akadikaꞌdaꞌdi Maꞌonahana Jahaki vagana akadiania.
Vada aniꞌabakhiaha;
aꞌbaꞌdibakhiamanihi ida vagana nokiani akadiania,
ovari fori arihija kaimoni.