Kamoti akaꞌboꞌdariki fori arihiki hari
4
Hari.
Deus haria nakaidivavini mani ida athi aavaadahaonivini kabadanihia haria noꞌavini hija,
oniani ida akavaꞌipahiniravini hija.
2 Akajoniki ida hojai ahojaki avaꞌi-ra anaipahihiki.
Ni-anofipaꞌitxiki jaboni ida ijaꞌari-ra akorijanahavini.
Ni-anahoarihaki ida Deus athi sohikaꞌoaki.
Vara avaniꞌaki ida Deus athi ijaꞌari hahavia vakamithaja kaimoni.
Deua biogaki ida akadivarani kaꞌoa hini.
Anofiki ida ariathi-ra mitha vaniꞌaki haria vakavaꞌibodivaranivini:
—Jahaki ida Paulo vakadihojai.
Asohiki ida vaathi.
3 Deu-ra avigariki-ra vaꞌora anavaꞌisohivini hiki ida Cristo monina jahaki ni-nahina hini avigaki.
Nahina ahojaki karahobaki fori hiki ida akadivarani.
Ijaꞌari Deus kania avaakamadakia ni-avigaki.
Vahoariha avigaki ida akadivarani.
4 Jahari vavaꞌi binahonariahihiki adani Deu-ra vanofiriki,
vanokho bikanamaodorohaki fori vihiki adani,
oniani ida Cristo monina-ra vakajariꞌdavini hija.
Vakaabokarihi ida Cristo monina-ra avavakharanaivini,
ni-nahina hini avigaki.
Cristo monina jahaki mahi vagaki fori hiki ida.
Monina jahakia binanokiavini kabaꞌi ida Cristo jahana,
danona,
vagana vahararana hojaki,
ni-vanokiki.
Deus kahojai oamani ida Cristo hojana hija.
5 Moni jahaki-ra avavaꞌisohihivini vani ni-varani arihina akavaraniki.
Jesus Cristo vani ada vara avaniꞌara.
Hahavi vakaꞌdaꞌdiva kaꞌoa ada.
Jesus kani arihina mani ida avakadikakodiahi abono haria nihaja.
Cristo monina-ra avarigavinia aꞌonira aakodiaki hari.
6 Deus hahavi-ra namonahavini kari bihonariaki ida bakibakini kaꞌoa kani avagaꞌini.
Ovari Deua bihonariaki jaboni ida vagana akadivaꞌibodivarani-ra navagavini,
Deu-ra aogaja kaimoni.
Cristo nokhoa binanokiaki ida Deus jahana,
aogaja kaimoni ida Deus jahana vagaki niha ninini.
7 Hari.
Nahina kaidivani arafiaki ida Cristo monina vara avaniꞌaꞌiki.
Harivani Cristo monina akavaranibakhiaki kamoti kakaidivariki akaꞌboꞌdariki fori arihiki hari.
Bavi aꞌboꞌdariki fori hiki ida ariabono.
Ariabono bodinia hojaki ida Deus kanahina kaidivaki.
Deus kani ida danoi arafiaki akadiania hojaki.
Akadiani hirihi ida.
Deus oavania binakamaꞌdaja ida danona arafiaki Cristo monina hojaki.
8 Ijaꞌari avaꞌi-ra rogo avaniꞌabakhiavini kabaꞌi,
ni-vakaabokaki ida haria vakanajajorivini.
Hoarahaja akadimahi-ra aogajanaravini kabaꞌi,
asia Cristo-ra avakaijokahaꞌoadahaki hari,
ni-akavaꞌipahinipaꞌitxiriha ada.
9 Ijaꞌari vaipohiki haria vanajahariharivini kabaꞌi,
ni-Deus haria kavaꞌipahiniki.
Haria avanahahabakhiavini kabaꞌi,
ni-haria vanaabinivini-ra vakaabokaki.
10 Mahi hahavi ijaꞌaria vanofibakhiaki ida haria vanaabinivini,
Jesus abiniꞌina-ra vanofibakhiavini vani fori hini.
Vasaꞌa kabodinia Cristo haria akavaꞌijoabakhiaki hari.
Cristo haria akavaꞌijoavini mani ida hokina-ra nanokiavini hija.
11 Arihokina oadani Jesus kaijaꞌari arihina mani ida haria vanaabinikamarivini hija afobakhia.
Oniania nokiaki ida Jesus kamahi anokhomiriki ariabono aꞌboꞌdariki kania.
12 Cristo monina akavaranibakhiana mani ida apohimajana-ra anamaakarija afohaꞌoadaha,
oniani ida Cristo kania avakadimahi anokhomiriki-ra nakaraja.
13 Hari.
Hojaki hida athii Deus athi kapapirania:
“Deu-ra ovakaijokavini mani ida vara hora niꞌaja.”
Onivani fori hija ida Deu-ra avakaijokavini.
Deu-ra avakaijokavini mani ida Cristo monina-ra vara avaniꞌabakhiavini hija.
14 Aogaki ida Deus akadikaꞌdaꞌdi Jesu-ra anahokiꞌavini.
Aogaki jaboni ida haria anahokivini bana,
Jesu-ra anahokiꞌavini fori hini.
Oniaroa Deus haria avikhajabanavini Jesua bivahojaki kania.
15 Aꞌonira kajoamoraja kaimoni ida nahina hahavi jahariki namithaꞌiki akadiania.
Cristo monina-ra akanarafarakhamavini oadani,
Deus vaꞌora anaꞌbaꞌdibakhiaki adani ijaꞌari-ra vaꞌora akavaꞌijoaki,
oniani ida ijaꞌari Deus jahana-ra khai vaniꞌaki-ra anaipohija.
Aꞌbaꞌdiki ida varani jahaki Deu-ra vara vaniꞌaki,
vaꞌora kajoamoravini vaꞌora vakahivini.
Cristo-ra avakaijokahaꞌoadahavini
16 Deu-ra avakaijokahaꞌoadahavini mani ida Cristo monina akavaranina-ra akavaꞌipahiniravini hija.
Vajaforia aꞌboꞌdarini kabaꞌi ida ariabono,
ajaꞌdibakhiaki ida amaꞌonahana mahi hahavi.
17 Namithabakhiaki ida nahina jahariki akadiania,
ajahariharina,
avaꞌi rogo inini hiki.
Mahi ipohirikia radahaki ida.
Paꞌitxi ida avaꞌi rogo inini hidiaja.
Karahoni arafiaki ida nahina jahaki namithaki bana akadiania.
Mahi anokhomirikia ni-radahaki.
Avaꞌi rogo inini vani haria naibavijahajoraki fori haria nihaja,
agathanija kaimoni ida nahina jahani arafiaki Deus kania khaki akadimoni hini.
18 Akavaꞌibodivaranibakhiaki ida nahina nokiariki.
Ni-akavaꞌibodiki ida anokiki.
Radahajorakiki bana ida nahina ijaꞌaria binokiki.
Ni-anokhomiki ida nahina ijaꞌaria binokiꞌiariki Deus kania.