Ijaꞌari abononi jaꞌdini-ra vahojaki bana
5
Hari.
Gora aꞌboꞌdariki fori hiki hida ariabono afohanana.
Thararaki fori hiki bana ida agorana hidiaja.
Deus haria kaibavijahahivini hiki bana ida gora hoariha kidiania nama,
amaꞌonahana ibavini kaimoni afohanana.
Ijaꞌari kamonahi hirihi ida agorana jaꞌdini.
Deus kamonahi ida.
Mahi anokhomirikia aꞌboꞌdaki ida bana.
2 Arihokina oadani hidiaja avahojaki ida ariabono.
Agorana fori hiki ida.
Anokhavini oadani ida agorana jaꞌdini,
avaꞌi vidavidahani haria nabodiꞌithoki fori arihiki hari.
Anokhaki ida ariabono jaꞌdini nama khaki-ra avahojavini.
Makari-ra akaimahavini vani fori hija ida ariabono jaꞌdini.
3 Akaimahahi;
ni-rajorajoki fori hiki bana ida amaꞌonahana.
Avahojaki bana ida aimana ijaꞌari nama vahojaki vaimana fori hiki.
4 Arihojana oadani hidiaja,
abodiꞌithoki fori arihiki hari,
ariabono jaꞌdini-ra avahojavini-ra anofivinia.
Ni-anofiki ida ariabinina agorana fori hiki thararani hidiaja.
Anofiꞌoamanija ida nama kamakarini fori hiki-ra aaragarivini akadimakari ꞌboꞌda fori hiki namania,
makari ꞌboꞌda-ra anavisoniki kaimoni.
Anofiki ida ariabono aꞌboꞌdariki-ra anaabosivini ariabono jaꞌdinia.
5 Deus vani haria naibavijahaꞌia ariabono jaꞌdini-ra avahojaꞌia kaimoni.
Bikaronaꞌiki ada Maꞌonahai Jahaki avaꞌi bodinia ibavina,
aogajahakija kaimoni ida haria navaꞌiponivini hiki namithaki bana akadiania ariabono jaꞌdinia agahinana.
6 Khai aniꞌahahaꞌoadahaki ida namithaki kaimoni akadiania.
Aogaki ida ariabinirina oadani agorana fori hiki kania ibavini ida amaꞌonahana.
Ni-aribaviꞌiarihi kaho akadikaꞌdaꞌdi kaꞌoa gorana kania.
7 Ariabinirina oadani,
Cristo-ra avakaijokahaꞌoadahaki hari.
Ni-anokiki kaho ida anaviahanokhaki.
8 Khai aniꞌakarahoki ida namithaki kaimoni akadiania.
Anofiki ida aasafi ꞌboꞌda-ra anahojahavini hidiaja,
aꞌaibavija kaimoni akadikaꞌdaꞌdi kaꞌoa gorana nama.
9 Hidiaja arihojana oadani,
kidiania arihojana kamahini,
anofivini arafiaki ida akadikaꞌdaꞌdi vaꞌi-ra khai aniꞌavini.
10 Harivani afohahavi arihojaki bana Cristo viaha afohanana,
haria navaꞌisohira kaimoni akadihojai abosinia.
Asohihi ida akadibadani araboa arihojana oadani;
agathanihi ida abosini jahaki.
Asohirihi ida akadibadani;
agathaniki ida abosini nahina jaharikia.
Asohikaꞌoaki ida niha ninini Cristo haria naabosivini.
Cristo kabadani ida Deus kavaꞌahi haria nihaja
11 Aogaki ida akadihojai abosini-ra agathanivini,
oniani ida akadikaꞌdaꞌdi Jesu-ra avavaꞌihavini hija.
Oniaroa,
Deu-ra avigariki-ra vaꞌora vara aniꞌabakhiaki hari afodanoki,
vakajariꞌdaria kaimoni ida vakadihojai abosini-ra vagathanivini.
Deua biogahahaviki afojahaki ida akadivaꞌibodivarani,
akadihojai hiki.
Biogaki ida asohini akadihojai.
Okavaꞌibodivaraniki ida akadihojai-ra avarigajahakivini jaboni.
12 Hariꞌa ariabono avaboraborahaki haria vavaniha bana.
Anofiki ida akadihojai asohini-ra avarigavini,
varani arihina-ra khai avaniꞌavini-ra avakaabokavini.
Vahoariha haria vakanavaranihakia vavaboraborahaki ida ijaꞌari nokiani niha ninini.
Ni-vakavaꞌibodiki ida ijaꞌari vaꞌini bodini vara nini niha ninini.
Anofiki ida akadivaꞌibodivarani-ra avarigavini,
vaꞌora avanasohira kaimoni adani athii masinia haria vakanavaranihaki.
13 Ijaꞌari haria vakanavaranihavini avaꞌiharina-ra vakahivini.
Deu-ra anofivini arafiani mani ida avaꞌiharina-ra vakahivini hija.
Akadivaꞌibodivarani jahani mani ida aꞌonira akajoamoravini-ra akaabokavini hija.
14 Cristo avaꞌi-ra nahonariahihivini mani ida ijaꞌari-ra anakaidivavini-ra anarafiaja,
haria nakaidivavini arafiani fori hini.
Ovari abono-ra vaꞌahaꞌiki abiniꞌina ijaꞌari hahavi vakadimoni hina,
oniani ida vaꞌora naabiniꞌia kidiania.
15 Ijaꞌari hahavi vakadimoni ida Cristo abiniꞌina,
vavakaꞌdaꞌdijanaria kaimoni ida vakadimahi afohanana.
Cristo vani ada vakadimahi vakaꞌdaꞌdini hira afohaꞌoadaha,
vanaabaja kaimoni ida hahavi binofiki vakadiania.
Ovari Cristo Deua bianahokiꞌiki vakadimoni hina.
16 Hari.
Ajaꞌdiꞌiki ida akadivaꞌibodivarani.
Cristo-ra aogaravini kari ijaꞌari araboa hojaki kavaꞌibodivarani fori hiꞌiki ida akadivaꞌibodivarani.
Binokiki ida ijaꞌari oniani ida jahani jaharini bikavaꞌibodivaranivini hija.
Nimania ida jaboni ꞌboꞌdakari Cristo-ra akavaꞌibodivaranivini.
Ni-niki-ra akavaꞌibodivaranijanaki.
17 Cristo kania ijaꞌari akaramisini mani ida ijaꞌari jaꞌdini nihani hija.
Ihimiꞌiki ida kidimahi ꞌboꞌda,
kamaꞌdaꞌiki ida kidimahi jaꞌdini.
18 Deus vania bianabosija ida akadimahi ꞌboꞌda mahi jaꞌdinia.
Cristo haria kajoamoravini mani ida Deus kavaꞌahi haria nihaja.
Akaimajahaꞌiki ada Deus.
Oniaroa haria noꞌavini hiki hida badani,
vahoariha-ra anariakavini Deus kavaꞌahi vihira kaimoni jaboni.
19 Kodivarani hiki hida Deus Cristo-ra karonaꞌavini ijaꞌari vakadiania.
Nini vani Deus vaꞌora anariakara adani,
kidivaꞌahi vihira kaimoni adani ijaꞌari hahavi.
Ni-Deua bianavathajanaki ida hojai asohirikia vakabadanibakhiaꞌina.
Binaꞌbiraꞌoamaniꞌia ida.
Hari.
Oniaroa,
haria karonavini ijaꞌari hahavi vakadiania aokhana,
vaꞌora anavaꞌisohira kaimoni kidivaꞌahi vihina Deus vaꞌora nofivini.
20 Hari.
Cristo haria honariaꞌihi athia akavaranina kidimoni.
Athia akavaranina vani Deus aꞌonira kaboaꞌiꞌia.
Aꞌonira anavaꞌisohivini hiki ida Cristo aꞌonira kaathidanoavini Deu-ra avarakariakaja kaimoni,
Deus kavaꞌahi avihija kaimoni.
21 Ni-hoaranija Cristoa bada biniꞌaki ida hojai Deus bivajahariki.
Haria kajoamorara kaimoni Cristoa bigathaniꞌiki ida ijaꞌari hahavi vakadihojai asohiriki abosini.
Cristo hojai asohiriki namonahava abono fori hiki Deua binahojaꞌavini.
Niki vania kabadaniꞌara ada Deus,
aakaramisija kaimoni Cristo kania,
oniani ida Cristo kahojai sohikaꞌoaki-ra avahojavini Deua bikahivini hija.