Deus athi avaadahaoniva abono kabadani
6
Deus khama bada akhanina vani aꞌonira akaathidanoaja.
Avagathaniꞌiki ida Deus aꞌonira kajoamoraꞌavini.
Hariꞌa bana vanakavithima bana.
2 Mitha vaniꞌa bana hida Deus athi hojaꞌboꞌdaꞌiki:
“Okanamahiki ida aꞌonira okajoamoravini kamahini,
oniani ida hora avibaranahavini aꞌonira okajoamoravini hiꞌia.
Okanamahiki ida aꞌonira oakavaꞌijoavini kamahini,
oniani ida hora avibaranahavini aꞌonira oakavaꞌijoavini hiꞌia.”
Nihi ida Deus athi.
Mitha vaniꞌa bana hida oathi.
Deua bikanamahiki bana hida hidakabaꞌi aꞌonira kajoamoravini.
Hidakabaꞌi Deua binofiki bana ida aꞌonira akavaꞌijoavini.
3 Anofirihi ida ijaꞌari Cristo-ra vagathanivini-ra anadabavini,
oniani ida Deus kabadania haria kanabadanijahakija,
haria vakanavaraniharara kaimoni.
4 Anofiki ida akadihojai asohikia aꞌonira ananokiahivini,
avarigaja kaimoni ida Deus kahonai abono arihina.
Aꞌaihamahirina vani haria vanajahariharivini-ra avaꞌahaja.
Nahina jahariki namithani kabaꞌi akadiania,
nahina avaꞌi-ra rogo aniꞌaki jaboni,
ni-akavaꞌipahiniki ida akadibadani.
5 Haria vidabakhiaki adani.
Haria avibaibakhiaki adani cadeia,
haria vavajoronibakhiavini hiki haria vanajahariharira kaimoni.
Arafiaꞌoamaniꞌia ida akadibadani.
Anokibakhiaki hari joma.
Akainamobakhiaki ida akadiꞌbai jaboni.
6 Ananokiaki ida Deus kahonai abono kaꞌoa arihina akadihojai asohikia.
Badani asohikia akabadaniki hari.
Ananokiaki ida Cristo monina-ra aogajahakivini.
Ni-akaitapiajorakiki ida hoariha.
Avaꞌadiki ida hoariha.
Maꞌonahai Jahaki avaꞌi-ra nahonariahihiki hari.
Kaꞌoa hiki hida hoariha-ra anakaidivavini.
7 Anasohiki ida Deus monina kaꞌoa.
Deus danona akadiania hojaki jaboni.
Akadisaꞌai hiki ida hojai sohikaꞌoakia akahojaina,
akaabokaja kaimoni ida nahina jahariki asohiriki-ra anadabavini,
akaabokaja kaimoni jaboni ida ariabono aakavaꞌijoavini.
8 Vahoariha varani jahakia vara haria vavaniꞌaki,
khai haria vaniꞌavini.
Vahoariha vani adani varani jaharikia haria vakanavaranihara.
Onii jaharikia haria vanoꞌaki.
Vara avaniꞌahahaꞌoadahavini kabaꞌi ida athii kaꞌoa hini,
korijanahi abonoa haria vanaoniki adani.
9 Nahina arihirina-ra vakahivini kabaꞌi,
ijaꞌari vaipohiki haria avigaki.
Ariabinikamaribakhiana kabaꞌi,
asia arihokina-ra avarigaki aꞌoni.
Haria vanaimaꞌbanabakhiavini kabaꞌi,
ni-haria vanaabiniꞌiaki kaho.
10 Ijaꞌari avaꞌi-ra ami avaniꞌabakhiavini kabaꞌi,
khaii akhanihaꞌoadahahi.
Akanahinariki fori arihina kabaꞌi,
vahoariha-ra vaꞌora akananahinaꞌahapikiꞌiki hari Deus kanahina jahakia.
Ipohirini kabaꞌi ida akadinahina nokiaki,
avahojaꞌoamanija ida nahina hahavi.
11 Akadivaꞌahi,
Corinto sidajia avahojaki.
Akadipapira athini aꞌonira vara aniꞌavini hiki hida hahavi avaꞌi bodinia hojaki.
Ni-avakadiania oanahojaki ida akadivaꞌibodivarani.
12 Aꞌonira ananokiahivini hiki ida aꞌonira anakaidivakarahovini.
Haria avanakaidivariki fori avihiki aꞌoni.
13 Kodisai fori avihini vani vara aꞌonira oniꞌaja bana.
Onofiki ida haria avanofijahakivinia haria avananokiavini aꞌonira anofijahakivini fori hini.
Ni-jahaki ida Cristo kaijaꞌari vihiki vihiriki khama
14 Hariꞌa bana Cristo-ra nofiriki khama bada vakhanihaꞌoadaha.
Ajahamisirihi ida hojai asohikaꞌoaki,
hojai asohiriki khama.
Ajahamisirihi jaboni ida vagani,
bakibakini khama.
15 Ni-Cristo,
Jahari khama vaabono avakanajahamisikhamaki.
Ni-nihanikia Cristo-ra nofiki Cristo-ra nofiriki khama vaabono avakanajahamisikhamaki.
16 Ni-nihanikia ijaꞌari Deus khai niꞌana hiki gorana Deus kaꞌoa-ra vakanamasiviki,
ijaꞌari deus amovana-ra vakanamasiviki khama vaabono avakanajahamisikhamara kaimoni.
Harivani Deus hokiki gorana hari.
Deus ibaviki akadiania.
Deus abono-ra vara vaniꞌavini:
“Oibaviki bana ho kodijaꞌari vakadiania.
Ohojaki bana ho vahararana.
VakadiDeus ohina mani ida hora vakanamasivivini hija bana.
Kodijaꞌari vihina mani ida vaꞌora ovakaꞌdaꞌdivini hija bana.”
17 Hari,
oniaroa Deus vaꞌora niꞌaki adani kidijaꞌari:
“Avakaraꞌo bana deus amovana-ra vakanamasiviki vakadiania.
Hariꞌa avaabononi
avakanajahamisikhama
vakadiania.
Vakavaꞌipahinikaꞌoa bana ida vakadihojai
okaramonaki.
Oniaroa aꞌonira okapoariki bana aꞌoni.
18 Avakadiabiꞌi ohiki bana ho.
Aꞌonivani kodisai avihiki bana aꞌoni.”
Nihaki ada akadikaꞌdaꞌdi kaꞌoa.
Hahavi kaabokava ada.