7
Kodivaꞌahi,
aꞌonira onakaidivaki ho.
Hihida athi aꞌonira onavaꞌisohivini hiꞌiki Deus haria navaꞌiponihahavivini hiki,
oniani ida hojai asohiriki hahavi-ra akavaꞌipahinikaꞌoavini Deua binofivini hija.
Akajoniva ida hojai ariabono-ra najahariki.
Akajoniva ida hojai akadivaꞌibodivarani-ra najahariki jaboni.
Deu-ra avavaꞌihavini mani ida hojai Deua binofikia haria kanahojaibakhiaja,
ariabono gahinai anihahahaꞌoadahava kidiania.
Khaii niki ada Paulo
2 Haria vananokiahi bana haria avanakaidivavinia.
Ni-badani asohirikia akabadaniki avakadiania.
Ni-anajahariki ida Cristo-ra avakajariꞌdaravini.
Ni-aꞌonira akorijanahaki.
3 Ni-avavaꞌini-ra oanaipahihivini kaimoni hirihi hida kodivarani.
Aꞌonira onavaꞌisohibakhiavini hiꞌiki ida aꞌonira anakaidivakarahovini.
Arihokina,
ariabinina jaboni aꞌonira akaabiohaꞌoadahaki hari.
4 Vara aꞌonira ovaniꞌavini vani khai oniꞌaja ida avakadihojai asohini.
Aꞌonira ovakaijokaꞌoamanija.
Namithabakhiani kabaꞌi ida nahina jahariki akadiania,
asia khaii onihaꞌoadahaki ho.
Arafiaki ida ovaꞌi khaii nini.
5 Macedônia kaarabonia aakhanoꞌina vani asia jahariki ida akadimahi.
Ibavi hahavi aꞌaadahaonina namithabakhiaki ida avaꞌi-ra anakoiripaꞌitxiriki.
Ijaꞌari vaabono avakanaathidanoararikhamavini.
Avaꞌi soko iniꞌiki hari jaboni.
6 Deus vania bikajoamoraja ida ijaꞌari vaꞌini khaii niriki.
Avaꞌi khaii nirini vani Deua bikaronaꞌara ada Tito akadiania kaikahiꞌina.
7 Tito kaikahina vani avaꞌi-ra khai niꞌakarahoja.
Varani avihini jaboni khai haria niꞌaki.
Haria nanamithavini hiꞌiki ida niha ninini Tito vaꞌi-ra khai avaniꞌavini avakadiania kaikahina.
Kidivarani hiki ida hora avakavaꞌibodivini,
hora avanokiꞌianavini-ra avanofikarahovini.
Kidivarani hiki jaboni avakadihojai asohiriki avavaꞌini-ra namokaravini.
Avanofiki ida hora avavajariꞌdavini,
oniani ida avamonini khai hora niꞌavini-ra anarafiaja.
8 Avavaꞌini-ra namokaravini kabaꞌi ida oathi kapapirani aꞌonira okajirihivini hiꞌiki,
onajiriꞌavini ni-ovaꞌi-ra namokaraki.
Oabono okavaꞌibodivaranikamarivini:
Ni-jahaki ida kodijirihi niha nininia vaꞌora okajirihivini.
Mahi ipohirikia vavaꞌi onamokaravini.
Onikamariki ho.
9 Khaii oniki ho.
Avavaꞌini-ra onamokaravini,
ni-khai hora niꞌaki.
Avakadihojai asohiriki-ra avakavaꞌipahinivini mani ida khai hora niꞌaja.
Deua binofiꞌiki ida avakadihojai asohiriki avavaꞌini-ra namokaravini.
Ni-oathi kapapirani aꞌonira namakhaniki.
10 Deus ijaꞌari vaꞌini-ra namokaravini hiki abononi kaꞌdaꞌdigariaja kaimoni,
oniani ida kidihojai asohiriki-ra kavaꞌipahinikaꞌoavini hija,
Deua biakavaꞌijoavini-ra kanikhariavini hija jaboni.
Nini vani vaꞌini mokara nini jahaja ida ijaꞌari.
Hari.
Hojaki ida vaꞌini mokara nini hoariha Deua binakamaꞌdariki.
Deu-ra vanofirikia ni-vakavaꞌipahiniki ida vakadihojai asohiriki,
oniani ida Deus kania vaꞌora arakharija.
Ni-nahina jahaki kaimoni hiki ida vavaꞌi mokara nini.
11 Vakavaꞌihoki bana ida avavaꞌini bodini mokara nini radahaꞌiki.
Avavaꞌini mokara nini viahania ni-avavamakhaniki ida avakadihojai asohiriki.
Deus avavaꞌini-ra mokara niꞌavini vani avanofikarahoja ida avakadihojai asohiriki-ra avakavaꞌipahinivini.
Avakaipahiꞌiki ida hojai asohiriki-ra avavaꞌahavini avakadiania hojani.
Avifiniꞌiki ida avakadihojai aꞌonira napohimajavini.
Avanofiꞌiki ida ariabono aakakariakakhamavini.
Avanofidoroꞌiki ida badani asohikia avakabadanini.
Avanofiꞌiki ida hojai asohiriki namonahava abono-ra avanasohivini,
bigathanija kaimoni ida kidihojai asohiriki abosini.
Kidibadani asohiriki avanasohivini avananokiavini mani ida aꞌonira osanirija.
12-13 Aꞌonira okajirihivini ni-okavaꞌibodivaraniki ida ijaꞌari hana hini hojai asohirikia kahojaiki,
hana hini ijaꞌari kania namithani ida badani asohiriki.
Aꞌonira okajirihivini hiki papira oathia avarigaja kaimoni ida niha ninini haria avanofijahakivini Deus viaha.
Oniani ida avaꞌi-ra khai niꞌaja.
Ni-harivani kaꞌoa avaꞌi khaii niki.
Tito jaboni vaꞌi khaii niki.
Tito aꞌonira akavaꞌisokonijanaravini mani ida vaꞌi khai avaniꞌakarahovini hija.
Kidivaꞌikhaiini khai haria niꞌaki jaboni.
14 Tito avakadiania okhana viahania oniꞌaha:
—Tito,
vajahaki adani Cristo kaijaꞌari Corinto sidajia vahojaki.
Ira vagathanijahakiki bana adani — oniꞌaꞌiki ada.
Hari.
Akhanoꞌaha ada Tito avakadiania,
kaꞌoa hini biogaꞌiki ida varani avihinia okavaranijoraꞌina.
Ni-ovaꞌi-ra avaranaipahihiꞌiki.
Kaꞌoa hiki jaboni ida akadivarani aꞌonira vara aniꞌabakhiavini.
Nini vani jaboni Titoa biogaja ida akadivarani kaꞌoa hini aꞌonira vara avaniꞌavini.
15 Titoa bikavaꞌihokibakhiaki ida niha ninini avavavaꞌihavini avagathanijahakiꞌavini,
athi avanaabavini avanofiꞌavini jaboni,
oniani ida aꞌonira nakaidivavini-ra anaꞌbaꞌdibakhiaja.
16 Khai oniꞌaki ida hora avanavaꞌiponiꞌimariniravini.
Kaaraki ida avaathini.