2 Deua bivaꞌahaki ida nahina jahariki namithabakhiani arigamina Macedônia kaarabonia vahojaki vakadiania vavaꞌi rogo aniꞌani hiꞌiki.

Kabaꞌi,

khaii vakhanihaꞌoadahaki adani.

Khai vaniꞌaki jaboni ida vagahinaina.

Vakanahinarina kabaꞌi vakagahinainofiki adani.

3 Vaꞌoaniani oa vanofija ida vakadijiniro,

vakadinahina hiki-ra vakavagahinaibakhiavini ijaꞌari vakanahinariki vakadimoni hini.

Paꞌitxini kabaꞌi ida vavahojaki,

vanofiki ida pitani vakavagahinaivini.

Vakavagahinaivini arafiani vanofiki ida.

4 Haria vaniꞌabakhiaha:

—Cristo kaijaꞌari vahoariha vaꞌora vakajoamoravini vaꞌora vanofiki adani Cristo kaijaꞌari vakanahinariki Judéia kaarabonia.

Anofiꞌoamanija ida akadijiniro-ra akaronavini jaboni,

vaꞌora akajoamorara kaimoni adani arigamina — vakhaniha adani Macedônia kaaraboni kaijaꞌarini haria vakaathidanoavini.

5 Arafiaꞌiki ida jiniro-ra vakavanoꞌaivini.

Aradahaꞌiki ida vakavagahinaivini anokhavini.

Akadikaꞌdaꞌdi Jesus kania vaabono vavaniꞌahiꞌimidiaꞌiki adani,

bada vaniꞌaja kaimoni ida badani hana hini binofiki.

Naothinia akadiania vaabono vavaniꞌahiꞌaha haria vaakodiavini niha ninini Deua binofivinia.

6 Tito avakadiania hojana kari binakamaꞌdaꞌiki ida jiniro kabadanihia aꞌonira kakodiavini,

vaꞌora avananokiahira kaimoni adani arigamina Judéia kaarabonia vahojaki vaꞌora avanakaidivavinia.

Oniania aniꞌaha ada Tito:

—Ivani,

inakamaꞌdaꞌiki ida Cristo kaijaꞌari vakadijiniro-ra vanajoronivini.

Jahaki ida badani-ra inaꞌdiahivini jaboni vakadiania — Tito-ra aniꞌaki hari.

7 Aꞌonivani Corinto sidajia avahojaki,

avakadihojai jahani aradahaki aꞌoni.

Kaaraki ida Cristo-ra avavakaijokavini.

Avarigaki ida Cristo monina avakavaranini.

Avarigahahaviki jaboni ida Cristo varani hina.

Avanofiki ida vahoariha-ra vaꞌora avakakodiavini.

Haria avanofijahakiki jaboni aꞌoni.

Nimania ida vahoariha-ra avararadamivini.

Onofiki ida jiniro-ra avakavagahinaivini aradahani jaboni.

8 Ni-aꞌonira ohonariarihi bada avakhanija kaimoni.

Onofiki ida aꞌonira onavaꞌisohivini hini ida Cristo kaijaꞌari Macedônia vahojaki vakadihojai,

vakadijiniro-ra vakavagahinaivini-ra vakavaꞌinofinofivini.

Nini vani aꞌonira okaijoꞌaja,

oogaja kaimoni ida kaꞌoa hini vahoariha-ra vaꞌora avanakaidivavini.

9 Avarigaki ida akadikaꞌdaꞌdi Jesus Cristo haria nakaidivavini arafiani niha ninini.

Araboja khana viahania bivahojahahaviki ida Deus kanahina.

Kabaꞌi,

binahojahaꞌihi ida hahavi bivahojaki.

Araboa khaꞌaha,

haria akavaꞌijoara kaimoni.

Nina vani makhira kanahinariki hina haria kananahinahahavivini hiki ida Deus kanahina.

10 Hari.

Okavaꞌibodivaraniki ida jiniro-ra avanajoronivini kabadanihi-ra avanaꞌdiahivini jahani bana.

Badara radahaꞌiki avanakamaꞌdaꞌiki ida.

Aꞌonimiroꞌa avanofija ida vaꞌora avanoꞌavini.

Aꞌonimiroꞌa jaboni avanakamaꞌdaki ida avakadijiniro-ra avanajoronivini.

11 Hari.

Vanaꞌdiahi bana oni avakadibadani.

Avakavaꞌinofinofiꞌiki ida avanakamaꞌdaꞌavini.

Vakavaꞌinofinofi bana jaboni ida avanaꞌdiahivini.

Vakavagahinai bana afohanana ida avakavagahinaivini avakaabokaki.

12 Khai avaniꞌahi ida avakavagahinaiki;

Deua bigathanihi ida avakavagahinaiꞌiki.

Vakavagahinai bana ida jiniro avavahojaki avakavagahinaivini avakaabokaki.

Deua ni-binokhaki ida jiniro avavahojariki-ra avakavagahinaivini.

13 Jahaki ida judeus kaijaꞌari-ra vaꞌora avakajoamoravini avakadijiniroa.

Ni-onofiki ida avakadinahina-ra avakainamovini.

Ni-onofiki ida vaꞌora avakananahinaꞌahapikivini.

14 Hidakabaꞌi ipohiki ida avakadinahina,

oniani ida avakadigahinai-ra najahaja.

Khaki bana vahabini ida mahi avakanahinarini kamahini,

oniani ida aꞌonira vanoꞌavini-ra najahaja.

Nimania ida vakadinahina ipohini avakadinahina ipohini fori hini bana.

15 Nimania bana hida maná kavaranihi Deus athi kapapirania hojaki:

16 Hari.

Deu-ra khai aniꞌaki hari.

Ovaria biobaiki ida Tito vaꞌi bodinia aꞌonira kakodiavini-ra nofivini,

aꞌonira aakodiavini vani fori hini.

17 Titoa khai biniꞌaki ida akanikhariavini okhana avakadiania.

Ovani oa bikavaꞌibodivaranija ida okhana avakadiania.

Binofiꞌoamanija ida aꞌonira kakodiavini.

18 Akaronaki ada arigamina hoariha Tito ꞌbamina kaimoni.

Cristo kaijaꞌari avajoronionibakhiakia avigajahakiki ada ovari.

Bikaabokajahakiki ida Cristo monina jahakia kavaranina.

19 Cristo kaijaꞌari Macedônia kaarabonia avajoronionibakhiakia vanagathogathoꞌaha haria vaipohihara kaimoni.

Haria kakodiaki bana ada jiniro vanajoroniki-ra aakadavaꞌavinia.

Arigamina Judéia kaarabonia vahojaki-ra vaꞌora akajoronihivini hiki jiniroa,

ananokiaja kaimoni ida vaꞌora anakaidivavini,

oniani ida vagathanivini kamahini akadikaꞌdaꞌdi Jesus Cristo jahana-ra khai vaniꞌavini hija.

20 Ni-anofiki bana ida ijaꞌari haria akaraganahavini jiniro karaho-ra aakadavaꞌajahakiravinia,

oniani ida ariabono akavaꞌigairivini hija.

21 Anofiki hida jiniro kabadanihi-ra anasohivini.

Asohini Deua bikahija kaimoni.

Asohini ijaꞌaria vakahija kaimoni jaboni.

22 Oniaroa akaronaki bana ada arigamina hoariha Tito vakadiania.

Akaijoꞌabakhiaꞌiki ada.

Haria nanokiahibakhiavini hiꞌiki ida kakodiahi-ra nofijahakivini.

Bikavaꞌibodivaraniki ida kaꞌoa hini avakadijiniro avanajoroniꞌiki-ra avakaronavini-ra avanofivini,

oniani ida aꞌonira kakodiavini-ra nofivini-ra anarafiaja.

23 Vara vaꞌora ovaniꞌaki bana adani Tito,

ipohina khama.

Oipohina ada Tito.

Hora kakodiabakhiavini hiki ida Cristo monina-ra namonivini avakadiania.

Hiꞌadani arigamina vahoariha Tito-ra vavaipohihaꞌiki Cristo kaijaꞌari vaꞌora vakaronaꞌiki adani.

Aꞌonira vanavaꞌisohiki bana adani vaꞌora vakaronaki vakadivarania.

Vakadibadania binanokiaki ida Cristo jahana.

24 Tito vakaikahina vani vaꞌora vananokiahi bana vaꞌora avanakaidivavinia vaꞌora avagathanijahakivini.

Jesus kaijaꞌari avajoronionibakhiaki-ra vaꞌora ananamithajoravini hiki ida varani avihini.

Tito-ra vaꞌora avagathanijahakivini kavaranihi-ra vakamithamahaha;

avigahi ida kaꞌoa hini varani jahakia vara aꞌonira ovaniꞌavini hiꞌiki.