2 Oogaki ida vaꞌora avakakodiavini vaꞌora avanofivini.

Arigamina Macedônia kaarabonia vahojaki-ra vaꞌora vara oniꞌavini hiꞌiki ida jaboni varani avihini.

Vaꞌora oniꞌaha:

—Arigamina Corinto sidajia vahojakia vanakamaꞌdaꞌiki ida jiniro-ra vanajoronivini badara radahaꞌiki — vaꞌora oniꞌaha.

Vakamithaꞌiki ida varani avihini,

khai vaniꞌaki ida jiniro-ra avakaronavini bana Judéia kaarabonia.

Avamonini-ra vakamithavini naothinia Macedônia kaaraboni kaijaꞌarini maina jiniro-ra vakaronavini-ra vanofikarahoki jaboni.

3 Vaꞌora okaronaki bana adani arigamina viꞌbamiki Tito kania avikhananavana avakadiania.

Onofiki ida avanaibavijahajoravini ida jiniro akaikahina viahania.

Vaꞌora oniꞌaꞌiki adani hora vavaipohihaki kaimoni:

—Arigamina Corinto sidajia vanaibavijahajoraꞌiki ida vakadijiniro,

vakaronaja kaimoni Judéia kaarabonia — vaꞌora oniꞌaꞌiki adani,

aꞌonira khai oniꞌavini.

Hari.

Onofiki ida hora vavaipohihaki jiniro avakavagahinaiki hojani-ra vakaragavini,

oniani ida kodivarani kaꞌoa hini-ra avigavini hija bana.

Ni-onofiki bana ida avakadigahinai-ra khai oniꞌaꞌimarinivini.

4 Hari.

Arigamina Macedônia kaarabonia vikhaki hora vavaipohihaki vahabini bana adani avakadiania aokhana.

Vakaragarihi ida avakadijiniro ibavijahajorarini;

ovaꞌi aipahihihi.

Aꞌonivani jaboni avavaꞌini aipahihiki bana aꞌoni.

Varani avihini-ra khai oniꞌavini mani ida jiniro hojarini avaꞌi-ra anaipahihivini hija bana.

5 Oniania okavaꞌibodivaraniꞌiki ida jahani arigamina Tito-ra vaꞌora okaronavini,

vaꞌoaniaro miroꞌa avikhananavana.

Vanaibavijahaꞌiki ida jiniro avanajoroniꞌiki avakavagahinaiki kaimoni.

Okaikahina viahania hojaki bana ida jiniro avanaibavijahajoraki.

Akaikahina vani oipohina vakaragaja ida avakadijiniro ibavijahaꞌiki.

Avigaki ida jiniro avakavanoꞌaivini avanofiki.

Ni-nahina aꞌonira honariavini hiki avakavagahinaivini.

6 Hari.

Okavarajomiki bana hida avakadijiniro avakavagahinaiki rakhajahi ꞌbaꞌdani fori hini.

Ijaꞌaria birakhaihi ida baꞌbaꞌda ipohiriki;

paꞌitxihi ida kidirakhajahi bononi.

Ijaꞌaria birakhaihi ida baꞌbaꞌda ipohiki;

karahohi ida kidirakhajahi bononi.

7 Vakavaꞌibodivaranihanana bana ida avakadijiniro avakavagahinaivini avanofiki niha fori hini.

Jahaki ida avakavanoꞌaivini avanofivini.

Hariꞌa avakadijiniro-ra vanakaidiva.

Hariꞌa vanofi bana avavaꞌini bodinia avakavagahinaivini avakaathirivini.

Deua bivajahaki ida ijaꞌari kagahinainofiki.

8 Deua bikaabokaki ida aꞌonira noꞌavini arafiani avakainamokia,

avakadinahina hahavi-ra avavahojaja kaimoni afohaꞌoadaha,

nahina-ra avakainamoria kaimoni.

Avavahojavini arafiaki bana jaboni ida vaꞌora avakajoamoravini kaimoni adani vahoariha,

vakadiania badani jahaki ipohikia avakabadanini.

9 Deus athi kapapirania hojaki hida athi:

10 Deus vania binoꞌaja ida ijaꞌari baꞌbaꞌda birakhaiki kaimonia.

Binoꞌaki ida jaboni ꞌbaia bihaki kaimonia.

Deus vani aꞌonira noꞌavini hija bana ida baꞌbaꞌda ipohiki avarakhaiki kaimoni,

binamovaki ida avakadirakhajahi.

Bianaꞌbaꞌdiki bana ida avavahojaki,

arafiaki ida avakavagahinaiki kaimoni.

Nimania ida avakadihojai asohiki aꞌbaꞌdini.

11 Deus aꞌonira kananahinabakhiaki aꞌoni,

avavahojaki ida vahoariha-ra avanoꞌabakhiavini kaimoni.

Ijaꞌari vaipohiki vaagahinainofina mani ida vagahinaki Deu-ra khai vaniꞌavini hija.

Judéia kaarabonia akaikahina kamahini arigamina vakadiania avakadijiniro-ra aarakhaki bana hari.

Oniaroa Deu-ra vaniꞌaki bana adani:

—Deus,

jahaki ida arigamina Corinto sidajia vahojaki haria vakajoamoravini vakadinahina.

Jahaki ida kadabadani vavaꞌi bodinia — vakhaniki bana adani.

12 Vaꞌora avakajoamoravini mani ida nahina jahaki-ra nanamithaja vakadiania.

Vaꞌora avakaijahitaki adani Deus kaijaꞌari,

oniani ida avakadikajoamorahia Deus jahana-ra khai vaniꞌavini-ra vanakamaꞌdavini hija bana.

13 Vakanahinariki-ra vaꞌora avanoꞌavini mani ida hojai Deua bivajahaki-ra avigavini hija.

Cristo kaijaꞌari hahavia khai vaniꞌaki bana ada Deus:

—Deus,

kadaijaꞌari Corinto sidajia vahojakia vananokiajahakiki ida kadahojai jahaki.

Vakapoariki ida Cristo monina afojahaki.

Jahaki ida vakadinahina haria vakajoamoravini,

vahoariha-ra vaꞌora vanoꞌavini jaboni.

Nimania ida kadabadani jahaki vakadiania — vakhaniki adani bana.

14 Oniaroa,

arigamina Judéia kaarabonia vahojaki aꞌonira vanakaidivaki bana aꞌoni.

Deus kania aꞌonira vakanikhariaki jaboni adani.

Deu-ra khai vaniꞌavini hiki ida aꞌonira kajoamoravini arafiani.

15 Khai aniꞌava ada Deus.

Haria noꞌavini hiꞌiki ida kidinahina jahaki kaidivani arafiaki.

Kidisai oamani ada haria kakaronavini hiꞌara.