Paulo abono-ra vajariꞌdavini athini
10
Hovani Paulo,
onofiki ida vara vaꞌora oniꞌavini adani korijanahia hora vakanavaranihaki avahararania vahojaki.
Avakadivarani hiki ida avakadiania ohojana oadani ijaꞌari nahina hipaꞌitxiriki ohina,
ni-athii khanakia aꞌonira onavaravaraki.
Napaja ohojaꞌina vani oathi kapapirania varani khanakia aꞌonira vara oniꞌaja,
ni-aꞌonira okaipahijanaki.
Cristo athii forakia kavaranina fori hiki ida vara onina-ra onofivini.
Ni-vaꞌi joko inipaꞌitxiki ada Cristo.
2 Okaikahina avakadiania onofiki bana ida varani forakia okavaranina.
Aꞌonira okanikhariaki ho,
varani ohina asohiriki-ra vakavaꞌipahini bana mahija varani khanakia okavaraniravini avakadiania.
Vaꞌora okaabanivini vaꞌora okaabokaki adani haria vakanavaranihaki.
Deu-ra vanofiriki vakadihojaia akahojaina-ra vakahiki adani.
3 Kaꞌoa hini kabaꞌi ida Deu-ra vanofiriki vahararana arihojana,
ni-vakadihojaia akahojaiki.
Vakadinahina araboa hojaki-ra vanofivini mani ida vaꞌora nadanodanoja.
Ni-niki kaimoni hida akadidanodanoi.
4 Akadisaꞌai fori hirihi ida Deu-ra vanofiriki vakadisaꞌai.
Deus kasaꞌai danoki vani ida avahojaja.
Deus kasaꞌaia anihimaki ida Jahari,
kidipohi vanokiariki khama vadanona.
Anihimaki ida aathidanoarari athini asohiriki Jaharia biobaiki ijaꞌari vaꞌini bodinia.
5 Ijaꞌari abononi vaboraborahakia bikavaꞌibodivaraniki ida nahina kaimoni hirini Deu-ra ogavini.
Anihimaki jaboni ida kidivaꞌibodivarani asohiriki Jaharia biobaiki.
Anihimaki jaboni ida nahina ijaꞌari Deu-ra ogavini-ra nadabaki.
Akaijoꞌaki ida kidivaꞌibodivarani anahoarihavini,
binaabaja kaimoni ida Cristo athi.
6 Ariathi-ra avanaabavini-ra anokivini naothinia jaharikia vaꞌora oarakhaki adani vahoariha hora vakapoaririki.
7 Avakavaꞌibodivaraniꞌiki ida nokiavahaki.
Vakavaꞌibodivarani jaboni bana ida nahina kaꞌoa hini nokiariki.
Hojaki vahabini ada makhira avahararania Cristoa bikaronavini-ra kahiki,
athi vikhava abono hina.
Jahaki hiꞌo makhira haria kavaꞌibodivaranivini Cristo haria karonavini jaboni.
Cristo athi vikhava abono hari,
ovari fori arihiki hari.
8 Akadikaꞌdaꞌdi Jesus Cristo hora honariavini hiki ida aꞌonira onasohivini.
Binofiki ida avavakaijokavini onadanovini.
Ni-binofiki ida avavakaijokavini onathararaki fori hini.
Arafiapaꞌitxiki vahabini ida oabono ovaboraborahavini Cristo danona hora noꞌavini hiꞌiki aꞌonira onasohija kaimoni.
Kabaꞌi,
ni-ovaꞌi aipahihiki aꞌonira onasohivini.
9 Ni-onofiki ida oathi kapapirania aꞌonira onarapatavini.
10 Nihaki vahabini bana ida ijaꞌari:
—Paulo athi kapapirania binajiriki ida athii khanaki haria kaabanivini afodanoki.
Ijaꞌari nahina hipaꞌitxiriha ada Paulo.
Ni-varani ogava abono hiriha ada vahoariha vaviaha — nihaki vahabini ida ijaꞌari hora kanavaranihaki,
hora kaihiponiriki.
11 Jahaki ida ijaꞌari akadivarani-ra kavaꞌibodivaranivini.
Hoarani ida kodivarani aꞌonira okajirihivini hiꞌiki.
Ni-oanahoarihaki hida kodivarani avakadiania ohojana kamahini.
Bada oniꞌaki bana ida aꞌonira onavaꞌisohivini hiꞌiki.
12 Ni-anofipaꞌitxirihi ida boraborahi rajomahi fori hikia ariabono akarajomakhamavini.
Vahoariha vajahana arafiani-ra vakahiꞌimariniki.
Vaabono vavaboraborahavini hiki ida vahoariha-ra vaꞌora avaradamikarahovini.
Vavaꞌihariki fori vihiꞌoamanira adani.
Vajahana-ra vakavaꞌibodivaranivini hiki avigaja kaimoni ida vakadirajomahi asohikaꞌoani.
Naothinia vaabono varajomavini hiki ida vakadirajomahi,
oniani ida ijaꞌari sohikaꞌoaki vaabono vavanihavini hija.
Nirihi bana hida ariabono akavaꞌibodivaranivini.
13 Nimania bana hida ariabono akavaꞌibodivaranivini.
Deus vani haria honariavini hija ida Cristo athi aavaadahaoniva abono arihina.
Haria honariaꞌiki ada jaboni avakadiania bada akhanina,
Cristo monina-ra anamonivinia.
Ni-aokhaki haria honariaravini hiki kaniaja,
oniani ida kidibadani avakadiania haria honariavini hiki-ra khai aniꞌavini hija.
14 Avakadiania akaikahibiininina vani Jesus Cristo monina jahakia aꞌonira akanamoniꞌia.
Arabo anikhaki kaimonia hojaki ida Corinto sidaji,
oniani ida avakadiania akaikahina Deua binofivini hija.
Ni-aradaki ida ibavi Deus haria navaꞌisohivini hiꞌiki kani.
15 Deus vaꞌora karonaki adani athi avaadahaoniva abono vahoariha avikhana ibavi Deus haria vaꞌaharavini hiki kania.
Ni-vakadibadania ariabono avaboraboraharihi.
Anokhaki ida Cristo-ra avavakaijokavini avijavani,
aꞌbaꞌdija kaimoni ida akadibadani abani avakadiania.
Asia arihojaki hari arabo Deus haria vaꞌahavini hiki kania.
16 Hari.
Oniaroa,
akadibadani avakadiania aꞌdiahini,
anofiki ida arabo hoariha Corinto sidaji okhaninikia aꞌaadahaonina,
Cristo varani hina-ra anamonija kaimoni.
Jokoa hoariha kabadania ariabono avaboraboraharihi.
Ni-akadibadani hirihi ida vakadibadani,
oniani ida arabo Deus ijaꞌari hoariha-ra vaꞌahavini hikia aokhana-ra anofiravini hija bana.
17 Hojaki hida athii Deus athi kapapirania:
“Ijaꞌari kidimahi jahani-ra vara vaniꞌavini-ra nofihi:
jakaho vara bivaniꞌava ida Deus kabadani jahaki kidiania.”
18 Deua asohini bikahihi ida ijaꞌari kahojai,
bona asohihi ida kidihojai,
oniani ida Deua bikapoarivini hija bana.
Ni-Deua bikapoariki ida ijaꞌari kidihojai asohini-ra kahiki.