2 Ni-nahina kaimoni avakadihojai jahakia avaabononi avavaboraborahaki.

Jahaki ida namithaꞌiki avavaꞌini-ra mokara niꞌavini.

Ni-avavaꞌini-ra mokara niꞌapaꞌitxiꞌiki.

Jahaki bana ida makhira akaraꞌona-ra avahonariavini avavajoroniki ibavini kania.

3-4 Napaja ohojana kabaꞌi,

hojahahaꞌoadahaki ida kodivaꞌibodivarani avakadiania.

Avakadiania ohojaki fori ohina vara ovaniꞌaki ada hiꞌada makhira.

Jesus Cristo hora honariavini oadani,

ovavaꞌisohihiki ida makhira kahojai asohipaꞌitxiriki.

Jahaki ida hojai asohiriki abosini-ra gathanivini.

Avajoroniꞌianani kamahini ovaꞌi bodini vara nini hojaki avakadiania jaboni bana.

Akadikaꞌdaꞌdi Jesus danona hojaki bana jaboni.

5 Oniania aꞌonira ohonariavini hiki hiꞌada makhira kidimadinava-ra viꞌomaki-ra avararakhavini Jahari saꞌa kabodinia,

abono-ra kaꞌdaꞌdigariara kaimoni,

kidihojai-ra kavaꞌipahinira kaimoni.

Jaharia hidiaja binapohimajavini kabaꞌi ida makhira abono,

akadikaꞌdaꞌdi kaꞌoa biakavaꞌijoaki bana ida makhira maꞌonahana ijaꞌari kahojai-ra naabosivini kamahini.

6 Hojai asohiriki hojani oadani avakadiania,

ni-asohipaꞌitxiki ida avaabononi avavaboraborahavini.

Avarigaria koda ida ijaꞌari kavarani afobakhia:

Okavarajomiki bana ida ijaꞌari hoarani kahojai asohiriki pão-ra kanathoramananiki paꞌitxia.

Vajaforia ijaꞌari hahavia bada vaniꞌaki ida hojai asohiriki.

7 Hojai asohiriki-ra vakavaꞌipahinikaꞌoaꞌa bana mahija avakadihojai sohini sohirini-ra avanakabodihadiharavini.

Pão-ra kanathoramananiki-ra avanahokahivini vani fori vihiꞌa bana mahija pão kaimani kajaꞌdini kathoramananiriki fori avihivini.

Hari.

Ihinika Páscoa oniki amonahabiininini kari akadijaꞌari avikhananavaki ovilia-ra vanaabiniꞌiki,

vaabinirara kaimoni adani vakadijaꞌari.

Ovilia fori hiꞌiki ada Cristo,

ovari abiniꞌina-ra vaꞌahaꞌiki ariabiniria kaimoni,

Ibavi Jaharikaꞌoakia aokharia kaimoni.

8 Vakavaꞌipahinikaꞌoaꞌa bana ida hojai asohiriki kaipahivahaki Deua bivajahariki.

Hojai jahaki kabodihadiharikia akahojaiꞌava.

Varani kaꞌoa hinia akavaraniꞌava.

Hojarihi ida hojai asohiriki akadiania,

Páscoa ihinika koꞌbaini pão kathoramananiriki-ra akahavini fori hiki ida.

9 Oathi kapapirani hoariha aꞌonira okajirihivini hiꞌiki ida hojai karamonavahaki kaimajahavahariki.

Aꞌonira okaabanivini hiki ida makhira kidigamo hiriki khama vaabono vakaviꞌomakhamaki-ra vaꞌora avagathaniravini.

10 Kodivarani hirihi ida ijaꞌari Deu-ra vanofiriki vakadiania avarakaraꞌoni.

Vaꞌoaniaroa bada vaniꞌabakhiaki ida hojai karamonavahaki vara ovaniꞌaꞌiki.

Vahoariha vanofivini arafiaki ida nahina hahavi vanokiki avakakabajahinofiki.

Vahoariha vakaboꞌdinofiki adani.

Vahoariha deus amovana-ra vakanamasivibakhiaki.

Ijaꞌari nikia vakabadaniki vakadiania avarakaraꞌoni-ra avanofija vaha;

ni-araboa avahojajanaki vaha.

11 Oathi kapapirania aꞌonira onavaꞌisohivini hiꞌiki ida Jesus kaijaꞌari hojai Jesua bivajaharikia kahojaini oadani aꞌonira naonivini avaigaminia.

Makhira kidigamo hiriki khama vaabono vakaviꞌomakhamaki,

ijaꞌari nahina hahavi-ra nofivini arafiaki kidimoni hini,

ijaꞌari deus amovana-ra kanamasiviki,

ijaꞌaria bikanavaranihaki ida hoariha,

ijaꞌari kahanobakhiaki,

ijaꞌari kaboꞌdinofiki.

Nikia kahojaihi ida ijaꞌari avaigaminia abononi naoniki,

hariꞌa vavithirari aviꞌbaijabanani kidiania mahija kidihojai asohiriki-ra kavaꞌipahinikaꞌoavini.

12-13 Kodibadani hirihi ida Deu-ra vakajoniki vakadihojai asohini asohirini-ra okahivini,

vakadibadani abosini-ra vagathanira kaimoni.

Deus kabadani ida vakadihojai asohiriki abosini nahina hini-ra kahivini.

Deus kaijaꞌari hojai asohiriki-ra namonahavini kamahini,

jahaki ida asohirini avakahivini.

Jahaki ida avanasohivini.

Hojaki ida athii Deus athi kapapirania: