Ijaꞌari nasohiva abono varani vihina
6
Hari.
Cristo kaijaꞌari igamina hoariha-ra anaathidanoararivini kamahini asohipaꞌitxirihi ida vakadiꞌaathidanoarari-ra avavikhavini ijaꞌari nasohiva abono Deu-ra avigariki vakadiania,
vanasohija kaimoni.
Vaꞌora vavaꞌaha bana adani Deus kaijaꞌari vahoariha avahararania vahojaki vakadiꞌaathidanoarari-ra vanasohivini,
hana hini asohini asohirini-ra vakahivini.
2 Avarigaki ida Deus kaijaꞌari Deus kamonahi hahavi-ra vanasohihahavivini bana,
nahina asohini asohirini-ra vakahivini.
Khaki bana ida mahi hahavi-ra avanasohivini kamahini.
Hidakabaꞌi avakaabokaria koda ida nahina paꞌitxi-ra avanasohivini?
3 Avarigaki ida ijaꞌari vanokiariki nama vahojaki-ra vaꞌora anasohivini bana.
Akaabokahi ida vaꞌora anasohivini;
akaabokavini arafiahi ida nahina akadiania araboa namithaki-ra anasohivini.
4 Ijaꞌari vaabono avakanaathidanoararikhamaki vahojaha avakadiania;
hariꞌa bana Deus kaijaꞌari vihiriki-ra vaꞌora vakanikharia avakadiꞌaathidanoarari-ra vanasohivini,
vaꞌora avanaariakavini.
Vaꞌora akavaꞌibodivaranivini hiki ida haria nasohivini arajomarini.
5 Onofiki hida kodinaꞌdohi avavaꞌini-ra anaipahihivini.
Hojaria koda ida ijaꞌari ogahaki avakadiania,
bikaabokaja kaimoni ida aathidanoarari-ra nasohivini,
hana hini asohini asohirini-ra kahiki kaimoni?
6 Hojaki ida.
Asohipaꞌitxirihi ida Cristo kaijaꞌari igamina-ra osavini ijaꞌari nasohiva abono vakadibadani kagorania,
Deu-ra avigarikia binasohija kaimoni ida vakadivarani.
7 Jahapaꞌitxirihi ida Cristo kaijaꞌari vaabono avakakariakakhamaravini,
igamina-ra osavini ijaꞌari nasohiva abono vakadiania.
Nikia avakahojainia haria avananokiahivini hiki ida Deus athi-ra avanaabavini-ra avaragarivini arafiani.
Jaharini kabaꞌi ida Cristo kaijaꞌari badani asohirikia kabadanini igamina kania,
jaharini arafiaki ida vaꞌora avakanikhariavini adani Deus kaijaꞌari vihiriki avakadiꞌaathidanoarari-ra vanasohivini.
Jaharini kabaꞌi ida Cristo kaijaꞌari igamina kanahina-ra boꞌdiavini,
jaharini arafiaki ida vaꞌora avakanikhariavini adani Deus kaijaꞌari vihiriki avakadiꞌaathidanoarari-ra vanasohivini.
Cristo kaijaꞌaria vanasohivini vakaabokarihi;
jakana isika kabaꞌi hojaꞌava.
8 Aꞌonivani badani asohirikia avaabononi avakanabadanihakhamaki aꞌoni.
Aꞌonivani avakadinahina-ra avakaboꞌdiakhamaki aꞌoni jaboni,
Cristo kaijaꞌari avihini kabaꞌi.
9 Avarigajahakiki ida Deus ijaꞌari hojai asohirikia vakahojaiki-ra vaꞌora vaꞌaharavini ijaꞌari-ra vavakaꞌdaꞌdivini kidiania.
Hariꞌa hojai asohiriki-ra makhaniriki vavaniha bana.
Deus ijaꞌari hahavi-ra vakaꞌdaꞌdivini kamahini ni-kidiania vahojaki adani ijaꞌari hojai bivajaharikia vakahojaiki.
Makhira kidigamo hiriki khama vaabono vakaviꞌomakhamaki ni-hojaki Deus kania.
Ijaꞌari deus amovana-ra kanamasiviki ni-hojaki jaboni Deus kania.
10 Ijaꞌari kaboꞌdinofiki ni-hojaki Deus kania.
Ijaꞌari nahina hahavi-ra nofivini arafiaki kidimoni hini ni-hojaki jaboni Deus kania.
Ijaꞌari kahanobakhiaki ni-hojaki Deus kania.
Ijaꞌari varani jaharikia hoariha-ra kanavaranihaki ni-hojaki jaboni Deus kania.
Ijaꞌari hoariha kanahina-ra saariki,
Deus ijaꞌari-ra vakaꞌdaꞌdivini kamahini ni-hojaki Deus kania.
11 Cristo-ra avarigaravini kari onivani fori hija ida avahoarahanana avakadihojai.
Naothinia akadikaꞌdaꞌdi Jesus Cristo,
Maꞌonahai Jahaki khama aꞌonira visokoꞌiki.
Vaaniꞌiki ida hojai asohiriki avakadiania,
aꞌonira avanahoariharibaniꞌiki adani,
Deus kaijaꞌari avihikaꞌoaja kaimoni.
Deus avajahakaꞌoani-ra kahiki aꞌoni,
aꞌonira kapoariki ada.
Nimania ida akadikaꞌdaꞌdi Jesus Cristo,
Maꞌonahai Jahaki khama vakadibadani avakadiania.
Deus kani ida avaabononi hahavi
12 Hari.
Nihahi vahabini ida ijaꞌari:
—Bada oniꞌaki ida hahavi onofiki — nihi ida ijaꞌari athini.
Kabaꞌi,
ni-asohiki ida badani hahavi bada iniꞌaki kaimoni.
Hahavi onofiki-ra bada oniꞌavini-ra okahivini kabaꞌi,
ni-bada oniꞌaki bana ida badani hora anagithiki fori hiki.
13 Nihaki vahabini ida ijaꞌari:
—Kahojaki ida ijaꞌari kaijoni kidiꞌbai bikidafiꞌiki ibavini kaimoni.
Hojaki ida ꞌbai ijaꞌari kaijonia oꞌoiki kaimoni — nihi ida ijaꞌari athini.
Deus ijaꞌari-ra noꞌavini kihiki ida kaijoi,
ꞌbai hiki.
ꞌBai arafiaki kaimoni kihirihi ida ijaꞌari kaijoni.
Khaki bana ida mahi Deus ijaꞌari kaijoni,
ꞌbai hiki-ra nihimavini kamahini.
Deua binamonahaꞌiki ida ijaꞌari abononi,
bikahinanikabakhiaki ida.
Deus kani ida ijaꞌari abononi niha nini hahavi,
oniani ida bivavaꞌisohihivini hija:
Makhira,
kadagamo hiriki khama avaabononi avakaviꞌomakhamahi,
niki kaimoni hirihi ida avaabononi.
Niki ida Deus athi.
14 Hari.
Deua bianahokiꞌiki ada akadikaꞌdaꞌdi.
Deus danona ariabono niha nini hahavi-ra anahokiki jaboni bana.
15 Avarigaria koda ida avaabononi afohanana Cristo abono hoarani niha nina hahavi avihinanani.
Ni-jahapaꞌitxiki ida Cristo kaijaꞌari hoarana Cristo niha nina hina kabaꞌi,
gamo makhira-ra odoraoniki-ra viꞌomavini.
Ni-nikia okabadanipaꞌitxiki bana.
16 Avarigaria koda ida makhira gamo nikia kahojaiki-ra viꞌomavini,
makhira gamo khama vaabono hoarani fori hiki.
Deus athi kapapirani hari navaꞌisohijahakiki hari:
“Makhira,
gamo khama
avakaraꞌina mani ida
ijaꞌari abononi hoarani
vaꞌora nihaja.
Ijaꞌari abononi hoarani hiꞌiki ida vaabono.”
Niki ida athi jiriki.
17 Akadikaꞌdaꞌdi Jesus kania ijaꞌari abononi gahinai nihavini vani kidiania akaramisiki ida ijaꞌari.
Maꞌonahai hoarani fori hiki kaimoni ida ijaꞌari maꞌonahani Cristo kania.
18 Makhira,
hariꞌa bana kadagamo hiriki khama avaabononi vakaviꞌomakhama.
Badani niki kania avakaraꞌoꞌa jorakia bana.
Nikia kabadaniha ada makhira,
ovani oa niha nina-ra najahariha.
Badani asohiriki hoariha ni-binajahariki ida makhira niha nina.
19 Avarigaria koda ida avaabononi afohanana Maꞌonahai Jahaki gorana fori hini.
Ibaviki ada avavaꞌini bodinia.
Deua bikaronaꞌiki ada avakadiania.
Ni-avakadiani ida avaabononi,
Deus kani ida niha avakhanini hahavi.
20 Cristo aꞌonira kapavakariꞌiki aꞌoni kidimoni avihini.
Abiniꞌina vani aꞌonira naabosiꞌara ada.
Vavaꞌaha bana ida avaabononi niha nini hahavi mahija hoariha-ra avakakodiavini,
avakajoamoravini,
oniani ida Deus jahana-ra avananokiavini hija.