Akarai viahani vaꞌisohihi hida
7
Hari.
Ogathaniꞌiki ida avakadinaꞌdohi avaathini kapapirania hojaki.
Hora avananaꞌdohivini hiki ida makhira kagamorina hojana jahani jaharini.
Haꞌa,
jahaki ida makhira kagamorina hojana.
2 Namithabakhiaki ida hojai asohiriki makhira kidigamo hiriki khama vaabono vakaviꞌomakhamavini,
oniani ida makhira kagamohananani-ra najahaja.
Jahaki jaboni ida gamo kamakhirahananani.
3-4 Makhira,
kadagamoa binofihi ida iviꞌomavini,
iviꞌoma bana.
Makhira kani hirihi ida abono.
Kidigamo kani ida.
Gamo,
kadamakhira binofihi ida iviꞌomavini,
iviꞌoma bana.
Gamo kani hirihi ida abononi.
Kidimakhira kani ida.
5 Hariꞌa avaabononi vaakaathirikhama bana.
Hari.
Vaꞌora onavaꞌisohiki bana adani makhira,
kidigamo khama.
Avaabononi avakanavaꞌisohikhamaki vahabini aꞌoni:
—Jahaki ida ariabono akaviꞌomakhamaravini mahi ipohirikia mahija Deu-ra vara aniꞌavini afojahaki — avakhaniki vahabini aꞌoni.
Ni-makhaniki ida avaabononi avakaviꞌomakhamaravini avahojani.
Hari.
Radahahi ida mahi ipohiriki avaabononi vakaviꞌomakhamaꞌiana bana.
Avakaabokarihi vahabini ida mahi ipohiki avaabononi avakaviꞌomakhamaravini,
oniani ida Jahari vahabini aꞌonira kaborovini hija bana.
Avavaꞌini-ra kaboroki vahabini bana ada Satanás,
makhira hoariha kania gamo okhani,
gamo hoariha kania makhira okhana.
6 Hari.
Ni-Deus hora honariavini onajiriki bana hida hihida vaꞌisohihi.
Hora vaꞌahavini kodivaꞌisohihia aꞌonira vara oniꞌavini.
7 Hovani ni-oagamona ohojaki.
Okavaꞌibodivaraniki ida hofori avihini avahojani afohanana jahani.
Kabaꞌi,
ni-niki ijaꞌari hahavia vakaabokaki.
Deus vaꞌora noꞌahananaki adani kidijaꞌari hahavi danona.
Vaꞌora noꞌaki adani vahoariha danona,
vakaabokaja kaimoni ida avakararina vahojana afohaꞌoadaha.
Vaꞌora noꞌaki adani kidijaꞌari vahoariha danona vakaabokaja kaimoni ida avakarana.
8 Hari.
Imakhinava,
imaꞌinavi,
kaariha,
vara aꞌonira oniꞌaꞌimidiaki bana ho.
Aꞌonira onavaꞌisohiki ho bana avakagamorini,
avakamakhirarini avahojahahaꞌoadahani jahani,
hofori avihini.
9 Avanofivini arafiaki ida avakadimaisa-ra avaviꞌomavini,
avakaabokajanariki ida avakadivaꞌinofinofi-ra avanadabavini,
oniani ida avakagamoni avakamakhirani-ra najahaja.
Ni-makhaniki ida avakagamoni avakamakhirani.
Makhaniki ida makhira gamo-ra viꞌomavini-ra kavaꞌinofinofiꞌimarinivini-ra kavaꞌibodivaranihaꞌoadahavini.
10 Hari.
Aꞌonivani avakagamoꞌiki,
avakamakhiraꞌiki,
aꞌonimaina vara aꞌonira oniꞌaki bana ho jaboni.
Kodivaꞌisohihi hirihi ida varani vara aꞌonira oniꞌavini hiki bana.
Deus kahonari mani ida kodivarani hija.
Gamo,
Deus aꞌonira honariavini hiki ida avakadimakhira-ra avanahojaharavini afohanana.
11 Gamo kidimakhira-ra nahojahavini-ra nofihi;
kamakhirarini hojani Deua bihonariahi.
Kamakhirarini hojani-ra nofirihi;
kidimakhira kania joini Deua bihonariahi vaabono avakakariakakhamara kaimoni.
Deus vaꞌora honariaki adani makhira vakadigamo-ra vakavaꞌipahiniravini,
ni-vaꞌora vahonariaki ai vihina.
12 Hari.
Hovani aꞌonira oniꞌahahaviki aꞌoni.
Deus kahonari hirihi ida kodivaꞌisohihi.
Vara oniꞌaki bana ada makhira Cristo kaijaꞌari hiki,
kidigamo Cristo kaijaꞌari hiriki:
Kadagamoa binofihi ida ihojani kidiania;
hariꞌa inahojaha bana.
13 Vara oniꞌaki bana ida gamo Cristo kaijaꞌari hiki,
kidimakhira Cristo kaijaꞌari hiriki:
Kadamakhira binofihi ida ihojani kidiania;
hariꞌa inahojaha bana.
14 Makhira Cristo-ra nofiriki,
kidigamo Cristo-ra nofiki,
ijaꞌari hoarani fori vihina mani ida Deus kaijaꞌari fori nihana hija.
Deua bikapoariki ada makhira.
Gamo Deu-ra nofiriki,
kidimakhira Cristo-ra nofiki,
ijaꞌari hoarani fori vihina mani ida Deus kaijaꞌari fori nihani hija.
Deua bikapoariki ida gamo.
Vakhanina vahojarara vaha;
ni-Deus vakadisai bikapoariki vaha.
Deus kani adani vakadisai.
Vakadisai fori vihiriha adani Deu-ra vanofiriki vakadisai.
Ni-Deus vaꞌora kapoariki adani nofina vihiriki vakadisai.
15 Gamo,
Cristo kaijaꞌari i.
Kadamakhira Cristo kaijaꞌari hirikia binofiki ida ihojajanarini kidiania,
ba inahojaha.
Makhira,
Cristo kaijaꞌari i.
Kadagamo Cristo kaijaꞌari hirikia binofiki ida ihojajanarini kidiania,
ba inahojaha.
Nini vani namithaja ida Cristo kaijaꞌari vakadiania;
ni-nahina vaꞌora avadadamiki adani arigamina vahojana Deu-ra vanofiriki vakadiania.
Deua binofiki ida makhira kidigamo khama vaabono avakavajahamisikhamavini.
16 Gamo,
Cristo kaijaꞌari i.
Ikaabokaki vahabini ida kadamakhira-ra iakodiavini,
Cristo kania abono-ra gahinai nihara kaimoni akavaꞌijoana hira kaimoni.
Makhira,
Cristo kaijaꞌari i.
Ikaabokaki vahabini ida kadagamo-ra iakodiavini,
Cristo kania abononi gahinai nihaja kaimoni akavaꞌijoani hira kaimoni.
Ahokina oadani Deus athi-ra anaabavini
17 Hari.
Vara aꞌonira oniꞌahahaviki bana aꞌoni.
Nimania hida kodivaꞌisohihi Jesus kaijaꞌari avajoronioniki-ra vaꞌora okaꞌojomoꞌivini athini.
Avakadimahi niha ninini-ra avavahojavini Deus aꞌonira kaboaꞌivini kari vani asia vavahoja bana ida avakadimahi nini.
Siikosida karajomihia avakarajomihi,
avakarajomirihi,
ijaꞌari kapavakarivahaki,
kapavakarivahariki avihihi,
nimania ida avakadimahi,
asia vavahoja bana.
Ni-makhaniki avavahojavini.
Cristoa binaibavijahaꞌiki ida avakadimahi niha ninini-ra avavahojavini.
18 Cristo kaijaꞌari hina-ra kapoarivini viahania makhira bivahojahi ida siikosida karajomihi asafia,
hariꞌa bikaijoꞌava ida rajomi-ra anivini,
nokiajanaria kaimoni.
Makhira hoariha Cristo kaijaꞌari hina-ra kapoarivini viahania bivahojarihi ida siikosida karajomihi asafia,
hariꞌa siikosida karajomihia karajomiva.
19 Ni-Deua bikavaꞌibodiki ida siikosida karajomihi makhira bivahojavini bivahojaravini.
Deua binofiꞌoamanija ida athi vanaabavini afojahaki.
20 Jakaho Cristo kaijaꞌari hahavi vakadimahi-ra vavahojava Deus vaꞌora kaboaꞌivini kari,
vakarajomina vakarajomirina vahojava kaho.
21 Hari.
Deus aꞌonira kaboaꞌivini kari kaꞌdaꞌdi kahonai abono kapavakarivahaki avihimanija?
Hariꞌa avakavaꞌisokoni bana ida nikia avakahojaini.
Kaꞌdaꞌdi vahabini aꞌonira vaꞌahaki bana aꞌoni avaraihotani,
vakapoari bana ida athi mahija gathaki fori avihijanaravini.
22 Hari.
Kaꞌdaꞌdi kani hina kabaꞌi ada honai abono kapavakarihaki,
Cristoa bikaboaꞌivini kamahini kidijaꞌari hira kaimoni,
oniania kaꞌdaꞌdi kahonai abono kapavakarivahaki fori nihajanarina hija.
Cristo kani ada.
Hari.
Nimanira ada jaboni makhira hoariha gathariki.
Cristoa bikaboaꞌivini kamahini kidijaꞌari hira kaimoni,
oniani ida Cristo kahonai abono kapavakarivahaki nihana hija.
Cristo kani ada.
23 Cristo amana ahovariꞌini aꞌonira kapavakariꞌiki aꞌoni.
Cristo kani aꞌoni.
Hariꞌa avaabononi vavaꞌaha bana ijaꞌari kahonai abono kapavakarivahaki avihiꞌianani.
24 Oigamina,
Deus kania avarajahamisini vani vavahoja bana ida avakadimahi.
Deus aꞌonira kaboaꞌibiininivini vani vavahoja bana ida avakadimahi avakapavakarivahani avakapavakarivaharini.
Akarai viahani vaꞌisohihi hoariha hida
25 Hari.
Avaathini kapapirania hora avananaꞌdohiꞌiki aꞌoni makhira kagamoriki,
gamo kamakhirariki hiki kavaranihia.
Ni-Jesus hora nanamithavini hiki ida honari aꞌonira onavaꞌisohivini hiki kaimoni.
Kabaꞌi,
aꞌonira onavaꞌisohiki bana ho kodivaꞌibodivarania.
Deus hora vaꞌadiꞌiki ho.
Kidibadani abono ohiꞌiki ho,
oniani ida kodivaꞌibodivarani-ra avavakaijokavini-ra najahaja bana.
26-27 Namithaki bana ida mahi jahariki ijaꞌari hahavi vakadiania.
Oniaroa,
okavaꞌibodivaraniki ada makhira kagamoki kagamoriki.
Jahaki ada makhira kagamoki kidigamo-ra vahojahahaꞌoadahavini.
Hariꞌa binahojahava bana.
Jahaki ada makhira kagamoriki kagamorina hojahahaꞌoadahana.
Hariꞌa gamo-ra nakoꞌdiva bana.
28 Ni-makhaniki ida imakhinava kagamona.
Ni-makhaniki ida imaꞌinavi kamakhirani.
Vaꞌora onofiki adani imakhinava,
imaꞌinavi vihiki-ra ovaꞌadivini,
oniani ida aꞌonira onavaꞌisohivini hija mahi jahariki khani viahania.
Makhira kagamoriki kamahi jahariki bana.
Makhira kagamoki kamahi jaharini arafiaki bana.
Mahi jaharini oadani makhira bikavaꞌibodivaranibakhiaki ida kidigamo,
kidisai vihiki-ra vaꞌora akadavaꞌavini.
29 Kodivarani hiki ida mahi anokhomini amaakarini.
Jorakia kamaꞌdaki bana ida mahi jahariki ijaꞌari hahavi vakadiania,
oniani ida aꞌonira onavaꞌisohivini hija bana:
Ni-nahina binadabaki ada makhira kagamoriki Cristo kabadania kabadanina.
Makhira kagamoki jaboni Cristo kabadania kabadaniki ada.
Jahaki ida Cristo kabadani dabarini-ra vaꞌaharavini.
30 Jahaki ida ijaꞌari asaraki abarariariaki,
ijaꞌari vaꞌini mokara niriki fori hini,
vaꞌini mokara ninia binadabaria kaimoni ida Cristo kabadania kabadanini.
Jahaki ida ijaꞌari khaii niki haha nini,
ijaꞌari khaii niriki fori hini,
kidikhaiinia binadabaria kaimoni ida Cristo kabadania kabadanini.
Jahaki ida ijaꞌari kidinahina-ra kapavakariki,
ijaꞌari kanahinariki fori hini,
kidinahina binadabaria kaimoni ida Cristo kabadania kabadanini.
31 Jahaki ida ijaꞌari nahina hahavi araboa hojakia abononi bada vaniꞌavini,
ijaꞌari vaꞌini soko iniriki fori hini,
kidibadania binadabaria kaimoni ida Cristo kabadania kabadanini.
Jorakia radahaki ida ijaꞌari vakadimahi niha ninini hidakabaꞌi araboa vavahojaki.
32 Onofiki ida avavaꞌini soko inirini avahojani.
Oigamina,
makhira kagamorikia bikavaꞌibodivaraniki ida Deus kabadania kabadanina,
Deus vaꞌi-ra khai niꞌavini-ra nofivini.
33 Makhira kagamoki vani ada nahina araboa hojaki-ra kavaꞌibodivaranira.
Binofiki ida kidigamo-ra kaijahitavini.
Kidigamo-ra khai niꞌavini mani ida nahina bivajahaki-ra bada niꞌavini hija,
34 oniani ida vaꞌi akanaraꞌbanahanakhamani hija.
Hari.
Gamo kaariha hiki,
imaꞌinavia jaboni bikavaꞌibodivaraniki ida Deus kabadania kabadanini.
Binofiki ida kidimahi hahavi,
kidibadani,
kidivarani hikia Deu-ra noꞌavini.
Deus kaimoni kaꞌoa ida abononi maꞌonahani hiki.
Gamo kamakhiraki vani ida nahina araboa hojaki-ra kavaꞌibodivaranija.
Gora bodinia badani-ra kavaꞌibodivaranija.
Kidimakhira-ra khai niꞌavini mani ida nahina bivajahaki-ra bada niꞌavini hija.
35 Aꞌonira oakodiavini kaimoni ida kodivarania aꞌonira onavaꞌisohivini hija.
Ni-onofiki ida aꞌonira onadabaki fori ohina.
Kodivarani hirihi ida avarakarani-ra okaabanivini.
Aꞌonira onavaꞌisohiki bana ho:
Bada vaniꞌa bana ida badani asohiki,
badani Deua binofikia avakabadanini.
Avaabononi vavaniꞌahi bana Deus kania mahija kidibadania avakabadanijahakivini.
36 Vara vaꞌora oniꞌaki bana adani vakamaisaki afohanana.
Makhira kidimaisa khama vaabono vakanavaꞌisohikhamavini hiki ida avaakarana-ra vanofijanaravini.
Naothinia maisa abono-ra kavaꞌibodivaraniꞌianaki:
—Ni-asohiki ida kodimaisa-ra okaijahitaravini,
ovahojaravini jaboni.
Onofivini arafiaki ida kodimaisa-ra oviꞌomavini.
Ni-okaabokajanaki ida okavaꞌinofinofivini oakadaivini — niha ada maisa,
oniani ida kagamona najahani hija.
Ni-makhanirihi ida avakarana.
37 Maisa hoariha bikavaꞌibodivaraniki ida kagamona asohimisijanarini.
Ni-nahina biavadadamiki ada maisa kagamona kagamorina.
Ni-arafiaki ida kidimaisa-ra viꞌomavini-ra nofivini.
Bikaabokaki ida binofivini biakadaivini.
Ovari kaꞌoa bikavaꞌibodivaraniki ida kagamona-ra nofijanaravini,
oniani ida kagamorina najahani hija.
38 Jahaki ida makhira kagamona.
Jahani arafiaki ida makhira kagamorina hojana.
39 Vara vaꞌora oniꞌaki bana adani gamo.
Deus kavaꞌisohihia bivaꞌahariki ida gamo makhira hoariha-ra kanamakhirahavini,
kidimakhira kaꞌoa hokina oadani.
Kidimakhira abiniꞌina naothinia,
akajaꞌdihini-ra nofihi;
kamakhiraꞌianahi.
Asohiki ida Cristo kaijaꞌari-ra kanamakhirahavini.
Ni-asohiki ida makhira Cristo-ra nofiriki-ra kanamakhirahavini.
40 Khaii niki ida gamo kamakhiraꞌianarini hojani.
Nimania ida okavaꞌibodivaraniki.
Oabono okavaꞌibodivaranivini hiki jaboni ida Maꞌonahai Jahaki ovaꞌi-ra nahonariahihivini.