Deus amovana kanavaꞌigani koꞌbaini kavaranihi
8
Hari.
Ogathaniki ida avakadinaꞌdohi hoariha.
Vara ovaniꞌaki bana ida baimana ijaꞌari vakadideus amovana-ra vakanavaꞌigavini hiki.
Kaꞌoa hiki hida ijaꞌari vakadivarani:
“Harivani hahavi avahojaki ida ogahai,
aogaja kaimoni ida asohiki asohiriki.”
Nikia vakavaraniki adani.
Kabaꞌi,
ni-ijaꞌari-ra kakodiaki ida ogahai hahavi.
Ijaꞌari ogahai araboja kamaꞌdaki-ra vahojahi;
abononi vaboraborahahi.
Ijaꞌari Deus aagahai-ra vahojahi;
hoariha-ra nakaidivahi,
biakodiahi ida Cristo-ra vakaijokavini avijavani.
2 Ijaꞌaria bikavaꞌibodivaranihi ida nahina-ra ogavini;
ni-biogahahaviꞌiaki kaho ida nahina biogaki.
Asia hojaki ida biogariki.
3 Deu-ra anakaidivahi;
haria ogaha,
kidiania aajahamisihi jaboni.
4 Hari.
Vara ovaniꞌaki ida baimana ijaꞌari deus amovana-ra vakanavaꞌigavini hiki.
Jahamanija koda ida arihavini ariharavini?
Ijaꞌaria vakavarajomiki ida vakadideus deus amovana.
Aogaki ida deus hirini deu-ra avanamovavini.
Aogaki ada Deus hoarana kaꞌoa hojana.
5 Ijaꞌari vaipohiki vaꞌora vakajariꞌdariki adani deus vaipohiki arabo,
nama hikia vahojaki.
Vaꞌora vanaoninanavini “Kodideus”,
“Kodikaꞌdaꞌdi.”
6 Harivani akajariꞌdariha ada Deus hoarana kaꞌoa hojaki.
Akadiabiꞌi ada.
Hahavi namonahava abono ada.
Haria nahokiki ada Deus.
Hojaki ada kaꞌdaꞌdi kaꞌoa hoarana Jesus Cristo.
Ovaria binamonahahahaviꞌiki ida nahina hahavi hojaꞌiki,
bikahinanikahahaꞌoadahaki ida.
Haria noꞌavini hiki ida akadimahi.
7 Ni-ijaꞌari hahavia avigaꞌiaki ida Deus hoarana kaꞌoa hojana.
Cristo kaijaꞌari vahoarahanana Cristo-ra avigavini viahania vakanamasiviꞌiki ida deus amovana.
Cristo kaijaꞌari vihiꞌina kabaꞌi,
baimana-ra vahavini deus amovana koꞌbaini vavanihaki ida.
Avigaꞌiarihi kaho ida baimana havahani asohini asohirini,
oniani ida vahavini naothinia vavaꞌi nakaabanahahani hija,
vakavaꞌibodivaranivini hija asohirini vahavini.
8 Baimana havaharini ni-haria anajahamisiki Deus kania.
Baimana-ra arihavini ni-haria kakodiaki jaboni Deus kania aajahamisina.
Ni-makhaniki ida akadimoni arihavini.
Ni-makhaniki jaboni ida ariharavini.
9 Avaabononi avakavaꞌigairi bana.
Makhanirini kabaꞌi ida baimana niki-ra avahavini,
hariꞌa avaigamini Cristo-ra vakaijokajahakiriki-ra avanaꞌdiraki fori vihi mahija deus amovana-ra khai niꞌaꞌianaravini.
Bikavaꞌibodivaranivini oadani ida hiꞌida baimana havahani asohirini,
ni-jahaki ida avahavini.
10 Rajomi kavaranihia okavaraniki bana ho.
Vakavaꞌibodivarani bana ida ijaꞌari Cristo-ra vakaijokajahakiriki.
Aꞌonivani avarigaki ida baimana ijaꞌari vahoariha vakadideus amovana-ra vakanavaꞌigavini havahani makhanirini.
Avaigaminia ni-biogaki.
Binokihi ida aviꞌbaini deus amovana khai niꞌani kagorani bodinia,
bikavaꞌibodivaraniki ida bana makhanirini kidimoni hini havahani.
Deus amovana deus kaꞌoa bivanihavini oadani,
ni-asohiki kidimoni hini ida havahani.
11 Avaigamini ada Cristo-ra vakaijokajahakiriki.
Abiniꞌiki ada Cristo kidimoni hina Ibavi Jaharikaꞌoakia okharara kaimoni ada avaigamini.
Avakadiꞌogahaia bianaꞌdiraki fori hiki ada.
Avahavini binokihi,
ovaria bihavini binofihi jaboni.
Nini vani bada biniꞌaja ida vaꞌi nakaabanahahani hiꞌiki,
oniani ida avaigamini-ra avanapohimajavini hija.
12 Ni-asohiki ida avakadibadani avaigamini kania.
Avakahidaꞌiki fori hiki ida avaigamini Cristo-ra vakaijokajahakiriki vaꞌi kaabanahahania.
Avaigamini-ra avanamakhaniꞌavini vani bada avaniꞌaꞌia ida badani asohiriki Cristo kania jaboni.
13 Hari.
Jokoa oigamina-ra okabororihi badani asohiriki-ra namonahavinia.
Jokoa oharihi ida baimana oigamina kakaaji hiki.
Ni-hoaranija ohajanarihi bana ida,
onapohimajajanarara kaimoni ada oigamina.