2 Vahoariha vahabini Jesus athi avaadahaoniva abono ohirina-ra vakahiki ho.

Aꞌonivani avarigaki ida Jesus athi avaadahaoniva abono ohina.

Vara ovaniꞌaꞌiki ada Jesus avakadiania.

Avagathaniꞌiki ada avakadikaꞌdaꞌdi hina,

oniani ida Jesus athi avaadahaoniva abono ohina-ra avarigavini hija.

3 Vahoariha hora vakanavaranihavini hiki ida Jesus athi avaadahaoniva abono ohirina.

Nimania hida oabono ovajariꞌdavini athini:

4 Jesus athi avaadahaoniva abono ohina mani ida kodibadani abosini ꞌbaia ogahinana-ra nasohija.

5 Jesus athi avavaadahaoniva abono vahoariha,

Pedro,

Jesus kakajoꞌo vihiki vaꞌora avavikhaki adani vakadigamo vaꞌora vavaipohihara kaimoni.

Asohiria koda ida vakadihojaia okahojaina?

6 Vaꞌoaniaro ni-bada vakhaniki vasaꞌa vaabono vakavaꞌogajarihara kaimoni.

Vagahinaki adani vakainamokia.

Avanofimanija koda ida Barnabé khama bada akhanina asaꞌa,

ariabono akavaꞌogajarihaja kaimoni?

Ni-niki asohiki.

7 Haria okavarajomivini hiki bana ada sorara.

Ni-sorara abono-ra kaijahitaki.

Kidikaꞌdaꞌdi vania bikaijahitara ada sorara.

Hari.

Rajomi hoariha hida.

Uva avani-ra rakhaikia bihaki ida kidihiꞌai bononi.

Ni-bikapavakariki ida ihiꞌai birakhaiki bononi.

Ovilia akadavaꞌava abonoa bikoꞌaviki ida ovilia kajoho kaaꞌbani.

Ni-biakapavakariki ida joho kaaꞌbani.

Kodivarani vihiki adani Jesus kaijaꞌari Jesus athi avaadahaoniva abono-ra vaꞌora vakaijahitavini asohini.

8 Avarigajahakiki ida kodirajomi sorara,

uva avani-ra rakhaiki,

ovilia akadavaꞌava abono vihiki.

Avanokibakhiaꞌiki ida vakadibadani abani vagathanivini vakapavakariravini.

Onivani fori hija jaboni ida Deus kavaꞌisohihi jiriki haria navaꞌisohiꞌiki,

ijaꞌari vakadibadani abani-ra vagathanivini.

9 Moiséa binajiriꞌiki hida Deus kavaꞌisohihi:

Hari.

Deua bikavaꞌibodiki ada ꞌdaama kahidari,

haria kavaꞌibodiki jaboni ada.

10 Varani arihina vani ida Deua vara bivaniꞌaja.

Deus kavaꞌisohihi jirikia hojaki ida haria kajoamoraki kaimoni,

oniani ida ijaꞌari kidibadani abania gahinani-ra nokhavini hija.

Bada vakhaniha adani siroi-ra vanamonahaki,

rakhajahi bononi-ra vanajoroniki khama.

Vanokhaki ida vakadibadani abani bononi pitani-ra vagathanivini kasiroiki kania.

11 Harivani arakhaiꞌiki fori hiki ida Deus athi jahaki avavaꞌini bodinia.

Asohiria koda ida avakadiania haria avakaijahitavini-ra anokhavini?

Akadibadani abani fori hiki ida haria avakaijahitavini.

12 Vahoariha Cristo monina jahakia vakavaranibakhiakia vanokhaki ida vakadibadani avakadiania avanaabosivini.

Asohiki ida vaꞌora avanaabosivini.

Asohini arafiaki ida haria avanaabosivini jaboni.

Asohini kabaꞌi ida haria avanaabosivini,

ni-nahina aꞌonira akanikhariaki.

Ni-anofiki.

Abosija vaha ida Cristo monina jahakia akavaranina;

Deu-ra avigariki vakhaniki vaha:

—Ni-anofiki ida vaathi akamithavini.

Vanofiki ida vaꞌora akaijahitavini — niki vania vakavaranira vaha adani.

Ni-anofiki ida Cristo monina-ra mitha avaniꞌavini-ra anadabavini,

oniani ida ariabono akavaꞌogajarihavini hija.

Ni-anofiki ida avakadinahina-ra agathanivini.

13 Avarigaki ida varani vihina bada vakhaniki Deus khai niꞌana kagorania vakadiꞌbai-ra vagathanivini.

Makhira Deu-ra kanavaꞌigavini hiki ida igitha abononi altar namania,

bigathaniki jaboni ida igitha imani pitahatahaki pitani hoarani.

14 Onivani fori hija ida Deua binofiki akadiania.

Ijaꞌari Cristo monina kavaranihia kabadanibakhiahi;

asohihi ida kidibadani abosini-ra gathanivini,

abononi kaijahitavini hiki kaimoni.

15 Asohini kabaꞌi ida avakadiania bada onina-ra avanaabosivini,

ni-onofiki ida hora avanaabosivini.

Kodivarani hirihi ida hora avanaabosivini asohini.

Ni-nirihi ida aꞌonira okajirihivini.

Vaiꞌami hora naabinija vaha;

ni-onofiki ida avakadinahina-ra okanikhariavini avakadiania.

Ni-makhaniki ida kodibadani abosirinia oabono khai oniꞌavini.

Ni-ovaꞌahaki ida ijaꞌari oabono khai oniꞌavini-ra nadabavini avakadinahina hora naabosivinia.

16 Cristo hora honariavini hiꞌiki ida athi oavaadahaonivini;

oavaadahaonimaniꞌihi.

Ni-nahina kaimoni ida athi onaabavinia oabono ovaboraborahavini.

Cristo monina jahakia okavaranirija vaha;

jahariki vaha ida kodimoni.

17 Hovani kaꞌoa Cristo monina okavaranina-ra onagathogathoja vaha;

kodivarani abosini-ra onokhamanihi vaha.

Ni-onagathogathoki.

Deus vani ada hora nagathogathoꞌara kidivarania okavaranina,

oniani ida Cristo monina hora kanavaranija.

18 Nahina mani ida kodibadani abosini hija?

Khai oniꞌaki ida nahina-ra okanikhariaravini Cristo monina jahakia okavaranina.

Asohini kabaꞌi ida Cristo monina jahaki-ra oavaadahaonivini kabadanihi abosini-ra ogathanivini,

okaabokaki ida oabono okaathirivini.

19 Makhira kapavakarivahariki ho.

Ni-nahina hora avadadamiki kodibadania.

Kabaꞌi,

ijaꞌari hahavi vakadihonai abono kapavakarivahaki fori ohiki ho.

Oadodoki fori ohiki ho vaꞌora oakodiavini adani ijaꞌari vaipohiki Cristo-ra vavakaijokavinia.

20 Onofiki ida judeus kaijaꞌari-ra vaꞌora oakodiavini Cristo-ra vavakaijokavinia,

oniani ida vakadiania ohojana oadani vakadikaajia hora kanahojaiꞌianaja.

Ni-Deus hora honariajanaki vaꞌisohihi jiriki Moisés vaꞌora navaꞌisohiꞌboꞌdavini hiꞌiki-ra onaabavini.

Judeus kaijaꞌari Cristo-ra avigariki asia vanaabaki ida.

Vahararana ohojana oadani Deus kavaꞌisohihi jiriki-ra onaabavini hiki Cristo kaijaꞌari vihina-ra vanofira kaimoni.

21 Hari.

Judeus kaijaꞌari vihiriki vahararana ohojahi,

vaꞌoaniaro maina fori ohihi.

Vavahojarihi ida vaꞌisohihi jiriki judeus kaijaꞌari vanaabaki,

oniani ida vaꞌisohihi jiriki-ra okavaꞌibodiravini hija.

Onofiki ida judeus kaijaꞌari vihiriki-ra vaꞌora vaakodiavini Cristo-ra vavakaijokavinia,

oniani ida Deus kavaꞌisohihi jiriki-ra okavaꞌibodiravini hija vakadiania ohojana oadani.

Kodivarani hirihi ida Deus kavaꞌisohihi-ra onaabaravini.

Cristo kavaꞌisohihi oamani ida onaabaja.

22 Cristo-ra vavakaijokajahakiriki vakadiania ohojahi;

vaꞌoaniaro maina fori ohihi.

Onofiki ida vaꞌora oakodiavini vajariꞌdarina kaaraja kaimoni.

Nimania hida kodihojai.

Ijaꞌari vakadiania ohojana vani vaꞌoaniaro fori ohija,

okaabokaja kaimoni ida vahoarahanana vaꞌora oakavaꞌijoavini.

23 Onina vani oakodiaja ida Jesus Cristo monina jahaki akarafarakhamani.

Vahoariha vagathanivini kamahini ida Deus kanahina jahaki Jesus monina jahaki haria navaꞌiponihahavivini hiꞌiki.

Onofiki ida ogathanivini jaboni vakadiania.

24 Hari.

Okavarajomiki ida akadibadani Cristo kaimoni hidiaja ijaꞌari kiꞌdarahaki fori hini.

Ijaꞌari vaipohiki vakiꞌdarahaki vaagathanija kaimoni ida kajamari.

Avarigaki ida ijaꞌari hoarani kaꞌoa kajamaria gahinani.

Oniaro miroꞌa akhanoꞌiki,

kiꞌdarahihi joraki vahoariha vakadikiꞌdarahihi jorani-ra aradaki.

Deus aꞌonira honariavini hiki vakadikiꞌdarahihi fori hini hida avakadibadani.

Vanadano bana ida avakadibadani mahija nahina jahakia avagahinani hiki kaimoni-ra avagathanivini.

25 Ijaꞌari kakiꞌdarahinofiki kiꞌdarahabakhiaki abononi nadanovini aꞌbaꞌdiki.

Abononi kaathirivini hiki ida nahina hahavi kidikiꞌdarahihi jorani nadabani hiki.

Binofiki ida kajamari-ra kagathanivini,

akaraꞌokhojorakini kabaꞌi.

Harivani akiꞌdarahaki fori arihiki hari,

agathanija kaimoni ida nahina jahaki aꞌboꞌdaki.

Mahi anokhomiriki vania hojaja ida agahinana hiꞌiki.

26 Hovani okiꞌdarahajorakiki fori ohiki ho hagihi oviaha hojaki-ra oanikhavini,

homiroꞌa oakhanoja kaimoni anokhomini kania.

Hari.

Onofiki ida ijaꞌari vahoariha Cristo-ra vanofivini-ra oaradavini.

Ni-onofiki ida ogahinana hiki kaimoni-ra oragarivini.

27 Hari.

Okaathiriki ida oabono hojai asohiriki-ra kavaꞌinofinofivini.

Oabono odavini fori hiki ida oabono onasohivini.

Oavadadamiki ida oabono Deus athi-ra naabavini.

Deus athia vahoariha-ra vaꞌora onavaꞌisohivini naothinia,

ni-onofiki ida Deus hora navaꞌisohivini bana:

—Paulo,

ni-onofiki ida kodijaꞌari nasohiva abono ihijanarini.

Ni-iogaki ida iabononi inasohivini — ni-nikia Deus vara hora niꞌavini-ra onofiki.