Avakoꞌomisiꞌaha kajoviri Malta kaonikia
28
Hari.
Oniaroa,
aakhanomisihahaviꞌihi.
Akhanina vani aꞌaihotaja.
Ni-amakhaniꞌiki.
Haria vanavaꞌisohivini kihiꞌiki ida kajoviri Malta kaoniki.
2 Arabo kaijaꞌarini haria vanaibavijahajahakiꞌiki.
Kharariki ada bahi.
Pahisirini karaho haria nakahoꞌiki,
oniani ida siho kakaraho-ra vakanamonahavini hija akadiragi kaimoni.
3 Kasihohaꞌaha ada Paulo.
Binajoroniꞌihi ida kabisi siho kakaraho kanamania biosonaꞌihi,
khaonaniꞌaha ada makha.
Siho kaafania biarakhaonaniꞌaha,
Paulo saꞌa-ra kaananiꞌaha.
4 Arabo kaijaꞌarinia vanokiha ada makha Paulo saꞌa-ra kaananivini viro khanirivanana,
vaabono vakaniꞌakhamaꞌaha:
—Kaabinimanira koda hada.
Aahidanarina kabaꞌi aꞌdaꞌdi kaabosini hina,
makha maina biananiha hada makhira,
abinira kaimoni — vaabono vakaniꞌakhamaꞌaha.
5 Pauloa biaradisaꞌaha ada makha,
siho kabodinia voroniꞌaha.
Ni-makha kaino kaꞌbanani-ra kamithaꞌiki.
6 Paulo-ra vada vaniꞌavini hiꞌiki pohimajaꞌina.
Rafona vanokhavini.
Abinijorakina vanokhavini jaboni.
Vanokhahahaꞌoadahaha,
ni-pohimajaꞌiki.
Oniania vakhanihaꞌaha:
—Kaabiniki avanihaki hada makhira.
Deus oamani hada — vaabono vakaniꞌakhamaꞌaha.
7 Oniaroa,
Públio haria kaboaꞌiꞌihi gorana arihojana.
Públio vaꞌora vakaꞌdaꞌdiki adani kajoviri kakaaraboni kaijaꞌarini.
Ibavi avigaimorikia kamaakarikhamaki ida kidisiroi.
Mahi ahoarabakosiki arihojahi Públio gorana bodinia,
haria naibavijahajahakiha.
8 Hari.
Oniaroa,
kavamoniꞌaha ada Públio kaabiꞌi.
Kabaravaꞌaha,
kajakhaviꞌaha gorana omaꞌaha.
Okhamiꞌaha ada Paulo,
Deu-ra kanikhariaꞌaha aihotara kaimoni ada Públio kaabiꞌi.
Pauloa bikanaibaviꞌihi ida saꞌa kavamoniki namana,
bianaihotaꞌaha.
9 Naothinia kajoviri kakaaraboni kaijaꞌarini vakavamoniki vikhaꞌaha Paulo kania,
vaꞌora anaihotahahavimaniꞌaha.
10 Vaꞌiga ipohikia haria vanoꞌaꞌaha.
Ai akihina kamahini viahani kanava kakaraho kahoariha kabodinia visamahi ida akainamoki hahavi akavikhaꞌianaki kaimoni.
Roma sidaji maina avikhaꞌaha
11 Masiko ahoarabakosikia arihojahi Malta kajoviri kakaarabonia.
Alexandria sidajia kakhaꞌiki ida kanava kakaraho vaidi kamasikoni viahania.
Deus amovana kasoikia kaoniki ida kanava kakaraho.
Vaidi kamasikoni radaharini oadani kajoviri kakasidajini adamininia kahojaki ida kanava kakaraho.
12 Hari.
Akiꞌdamahi,
ai akihiꞌihi.
Aakhahi,
Siracusa sidaji adamininia aakaikahiꞌihi.
Mahi ahoarabakosikia akahojaꞌihi.
13 Akaꞌajihiꞌianahi,
akakhaꞌianahi Régio sidaji adaminini maina akakhanoꞌihi.
Kaꞌafokajomani kamaꞌdaꞌihi ida sirisiriki safini kakhamanani ibavini kajasonija.
Akaꞌajihiꞌianahi,
mahi ꞌbamiki akaadahaꞌihi,
Pozuoli sidaji adamininia aakaikahiꞌihi,
agaimorahaꞌihi.
14 Vaꞌora akaragaꞌaha adani Cristo kaijaꞌari,
haria vakaboaꞌiꞌaha vakadiania arihojana semana hoarani.
15 Arihojahi,
ai arihiꞌianahi arabo maina aokhaꞌihi Roma sidaji-ra anikhahavini.
Cristo kaijaꞌari Roma sidajia vahojakia vakamithaꞌihi ida akaikahina monini.
Vikhaꞌaha,
haria vakaragaharariꞌaha.
Ápio ibavi onikia vaꞌora akaragarariꞌaha adani vahoariha.
Vada Ibavini Ahoarabakosikia onikia vaꞌora akaragarariꞌaha adani vahoariha.
Paulo vaꞌora nokiꞌaha,
khaii niꞌaha,
Deus jahana vani-ra kahiꞌaha ada Paulo.
Hojaki ada Paulo Roma sidajia
16 Hari.
Roma sidajia akaikahina vani sorara vavaꞌahaha ada Paulo gora-ra rihavini,
oniaroa hojaha.
Sorara hoarana hojaki kidiania ajihirara kaimoni ada Paulo.
17 Mahi ahoarabakosiki radahani naothinia Paulo vaꞌora kaboaꞌiha adani judeus kaijaꞌari vavakaꞌdaꞌdiva vajoronina gora bivahojaki kania.
Vajoroniꞌaha,
vaꞌora niꞌaꞌaha:
—Oigamina,
vaꞌora onaibavijahaꞌiki adani akadijaꞌari afobakhia.
Ni-okajoniki ida vakadihojai akadijaꞌari avikhananavaki haria vakaꞌojomoꞌivini hiꞌiki.
Kabaꞌi hora vagathiꞌaha adani akadijaꞌari Jerusaléa,
Roma sidaji kakaꞌdaꞌdini kaijaꞌarini vasaꞌa kabodinia hora avarakhaꞌaha.
18 Vakadisorara hora vananaꞌdohivini hiki ida kodibadani.
Badani asohiriki-ra bada oniꞌaravini mani ida hora vanaabinivini-ra vanofiravini hija.
Vanofiki ida hora avarakhavini ai ohija kaimoni.
19 Akadijaꞌari vani adani ai ohina-ra vanofiriha,
oniani ida César kania ookhana-ra okanikhariavini hija.
Ni-onofiki ida akadijaꞌari-ra vaꞌora oanaathidanoararivini,
20 oniani ida avikhani hida aꞌonira obaranahavini hija.
Onofiki ida aꞌonira onokivini ariabono vara akaniꞌakhamaja kaimoni.
Israel kaijaꞌari arihina mani ida akadiꞌaihotahi abono-ra anokhavini hija.
Jesus akadiꞌaihotahi abono hina-ra okajariꞌdaravini mani ida hora vidabohavini hija correntea — Paulo vaꞌora niꞌaha adani judeus kaijaꞌari vavakaꞌdaꞌdiva.
21 Paulo-ra vaniꞌaha:
—Ni-Judéia kaarabonia khaꞌiaki kaho ida varani ihini kapapirani.
Ni-moni-ra vavikhaꞌiaki kaho adani arigamina Judéia kaarabonia.
Ni-nahina vara ira vaniꞌaꞌiaki akadiania.
22 Anofiki bana ida kadavarani-ra akamithavini Jesus monina-ra vara ivaniꞌavini kavaranihi.
Aogaki ida vaibavi hahavi kaijaꞌarini vaꞌora vakanavaranihavini adani Jesus Cristo kaijaꞌari.
23 Oniaroa,
vaabono vakanaaminakhamavini-ra vakanamahiꞌaha,
Paulo kavarani-ra vakamithara kaimoni.
Oniaroa,
mahi hoariha vajoroniꞌaha adani judeus kaijaꞌari vaipohiki Pauloa bivahojaki kania.
Mahi avagani vani kamaꞌdaꞌihi ida kidivarani.
Mithani asia mani vaꞌora vara niꞌaha.
Vara bivaniꞌaꞌihi ida Deus ijaꞌari hahavi-ra vakaꞌdaꞌdivini.
Pauloa binofiki ida Jesus monina kaꞌoa hini-ra avigajahakivini,
oniani ida Deus kavaꞌisohihi athini kapapirani Moisés kohana binajiriꞌikia vaꞌora navaꞌisohivini hija.
Deus athi namoniva abono kohana vahoariha vaathi kapapirani hikia vaꞌora navaꞌisohivini hija jaboni.
24 Vahoariha vakajariꞌdarihi ida Jesus varani hina.
Vahoariha vani adani vajariꞌdaha.
25 Vaꞌajihina kabaꞌi vaabono vakaniꞌakhamavini hiki ida Paulo athi asohini asohirini.
Vaꞌajihina viahania Paulo vaꞌora niꞌaha:
—Asohiꞌoamanija ida Isaías kohana athi,
avakadijaꞌari avikhananavaki-ra vaꞌora navaꞌisohivini hiꞌiki ida Maꞌonahai Jahaki athi.
26 Biniꞌaha ada Isaías:
“Ijaꞌari vakadiania okhaꞌa bana.
Vaꞌora niꞌa bana:
‘Mitha avakhanijahakini kabaꞌi,
ni-nahina nini avarigaki.
Vada avakhanijahakini
kabaꞌi,
ni-nahina-ra avanokiki.’
Vaꞌora niꞌaꞌa bana.
27 Avigaravini vanofiravini mani ida vamorobo-ra
vakaꞌoahavini hija,
vanokho-ra modo
vaniꞌavini hija jaboni.
Avigavini vanofija vaha;
mara vaniꞌamanihi vaha ida vanokho,
vamoroboa vakamithamanihi vaha jaboni.
Avigavini vanofija vaha;
mitha vaniꞌamanihi vaha.
Vavaꞌi bodinia oathi-ra avigara vaha;
hora vanofimaniha vaha,
vaꞌora okajoamoramaniha vaha jaboni.”
— Nimania ida Isaías kohana bidionivini Maꞌonahai Jahaki athi.
28 Oniaroa,
ai vihina viahania Paulo vaꞌora niꞌaha adani judeus kaijaꞌari:
—Aꞌonira onavaꞌisohiki bana ho,
Deua bikaronaki bana hida akavaꞌijoahi kavaranihi judeus kaijaꞌari vihiriki vakadimoni.
Vaꞌoaniaro athi vakamithajahakiki bana adani — niha ada Paulo.
29 Paulo athi-ra mitha vaniꞌavini naothinia ai vihiꞌaha adani judeus kaijaꞌari.
Paulo athi asohini asohirini hikia vaabono vara vakaniꞌakhamadanokiꞌaha.
30 Hari.
Oniaroa,
badara ꞌbamiki hojaꞌaha ada Paulo gora birihakia.
Binaabosiꞌiki ida gora-ra rihavini.
Paulo-ra vanavanavanahaha adani ijaꞌari,
vaꞌora gathanijahakimaniꞌaha ada Paulo.
31 Vaꞌora navaꞌisohivini hiki ida Deus athi,
Deus vaꞌora vakaꞌdaꞌdiki adani ijaꞌari hahavi.
Paulo vaꞌora kaꞌojomoꞌiꞌaha Jesus Cristo varani hina jaboni,
kaꞌdaꞌdi hina ada Jesus.
Ofinirina vani vara vaꞌora niꞌaꞌaha.
Ni-nahina binadabaki ida vaꞌora vara niꞌavini.
Hari ida vani oamani Lucas athi anokhomini.