2 Oniaroa,

akiꞌdamaꞌihi.

Kiꞌdamaꞌaha ada jaboni Aristarco akadiania okhaꞌaha.

Macedônia kaaraboni kaijaꞌarini ada Aristarco.

Bivaꞌbanaki ibavini onini Tessalônica.

Akiꞌdamana viahania Adramítio sidajia kakhaꞌiki ida kanava kakaraho.

Ásia kaaraboni kasidajini adamininia akoꞌomisionija kaimoni ida kanava kakaraho.

Hari.

Akiꞌdamaꞌihi,

ai akihiꞌihi,

aakhabaoniꞌihi.

3 Kaꞌafokajomani Sidom sidaji adamininia aakaikahiꞌihi.

Júlioa binaibavijahajahakiha ada Paulo.

Bivaꞌahamaniha kidivaꞌahi-ra vaꞌora navanavanahamorivini,

gahinaꞌaha nahina bikainamokia jaboni.

4 Akiꞌdamaꞌianahi,

Sidom sidajia ai akihiꞌihi.

Sirisiriki haria agathaniꞌihi Chipre kajoviri kaoniki-ra aakaradamiꞌihi jasoja.

Ni-danojanaki ida sirisiriki kajoviri kakajasonija.

5 Akakafianiꞌihi Cilícia kaaraboni vadinia akakhabakosaharibanahaꞌihi,

Panfília kaaraboni vadinia akakhanairibaniꞌihi,

akakafianiꞌihi,

Mirra sidajia akakhanoꞌihi,

akoꞌomisiꞌihi.

Lícia kaarabonia hojaki ida Mirra sidaji oniki.

6 Roma sidaji kakaꞌdaꞌdini kasorarania bikanakoꞌdihahi ida kanava kakaraho kahoariha,

akahagi kaimoni.

Biakaragaꞌihi ida Alexandria sidaji kakanavani Mirra sidajia kakaikahiꞌini.

Itália kaarabonia aakhaki ida kanava kakaraho,

oniani ida sorara vakadikaꞌdaꞌdi akiꞌdamana-ra honariavini hija.

7 Vajaforia akakhahi,

mahi ipohiriki aakakhahi,

sirisiriki vani haria agathanihi.

Cnido sidaji adaminini maakarinia aakaikahiꞌihi.

Sirisiriki danoki haria aakarojaribanivini mani ida haria akarakharibanija,

Creta kajoviri kakaaraboni-ra aakaradamivini aniaja.

Ni-danoki ida sirisiriki kajoviri kamathanija.

Akaradahi ida arabo anokhojohonaini vira niki Salmona oniki.

8 Creta kajoviri kakaaraboni vadinia akakhabakosaharibanahaꞌihi.

Vâjaforia akanakaikahiꞌihi ida Kaadami Jahaki ibavi oniki.

Kamaakarikhamaki ida Laséia sidaji oniki.

9 Hari.

Mahi ipohiki arihojana,

radahaꞌihi ida judeus kaijaꞌari vakadihinika.

Badara hoarahanana Deu-ra vakavaihinikavini,

Deua binaꞌbiraja kaimoni ida vakadihojai asohiriki.

Ihinika amonahani naothini kamasikoni ni-kajahajanaki ida kanava kaadahani.

Kamaꞌdaꞌiki ida vaidi karaho afobakhia.

Oniania,

Paulo vaꞌora kaabaniꞌaha adani kanava kakakarivani,

sorara vakadikaꞌdaꞌdi vihiki jaboni:

10 —Aꞌonira onavaꞌisohiki ho,

akakhana jahajanarihi kaho bana.

Kaꞌboroꞌboroki bana ida kanava komini kanaꞌbahakia.

Aakamadaki bana ida kanava kadaini,

avaahidananaki bana hadani ijaꞌari vaipohiki — vaꞌora niꞌaha ada Paulo.

11 Kanava kakakarivani,

kanava kanasohiva abono vihiki vania ai kihini vakanofiꞌianahi.

Sorara vakadikaꞌdaꞌdia bikajariꞌdarihi ida vakadivarani,

ni-bikamithaki ida Paulo kakaabanahi.

12 Ni-jahaki ida kanava kakaraho kahojani adamia paha oadani,

oniani ida kanava-ra vakavaadahakia vakavigaibanivini vakanofivini hija.

Vanofiki ida avakaibavibakosiꞌianana,

Fenice sidaji adamininia vaagaibanina.

Creta kakajovirini kakaarabonia hojaki ida Fenice sidaji oniki.

Safini aagari ibavinia vakahojaꞌafona-ra vakanofivini.

Vaniꞌaha:

—Jakaho ai akihiꞌava mahija akanaradahavini hida paha Fenice sidaji adamininia — vakhaniha.

13 Hari.

Oniaroa,

foraforani kamaꞌdaꞌihi ida sirisiriki.

Paha namani vani radahahi ida sirisiriki jahaki khamisini.

Vaabono vara vakaniꞌakhamaꞌaha:

—Jahaki ida sirisiriki hidakabaꞌi haria akosavini.

Aakakhabakosiꞌava mahija akaikahiꞌavini akoꞌofiꞌia kaimoni Fenice sidaji adamininia — vakhaniha.

Oniaroa,

varaꞌbanimananiꞌihi ida kanava kaahoni kaibavini khanaki âncora oniki.

Visamaꞌihi ida âncora,

ai akihiꞌihi.

Creta kakajovirini vadinia arabo maakarinia aakakhabakosaharibanahaꞌihi.

14 Hari.

Aakakhabakosaharibanahana kabaꞌi kamaꞌdaꞌihi ida sirisiriki danoki kajoviri kakaaraboni namania khani.

Vanaonivini ida sirisiriki danoki Nordeste.

15 Sirisiriki danoki haria kagathiꞌihi,

ni-nihanikia akanasohijanaki ida kanava kakaraho.

Ni-aakaabokajanaki ida kanava.

Akarakoꞌoamaniꞌihi.

Sirisiriki haria aakarojaꞌihi.

16 Aniaja vania kahojahi ida kajoviri kapaꞌitxi Cauda kaoniki.

Akaradahana kabaꞌi kajoviri kapaꞌitxia biakaꞌoahafiaꞌihi ida sirisiriki afopaꞌitxi.

Kajoviri kamathania akahojana kabaꞌi makhira avarahokasiꞌihi ida kanava kapaꞌitxi kahoariha.

17 Vakosamaꞌihi,

avakanaahomisiꞌihi ida kanava kapaꞌitxi.

Badani karaho oamani ida kanava kapaꞌitxi karaꞌbanahamananini akaahomisini.

Naothinia caboa avakodabomisiꞌihi ida kanava kakaraho kaꞌbororia kaimoni.

Líbia kaaraboni txikatxikania hojaki ida kaasi.

Paha bihiariki kania kanava kakaraho koꞌomani-ra vakofiniꞌaha.

Oniania,

avaragarahanaꞌihi ida kanava kakamakarini sotinimananiki.

Sirisiriki vani haria kanaadahakaꞌoaꞌihi.

18 Joma oadani karaofafarahaꞌoadahahi ida kanava,

ni-radahapaꞌitxiki ida sirisiriki danoki.

Danohahaꞌoadahamanihi.

Kaꞌafokajomani avakakakodafahanaꞌihi ida kanava kabodini kakainisikani pitani,

kaꞌbiriꞌbirijanaria kaimoni.

19 Kaꞌafokajomani vani avakakakodafahanaꞌianahi ida kanava kakanahinani,

kanava-ra kanasohiki-ra vaakodiavini kaimoni ahoi,

makari,

nahina khanaki hiki,

kaꞌdoromananija kaimoni.

20 Mahi ipohiki ni-anokijanaki ada safini,

boviri hiki.

Danohahaꞌoadahamanihi ida sirisiriki.

Hari.

Akavaꞌibodivaraniꞌiki ida aꞌaihotajanarina.

21 Mahi ipohiki ni-aꞌbaijanaki.

Oniaroa vahararana gaamananiꞌaha ada Paulo,

vaꞌora niꞌaha:

—Oipohina,

Creta arihojana kari ni-kodikaabanahi-ra avakamithaki.

Ai akihirija vaha;

ni-akapohimajaki vaha.

22 Hidakabaꞌi oathi-ra bana mitha vaniꞌa.

Hariꞌa avavaꞌini soko inijanava.

Ni-hoarani ahidarihi bana.

Kanava oavani bana ida kaꞌboroꞌboroja.

23 Deus kahonai abono ho.

Deu-ra okanamasivibakhiaꞌiki ho.

Hihida joma Deus ibavi kaijaꞌarini khaꞌaha kodiania,

hora navaꞌisohijoravini hiki ida namithaki kaimoni akadiania.

24 Hora niꞌaꞌaha:

25 Oipohina,

hariꞌa vaofinijana.

Deu-ra ovakaijokaki ho.

Ovaria binanamithaki bana akadiania ida hora niꞌavini hiꞌiki.

26 Kajoviria sirisiriki haria akarahokamoriki bana hari — vaꞌora niꞌaha ada Paulo.

27 Hari.

Semana ꞌbamiki sirisiriki hari aakarojaꞌiki hari.

ꞌDako karaho kajokiraki Mediterrâneo onikia akaadahaꞌimajaniꞌiki hari.

Joma ꞌboꞌdahini vani kanava avakakadavaꞌava abonoa vakavaꞌibodivaranihi ida arabo-ra akanamaakarivini.

28 Visafarihi ida vaꞌa oadaki nokhoni akhananakosiki,

avigaja kaimoni ida paha bihiani.

Varajomahi ida paha bihiani vaꞌa oadaki ipohini 20 hiki vadiia.

Mitihini visafariꞌianahi,

varajomaꞌianahi ida vaꞌa oadaki ipohini 15 hiki vadiia.

29 Jaꞌdi karaho namania sirisiriki haria akanahanamorivini-ra vifinivini,

oniani ida kanava kamaꞌdania âncora ahoki akoꞌbamahakhamaki-ra avisafivini hija,

kadaanija kaimoni ida kanava kakaraho.

Deu-ra vakanikhariavini hiki avagajorakija kaimoni ida mahi.

30 Kanava avakakadavaꞌava abonoa vakanofiki ida vaabono avanaihotavini,

oniania kanava kapaꞌitxi-ra vakanahiririrariꞌaha.

Sorara-ra vaꞌora vakorijanahavini vaꞌora vaniꞌaha:

—Kanava kabononia anaibaviki bana ida âncora hoariha — vaꞌora vaniꞌaha.

Vakaꞌajihikaꞌoana-ra vanofiꞌaha.

31 Hari.

Paulo vaꞌora niꞌaha adani sorara vakadikaꞌdaꞌdi,

kidisorara vihiki:

—Kanava kakaraho kabodinia vahojariha adani kanava avakakadavaꞌava abono;

jokoa avaabononi avarakavaꞌijoarihi.

Vahojaha;

avaraihotahi — vaꞌora niꞌaha ada Paulo.

32 Oniaroa,

sorara avavaꞌboaꞌihi ida vaꞌa kanava kapaꞌitxi kaahoni hiki.

Kafariꞌihi,

akarakoꞌihi ida kanava kapaꞌitxi.

33 Vagavagani vani Paulo vaꞌora kaboaꞌiꞌaha viꞌbaiꞌara kaimoni.

Vaꞌora niꞌaha:

—14 mahi ipohini aviꞌbairini avahojaki aꞌoni.

34 ꞌBai paꞌitxi-ra bana vahaꞌa.

Jahaki ida aviꞌbaini avahokija kaimoni.

Ni-avapohimajarihi bana — vaꞌora niꞌaha ada Paulo.

35 Paulo vara nina kabaꞌi,

bikanabiiniꞌihi ida pão.

Vada vakhanina kabaꞌi,

Paulo Deu-ra niꞌaꞌaha:

—Deus,

ivani ijahaki i,

haria ikaijahitabakhiaki i — niha ada Paulo.

Vada vakhanina kabaꞌi,

bikanapitaꞌihi ida pão,

bikahaꞌihi.

36 Khai vakhanipaꞌitxiꞌaha,

ni-vaofinijanaki viꞌbaiꞌaha.

37 Kanava kabodinia arihojaki 276 arihiki hari aripohina.

38 Aꞌbaihahavina naothinia visafariꞌihi ida trigo kaꞌbiriꞌbirijanaria kaimoni ida kanava kakaraho.

39 Hari.

Oniaroa,

vagavagani vani anokiꞌihi ida arabo.

Kanava-ra avakakadavaꞌaki ni-avigaki ida arabo hana hini hini.

Vanokiꞌihi ida kaasi aiꞌdokohamisini.

Ni-jaꞌdi karaho-ra vanokiꞌiki.

Vanofiki ida kanava-ra vakanasohivini koꞌomaja kaimoni kaasia.

40 Hari.

Âncora ahoni-ra avavaꞌboaꞌaha,

oꞌomariꞌihi ida âncora akoꞌbamahakhamaki.

Vakokhariꞌihi ida vanami kaahoni kanava kakaraho kasohini hiki.

Vakokharivini naothinia avarakasahanaꞌihi ida kanava kakasotinimananini kanava kabononia hojaki,

sirisiriki kanava-ra akaniꞌomisija kaimoni.

41 Aakhamisiꞌihi,

koꞌomaꞌihi ida kanava kabononi kaasi txikatxikani nokiariki kania.

Koꞌomaꞌihi ida kanava kabononi,

ni-aakhajanaki.

Kanava kamaꞌdani ni-koꞌomaki.

Komini kanaꞌbahakia bikosonasonafarihaꞌoadahahi ida kanava kamaꞌdani,

kaꞌboroꞌboroꞌihi.

42 Hari.

Sorara vanofiki ida vagathaki-ra vaꞌora vanaabinivini.

Vifiniki ida avikonahamisina vigafanahana.

43 Sorara vakadikaꞌdaꞌdi vania binofihi ida Paulo-ra akavaꞌijoavini.

Vaꞌora kaabaniꞌaha adani sorara vagathaki-ra vaꞌora vanaabinirara kaimoni.

Vaꞌora niꞌaꞌimidiaha adani konahi-ra avigaki:

—Konahi-ra avarigaki aꞌoni.

Vikafari bana mahija avarikonahamisivini — vaꞌora niꞌaha ada sorara vakadikaꞌdaꞌdi.

44 Vaꞌora honariaha adani vahoariha konahi-ra avigariki:

—Vanaothia avikafarisiaga bana.

Vagathi oni ava arakoki,

kanava kapitani akarakoki,

avaraihotaja kaimoni.

Avakhanini vani avaraihotaja kaasia — vaꞌora niꞌaha ada sorara.

Oniaroa aakhanomisihahaviꞌiki hari,

ni-amakhaniꞌiki.