Pauloa vara biniꞌaki ada Agripa
26
Hari.
Agripa biniꞌaha ada Paulo:
—Ba varani mahija iabono ivajariꞌdavini-ra okamithavini.
Paulo saꞌa-ra kanabiiniꞌaha,
vara biniꞌaha ada arabo kakaꞌdaꞌdini:
2 —Agripa,
judeus kaijaꞌari hora avanaathidanoararibakhiavini hiꞌiki ida vakadihojai okajonivini,
oniani ida oabono ovajariꞌdavini kavaranihi-ra ikamithavini-ra khai oniꞌavini hija.
3 Ivani iogajahakiki ida judeus kaijaꞌari vakadihojai,
vakadivarania vaabono avakanaathidanoararikhamavini,
oniani ida kodivarani-ra ikamithavini khai hora niꞌaja.
Ira okanikhariaki ho bana,
ivaꞌini vidavidaharini kodivarani-ra mitha iniꞌaja kaimoni.
4 Judeus kaijaꞌari avigajahakiki ida kodimahi afohahavi vakadiania ohojaꞌiki ho afohaꞌoadaha.
Isai ohina kari kodiaraboa ohojaꞌiki ho vakadiania.
Okarahoꞌina vakadiania asia mani ohojahi Jerusalém sidajia,
oniani ida hora avigajahakivini hija.
5 Farisio ohiki ho imakhinava ohina kari.
Akadijaꞌari avikhananavaki vakadihojai jiriki-ra vanofivini arafiaki adani farisio,
hovani jaboni ovahojamanija ida hojai jiriki ipohiki.
Kodivarani kaꞌoa hini-ra avigajahakiki adani kodijaꞌari hora avigaki.
Aꞌonira vanavaꞌisohivini-ra vanofiha;
ba aꞌonira vanavaꞌisohiva kaꞌoa hinia.
6 Deus vaꞌora navaꞌisohijoraꞌiki adani akadijaꞌari avikhananavaki namithaꞌiarikia.
Okajariꞌdarihi ida Deus vaꞌora navaꞌiponijoravini athini,
onokhaki ida athi-ra nanamithavini kamahini,
oniani ida kodijaꞌari hora avanaathidanoararibakhiavini hija.
Hidakabaꞌi avakadiania ohojaki ho kodivarani-ra inasohija kaimoni.
7 Ni-hovani ohoarana Deus athi namithaki-ra onokhaki.
Akadijaꞌari hahavia vanokhaki jaboni ida namithaki kaimoni,
Deus akadijaꞌari avikhananavaki-ra vaꞌora navaꞌisohijoravini athini.
Jacó kohana kaisai kohana 12 vihiki vakadisai kaisai kahanodi mani hari.
Deu-ra akanamasiviki hari afohaꞌoadaha mahi,
joma hiki anokhavini ida Deus vaꞌora niꞌajoravini hiꞌiki.
Agripa,
akadijaꞌari-ra ivakaꞌdaꞌdiki i.
Deus athi namithaki kaimoni-ra onokhavini mani ida judeus kaijaꞌari hora avanaathidanoararibakhiavini hija.
8 Aꞌonivani judeus kaijaꞌari aꞌoni.
Nahina mani ida Deus ijaꞌari abiniki-ra anahokivini-ra avakajariꞌdavini hija?
9 Paulo asia mani vara vaꞌora niꞌaha:
—ꞌBoꞌdakari hovani jaboni ni-ovajahaki ada Jesus.
Ovari Jesus Nazaré sidajia avijavaki.
Oniani ida Jesus vaipohihava abono-ra vaꞌora onajahariharivini hiꞌia.
10 Jerusaléa ohojana kari vaꞌora onajaharihariꞌaha.
Sasidotxi vavakaꞌdaꞌdiva hora honariavini hiki vaꞌora ogathivini adani Jesus athi-ra vanaabaꞌiki,
cadeia vaꞌora oobaiꞌaha.
Vaꞌora vavahonariahiꞌaha vaabinina,
oniaro kari vaꞌora onofiki jaboni adani vaabinina.
11 Judeus kaijaꞌari Deu-ra vara vaniꞌavini kagorani hahavia vaꞌora onajahariharibakhiaꞌiki adani.
Vaimana ꞌbanani ovahonariahiꞌiki adani,
vakavaꞌipahinija kaimoni ida Jesus Cristo kaijaꞌari vihina.
Vaꞌora okavaꞌijokojokohaꞌoadahavini mani ida sidaji hoariha hora arakhaja,
vaꞌora onakoꞌdihavini vaꞌora onajaharihariꞌianara kaimoni.
Paulo Jesus kaijaꞌari hiꞌiki
12 Hari.
Oniaroa,
Damasco sidajia hora arakhaꞌiki vaꞌora onajahariharihaꞌianavini.
Sasidotxi vavakaꞌdaꞌdiva hora vahonariavini hiki ookhaꞌina.
Vakaronaꞌihi ida vaathi vaꞌora ogathira kaimoni adani Jesus vaipohihava abono.
13 Agripa,
safini sohirarina vani hagihia oadahana kabaꞌi,
onokiꞌiki ida vagaki karaho safini vagana-ra aradaki.
Oiꞌoaria,
vâga niꞌihi ida vagani nama khaki.
Hora vavaipohihaki vaiꞌoaria jaboni vâga niꞌiki ida vagani.
14 Ariadarihahaviꞌihi,
athii-ra okamithaꞌihi,
hebreu athinia hora niꞌaꞌihi:
“Saulo,
Saulo,
nahina mani ida hora inajahariharibakhiavini hija?
ꞌDaama kahidaria bikajonivini ida akadavaꞌava athi,
oniani ida ava txoꞌdikia bitxagavini hija.
ꞌDaama kahidari akadavaꞌava-ra kajonivini vani fori ihiꞌia.
Hora ikajonivini mani ida
iabono inaimaꞌbanavini hija.”
15 “Kaꞌdaꞌdi,
hana ihini
mani i?”
Oniꞌaha onanaꞌdohivini.
“Hovani mani Jesus
ooniki ho.
Hora inajahariharibakhiaꞌiki ho.
16 Gaamananiꞌa,
gaaꞌa.
Oabono onanokiavini hiꞌiki kadania,
ira onagathogathovini hiki kodihonai abono ihija
kaimoni.
Vahoariha-ra vaꞌora kanamonivini hiꞌa bana
ida hidakabaꞌi hora
inokiꞌavini.
Oabono onanokiaꞌianaki bana ho
kadania naothinia vaꞌora ikanamonivini hiki bana
ida ira onanokiahivini hiki.
17 Ira okaronaki bana ho
judeus kaijaꞌari vakadiania,
judeus kaijaꞌari vihiriki vakadiania jaboni.
Ira vanajahariharivini kabaꞌi,
ira oakavaꞌijoaki bana ho.
18 Vaꞌora kaꞌojomoꞌiꞌa bana
oathia mahija
vakamaodorohaki fori
vihijanaravini.
Joma bakibakinia vaadahani vani fori vihiki adani
hora avigariki vaadahana.
Vaꞌora navaꞌisohi bana omonina jahakia
mahija mahi vaadahani vani fori hini ida
vaadahana.
Vaꞌora kaabani bana
mahija Jahari saꞌa kabodinia vahojana-ra vanofijanaravini
mahija Deus saꞌa kabodini kaꞌoa maina vahojaꞌavini.
Hora vavakaijokavini
mani ida
vakadihojai asohiriki
onaꞌbiravini hija.
Oniani ida bana Deus vaꞌora kapoarivini hija,
kidijaꞌari vihira kaimoni.”
Nikia Jesus vara hora niꞌaꞌiki ho.
Pauloa vara bivaniꞌaki ida kidibadani
19 Hari.
Oniaroa,
Pauloa asia mani vara biniꞌaha ada arabo kakaꞌdaꞌdini:
—Agripa,
ni-okajoniꞌiki ida Jesus athi okamithaꞌiki nama khani vadami fori hikia.
20 Damasco sidaji kaijaꞌarini-ra vaꞌora onavaꞌisohiꞌimidiavini hiki ida Jesus monina.
Jerusalém maina ookhahi,
vaꞌora onavaꞌisohiꞌaha.
Judéia kaaraboni maina ookhaꞌihi vaꞌora oanavaꞌisohionivini.
Naothinia judeus kaijaꞌari vihiriki vakadiania oaꞌaadahaoniꞌihi vaꞌora oanavaꞌisohionivini Deus athia.
Vaꞌora okaabanivini hiki vakavaꞌipahinija kaimoni ida vakadihojai asohiriki.
Vaꞌora oniꞌabakhiaꞌavini:
“Deus kania avaabononi gahinai vanihaꞌa
mahija kidijaꞌari
avihiꞌavini.
Bada vaniꞌa ida badani asohiki afohaꞌoadaha
mahija vahoariha avigavini ida avakadihojai asohiriki-ra avanofijanaravini.”
Vaꞌora oniꞌabakhiaꞌaha.
21 Nimania ida kodibadani,
kodivarani afohaꞌoadaha.
Oniania judeus kaijaꞌari Deu-ra khai aniꞌavini kagorani kavasiribanini bodinia ohojaꞌina,
hora vagathivini hora vanaabinivini-ra vanofivini.
22 Deus vani hora kajoamorabakhiaja,
oniani ida hidakabaꞌi hida hora nahojaja aꞌonira okanamonivini hiki Jesus varani hina.
Vaꞌora okanamonihahaviki adani ijaꞌari kaꞌdaꞌdi vihiki,
kaꞌdaꞌdi vihiriki.
Mahi ꞌboꞌdakari Moisés kohana,
Deus athi namoniva abono kohana vihikia vara vavaniꞌaꞌiki ida namithaꞌiariki.
Kodivarani vakadivarani fori hiki.
23 Vakadivarani hiki ida Cristo imana ꞌbanani karaho-ra kamithavini,
abiniꞌina naothinia ahokiꞌina.
Ovani ada ahokibiininiꞌara.
Cristo ahokiꞌina mani ida vaꞌora kajoamoravini hija judeus kaijaꞌari,
judeus kaijaꞌari vihiriki.
Mahi vagani vani fori hiki ida Jesus ijaꞌari-ra kajoamoravini varani hini.
24 Hari.
Vara nina kabaꞌi ada Paulo,
Festoa biniꞌaha athi ꞌbarakia:
—Paulo,
ivaꞌini bajadidiꞌoamanija!
Papira athini vada iniꞌabakhiavini arafiaki mani ida ivaꞌini-ra nabajadidija.
25 Pauloa bigathanihi ida Festo kabodiꞌbarai:
—Iniani,
kodikaꞌdaꞌdi,
ovaꞌi bajadidirihi.
Kodivaꞌibodivarani sohiꞌoamanija.
Kaꞌoa hiꞌoamanija hida kodivaꞌibodivarani.
26 Agripa,
ivani arabo kakaꞌdaꞌdini i.
Ivani iogajahakiki ida kaꞌoa hini oathi,
oniani ida oofinirina vara ira oniꞌavini hija.
Ni-ahojaia namithaꞌiki ida ira oniꞌavini hiki.
27 Agripa,
Deus athi namoniva abono kohana vaathi-ra ikajariꞌdaria?
Oogaki ida ikajariꞌdaravini — Pauloa biniꞌaha ada arabo kaꞌdaꞌdini.
28 Agripa biniꞌaha ada Paulo:
—Jesus kania oabono gahinai onihajorakiki hora ivanihamanija koda?
29 Pauloa bigathaniꞌihi:
—Deu-ra okanikhariavini hiki Jesu-ra avakajariꞌdaravini ivani,
vahoariha kodivarani-ra vakamithaki jaboni.
Onofiki ida joraki jorariki Jesu-ra avanofijahakihahavivini hofori avihija kaimoni.
Ni-aꞌonira ovanofiahivini hiki ida avidabohani odabohana fori avihini — vaꞌora niꞌaha ada Paulo.
30 Hari.
Paulo khama vakadivarani aꞌdiahiꞌaha,
vigaamananiꞌaha adani arabo kakaꞌdaꞌdini Agripa,
oniki,
Festo,
Berenice,
vahoariha vajoroniki vakadiania,
avikhaonaniꞌaha.
31 Avikhaonanina naothinia vaabono vakaniꞌakhamaꞌaha:
—Ni-makhaniki ida Paulo kabadani.
Ni-jahaki ida abinina avahonariahivini.
Ni-jahaki ida kidibadani abosini gathana — vakhaniꞌaha.
32 Oniaroa,
Agripa biniꞌaha ada Festo:
—César kania okhana-ra kanikhariarara vaha;
ni-gathana hojajanaki vaha.
Bikanikhariavini mani ida bana Paulo-ra arakhaja César kania Roma sidajia.