22
—Kodijaꞌari,
oigamina avihiki aꞌoni.
Mitha vaniꞌa bana hida kodivarani mahija kodibadani-ra avarigavini.
Ni-bada oniꞌaki ida avaniꞌaꞌiki,
ni-vaꞌora ovikhajakosiꞌiki adani akadijaꞌari vihiriki Deu-ra khai aniꞌavini kagorani bodinia — vaꞌora niꞌaha ada Paulo.
2 Kidiarabo kaijaꞌarini athinia vara nina vakamithaꞌaha,
viso vakhanijahakiꞌaha.
Paulo vaꞌora vara niꞌaꞌianaha:
3 —Judeus kaijaꞌari ho.
Cilícia kaarabonia hojaki ida Tarso sidaji ovaꞌbanaki.
Hihida sidaji Jerusaléa oavijavaki ho.
Hora kaꞌojomoꞌiꞌiki Gamaliel.
Hora kaꞌojomoꞌijahakivini hiki ida Moisés kohana kavaꞌisohihi jiriki,
akadijaꞌari avikhananavaki vakadihojai hiki.
Deu-ra avanofijahakivini vani fori ohija onofijahakivini jaboni.
4 Mahi ꞌboꞌdakari vaꞌora onajaharihariꞌiki adani Jesus Cristo kaijaꞌari.
Makhira,
gamo vihiki-ra vaꞌora ogathiꞌiki ho,
vaꞌora ovahonariahiꞌiki adani vagathaꞌina,
cadeia kabodinia aviꞌoira kaimoni.
Vahoariha-ra vaꞌora ovahonariahiꞌiki ho vaabinira kaimoni jaboni.
5 Sasidotxi vakadikaꞌdaꞌdi,
akadijaꞌari vanavaꞌisohiva abono vihikia avigaki ida aꞌonira okorijanaharavini.
Avanofihi;
vaꞌoaniaro maina aꞌonira vanavaꞌisohivini hiki hida oathi.
Hora vanoꞌavini hiꞌiki ida vaathi kapapirani Damasco sidajia oavikhaki kaimoni,
akadijaꞌari hora vaakodiaja kaimoni.
Vakadipapira jiriki ogathaniꞌihi,
Damasco sidajia ookhaꞌihi,
vaꞌora ogathira kaimoni adani Jesus Cristo kaijaꞌari,
vaꞌora odabohavini vaꞌora onofiꞌaha,
vaꞌora ovikhara kaimoni hida sidajia dafi vihira kaimoni.
Pauloa bikamithaki ida Jesus athi
6 Hari.
Damascoa aokhahi.
Safini sohirarina vani sidaji-ra anamaakariꞌihi,
nama khaꞌihi ida safini vagana fori hiki oiꞌoaria vagajorakiꞌihi.
7 Oadarihi,
okamithaꞌihi ida hora vara niꞌaki athii:
“Saulo,
Saulo,
nahina mani ida hora inajahariharivini hija?”
8 Onanaꞌdohiha:
“Kaꞌdaꞌdi,
hana ihini
mani i?”
“Hovani mani Jesus ooniki ho,
hora inajahariharibakhiaꞌiki ho.”
Hora niꞌaha.
9 Hora vavaipohihakia vanokiꞌihi ida vagaki,
vaofiniꞌaha.
Ni-vakamithaꞌiki ida hora vara niꞌaꞌiki athii.
10 Onanaꞌdohiꞌianaha:
“Kodikaꞌdaꞌdi,
nahina ida inofija kodiania?”
Hora niꞌaꞌaha:
“Gaamananiꞌa,
Damasco sidajia okhaꞌa.
Ikaikahini vani hoariha ira honariavini hiki ida
bana badani Deua binofiki bada iniꞌaki kaimoni.”
Hora niꞌaha.
11 Ogaamananihi,
onokho-ra anamaraꞌihi ida vagani karaho,
hora kanamaodorohaꞌihi.
Hari.
Oipohina osaꞌa-ra vaagathiha,
hora avakakavanamaꞌaha,
Damasco sidajia hora avavikhaꞌaha.
12 Sidajia hojaha ada Ananias oniki.
Deu-ra nofijahakiki ada Ananias.
Deus kavaꞌisohihi jiriki-ra naababakhiaki ada.
Akadijaꞌari Damasco sidajia vahojakia vavajahaki ada Ananias,
kidibadani jahani vani vakahiha.
13 Hari.
Kodiania khaꞌaha,
oiꞌoaria hojaha,
hora niꞌaha:
“Oigamina Saulo,
inokhoni vagaꞌianava.”
“Mahi ꞌboꞌdakari Deus ira nagathogathoꞌiki i.
Ovani ada akadijaꞌari avikhananavakia khai
vaniꞌabakhiaꞌara.
Ira nagathogathoꞌiki ada,
iogaja kaimoni ida bada iniꞌavini binofiki.
Ira nagathogathovini hiki
inokira kaimoni ada Deus kahonai abono jahakaꞌoaki,
Cristo oniki,
ikamithaja kaimoni jaboni ida athi vara ira niꞌavini hiki.
15 Deua binofiki ida ijaꞌari hahavi-ra vaꞌora inanamithaꞌavini inokiꞌiki,
ikamithaꞌiki hikia.
16 Hariꞌa viahanokhajana.
Gaamananiꞌa,
Deu-ra kanikharia mahija
ira vakaꞌdaꞌdivini,
kadahojai asohiriki-ra naꞌbirara kaimoni,
oniani ida ira okanavini hija bana,
kidipohi ihija kaimoni.”
Hora niꞌaha ada Ananias.
17 Hari.
Oniaroa,
Jerusaléa ojoiꞌianahi.
Deu-ra khai aniꞌavini kagorani bodinia Deu-ra vara oniꞌavini kabaꞌi vadami fori hikia onokiꞌaha ada kodikaꞌdaꞌdi.
18 Hora niꞌaꞌaha:
“Jorakia bana ajihiꞌa
Jerusaléa.
Jerusalém sidaji kaijaꞌarinia vakajariꞌdaki bana ida omonina-ra vara
ivaniꞌavini.”
“Kodikaꞌdaꞌdi,
hivaꞌoani hora
avigajahakiki,
avigaki ida akadijaꞌari Deu-ra vara aniꞌavini
kagorania
ookhaoniꞌina vaꞌora oagathionivini adani ira
vakajariꞌdariki
cadeia aviꞌoina vaꞌora ovahonariahiꞌiki adani,
dafi vihina vaꞌora ovahonariahiꞌiki adani jaboni.
20 Ijaꞌaria vanaabiniꞌaha ada imonini-ra vara vaniꞌaki kohana,
Estêvão oniki.
Vahararana vania ohojaja,
ovajahaꞌiki ida vakadibadani,
vakadimakari oakadavaꞌaꞌavini.”
Oniꞌihi vadami fori hikia.
21 Kodikaꞌdaꞌdi hora niꞌaꞌianaha:
“Ajihiꞌa bana mahija napaja iokhavini.
Ira okaronaki bana i
judeus kaijaꞌari vihiriki
vakadiania.”
Hora niꞌaha ada Jesus.
Paulo-ra vidavini-ra vanofiꞌianaha, ni-vidaꞌiki
22 Hari.
Paulo athi-ra mitha vaniꞌajahakiha adani judeus kaijaꞌari.
Paulo judeus kaijaꞌari vihiriki vakadiania Deua bikaronavini bikahiꞌiki,
ni-mitha vaniꞌajanaki.
Kamaꞌdaꞌianahi ida vakadihamahi.
Vabodiꞌbarahaꞌianaha:
—Anaabiniva,
anaabiniva,
hokina jahajanariha ada.
23 Vabodiꞌbaraꞌaha,
nama vanaꞌdaraꞌdaraꞌihi ida vakadimakari,
vaihamahiꞌina.
Vaaniꞌihi ida khomakhomani,
nama avisonasahanaꞌihi.
24 Hari.
Sorara vakadikaꞌdaꞌdi vaꞌora honariaha adani sorara vahoariha:
—Avisajakosi o makhira agorana.
Vida mahija aꞌonira nanamithavini niha nina judeus kaijaꞌari-ra vaꞌora naihamahivini — vakadikaꞌdaꞌdi vaꞌora niꞌaha adani sorara.
25 Avavikhajakosiha,
Paulo saꞌa,
ꞌdama kihiki-ra vakodabohaꞌaha vidavini viahania.
Vidabohavini kabaꞌi Pauloa binanaꞌdohiha ada Roma sidaji kakaꞌdaꞌdini kasorarani.
Ovari vaꞌora honariafiahaki adani 100 vihiki vaipohina.
—Roma sidaji kaijaꞌarini-ra avidafiamaniki koda aꞌoni?
Roma sidaji kaijaꞌarini ho.
Avakadijaꞌari navaꞌisohiva abonoa ni-avigaꞌiaki ida kodibadani jahani jaharini.
Avigaravini kabaꞌi ni-jahaki ida oimana ꞌbanani-ra vavahonariahivini.
Nimania ida Roma sidaji kaijaꞌarini kidai hini jaharini — niha ada Paulo.
26 Sorara bikamithahi ida Paulo kavarani,
kidikaꞌdaꞌdi kania okhamiꞌaha,
biniꞌaꞌaha:
—Hariꞌa kaho bana vida o makhira.
Roma sidaji kaijaꞌarini o.
27 Oniaroa,
okhamiha ada sorara vakadikaꞌdaꞌdi Paulo-ra nanaꞌdohihaꞌavini:
—Hora nanamithaꞌa bana,
ivani Roma sidaji kaijaꞌarini mani i?
—Haꞌa,
kaꞌoa hiꞌoamanija ida iniꞌaki — niha ada Paulo.
28 Sorara vakadikaꞌdaꞌdia biniꞌaha:
—Hovani Roma sidaji kaijaꞌarini ho,
Roma sidajia oꞌbanarina kabaꞌi.
Onaabosiꞌiki ida jiniro ipohikia,
oniani ida Roma sidaji kaijaꞌarini hora nihaꞌia — niha ada sorara vakadikaꞌdaꞌdi.
Pauloa biniꞌaha:
—Hovani,
ni-onaabosiki.
Hovani Tarso sidajia oꞌbanaki ho,
kabaꞌi Roma sidaji kaijaꞌarini ohiꞌina.
Kodiabiꞌi Roma sidaji kaijaꞌarini hina mani ida Roma sidaji kaijaꞌarini hora nihaja — niha ada Paulo.
29 Oniaroa,
avikhaonaniha adani Paulo kabadani-ra vananaꞌdohivini-ra vanofiki.
Ni-Paulo-ra vidaꞌiki.
Paulo Roma sidaji kaijaꞌarini hina-ra kahivinia binaofiniꞌaha ada sorara vakadikaꞌdaꞌdi.
Paulo dabohana-ra vahonariahivini mani ida naofinina hija.
30 Sorara vakadikaꞌdaꞌdia binofiki biogajahakivini ida judeus kaijaꞌari Paulo-ra avanaathidanoararivini hiki.
Afokajoma vani sorara-ra honariaha:
—Vakokhariꞌa o Paulo.
Vaꞌora bana vanavaꞌisohiha adani judeus kaijaꞌari vanasohiva abono vavakaꞌdaꞌdiva,
sasidotxi vavakaꞌdaꞌdiva khama vajoronina,
Paulo kavarani-ra vanasohira kaimoni — niha ada sorara vakadikaꞌdaꞌdi.
Vajoronina naothinia biavikhamiꞌaha ada Paulo,
vaviaha bihonariaꞌaha ada Paulo gaana.