Akakafianiꞌihi Cós kajoviri kakaarabonia aakakhanoꞌihi.

Kaꞌafokajomani kajoviri kahoariha Rodes kaonikia akoꞌomisiꞌihi.

Akaꞌajihiꞌianahi,

Pátara sidaji adamininia aakakhanoꞌihi,

akoꞌomisiꞌihi,

agaimorahaꞌihi.

2 Aakaragaꞌihi ida kanava kakaraho kahoariha Fenícia kaarabonia aakhaki.

Oniania akiꞌdamaꞌianahi,

akaꞌajihiꞌianahi.

3 Aakakhaꞌianahi,

akaadahahi,

apitana kajasonija napaja aakanokiꞌihi ida Chipre kajoviri,

aakakhaꞌihi akaradaꞌihi ida kajoviri,

Síria kaaraboni-ra akanikhahavini.

Aakakhanoꞌihi,

Tiro sidaji adamininia akoꞌomisiꞌihi,

agaimoriꞌihi.

Kanava kakaraho kadaini-ra vakaibaꞌimorahanaꞌiki adani honai abono.

4 Agaimoriꞌihi,

vaꞌora anakoꞌdihaꞌaha adani Cristo kaijaꞌari Tiro sidajia vahojaki.

Vaꞌora akaragaꞌaha,

semana hoarani vakadiania arihojaꞌihi.

Maꞌonahai Jahaki vaꞌora navaꞌisohiha,

Paulo-ra vakaabanira kaimoni Jerusaléa okhajanarara kaimoni.

5 Radahaꞌihi ida semana hoarani vakadiania arihojana,

ai arihiꞌianahi.

Sidajia ai arihina akharafonina haria vavaipohifoniꞌaha adani Cristo kaijaꞌari afohahavi,

makhira,

vakadigamo,

vakadisai vihiki.

Kaasia akajoꞌathararihahaviꞌihi,

Deu-ra vara aniꞌavini.

6 Oniaroa,

ariabono aakaaminakhamaꞌihi,

akiꞌdamaꞌihi,

akaꞌajihiꞌianahi.

Vaꞌoaniaro vagorana avajoimoriꞌianaha.

7 Hari.

Oniaroa,

Tiro sidajia akaꞌajihiꞌihi.

Aakakhaꞌianahi,

Tolimaida sidajia akakhanoꞌihi.

Aogaimoriꞌihi vaꞌora akaꞌivanitiha adani arigamina Jesus kaniaja.

Mahi hoarani vani arihojaꞌihi vakadiania.

8 Kaꞌafokajomani akaꞌajihiꞌianahi,

Cesaréia sidajia akakhaꞌihi.

Aogaimorihi,

Filipe gorana aokhaꞌihi,

kidiania arihojaꞌihi.

Jesus varani hina-ra vara vaniꞌabakhiaki ada Filipe.

Mahi ꞌboꞌdakari Jerusaléa vahojaꞌiki adani Jesus vaipohihava abono,

vaꞌora vanagathogathoꞌiki adani 7 vihiki vaipohina kakodiahi abono kaimoni,

vanagathogathoꞌiki ada Filipe kakodiahi abono hira kaimoni.

9 Filipe gorana vahojaki kidisai avakoꞌbamahakhamaki.

Imaꞌinavi adani Filipe kaisai.

Deus athi namoniva abono adani imaꞌinavi.

Filipe vakadiania arihojahi.

10 Mahi ꞌbamiki arihojana vani kaikahiꞌaha ada Ágabo.

Judéia kaarabonia khaki ada.

Deus athi namoniva abono jaboni ada Ágabo.

11 Akadiania khaꞌaha,

maakariꞌaha,

bikokhariꞌihi ida makari pitani ahoki Paulo jararia hojaki.

Bikokharihi,

abono-ra daboꞌaha saꞌa,

ꞌdama kihiki-ra kodaboꞌaha.

Ágaboa biniꞌaꞌaha ada Paulo:

—Maꞌonahai Jahaki ira navaꞌisohiki bana i:

12 Akamithahi ida Ágabo kavarani,

akaabaniꞌaha ada Paulo:

—Hariꞌa Jerusaléa okhajana — aniꞌaha afobakhia.

Cristo kaijaꞌari vahoariha vakaabaniꞌaha jaboni okhajanarara kaimoni.

13 Pauloa bigathaniꞌihi ida ariathi:

—Niha avakhanimanija avaasaraki?

Ovaꞌi-ra mokara niꞌaki avakadiasara.

Jerusaléa hora vidabohakaꞌoavini-ra vanofiha;

hora vidabohaha.

Hora vanaabinivini-ra vanofikaꞌoaha;

ba hora vanaabinikaꞌoava.

Jesus kaijaꞌari ohina mani hida hora vanaabinivini-ra ovaꞌahavini hija — niha ada Paulo.

14 Ni-Pauloa bikamithavini binofiki ida akadikaabanahi,

oniani ida viso haria niꞌaꞌia.

Aniꞌaha:

—Jakaho Deua bada biniꞌava ida binofiki.

15 Mahi ꞌbamiki asia mani arihojaꞌihi Cesaréia sidajia.

Oniaroa,

aibavijahahaꞌianahi,

Jerusaléa aokhaꞌihi.

16 Haria vavaipohihaꞌaha adani Jesus vaipohihava abono Cesaréia sidajia vahojaki.

Aokhajabanaꞌihi Jerusaléa.

Akaikahiꞌihi,

haria avisaha Menasom gorana.

Menasoa bivaꞌbanaki kaibavini kakajovirini kaonini Chipre.

Badara ipohiki Jesus vaipohihava abono hiꞌiki ada Menasom.

Kidiani vania arihojaꞌihi.

17 Hari.

Oniaroa,

Jerusaléa akaikahina,

haria vagathanijahakiꞌaha adani arigamina Jesus kaniaja.

Khai vaꞌora niꞌaꞌiki akaikahiꞌina.

18 Kaꞌafokajomani Tiago-ra anavanavanahahi Paulo khama,

ariabono vara akaniꞌakhamaꞌihi.

Jesus Cristo kaijaꞌari vanavaꞌisohiva abono vahojahahaviꞌiki.

19 Paulo vaꞌora kaꞌivanitiꞌaha.

Vaꞌora nanamithavini hiꞌihi ida Deus kabadani Pauloa bada biniꞌaꞌiki niha ninini Deus vaꞌora kajoamorabakhiavini adani judeus kaijaꞌari vihiriki.

20 Vakamithahi ida Paulo kavarani,

Deus jahana-ra khai vaniꞌaꞌaha.

Paulo-ra vaniꞌaha:

—Arigamina,

iogaki ida judeus kaijaꞌari vâipohiki vaabono gahinai vanihavini Jesus kania.

Vaꞌoaniaro hahavia vanaababakhiaki ida Deus kavaꞌisohihi jiriki.

21 Vakamithahi ida ijaꞌari ira vakanavaranihavini.

Kaꞌoa hirihi ida vakadivarani.

Vakhaniha:

22 Hari.

Ikaikahini vani hida Jerusaléa avigaꞌihi.

Anofiki ida ira vanokivini akadijaꞌari kahojai-ra bada iniꞌavini,

avigaja kaimoni korijanahi hini ida ira vakanavaranihavini — Paulo-ra vaniꞌaha adani Jesus Cristo kaijaꞌari vanavaꞌisohiva abono.

23 Asia vara vakhaniha:

—Paulo,

ira anavaꞌisohiki bana hari avigaja kaimoni ida asia akadijaꞌari kahojai-ra inofivini.

Vahojaki hadani Jesus vaipohihava abono avakoꞌbamahakhamaki.

Judeus kaijaꞌari adani.

Masiko hoariha radahaki kamaꞌdaꞌiki ida vakadihojai,

bada vaniꞌaki kaimoni Deu-ra vanavaꞌiponijoravini hiꞌiki badani.

Hari hini amaakarini ida vakadibadani.

24 Afokajoma vaꞌora vaipohiha bana hadani makhira avakoꞌbamahakhamaki Deu-ra khai aniꞌavini kagorania avikhana.

Vaabono visokovinia vakavarajomiki ida vakadibadani anokhomiꞌini Deu-ra vaniꞌavini hiꞌiki.

Akadijaꞌari kahojai hiki ida vakadibadani.

Ivani jaboni bana iabono sokojabana vakadiania.

Avaabononi avanajahavini naothinia hoariha bikavaꞌboaki bana ida vakaꞌdaꞌdi kaafani.

Rajomi kihiki jaboni ida kaꞌdaꞌdi kaafani kaꞌboani,

Deu-ra vaniꞌavini hiki aꞌdiahiꞌini.

Ivani bana ikanaabosi ida vakaꞌdaꞌdi kaafani kaꞌboani jiniroa vakadimoni.

Hari.

Oniaroa,

vahoariha Deu-ra khai aniꞌavini kagorani bodinia vahojakia vanokiki bana ida bada iniꞌavini.

Akadijaꞌari kahojai-ra bada iniꞌavini-ra vanokivini,

oniani ida korijanahi kaꞌoa ira vakanavaranihavini-ra avigavini hija.

Avigaki jaboni ida Deus kavaꞌisohihi jiriki-ra inaababakhiavini.

25 Hoariha paꞌitxiki ida akadivarani akadijaꞌari vihiriki-ra anavaꞌisohivini hiꞌiki hiꞌadani Jesus athi-ra vakajariꞌdariki.

Ariathi kapapirania vaꞌora anavaꞌisohiꞌboꞌdaꞌiki adani:

26 Oniaroa,

kaꞌafokajomani Paulo vaꞌora avikhaha adani judeus kaijaꞌari avakoꞌbamahakhamaki,

vaabono visokovini kaimoni vakadihojai hikia.

Vaabono vanajahavini naothinia Deu-ra khai vaniꞌavini kagorani kavasiribanini bodinia okhajakosiha ada Paulo,

sasidotxi-ra navaꞌisohivini hiki mahi vakadihojai kabadanihi bivaaꞌdiahiꞌiki kamahini.

7 mahi ipohini radahaꞌini Deu-ra vakanavaꞌigananavini hiꞌihi ida igitha abononi ahaꞌdiki.

27 Hari.

7 mahi radahani vakadihojai aꞌdiahini amaakariꞌini Deu-ra khai vaniꞌavini kagorani kavasiribanini bodinia vahojaha adani Paulo.

Vahojaꞌaha adani judeus kaijaꞌari vahoariha.

Ásia kaarabonia vikhaꞌiki adani.

Deu-ra khai vaniꞌavini kagorani kavasiribanini bodinia vanokiꞌaha ada Paulo.

Paulo-ra vakaihamahiꞌboꞌdaꞌiki adani.

Vahoariha-ra vanaihamahivini hiki Paulo-ra vakanavaranihavini.

Paulo-ra vagathiꞌaha.

28 Vabodiꞌbarahana vaꞌora vaniꞌaha adani judeus kaijaꞌari vahoariha Deu-ra khai vaniꞌavini kagorani kavasiribanini bodinia:

—Akadijaꞌari,

haria vaakodia bana.

Hihada makhira agathiꞌiki aadahaoniꞌiki hada,

ijaꞌari arabo hoariha hojaki-ra vaꞌora kaꞌojomoꞌihahaviꞌiki hada vaꞌora vanakaidivajanarara kaimoni adani akadijaꞌari.

Vaꞌora kaꞌojomoꞌiꞌiki hada vanaabajanaria kaimoni ida Deus kavaꞌisohihi jiriki.

Paulo vaꞌora kaꞌojomoꞌiki jaboni adani ijaꞌari vaibavi ipohikia vahojaki vaꞌora vanakaidivajanaria kaimoni hida hihida gora.

Hari.

Deu-ra khai aniꞌavini kagorani kavasiribanini bodinia vaꞌora vikhajakosiꞌaha adani akadijaꞌari vihiriki.

Akadikaaji hiki ida akadijaꞌari vihiriki hihida gora aviꞌoina.

Akadikaaji-ra kajonivini mani ida akadijaꞌari vihiriki-ra vaꞌora aviꞌoivini hija,

oniani ida Deu-ra khai aniꞌavini kagorani-ra najaharivini hija — Ásia kaarabonia vikhaꞌiki vaꞌora vaniꞌaha adani judeus kaijaꞌari vahoariha vaꞌora vakorijanahavini.

29 Paulo-ra vagathivini viahania vaꞌora vanokiꞌaha adani Paulo,

Trófimo khama vaadahajabanana Jerusalém kahagihinia.

Judeus kaijaꞌari hiriki ada Trófimo.

Éfeso sidaji kaijaꞌarini ada.

Deu-ra khai vaniꞌavini kagorani bodinia Pauloa biavikhajakosiki vavanihavini mani ida vaꞌora naihamahija.

30 Okhaꞌokhaoniꞌihi ida Paulo-ra vakanavaranihavini,

oniani ida Jerusalém sidaji kaijaꞌarini Paulo-ra vakaihamahivini hija.

Vakiꞌdarahajakosina vajoroniꞌaha,

Paulo-ra vagathiha,

gora bodinia avarahokaonaniꞌaha.

Paulo naothia vaakaꞌoahaꞌihi ida Deu-ra khai vaniꞌavini kagorani kaathani.

31 Paulo-ra vanaabinivini-ra vanofiꞌaha adani vaihamahiki.

Hari.

Sorara vakadikaꞌdaꞌdia bikamithaꞌihi ida moni:

—Vaihamahimaniꞌaha adani sidaji kaijaꞌarini.

Ni-aogaki ida vidavini vanofivini — moni-ra vikhakia biniꞌaꞌaha ada sorara vakadikaꞌdaꞌdi.

32 Jorakia sorara vakadikaꞌdaꞌdi vaꞌora baranahaha adani sorara vaipohiki,

vakadikaꞌdaꞌdi vahoariha viꞌbamiki kidiania avikhara kaimoni.

Vakiꞌdarahahaꞌaha ijaꞌari vaipohiki vajoroniki vakadiania.

Sorara-ra vaꞌora vanokiha adani ijaꞌari vaihamahiki,

ni-Paulo-ra vidafiahajanaki.

33 Sorara vakadikaꞌdaꞌdia binamaakariha ada Paulo,

vaꞌora honariaha adani sorara:

—Vagathi o makhira.

Saꞌa vakodaboha corrente koꞌbamikia — vaꞌora niꞌaha.

Vaꞌora nanaꞌdohiꞌaha adani vahararana vahojaki:

—Hana hina makhira mani o?

Nahina mani ida kidibadani hini aꞌonira naihamahija?

34 Naꞌdohi-ra vagathaniꞌaha vabodiꞌbarahana Paulo-ra avanaathidanoarariꞌaha.

Vahoariha vakadibodiꞌbarahi athini hoarihaki,

vahoariha vakadibodiꞌbarahi athini hoarihaki jaboni.

Karahoꞌoamanija ida vakadihamahi.

Sorara vakadikaꞌdaꞌdia mitha biniꞌahi ida vakadibodiꞌbarahi,

ni-biogaki ida namithaꞌiki.

Oniaroa,

vaꞌora honariaha adani sorara:

—Hihada makhira-ra avisajakosi sorara vagorana karaho katokini odoki bodinia.

35 Hari.

Sorara vavaꞌajihiꞌaha ada Paulo.

Vagorana kakaraꞌinani kania avakhanoꞌaha,

ni-nihanikia Paulo-ra vavaadahajanaki,

ijaꞌari vaihamahiki vaꞌora vakanajajoriꞌaha.

Nihanikia Paulo adahajanarina mani ida sorara vaꞌdaꞌdi aꞌania vavaadahavini hija.

36 Sorara vanaothia vikhaki adani vaihamahiki vabodiꞌbarahaꞌoadahaki:

—Jakaho anaabiniꞌava kaho,

jakaho anaabiniꞌava kaho — vakhaniha.

37 Hari.

Oniaroa,

sorara vagorana banininija avavakhanoꞌaha,

avavikhajakosivini viahania Pauloa biniꞌaha ada sorara vakadikaꞌdaꞌdi:

—Vara ira oniꞌavini-ra inofiria koda?

—Iogamania ida grego athini?

38 Egito kaarabonia khaꞌiki ada makhira vakaabiniki vaipohiki-ra vaꞌora vakaꞌdaꞌdiꞌiki.

Ovari vaꞌora avikhaꞌiki adani 4 mil vihiki vaipohina vakasaꞌaiki arabo kagorariki kania.

Vanofiki vaꞌora vidavini adani akadisorara.

Vakaabiniki vakadikaꞌdaꞌdi mani i?

39 —Iniani,

ovari ohirihi.

Hovani judeus kaijaꞌari ho.

Ovaꞌbanaki ibavini Tarso sidaji.

Cilícia kaarabonia hojaki ida sidaji karaho Tarso oniki.

Khai vaꞌora iniꞌamanira koda hadani vara vaꞌora oniꞌavini?

40 —Ba vaꞌora vara niꞌa — Paulo-ra niꞌaꞌaha.

Oniaroa,

karaꞌina kania gaana hojaha ada Paulo,

vaꞌora kaabaniꞌaha saꞌa mitha vakhanira kaimoni.

Viso vakhaniꞌaha,

hebreu athinia Paulo vaꞌora vara niꞌaꞌaha.

Judeus kaijaꞌari vaathi kaꞌoa ida hebreu athini.

Paulo athi hiki jaboni ida.