Macedônia, Acaia hiki kaaraboni-ra anikhahaki ada Paulo
20
Hari.
Radahaꞌihi ida Éfeso sidaji kaijaꞌarini vakadihamahi,
Paulo vaꞌora kaboaꞌiha adani Jesus vaipohihava abono vajoronina.
Vaꞌora niꞌaha;
—Hari ai bana ho.
Jesu-ra vanofijahakihaꞌoadaha bana mahija aꞌonira kajoamorabakhiavini — niha ada Paulo.
Vaꞌora kaaminavini naothinia ajihiꞌaha.
Macedônia kaarabonia adahaꞌianaha.
2 Okharimananina vaꞌora akaragaoniꞌaha adani Cristo kaijaꞌari.
Vaꞌora anavaꞌisohioniꞌaha Jesu-ra vanofijahakivinia,
vaꞌora kaꞌojomoꞌivini hiki jaboni ida Jesua binofiki vakadiania.
Oniaroa,
kaikahiꞌaha ada Paulo Acaia kaarabonia.
3 Masiko ahoarabakosiki hojaꞌaha.
Ibavijahahaꞌianaha,
Síria kaarabonia okhara kaimoni.
Ajihina viahania bikamithahi ida varani judeus kaijaꞌari vanaabinivini vanofivini.
Varani-ra kamithaha,
ni-okhajanaki.
Macedônia kaaraboni vania ajoiꞌaha.
4 Trôade sidajia avikhananavaki adani Paulo vahoariha khama.
7 vihiki Jesus athi-ra vanaabaꞌikia vavaipohihaꞌaha ada Paulo.
Okhaki kidiania ada Sópatro.
Sópatroa bivaꞌbanaki sidaji onini Beréia.
Kidiabiꞌi onina Pirro.
Avikhaki jaboni adani Aristarco,
Segundo vihiki.
Tessalônica sidaji kaijaꞌarini mani adani.
Okhaki jaboni ada Derbe sidaji kaijaꞌarini Gaio oniki.
Okhaki ada Timóteo.
Avikhaki jaboni adani Ásia kaaraboni kaijaꞌarini viꞌbamiki Tíquico,
Trófimo vaoniki.
5 Hari.
Paulo okhananavaki hiꞌadani 7 vihiki vakadiania.
Hovani Lucas,
vahoariha khama aokasiagaki hari.
Trôade sidajia akaikahina-ra vanokhaki adani Paulo.
6 Filipos sidajia arihojana oadani judeus kaijaꞌaria vanamonahaꞌihi ida vakadihinika.
Ihinika amonahani oadani vani ijaꞌaria bikahaja ida pão kathoramananiriki.
Ihinika naothinia akaꞌajihiꞌihi Filipos sidajia.
Kanava kakarahoa akiꞌdamaꞌihi vahoariha khama.
Mahi saꞌai kahoarani hiki ipohini akaadahaꞌihi.
Trôade sidajia aakaikahiꞌihi,
vaꞌora akaragaꞌaha adani 7 vihiki vaipohina haria vanokhaki.
Semana hoarani arihojaꞌihi vakadiania.
Trôade sidajia hojaki ada Paulo
7 Hari.
Sábado,
mithani vani ajoroniꞌihi Jesus vaipohihava abono vakadiania,
aꞌbaijabanaja kaimoni.
Paulo haria vara niꞌaꞌihi athi ôadakia.
Joma ꞌboꞌdahini asia mani vara niha.
Binofiki ida aꞌajihikajomana,
oniani ida vara niꞌahahaꞌoadahana hija.
8 Gora kaꞌobani kakanamajakhamaki kania ajoroniꞌiki hari.
Joma hojaki ida lamparina haꞌdini ipohiki.
9 Gora kaathani kania hojaꞌaha ada imakhinava Êutico oniki.
Paulo vara nina kabaꞌi,
nokoꞌisihaꞌaha ada Êutico.
Nokoꞌisihaha,
vadiꞌaha,
voroniꞌaha.
Gora kaꞌobani kakanamajakhamaki kakanamajakhamaꞌianania voroniꞌaha.
Avanigarahanaꞌaha ada imakhinava voroniꞌiki.
Abiniꞌina vani vakaragaꞌaha.
10 Hari.
Ogarisiagaꞌaha ada Paulo.
Kajoꞌatharariha imakhinava abaꞌona ꞌdihania.
Bikajaraꞌbaꞌbaꞌaha,
vaꞌora niꞌaha:
—Hariꞌa vaofini,
abinijanariha ada.
Ahokiꞌiki hada.
11 Oniaroa,
aokasiꞌianahi,
Pauloa bikanapitahatahaꞌihi ida pão,
akavaꞌihokija kaimoni ida Jesus abiniꞌina akadimoni hina.
Aꞌbaina naothinia vara haria niꞌaꞌianaha.
Safini anadaramananikajomana vani ajihiꞌaha ada Paulo.
12 Vahoariha vavaipohihaha ada imakhinava,
gorana avavikhaꞌaha.
Imakhinava ahokiꞌina mani ida vaꞌora khai niꞌaꞌia.
Sidaji Mileto onikia okhaꞌaha ada Paulo
13 Hari.
Oniaroa,
Paulo haria niꞌaꞌihi:
—Avakakhananava bana mahija hora avanokhavini Assôs sidajia.
Arabo vania ookhaja bana — niha ada Paulo.
Kanava kakarahoa akiꞌdamaꞌihi,
Assôs sidajia akakhaꞌihi.
14 Assôs sidajia akakhanohi,
haria karagaꞌaha ada Paulo.
Kiꞌdamaha akadiania,
akakhaꞌianahi,
Mitilene sidajia akakhanoꞌihi.
15 Akaꞌajihiꞌianahi,
kaꞌafokajomani Quios kajoviri kaoniki kakaaraboni maakarinia akaradahaꞌihi.
Mahi hoariha Samos sidaji adamininia akakhanoꞌihi.
Akaꞌajihiꞌianahi,
mahi hoariha Mileto sidaji adamininia akoꞌomisiꞌihi,
agaimorahaꞌihi.
16 Pauloa ni-binofiki ida Éfeso sidajia okhaꞌianana.
Ni-mahi ipohiki Ásia kaarabonia hojana-ra nofiki.
Paulo-ra najorajoraki Jerusalém sidajia okhaꞌianana-ra nofivini.
Binofiki ida Pentecostes kaihinikani kamahini viahani kaikahina Jerusaléa.
Paulo vara niꞌianaki
17 Hari.
Mileto sidajia hojaha ada Paulo,
bikaronaꞌihi ida athi,
Éfeso sidaji vahojaki-ra vaꞌora kaboaꞌiha ada Paulo,
Jesus Cristo kaijaꞌari vanavaꞌisohiva abono kidiania vikhara kaimoni.
Kanapajahikhamariki ida Mileto sidaji,
Éfeso sidajia.
18 Vakaikahiha adani Éfeso sidaji kaijaꞌarini,
Paulo vaꞌora niꞌaꞌaha:
—Oigamina,
avarigaki ida kodihojai,
kodibadani hiki avakadiania ohojana kari.
Ásia kaarabonia okaikahibiininina kodihojai-ra vada avaniꞌabakhiaꞌiki aꞌoni.
19 Jesus kahonai abono ohina mani ida kidibadani bada oniꞌavini hija.
Avakadiania ohojana oadani ijaꞌari nahina hipaꞌitxiriki ohiki ho.
Éfeso kaijaꞌarini Jesu-ra vanofiravini mani ida vaꞌora okaasaravini hija.
Judeus kaijaꞌaria vanofibakhiaki ida hora vanaabinivini,
oniani hida ovaꞌi-ra anarogonija.
20 Aꞌonira onavaꞌisohihahavivini hiꞌiki ida Jesus monina.
Onanamithahahaviꞌiki ida aꞌonira oakodiavini kaimoni.
Deu-ra vara avaniꞌavini kagorani vania aꞌonira onavaꞌisohibakhiavini hiki ida Jesus varani hina.
Avagorania jaboni ookhaonina aꞌonira oakaꞌojomoꞌioniꞌihi.
21 Asia mani Paulo vara vaꞌora niꞌaha adani Jesus Cristo kaijaꞌari vanavaꞌisohiva abono:
—Hari.
Vaꞌora okaabanibakhiaꞌaha adani judeus kaijaꞌari.
Vaꞌora okaabaniꞌaha adani jaboni judeus kaijaꞌari vihiriki.
Kodivarani hiki ida:
Vakavaꞌipahinikaꞌoa ida hojai asohiriki bada avaniꞌabakhiaki mahija Deus athi-ra avanaabavini.
Hariꞌa vakajariꞌda ida Jesus varani hina.
Jesus kania avaabononi gahinai vanihaꞌa mahija avakadikaꞌdaꞌdi hivini.
Vaꞌora oniꞌabakhiaha.
22 Hari.
Jerusalém sidajia bana ookhaki ho.
Maꞌonahai Jahaki ovaꞌi-ra nahonariahihivini mani ida hora arakhaꞌia bana.
Ni-oogarihi kaho ida okaikahina opohimajana bana.
23 Sidaji hahavi oadahaꞌina Maꞌonahai Jahaki hora navaꞌisohibakhiavini hiꞌiki ida Jerusalém okaikahina opohimajana bana.
Hora niꞌaha:
“Ijaꞌari ira avibaiki
bana i cadeia.
Ira vanajaharihariki
bana adani.”
Hora niꞌaha ada Maꞌonahai Jahaki.
24 Ni-onakaidivaki ida kodimahi.
Oabinihi;
oabinihi.
Ohokihi;
ohokina ohojahi.
Nimania ida ohojana.
Onofiki onaaꞌdiahivini ida badani kodikaꞌdaꞌdi Jesus hora honariavini hiꞌiki.
Hora honariavini hiki ijaꞌari-ra vaꞌora onavaꞌisohivini,
Deua bikajoamoravini binofivini ida athi naabani hiki.
25 Avakadiania ohojana kari aꞌonira onavaꞌisohivini hiꞌiki ida Deus ijaꞌari hahavi-ra vakaꞌdaꞌdivini bana.
Oogaki ida hora avanokijanaravini bana.
26 Kaꞌoa hiki hida varani aꞌonira vara oniꞌavini hiki bana.
Aꞌonira okaabanibakhiavini hiki Deus athi-ra avakajoniria kaimoni.
Deus athi-ra kajoniki ijaꞌari akamadaki.
Ni-Deus kania okhaki.
Avarakamadahi;
hariꞌa Paulo aꞌonira kaabaniravini-ra vakahi.
27 Ni-okajoniki ida Deus athi hahavi aꞌonira onanamithavini hiꞌiki.
28 Avaabononi avakadavaꞌa bana.
Jesus Cristo kaijaꞌari-ra vaꞌora avakadavaꞌa bana jaboni.
Maꞌonahai Jahaki aꞌonira honariavini vaꞌora avarakadavaꞌavini afohaꞌoadaha.
Ovilia akadavaꞌava abono ovilia-ra avakadavaꞌavini vani fori vihiꞌa bana mahija vaꞌora avarakadavaꞌavini adani Jesus Cristo kaijaꞌari.
Deus kaisai abiniꞌiki vakadimoni,
oniani ida Deus vaꞌora gathanivini hija kidijaꞌari kaimoni vihina.
29 Vaꞌora oogaki adani ai ohina naothinia avakadiania vikhana bana vahoariha.
Avahararania vahojana aꞌonira vakorijanahaki bana adani,
avakavaꞌipahinija kaimoni ida Jesus athi-ra avanaabavini.
Ni-aꞌonira vanakaidivaki bana.
Jomahi ovilia-ra arivini vani fori vihira adani aꞌonira vakorijanahaki.
Aꞌonira onavaꞌisohijoravini hiki ida bana namithaki avakadiania.
30 Hidakabaꞌi vahojaki adani Jesu-ra vanofijahakiriki avakadiania.
Vaꞌora vakorijanahaki bana adani Jesus kaijaꞌari,
Jesu-ra vakavaꞌipahinira kaimoni.
Jesu-ra vanofijahakiriki vaꞌora vanofiki adani Jesus vaipohihava abono vaipohihana vihira kaimoni.
31 Vaꞌora akavaꞌigairi bana adani korijanahi abono.
Hariꞌa avakavaꞌiꞌbirini ida badara ahoarabakosiki ohojaꞌina avakadiania.
Mahi,
joma hikia aꞌonira okaꞌojomoꞌivini afohanana,
aꞌonira okaabanivini,
aꞌonira okaasaravini jaboni.
32 Hari.
Oigamina,
hidakabaꞌi Deus saꞌa kabodinia aꞌonira oarakhaki ho,
aꞌonira akadavaꞌara kaimoni.
Onofiki ida Deus aꞌonira kajoamoravini kavaranihi-ra avarigavini.
Deus athi aꞌonira kakodiavini hiki ida Jesu-ra avavakaijokavini avijavani.
Deua binaibavijahaki ida nahina jahaki kidijaꞌari vihidoroki hahavi vakadimoni.
Avakadimoni jaboni bana ida binaibavijahaki.
33 Avakadiania ohojana kari ni-oakabairihi ida avakadinahina,
avakadijiniro hiki.
Ni-avakadimakari-ra onofiki.
34 Avakadiania ohojana kari bada oniꞌabakhiaꞌiki ida badani oipohina-ra vaꞌora okaijahitavini,
oabono okaijahitaꞌavini jaboni.
Avarigaki ida akadinahina hahavi-ra okapavakaribakhiaꞌavini.
35 Kodibadani karahoa aꞌonira onanokiahivini hiꞌiki vahoariha-ra vaꞌora okaijahitavini.
Nini vani jaboni bana vaꞌora vakaijahita adani vakavamoniki.
Vakavaꞌihoki bana ida akadikaꞌdaꞌdi Jesus kavarani:
“Ijaꞌari gahinani mani ida
khai niꞌapaꞌitxini hija.
Ijaꞌari kagahinaini mani ida
khai niꞌakarahoni hija.”
— Nimania ida Jesus kavarani Paulo vaꞌora vara niꞌavini hiki.
36 Anokhomiꞌihi ida kidivarani,
vakajoꞌatharariꞌaha adani Paulo,
Jesus Cristo kaijaꞌari vanavaꞌisohiva abono khama,
Deu-ra vara vaniꞌaꞌaha.