—Jesus kania avaabononi gahinai avanihavini vani Maꞌonahai Jahaki-ra avagathanimanija?

—Iniani.

Ni-akamithaꞌiaki ida Maꞌonahai Jahaki varani hina.

Ni-aogaꞌiaki kaho ada Maꞌonahai Jahaki hojaki — Paulo athi-ra vagathaniꞌaha.

3 Paulo vaꞌora nanaꞌdohiꞌaha:

—Niha avakhanimaniꞌia avikanaꞌiki?

—João Batista kohana kavarani-ra akamithavini mani ida haria nikanaꞌia — Paulo athi-ra vagathanivini vakhaniha.

4 Paulo vaꞌora niꞌaha:

—João Batista kohana vaꞌora kanaꞌiki adani vakadihojai asohiriki-ra vakavaꞌipahiniꞌiki.

João Batista vaꞌora navaꞌisohibakhiaki adani ijaꞌari:

5 Paulo athi-ra vakamithaha,

vaꞌora kanahahaviꞌianaha.

Paulo vaꞌora kanavini kabaꞌi,

Jesu-ra vanofijahakiki vakadikaꞌdaꞌdi hina-ra vakahiꞌaha.

6 Vikanana naothinia Paulo vaꞌora kaabadaha vaꞌdaꞌdi aꞌania,

Maꞌonahai Jahaki vaꞌora aviꞌonanihahaviꞌaha.

Maꞌonahai Jahaki vavaꞌi binahonariahihiꞌaha,

kamaꞌdaꞌihi ida athi hoariha oogavahariki-ra vidionivini afohahavi.

Vara vavaniꞌaꞌiki jaboni ida varani Deus vaꞌora navaꞌisohivini hiꞌiki.

7 Makhira 12 vihiki vaipohina Maꞌonahai Jahaki vaꞌora aviꞌonaniꞌiki.

8 Masiko ahoarabakosikia judeus kaijaꞌari Deu-ra vara vaniꞌavini kagorania okhabakhiaha ada Paulo.

Ni-vaꞌora finiki adani ijaꞌari vajoroniki,

vaꞌora navaꞌisohimaniꞌaha Deus kaꞌdaꞌdi hina kavaranihia.

Vaabono vara vakaniꞌakhamaꞌaha afobakhia.

Pauloa binofiki ida Deus monina-ra vakajariꞌdajanaravini.

Vahoariha ni-vakajariꞌdaki.

9 Vahoariha vani adani vajariꞌdaha.

Ni-vanofipaꞌitxiki ida Jesus monina varani hini.

Vaihamahiꞌina vahoariha vaviaha Jesus monina-ra vakanavaranihaꞌaha.

Oniaroa,

ajihiꞌaha ada Paulo,

vaꞌora avikhaha adani Jesus vaipohihava abono.

Tirano kaꞌojomoꞌihi ibavinia avikhaꞌaha.

Mahi hahavi okhaha ada Paulo vaabono vara vakaniꞌakhamaꞌaha.

10 Badara ꞌbamiki Paulo ijaꞌari-ra navaꞌisohivini hiki ida Jesus varani hina afohaꞌoadaha.

Judeus kaijaꞌari hahavi Ásia kaarabonia vahojakia vakamithaki ida Jesus monina.

Judeus kaijaꞌari vihirikia jaboni vakamithaki ida.

11 Hari.

Oniaroa,

Deua bikajoamoraha ada Paulo bada biniꞌaja kaimoni ida Deus kabadani danoki ipohiki.

Ijaꞌaria binokibiininiki ida badani danoki arafiakaꞌoaki Pauloa bada biniꞌaꞌiki.

12 Pauloa bivahojaki ida makari pitahani ipohiki.

Makari kaꞌdaꞌdi kodabohani kaimoni radaharia kaimoni ida anokhoi.

Makari hoariha jararia avithinahaki bikaimahaki hoarahanana.

Ijaꞌari hoariha biavikhaꞌihi ida Paulo kamakari pitani hoarahanana ijaꞌari kavamonikia bikaabadaja kaimoni.

Bikaabadahi;

aihotahi.

Kabajadikia jaboni bikaabadahi ida Paulo kamakari hoarani pitani,

ajihiꞌihi ida bajadi,

jahaꞌihi ida ijaꞌari.

13-14 Hari.

Oniaroa,

vahojamaniha adani jaboni judeus kaijaꞌari 7 vihiki vaipohina.

Vakadiabiꞌi onina Ceva.

Ceva kaisai adani makhira isani 7 vihiki vaipohina.

Ceva kabadani kaꞌoa sasidotxi vakadikaꞌdaꞌdi.

Ceva kaisai vaadahaꞌimajaniki ijaꞌari vaibavia.

Avigaki jaboni ida bajadi ajihini-ra vahonariavini.

Vanofiki ida Jesus onina-ra vidionivini ajihija kaimoni ida bajadi.

Pauloa bihonariavini vani fori vanihahi vahonariavini vanofivini jaboni.

Oniania,

bajadi-ra vaꞌora vaniꞌaha:

—Bajadi,

hiꞌada Jesus Pauloa vara bivaniꞌabakhiaꞌiki aꞌonira honariavini avarakaraꞌoꞌini hihada makhira kania — vakhaniha.

15 Bajadia bigathaniꞌihi ida Ceva kaisai vaathi:

—Jesu-ra aogaki hari.

Aogaki jaboni ada Paulo.

Hana avihini mani aꞌoni hora vara avaniꞌaja?

Ni-aꞌonira aogapaꞌitxiki — vakhanihaha adani bajadi.

16 Raofaꞌaha ada kabajadiki vanamana.

Danoki ada kabajadiki.

Vaꞌora dafiahaꞌaha,

vasiihananaꞌaha,

ꞌbiraꞌihi ida vakadimakari.

Vaꞌora najahariharivini mani ida vaꞌora aakojaonanija.

17 Oniaroa,

judeus kaijaꞌari,

judeus kaijaꞌari vihiriki Éfeso sidajia vahojaki vaꞌora avigaꞌaha adani makhira vapohimajaꞌina.

Vakamithahi ida moni,

vaofiniꞌaha,

oniani ida Jesu-ra khai vaniꞌavini hija.

Vaniꞌaha:

—Kaꞌdaꞌdi danoki ada Jesus.

18 Jesus athi-ra vakajariꞌdarikia vananamithaꞌihi ida vakadihojai asohiriki ijaꞌari vaipohiki vaviaha:

—Jesus kania ariabono gahinai anihavini viahania,

nimania ida akadihojai asohiriki anofijanariki — vaꞌora vaniꞌaha.

19 Vahojamaniha adani arabani Jesu-ra vakajariꞌdariki jaboni.

Vanajoroniꞌihi ida vakadipapira ijaꞌari-ra vakaijorahavini-ra avigavini hiki.

Papira-ra vanajoroniha,

ijaꞌari vaipohiki vaviaha avanahaꞌdiꞌihi.

Vakarajomiki ida vakadipapira ahaꞌdini kaidivani.

50 mil jiniro ipohini ꞌbaꞌdani ida papira kaidivani.

Jiniro karaho oamani ida jiniro ꞌbaꞌdani prata amonahaꞌiki ipohiki.

20 Hari.

Oniaroa,

okhaꞌokhaoniꞌihi ida Jesus varani hina.

Deus danona hojaki vahararana,

oniani ida ijaꞌari vaipohiki Jesu-ra vanofivini hija.

21 Hari.

Oniaroa,

adahaꞌianana-ra nofiha ada Paulo.

Pauloa bikavaꞌibodivaraniki ida Macedônia kaaraboni,

Acaia kaaraboni,

Jerusalém sidaji hikia okhaꞌianana.

Paulo vaꞌora niꞌaꞌaha:

—Jerusaléa ookhaꞌimidiaki bana ho.

Naothinia ookhahi Roma sidajia — niha ada Paulo.

22 Oniaroa,

vaꞌora honariaha adani ipohina viꞌbamiki avikhananavana Macedônia kaarabonia.

Avikhananavaki adani Timóteo,

Erasto khama.

Asia mani hojaroniha ada Paulo Ásia kaarabonia.

23 Oniaroa,

Éfeso sidajia hojana kari ada Paulo,

namithaꞌiki ida ijaꞌari vaipohiki vaihamahina.

Jesus varani hina vaꞌora naihamahiꞌiki adani Éfeso sidaji kaijaꞌarini.

24 Éfesoa hojaki ida gora kâraho ijaꞌari Diana-ra vakavaihinikabakhiavini ibavini.

Vakadideusa oamani ida Diana oniki.

Hojaki jaboni ada Demétrio.

Kidibadani kaꞌoa ida vakadideusa-ra vakavaihinikavini ibavini kagorani-ra anamoavini.

Demétrioa bianamovavini hiki ida prata kagorahi itxani kidipavakari kaimoni hini.

Demétrio,

kidipohi khama vagathanibakhiaki ida jiniro karaho gora itxani amovani abosini.

25 Demétrio vaꞌora baranahaha adani vahoariha gora itxani amovani-ra vanamonahabakhiaki jaboni vajoronijabanara kaimoni.

Vaꞌora niꞌaha:

—Oipohina,

avarigaki ida jiniro karaho-ra agathanibakhiavini hini ida akadiamonahi abosini.

26 Aꞌonivani jaboni avanokiꞌiki ada Pauloa oniki vara nina,

avakamithaꞌiki ida kidivarani jaboni.

Kidivarani hiki ida akadiamonahi,

deus hirini-ra kahivini.

Deus kaꞌoa hiriha ada makhira binamonahaki deus amovana.

Nimania ida Paulo vara vaꞌora niꞌabakhiavini afodanoki.

Ijaꞌari vaipohiki Paulo athi-ra vakajariꞌdaravini mani ida Diana-ra vanofijanaravini hija bana vakadideusa hini.

Éfeso sidaji kaijaꞌarini,

Ásia kaaraboni kaijaꞌarini vihiki Diana-ra vanofijanaravini hija bana jaboni.

27 Jaharihi ida bana ijaꞌari akadiamonahi-ra vakanavaranihavini.

Ni-akadiamonahi-ra vakapavakarivini-ra vanofijanaki bana.

Akadiamonahi kaꞌoa hirihi bana ida vanakaidivajanarija.

Vanofijanariki jaboni bana ida Diana.

Vanakaidivajanariki ida jaboni bana Diana-ra vakavaihinikavini ibavini kagorani.

Ásia kaaraboni kaijaꞌarinia vanôfiki jaboni ida Diana,

arabo ipohiki kaijaꞌarinia vanôfiki ida jaboni.

Paulo athi-ra vakamithaha;

jokoa vakanamasivijanarihi ida bana Diana.

28 Demétrio athi-ra vakamithaha adani ijaꞌari vaipohiki,

vavaꞌi jokojokoni vabodiꞌbarahaꞌoadahaꞌaha:

—Jahaki ida Diana.

Danoki ida.

Éfeso sidaji kaijaꞌarini vakadideusa ida Diana — vakadibodiꞌbarahi athini nihi.

29 Oniaroa,

sidaji bodinia okhaꞌokhaoniꞌihi ida vakadihamahi kavaranihi.

Sidaji kaijaꞌarini hahavi vaihamahiꞌiki.

Vavaꞌi jokojokoni vaꞌora vagathiꞌaha adani Gaio,

Aristarco vihiki.

Macedônia kaaraboni kaijaꞌarini adani.

Paulo-ra vavaipohihabakhiaki adani.

Hari.

Vaꞌora vagathiꞌaha,

vaꞌora avarahokajorakiꞌaha,

ijaꞌari vajoroniki vaibavia vaꞌora avisaꞌaha.

30 Paulo vania binofihi ida ijaꞌari vaipohiki vakadiania okhana,

vaihamahiki-ra vaꞌora vara niꞌara kaimoni.

Ni-Paulo okhana-ra vavaꞌahaki adani Jesus vaipohihava abono.

31 Vahoariha jaboni vakaronaꞌihi ida vaathi Paulo okharara kaimoni ijaꞌari vaihamahiki vajoroniki vakadiania.

Ásia kaaraboni akadavaꞌava abono adani vaathi-ra vakaronara.

Paulo-ra vavajahaki adani.

32 Hari.

Ibavi vavajoroniki kania saa vakhaniꞌaha adani ijaꞌari vaipohiki vavaꞌi jokojokoꞌiki.

Vavaꞌi kidakidaꞌini vabodiꞌbarahaꞌaha.

Vajoroniꞌina vaipohikia ni-avigaki ida nahina kaimoni hini vabodiꞌbarahana.

Vakadibodiꞌbarahi ni-avakogakhamaki.

33 Oniaroa,

judeus kaijaꞌaria vahonariaha ada Alexandre,

ijaꞌari vaihamahiki vaviaha okhana.

Sidaji kaijaꞌarini-ra vaꞌora anariakavini-ra nofiha ada Alexandre.

Okhamiha,

vaviaha hojaꞌaha,

vaꞌora navaꞌisohiꞌaha saꞌa viso vakhanira kaimoni.

Alexandre-ra vanokiha adani vaihamahiꞌiki,

Alexandre vaꞌora naihamahiki vaabono vavanihaꞌaha.

Alexandre vara nina-ra nofivini kabaꞌi,

ni-vara niꞌiki.

34 Judeus kaijaꞌari hina avigaꞌaha,

vabodiꞌbarahaꞌoadahaꞌianaha.

Ora ꞌbamiki asia mani vabodiꞌbarahaha afohaꞌoadaha:

—Jahaki ida Diana.

Danoki ida.

Éfeso sidaji kaijaꞌarini vakadideusa ida Diana — vabodiꞌbarahaꞌianana vakhaniha afohaꞌoadaha.

35 Oniaroa,

vaviaha hojaha ada ijaꞌari honariava abono vakadikaꞌdaꞌdi.

Vaꞌora kaabaniꞌaha,

saa vakhanijanarara kaimoni.

Vajaforia viso vakhaniraraoniꞌaha.

Viso vakhanina naothinia vaꞌora niꞌaha adani Éfeso sidaji kaijaꞌarini vaihamahiꞌiki:

—Aꞌonivani Éfesoa avahojaki.

Ijaꞌari hahavia biogaki ida Diana gorani-ra akavaihinikavini akadavaꞌava abono arihina.

Akadideusa jahaki ida Diana.

Nama voroniꞌiki ida jaꞌdi karaho kidiania.

Ijaꞌaria biogaki jaboni ida jaꞌdi karaho-ra aakadavaꞌavini.

36 Kaꞌoa oamani hida oathi,

ni-korijanahi hirihi ida oniꞌaꞌiki.

Viso vakhaniꞌa bana.

Vakavaꞌibodivaraniꞌimidiaꞌa bana ida bada avaniꞌaki kaimoni.

Naothinia bada avakhanihi.

37 Nahina kaimoni vaꞌora avavikhaki hadani makhira hida?

Ni-nahina-ra vaboꞌdiaki Diana gorani bodinia.

Ni-vakanavaranihaki jaboni ida akadideusa.

38 Demétrio ijaꞌari-ra avanaathidanoararivini-ra vanofiha;

jahaki ida ijaꞌari vanasohiva abono vakadiania avikhana vara vakhanira kaimoni.

Jahaki ida ijaꞌari abononi akanaathidanoararikhamavini kamahini kania avikhana.

Ni-jahaki ida hidakabaꞌi hihida ibavia avaabononi avakakaihamahikhamavini.

Vahojaki adani sidaji kaijaꞌarini vavakaꞌdaꞌdiva jaboni,

vanasohija kaimoni ida ijaꞌari vaabono vakaihamahikhamaki vakadivarani.

39 Nahina hoariha-ra avanofihi,

vajoronina kamahini adani Éfeso sidaji kaijaꞌarini vavakaꞌdaꞌdiva vaꞌora vanavaꞌisohi bana avanofikia.

40 Roma sidaji vavakaꞌdaꞌdiva vakamithaki bana ida amonina,

Éfeso sidaji kaijaꞌarini vaihamahina,

saani karaho-ra vanamonahaꞌavini.

Moni-ra vakamithaha;

haria bana vakajaꞌoriamanira bana adani.

Vaꞌora adavini vaꞌora anofiki vaabono vavanihamanira bana adani arabo ipohiki kakaꞌdaꞌdini Roma sidajia hojaki.

Ni-jahapaꞌitxiki ida akadisaani hidakabaꞌi.

Haria vananaꞌdohiha;

ni-aogaki ida akadisaani nahina kaimoni hini — vaꞌora niꞌaha.

41 Hari hiꞌini ida ijaꞌari honariava abono kavarani,

vaꞌora kaaminaꞌaha.