Arabo ipohiki kakaꞌdaꞌdini Cláudio oniki vaꞌora honariaꞌiki adani judeus kaijaꞌari hahavi Roma sidajia vahojaki ai vihira kaimoni.

Judeus kaijaꞌari-ra honariavini mani ida Itália kaarabonia Áquila-ra vaꞌora naꞌajihija,

oniani ida Corinto sidajia vaꞌora arakhaꞌia.

Ni-ꞌboꞌda vakaikahiki adani Áquila,

kidigamo khama Corinto sidajia.

3 Hari.

Paulo vaꞌora navanavanahaꞌaha adani Áquila.

Vakadibadani kaꞌoa ida makari kagorahi amonahani vakadipavakari kaimoni.

Pauloa bada biniꞌaki jaboni ida makari kagorahi amonahani.

Áquila vakadiania hojaha ada Paulo,

bada nijabanara kaimoni.

4 Avakoirina kamahini hahavi okhaha ada Paulo judeus kaijaꞌari Deu-ra vara vaniꞌavini kagorania.

Vaꞌora vara niꞌabakhiaha afodanoki adani judeus kaijaꞌari,

judeus kaijaꞌari vihiriki jaboni vajoroniki.

Pauloa vara bivaniꞌavini hiki ida Jesus varani hina,

vakajariꞌdaria kaimoni ida kaꞌoa hini.

5 Oniaroa,

vakaikahiꞌaha adani Silas,

Timóteo khama Paulo kania.

Macedônia kaarabonia vikhaki adani.

Vakaikahina,

Pauloa binahojaꞌihi ida makari kagorahi amonahani kabadanihi.

Mahi hahavi vara bivaniꞌabakhiaꞌiki ida Cristo varani hina.

Judeus kaijaꞌari-ra vaꞌora niꞌabakhiaha:

—Jesus mani o Cristo Deua bikaronaꞌara — Paulo vaꞌora niꞌabakhiaha.

6 Ni-vakamithavini vanofiki ida Paulo athi.

Paulo-ra vakanavaranihamaniꞌaha.

Jesus varani hina-ra vanofiravini mani ida Paulo kidimakari-ra naꞌdaraꞌdaravini hija,

avigaja kaimoni ida jaharini Deus athi-ra vakajonivini.

Vaꞌora niꞌaha:

—Ibavi jaharikaꞌoakia aꞌonira arakhaki avanofivini,

ni-hovani avarikhani-ra onofiki.

Aꞌonivani oa avaabononi avakahidaja.

Ni-kodibadani hijanarihi bana hida aꞌonira okaabanivini.

Hidakabaꞌi judeus kaijaꞌari vihiriki vakadiania ookhaki bana ho,

vara ovaniꞌaja kaimoni ida Jesus varani hina — vaꞌora niꞌaha.

7 Oniaroa,

Paulo vaꞌora nahojahaꞌaha.

Tício Justo gorana maina hojaꞌaha ada Paulo.

Judeus kaijaꞌari hirina kabaꞌi,

Tício Justo Deu-ra kanamasiviki ada.

Judeus kaijaꞌari Deu-ra vara vaniꞌavini kagorani ꞌdihania hojaki ida Tício Justo gorana.

8 Judeus kaijaꞌari Deu-ra vara vaniꞌavini kagorani akadavaꞌava abono onina Crispo.

Ni-vakajariꞌdaki ida Jesus varani hina kidigamo,

kidisai vihikia.

Corinto sidaji kaijaꞌarini vaipohikia vakamithahi ida Jesus monina.

Vajariꞌdarina mani ida Paulo vaꞌora kanahavini hiꞌia.

9 Hari.

Joma vania Pauloa binokiꞌihi ida vadami fori hiki.

Vadamia bikamithahi ida kidikaꞌdaꞌdi Jesus athi:

—Hariꞌa ofini.

Vara vaꞌora niꞌavinihi ida varani ohina.

Hariꞌa visoni,

vara nimani.

10 Hovani ohojaki ho kadania.

Ni-nahina ira namakhanirihi bana.

Vahojaki adani ijaꞌari vaipohiki hihida sidaji,

kodijaꞌari vihira kaimoni — niha ada Jesus.

11 Oniaroa,

Paulo hojaꞌaha badara hoarani,

pitani jaboni hojaha.

Vaꞌora kaꞌojomoꞌivini hiki ida Jesus varani hina.

12 Hari.

Arabo ipohiki kaijaꞌarini vakadikaꞌdaꞌdi Cláudio onikia bihonariaki ada Gálio oniki Acaia kaaraboni kaijaꞌarini-ra vaꞌora vakaꞌdaꞌdira kaimoni.

Corinto sidajia hojaki ada Gálio.

Hari.

Vajoroniꞌaha adani judeus kaijaꞌari Corinto sidajia vahojaki.

Paulo-ra vagathiꞌaha,

ijaꞌari-ra nasohivini kagorania Paulo-ra avisaꞌaha.

13 Gálio-ra vaniꞌaha:

—Hiꞌo makhira binofiki akadihinika-ra nahoarihavini.

Moisés kohana bivavaꞌisohihiꞌboꞌdaꞌiki ida ihinika amonahani Deu-ra akanamasivivini-ra akavaihinikavini hini.

Anaababakhiaki ida kidivaꞌisohihi.

Paulo vara vaꞌora niꞌabakhiaki afodanoki adani akadijaꞌari,

Deu-ra kavaihinikavini-ra nahoarihavini — Gálio-ra vaniꞌaha adani vaihamahiki.

14 Paulo vara nina-ra nofivini kabaꞌi,

Gálio vani ada vara niꞌara.

Vaꞌora niꞌaꞌaha adani judeus kaijaꞌari:

—Paulo badani jaharikaꞌoaki-ra bada niꞌara vaha;

avakadivarani-ra okamithajahakimanihi vaha.

Pauloa ni-bada biniꞌaki ida badani asohiriki.

15 Avakadivarani hiꞌoamanija ida avakadijaꞌari avikhananavaki vakadihojai,

ihinika hiki.

Jokoa ohonariariha ada Paulo imana ꞌbanani.

Ni-Roma sidaji kaijaꞌarini kavaꞌisohihi-ra kajoniriha ada.

Aꞌonivani kaꞌoa vanasohiꞌa bana ida avakadivarani.

Ni-onofiki ida aꞌonira onasohivini — vaꞌora niꞌaha ada Gálio.

16 Gálio vaꞌora honariaha adani kidisorara vaꞌora avarakhaonanira kaimoni adani judeus kaijaꞌari ijaꞌari-ra nasohivini kagorania.

17 Gálioa bivahojaki kania vikhaonaniꞌaha adani ijaꞌari,

vagathiꞌaha ada Sóstenes oniki,

vidafiahaꞌaha baniniaja.

Judeus kaijaꞌari Deu-ra vara vaniꞌavini kagorani akadavaꞌava abono ada Sóstenes oniki.

Sóstene-ra vidavini-ra ogavini kabaꞌi ada Gálio,

ni-biakavaꞌijoaki.

18 Hari.

Asia hojamaniha ada Paulo mahi ipohiki Cristo kaijaꞌari vakadiania Corinto sidajia.

Oniaroa,

Paulo vaꞌora niꞌaha:

—Ai ohiki bana ho.

Síria kaarabonia oajoiki ho — vaꞌora niꞌaha.

Vaꞌora kaaminavini naothinia ajihiꞌaha.

Avikhaꞌaha adani Áquila,

Priscila khama Paulo kania.

Cencréia sidaji miroꞌa avikhanaiꞌaha.

Ai vihina viahania Paulo kaꞌdaꞌdi kaafani kaꞌboaꞌaha.

Aꞌdiahiꞌiki ida athi Deu-ra navaꞌiponijoravini hiꞌiki,

oniani ida kaꞌdaꞌdi kaafani kavaꞌboahini hija.

Oniaroa,

vahoariha vakadiania vakiꞌdamaꞌaha adani Paulo,

Áquila,

Priscila vihiki.

Ai vakihiꞌaha.

19 Éfeso sidajia avakakhanoꞌaha.

Paulo vaꞌora nahojahaꞌaha adani Áquila,

Priscila khama.

Judeus kaijaꞌari Deu-ra vara vaniꞌavini kagorania okhaꞌaha ada Paulo.

Paulo judeus kaijaꞌari vihiki khama vaabono vara vakaniꞌakhamavini hiꞌihi ida Jesus varani hina.

20 Oniaroa,

vaniꞌaha ada Paulo:

—Paulo,

akadiania hojaꞌa bana mahi ipohiki.

—Iniani,

jokoa kaho hida ohojarihi kaho.

—Deus ojoina-ra nofihi hida;

ojoihi.

Vaꞌora kaaminavini naothinia kiꞌdamaha kanava kakarahoa,

Éfeso sidajia vakaꞌajihiꞌaha.

22 Avakakhaha,

Cesaréia kaarabonia avakoꞌomisiꞌaha.

Ogaimoriꞌaha ada Paulo.

Okharimananiꞌaha,

Jerusaléa kaikahiꞌaha,

vaꞌora kaꞌivanitiꞌaha adani Jesus Cristo kaijaꞌari.

Naothinia ajihiꞌianaha.

Antioquia da Síria maina okhaꞌaha.

23 Oniaroa,

hojaꞌaha masiko ꞌbamiki,

naothinia ajihiꞌianaha.

Galácia kaaraboni,

Frígia kaaraboni hikia adahaꞌianaha.

Vaꞌora akaragaoniha adani Cristo kaijaꞌari,

vaꞌora anavaꞌisohioniꞌaha Jesu-ra vavakaijokajahakira kaimoni.

24 Hari.

Éfeso sidajia okhaha ada judeus kaijaꞌari Apolo oniki.

Apoloa bivaꞌbanaki kasidajini onini Alexandria.

Apoloa biogajahakiki ida varani vara vaniꞌajahakini vahoariha vakamithaki kaimoni.

Biogajahakiki jaboni ida athi Deus athi kapapirania hojaki.

25 Ni-biogahahaviki ida Jesus varani hina.

Kamaꞌdani oavani ida biogaja.

João Batista kohana hokina kari vara bivaniꞌaꞌiki ada Jesus,

vaꞌora kanaꞌiki adani vakadihojai asohiriki-ra vakavaꞌipahiniꞌiki.

Apoloa biogaꞌiki ida João Batista ijaꞌari-ra kanavini kavaranihi.

Apolo ijaꞌari-ra vaꞌora kaꞌojomoꞌijahakiki Jesus varani hina pitani biogakia.

Khai biniꞌaki ida kidivarani vaꞌora navaꞌisohivini hiki.

26 Hari.

Éfeso sidajia okhaha ada Apolo.

Judeus kaijaꞌari Deu-ra vara vaniꞌavini kagorania okhaꞌaha.

Ofinirina vani ijaꞌari-ra navaꞌisohivini hiki ida varani biogaꞌiki.

Áquila,

Priscila khama mitha vaniꞌahi ida kidivarani.

Oniaroa,

Apolo-ra vakaboaꞌiꞌaha vagorana okhana,

vananamithavini hiꞌihi ida Jesus varani hina hahavi.

27 Oniaroa,

Apolo vaꞌora vara niꞌaꞌaha adani Cristo kaijaꞌari Éfeso sidajia vahojaki:

—Acaia kaarabonia ookhana-ra onofiki ho — niha ada Apolo.

—Iokhahi;

papira ira anoꞌahi iavikhaki kaimoni.

Papira ariathi hojaki vaꞌora akanikhariaki adani Jesus kaijaꞌari Acaia kaarabonia vahojaki,

ira vagathanijahakira kaimoni — Apolo-ra vaniꞌaha.

Oniaroa,

Acaia kaarabonia okhaha ada Apolo.

Vaꞌora karagaꞌaha adani Jesus Cristo kaijaꞌari.

Deus vaꞌora kajoamoravini mani ida Jesu-ra vavakaijokavini hija.

Vakadiania hojaꞌaha ada Apolo,

vaꞌora kakodiaꞌaha.

28 Apolo vara vaꞌora niꞌadanokiha adani judeus kaijaꞌari ijaꞌari vaipohiki vaviaha.

Ni-avigaki ida Apolo athi-ra vagathanivini,

asohini kabaꞌi asohirini vakahivini.

Apolo kavarani hiki ida Cristo varani hina Deus athi kapapirania hojaki: