2 Paulo vakadihojai ida judeus kaijaꞌari akoiri kamahini ijaꞌari Deu-ra vara vaniꞌavini kagorania avikhana.

Avakoirina kamahini ahoarabakosikia avikhabakhiaha.

Avikhaha,

vaabono vara vakaniꞌakhamaꞌaha adani Paulo,

judeus kaijaꞌari vihiki vajoroniki khama.

Vakadivarani hiki Deus athi kapapirani.

3 Paulo vaꞌora navaꞌisohijahakivini hiki ida Deus athi.

Vaꞌora niꞌaha:

—Deus athi kapapirani haria navaꞌisohijoravini hiki ida Cristo imana ꞌbanani karaho,

abiniꞌina ahokiꞌina kavaranihi.

Nimania ida Deua binofiki namithani kidiania.

Aꞌonira okanamonivini hiꞌiki ida Jesus Cristo varani hina.

Cristo mani o Jesus Deua bikaronaꞌiki — vaꞌora niꞌaha ada Paulo.

4 Paulo,

Silas khama vaꞌora vara vaniꞌabakhiaki afodanoki adani judeus kaijaꞌari vakajariꞌdaria kaimoni ida Cristo varani hina.

Vaipohiriki vakajariꞌdarihi ida Paulo vakadivarani.

Paulo,

Silas vihiki vakadiania vajoronibakhiaha.

Gamo vaipohiki jaboni vakanahinaꞌahapikiki Jesus kania vaabono gahinai vanihaꞌiki.

Vaꞌoaniaro jaboni Paulo vakadiania vajoroniꞌiki.

Grécia kaaraboni kaijaꞌari vaipohiki jaboni Deu-ra vakanamasiviꞌikia vanaabaꞌiki ida Jesus athi.

Judeus kaijaꞌari vihiriki adani.

Paulo-ra vaꞌora vavajoronibakhiaꞌaha.

5 Hari.

Judeus kaijaꞌari vani adani Paulo-ra avakabaiꞌaha.

Paulo-ra avakabaivini hiki vaipohiki adani Paulo athi-ra vanaabaꞌiki.

Avakabajahaki vaꞌora vanakoꞌdihaꞌaha adani makhira hojai jaharikia vakahojaiki vaadahaꞌimajaniki sidaji kahagihinia.

Saa vakhaniꞌaha vajoroniꞌina.

Vaihamahiꞌina vaadahaha sidajia,

Jasão gorana avikhaꞌaha,

Paulo,

Silas vihiki-ra vaꞌora vanakoꞌdihaꞌavini.

Jasão gorana kaathani-ra avakoꞌdanijakosiꞌaha.

Vanofiki vaꞌora avavikhaonanivini adani Paulo,

Silas khama,

ijaꞌari vahararana vaꞌora avisavini.

6 Ni-Paulo-ra vaꞌora vakaragaꞌiki.

Oniaroa,

Jasão vani ada vagathiꞌaha.

Cristo kaijaꞌari vahoariha-ra vaꞌora vagathiꞌaha jaboni,

vaꞌora avarahokaꞌaha sidaji kaijaꞌarini vakaꞌdaꞌdiva vaviaha.

Vabodiꞌbarahaꞌaha:

—Akadisidaji maina vakaikahiꞌaha adani makhira.

Vakadihojai hiki ijaꞌari-ra vanaihamahikarahovini ibavi hahavia.

7 Ni-vanaabaki ida arabo ipohiki kakaꞌdaꞌdini César oniki athi.

Kaꞌdaꞌdi kaꞌoa hina vakahiha ada hoariha Jesus oniki.

Jasão vani vaꞌora gathaniꞌara adani gorana bodinia — korijanahia vakhaniꞌaha.

8 Mitha vakhaniꞌaha adani sidaji kaijaꞌarini vavakaꞌdaꞌdiva,

sidaji kaijaꞌarini vajoroniꞌiki jaboni mitha vaniꞌahi ida vakadibodiꞌbarahi athini.

Vakadivarani vavaꞌi soko aniꞌahahavini hiꞌiki.

9 Vakadikaꞌdaꞌdi vaꞌora vaniꞌaha adani Jasão:

—Haria bana jiniroa vanoꞌa,

aꞌonira arakhavini abosini kaimoni.

Sidaji kaijaꞌarini-ra vaꞌora avanaihamahiꞌianahi;

ni-avakadijiniro-ra avagathaniki — vaꞌora vaniꞌaha.

Oniaroa,

vakadikaꞌdaꞌdia vagathanihi ida Jasão vakadijiniro,

vaꞌora avarakhaꞌaha,

ai vihiꞌaha adani Jasão.

10 Hari.

Mithani vani Cristo kaijaꞌari vaꞌora vahonariaha adani Paulo,

Beréia sidaji maina avikhaꞌaha.

Avikharimananiꞌaha,

vakaikahiꞌaha.

Judeus kaijaꞌari Deu-ra vara vaniꞌavini kagorania avikhaꞌaha.

11 Tessalônica sidaji kaijaꞌarini fori vihiriha adani Beréia sidaji kaijaꞌarini.

Ni-vamorobohariki fori vihiki.

Beréia sidaji kaijaꞌarinia avigavini vanofiki ida Deus athi.

Mahi hahavi Paulo vaꞌora kaꞌojomoꞌivini hiki ida Deus athi.

Vada vaniꞌamanihi ida Deus athi kapapirani,

avigaja kaimoni ida asohini Paulo athi.

12 Oniaroa,

ijaꞌari vaipohiki Jesus kania vaabono gahinai vanihaꞌiki.

Grécia kaaraboni kaijaꞌarini vaipohiki Jesu-ra vavakaijokaki jaboni.

Grego anani vaipohiki vakanahinaꞌahapikikia vakajariꞌdariki jaboni ida Jesus varani hina.

13 Hari.

Judeus kaijaꞌari Tessalônica sidajia vahojakia vakamithaꞌihi ida varani Paulo Beréia sidajia okhaꞌina,

sidaji kaijaꞌarini-ra vaꞌora kanamonivini Deus athia.

Paulo monina-ra vakamithaꞌiki,

Paulo-ra vanajoikahiꞌaha.

Beréia sidajia avakhanoha,

Paulo-ra vakanavaranihavini hiki vaihamahira kaimoni adani Beréia sidaji kaijaꞌarini.

14 Oniaroa,

Cristo kaijaꞌari vaꞌora vanavaꞌisohiꞌaha adani Paulo ai vihira kaimoni.

Vaꞌora vahonariaha adani Paulo,

vaipohina khama ꞌdako karaho kajokiraki vadinia avikhanaiꞌina.

Oniaroa,

ai vihiꞌaha adani Paulo.

Ni-avikhanaiki adani Silas,

Timóteo khama.

Vahojaronimaniꞌaha adani Silas Beréia sidajia.

15 Kidivaꞌahia vavaipohihaꞌaha ada Paulo.

Atenas sidajia avikhaꞌaha.

Avakhanoꞌaha,

hojahaꞌaha ada Paulo.

Kidivaꞌahi vajoiꞌiki Beréia sidajia.

Pauloa bikaronahi ida athi vakadiania:

16 Hari.

Paulo vaꞌora nokhavini kabaꞌi adani Silas,

sidaji-ra navanavanahaꞌaha.

Binokiꞌihi ida deus amovana îpohiki,

ibavi hahavi hojani.

Deus amovana ipohiki-ra nokivini mani ida Paulo vaꞌi-ra mokara niꞌaja.

17 Oniania,

Paulo vaꞌora vara niꞌabakhiaha adani judeus kaijaꞌari Deu-ra vara vaniꞌavini kagorania vajoroniki.

Vaꞌora vara niꞌaha adani jaboni judeus kaijaꞌari vihiriki Deu-ra vakanamasiviki.

Mahi hahavi pavakarihi ibavinia okhaꞌaha ada Paulo.

Vaꞌora vara niꞌaꞌaha adani vaadahaꞌimajaniki.

18 Vahojamaniha adani ijaꞌari vakaꞌojomoꞌiva abono vaonina ipikorio,

vahoariha vaonina itoiko.

Deu-ra avigariki adani ijaꞌari vakaꞌojomoꞌiva abono.

Paulo khama vaabono vara vakaniꞌakhamavini hiꞌihi ida Jesus varani hina.

Vahoariha Paulo-ra avigarahaꞌavini vananaꞌdohiꞌaha:

—Nahina mani oni hiꞌo ogaharikia vara bivaniꞌavini binofija?

Vahoariha vagathaniꞌihi ida vaathi:

—Ni-aogaki.

Arabo hoariha kaijaꞌarini kaDeuni vahabini ada kidivarani hira — vakhaniha.

Pauloa vara bivaniꞌaki ida Jesus varani hina,

ijaꞌari abinini naothinia ahokini ida kidivarani hija jaboni.

Ni-avigajahakiki ida Paulo athi nahina nini.

19 Oniaroa,

Paulo athi-ra vakamithakia vakaboaꞌiha Areópago ibavi maakarini hojaki okhana.

Ijaꞌari vavajoroniki ibavini ida Areópago oniki.

Vaniꞌaha:

—Paulo,

ivikhaꞌiki ida varani jaꞌdini haria ikaꞌojomoꞌivini hiꞌiki kaimoni.

Akamithaꞌianavini anofiki ida kadavarani.

20 Akamithabiininiꞌiki ida kadavarani fori hiki.

Aogavini anofiki ida varani nahina nini — Paulo-ra vaniꞌaha.

21 Vakadihojai hiki ida Atenas sidaji kaijaꞌarini,

vahoariha khama vajoronina vakamithaja kaimoni ida moni jaꞌdini,

vara vavaniꞌaja kaimoni jaboni ida moni jaꞌdini.

Vavajahaki ida moni jaꞌdini-ra vakamithavini.

22 Hari.

Areópago ibavia okhaha ada Paulo.

Atenas sidaji kaijaꞌarini vaviaha gaakosoana hojaꞌaha,

vaꞌora niꞌaha:

—Aꞌonivaniti,

avakadideus ipohiki-ra avakavaihinikabakhiavini-ra onokiꞌiki ho.

23 Sidajia oadahaꞌimajaniꞌina vada oniꞌaꞌiki ida deus amovana-ra avakavaihinikavini ibavini ipohiki.

Ibavi hoarania okaikahina onokiꞌihi ida jirihi jaꞌdi aroisiki namania “DEUS AOGARIKI KANAVAꞌIGANA IBAVINI.”

Nimania ida jirihi onokiꞌiki.

Oogaki ada Deus avarigariki.

Avakavaihinikabakhiaki ada Deus avarigaravini kabaꞌi.

Aꞌonira onavaꞌisohivini hiki bana ada Deus kaꞌoa.

24 Hiꞌada Deus avarigariki vania binamonahaja ida arabo,

nama,

hahavi hojaꞌiki hiki.

Deus vania bivakaꞌdaꞌdija ida nama,

arabo hiki.

Ni-arajomaki ida gora ijaꞌaria binamonahaki Deus ibavi kaimoni hini.

25 Ni-nahina-ra kainamoki ada Deus,

ni-bikainamoki ida ijaꞌaria binamonahaki.

Ovani oa vaꞌora noꞌara adani ijaꞌari vakadimahi,

vakadivaꞌikhami hikia jaboni.

Vakadinahina hahavia vaꞌora noꞌaꞌiki ada Deus.

26 Deua binamonahaꞌiki ada makhira hoarana.

Ovani ada ijaꞌari hahavi okhananavaki vakadiꞌarahoda hira.

Arabo hahavia Deus vaꞌora karonahahaviꞌiki adani ijaꞌari vaibavi kaimonia avikhana.

Vaꞌora namonahavini viahania Deus vania bikavaꞌibodivaranijoraja hida ijaꞌari hahavi vakadimahi,

vaibavi hiki-ra vavahojara kaimoni.

27 Deua binamonahaki ida ijaꞌari nakoꞌdina hiki kaimoni.

Deua binofiki ijaꞌaria vanakoꞌdivini,

vakaragara kaimoni.

Vanakoꞌdivini kabaꞌi,

napaja hojariha ada Deus.

28 Hoariha biniꞌaha:

Hari.

Vara vakhaniꞌaha adani avakadijirihi abono jaboni:

29 Paulo asia vara niha:

—Deus kaisai hari.

Oniania,

hariꞌa vakavaꞌibodivarani ida avakadiamonahi Deus hini.

Deus hirihi oni deus amovana avakadideus hiki.

Ni-ouro nokiani fori hiki ada Deus.

Ni-prata nokiani fori hiki,

ni-jaꞌdi nokiani fori hiki jaboni.

Ijaꞌaria avigajahakiki ida deus amovana amonahani.

Deus kaꞌoa hirihi ida vakadiamonahi.

30 ꞌBoꞌdakari avigaharina Deua biogavini kabaꞌi,

ni-bihonariaki ida vakadihojai asohiriki abosini nahina jaharikia.

Hidakabaꞌi vani vaꞌora honariaha adani ijaꞌari hahavi arabo hahavia vaibavia vahojaki vakavaꞌipahinija kaimoni ida hojai asohiriki.

31 Deua bikanamahiki ida mahi ijaꞌari hahavi kahojai abosini kamahini kaimoni.

Asohikaꞌoaki bana ida hojai abosini kabadanihi.

Deua binagathogathoꞌaha ada makhira hoarana,

vakadihojai abosinia vaꞌora navaꞌisohira kaimoni.

Deua bianahokiꞌaha ada makhira abiniꞌina naothinia ijaꞌaria avigaja kaimoni ida kaꞌoa hini hida varani.

32 Vara bivaniꞌahi ida Jesus ahokiꞌina kavaranihi,

vahoariha vakanahahanihaꞌaha ada Paulo.

Vahoariha vani adani Paulo-ra vaniꞌaha:

—Mahi hoariha bana akamithaꞌianavini anofiki ida kadavarani.

33 Oniaroa,

ajihiꞌaha ada Paulo.

34 Vahoariha vakajariꞌdarihi ida Paulo athi,

oniani ida Jesus kania vaabono gahinai vanihavini hija.

Paulo-ra vavaipohihaꞌaha.

Jesu-ra kajariꞌdariki hoarana onina Dionísio.

Areópago kaijaꞌarini ada Dionísio.

Areópago oniki ida ijaꞌaria bivajoronibakhiaki ibavini.

Jesu-ra kajariꞌdariki hoariha onini Damáris.

Vahoariha jaboni Jesu-ra vavakaijokaki.