—Timóteoa binaabajahakiki ida Jesus athi — vakhaniha.

Judeus anani ida Timóteo kaamia.

Cristo kaijaꞌari jaboni ida.

Timóteo kaabiꞌi Grécia kaaraboni kaijaꞌarini ada.

Judeus kaijaꞌari sidaji maakarinia vahojakia avigaki ida Timóteo siikosida karajomihi-ra vahojaravini.

3 Pauloa binofivini biavikhavini judeus kaijaꞌari vakadiania,

oniani ida Timóteo-ra karajomivini hija.

4 Sidaji ipohikia vakaikahiꞌaha,

Jesus athi-ra vanaabaꞌiki-ra vaꞌora avanavaꞌisohionivini hihi ida Jesus athi avavaadahaoniva abono vaathi papira hojaki.

Vaꞌora vaniꞌaha:

—Jesus athi avavaadahaoniva abono Jerusaléa vahojaki,

Jesus Cristo kaijaꞌari vanavaꞌisohiva abono khama aꞌonira vanavaꞌisohivini hiki ida bana honari avanaabaja kaimoni — vaꞌora vaniꞌaha.

Oniania Paulo vaꞌora vanavaꞌisohivini hihi ida honari ipohiriki.

5 Oniania avijavaꞌiki ida Jesu-ra vavakaijokavini.

Vahoariha vakamithabiininihi ida Jesus varani hina,

vaꞌoaniaroa vanaabamaniꞌihi jaboni,

oniani ida Jesus Cristo kaijaꞌari-ra vaꞌora anaipohija.

6 Hari.

Oniaroa,

vaadahaꞌianaha adani Paulo.

Frígia-Galácia kaaraboni kavahajavarikhamani kania avikharimananiꞌaha.

Maꞌonahai Jahaki ni-vaꞌora vaꞌahaki Jesus varani hina-ra vara vavaniꞌavini Ásia kaarabonia.

7 Mísia kaaraboni-ra avanamaakariꞌaha,

Bitínia kaarabonia avikhana-ra vanofiꞌaha.

Ni-Maꞌonahai Jahaki vaꞌora vaꞌahaki avikhana.

8 Oniania Mísia kaarabonia avikhaꞌaha,

Trôade sidajia avikhanaiꞌaha.

9 Hari.

Joma vadami fori hikia Pauloa binokiha ada makhira gaaki.

Macedônia kaaraboni kaijaꞌarini ada makhira.

Paulo-ra kanikhariadanokiꞌaha vadamia:

—Macedônia kaarabonia bana vikhaꞌa mahija haria avakajoamoravini — niha ada makhira.

10 Vadami fori hiki-ra nokivini naothinia ariabono vara akaniꞌakhamavini hiꞌihi ida vadami.

Hovani Lucas ohojaꞌia vakadiania.

Aniꞌahi:

—Macedônia kaarabonia akakhaꞌava.

Vadami fori hikia Deus haria navaꞌisohivini hiki kania.

Akakhaꞌava mahija Macedônia kaaraboni kaijaꞌarini-ra vaꞌora ananamithavini kaimoni Jesus monina jahakia.

11 Hari.

Oniaroa,

kanava kakarahoa akiꞌdamaꞌihi,

Trôade sidajia ai akihiꞌihi,

akakafianiꞌihi,

Samotrácia kajoviri kaonikia aakaikahiꞌihi.

Kaꞌafokajomani vani ai akihiꞌianahi.

Aakakhaꞌianahi,

Neápolis sidaji adamininia aakaikahiꞌihi.

12 Aogaimoriꞌihi,

Filipos sidajia aokharimananiꞌihi.

Hari.

Macedônia kaarabonia hojaki ida Filipos sidaji oniki.

Roma sidaji kaijaꞌarinia vanamonahaꞌiki ida sidaji vaibavi kaimoni.

Akapitakhamaꞌiki ida Macedônia kaaraboni,

akoꞌbamahakhamaki ida arabo pitahani.

Arabo pitani biininia hojaki ida Filipos sidaji oniki.

Hari.

Filipos sidajia akaikahiꞌihi,

mahi ipohirikia arihojaꞌihi.

13 Akadiꞌakoiri kamahini vani sidajia aokhaonaniꞌihi.

Vaini vadinia aokharafoniꞌihi.

Akavaꞌibodivaranihi ida vaini vadinia hojaki judeus kaijaꞌari vajoronibakhiaki vaibavi,

Deu-ra vara vaniꞌavini-ra vavaibavivini ida.

Vaꞌora akaragaꞌaha adani gamo vajoroniki.

Avithiꞌihi vakadiania,

vara vaꞌora aniꞌaꞌaha.

14 Gamo ariathi-ra vakamithaki vahararana hojahi ida gamo Lídia oniki.

Lídia ibavini kaꞌoa Tiatira sidaji oniki.

Kidibadani hiki ida makari jahaki,

kaidivaki pavakari nihani.

Judeus anani hirini kabaꞌi Deu-ra kanamasiviki ida Lídia.

Hari.

Deua bikajoamoraꞌihi ida Lídia,

bikamithajahakija kaimoni ida Paulo athi,

oniani ida binaabavini hiꞌia.

15 Lídia jariꞌdarini mani ida Pauloa bikanavini hija.

Lídia gorani kaijaꞌarini vihiki jaboni vajariꞌdarina mani ida vaꞌora kanavini hija.

Jesus Cristo kaijaꞌari vihina kaimoni karajomihi ida kanai.

Oniaroa,

Lídia haria kaboaꞌiꞌihi gorania arihojana.

Haria niꞌahi:

—Jesu-ra ogathanijahakivini-ra avakavaꞌibodivaranihi;

vikhaꞌa bana mahija ogorana avahojavini.

Haria kaboaꞌiꞌihi,

gorania arihojaꞌihi.

16 Hari.

Oniaroa,

mahi hoariha ijaꞌari Deu-ra vara vaniꞌavini ibavinia aokharafoniꞌianahi.

Aokhahi,

akaragarariꞌihi ida imaꞌinavi.

Kidikariva vakapavakariꞌiki ida imaꞌinavi.

Imaꞌinavi kiditavaria binavaꞌisohijoravini hiki ida namithaꞌiariki,

oniani ida ijaꞌari kamahi namithaꞌiariki-ra ogavini hija.

Imaꞌinavi kabadani kaꞌoa ida ijaꞌari navaꞌisohijorani namithaꞌiarikia.

Kidikariva vagathanibakhiaki ida kidibadani abosini jiniro karahoa.

17 Hari.

Haria karagarariꞌihi,

anaothia khaꞌihi,

bodiꞌbarahaꞌoadahani:

—Hihadani makhira Deus danoki nama hojaki kabadani abono mani hadani.

Hivaꞌoani aꞌonira vanavaꞌisohivini hiki nihanikia Deus aꞌonira akavaꞌijoavini — nikia kabodiꞌbarai athini siagaki ida anaothia.

18 Mahi ipohiki bodiꞌbarahani kasiagaki ida imaꞌinavi anaothia.

Oniania Pauloa bikajaꞌoriaꞌihi.

Imaꞌinavi kania roiribaniꞌaha,

imaꞌinavi kaitavari-ra niꞌaha ada Paulo:

—Jesus Cristo ira honariavini imaꞌinavi kania iakaraꞌoꞌini.

Ajihijorakiꞌihi ida kiditavari.

19 Hari.

Imaꞌinavi kakariva vaabono vakaniꞌakhamaꞌaha:

—Ida ajihiꞌihi kiditavari,

ni-imaꞌinavia biogajanaki ida ijaꞌari kamahi namithaꞌiariki vara vaniꞌani afojana.

Ni-agathanijanaki ida kidibadani abosini jiniroa — vaabono vakaniꞌakhamaꞌaha vaihamahiꞌina.

Paulo,

Silas vihiki-ra vaꞌora vagathiꞌaha adani vaihamahiꞌiki.

Ijaꞌari vajoroniki vaibavia vaꞌora avarahokaꞌaha.

Sidaji kaijaꞌarini vakadikaꞌdaꞌdi vaviaha vaꞌora avavikhaꞌaha.

Roma sidaji kakaꞌdaꞌdini kaijaꞌari vihina vaꞌora vavakaꞌdaꞌdivini hiki adani Filipos sidaji kaijaꞌarini.

20 Vakadiania Paulo-ra vaꞌora avarahokaꞌaha adani imaꞌinavi kakariva.

Ijaꞌari vanasohiva abono-ra vaꞌora vaniꞌaha:

—Hihadani makhira judeus kaijaꞌari mani hadani.

Vakadibadani hiki ijaꞌari-ra vanarifirafiravini vanaihamahikarahovini.

21 Haria vakaꞌojomoꞌivini hini vanofiki vakadihojai.

Ni-jahapaꞌitxiki ida vakadihojai anaabavini.

Roma sidaji kakaꞌdaꞌdinia bihonariaki ida hojai,

vaꞌisohihi hiki,

anaabaja kaimoni.

Ni-asohipaꞌitxiki ida athi akajonivini — vakhaniha.

22 Oniaroa,

vajoroniꞌaha adani ijaꞌari vaipohiki,

Paulo-ra vaꞌora vidavini-ra vanofiꞌaha.

Ijaꞌari vanasohiva abonoa vanaꞌbiraꞌihi ida Paulo,

Silas vihiki vakadimakari.

Sorara-ra vahonariaha:

—Vaꞌora vidafiahaꞌa ava.

23 Vaꞌora vidafiahavini naothinia vaꞌora avisaꞌaha cadeia.

Cadeia akadavaꞌava abono-ra vaniꞌaha adani sorara.

—Vaꞌora daboha bana mahija vaꞌajihiravini.

24 Cadeia akadavaꞌava abonoa binaabaꞌihi ida vakadihonari.

Vaꞌora gathiꞌaha adani Paulo,

vaꞌora osajakosiꞌaha cadeia kabodinia.

Bikanaibaviꞌihi ida vaꞌdama ava khanaki akharakia.

Akoꞌoiꞌihi ida vaꞌdama kaꞌborarikhamaꞌihi.

25 Joma ꞌboꞌda hini vani Deu-ra vara vaniꞌaꞌaha adani Paulo.

Deus kamoroa vaahiaꞌaha Deu-ra khai vaniꞌavini.

Vahoariha cadeia vahojaki jaboni mitha vakhaniꞌiki.

26 Jorakia hoꞌdohoꞌdoꞌihi ida arabo cadeia bikavahojaki naboꞌani.

Kagiragiraꞌihi ida cadeia.

Kaꞌoniani oa akarabikhajahaꞌihi ida bakatha afohahavi.

Kaꞌbararaharahaꞌihi ida corrente vidabohana kihiki.

27 Oniaroa,

nokho aforaꞌaha ada cadeia akadavaꞌava abono.

Vada inijakosiꞌaha.

Bikanokiꞌihi ida cadeia kaathani hahavi akarabikhajahaꞌini.

Vigafanahaꞌiki vaꞌora vanihavini adani cadeia vahojaki,

oniania bidioniꞌihi ida kiditarasara fori hiki bavinia.

Ovani oa abono-ra naabinivini-ra nofiꞌaha.

(Gathaki gafanahahi;

sorara vakadikaꞌdaꞌdia bivahonariahiha ada akadavaꞌahi abono abinina.)

28 Pauloa biniꞌaꞌaha athi ꞌbarakia:

—Hariꞌa iabono naabini.

Asia mani arihojahahavija — niha ada Paulo.

29 Oniaroa,

cadeia akadavaꞌava abonoa bikanikhariahi ida lamparina,

okhajakosiꞌaha jorakia,

kajoꞌatharariꞌaha Paulo,

Silas vihiki vaviaha,

imahidaꞌina.

30 Vaꞌora avikhaonaniꞌaha adani Paulo,

Silas vihiki,

vaꞌora nanaꞌdohiꞌaha adani viꞌbamiki:

—Nahina-ra koda bana bada oniꞌaja oabono oakavaꞌijoavini kaimoni?

—Iabono gahinai nihaꞌa Jesus kania kadakaꞌdaꞌdi hiꞌara kaimoni,

oniani ida Deus ira akavaꞌijoavini hija bana.

Vaꞌora bana jaboni akavaꞌijoaki adani kadaijaꞌari igorania vahojaki — vakhaniha adani Paulo.

32 Oniaroa,

Paulo vaꞌora vanavaꞌisohiha adani cadeia akadavaꞌava abono,

gorana kaijaꞌarini vihiki Jesus varani hina jahakia.

33 Mitha vaniꞌavini naothinia cadeia akadavaꞌava abono vaꞌora avikhamiꞌaha adani Paulo vakaida kasiinanahani sokoaja kaimoni.

Vasiina sokoani naothinia Paulo vaꞌora vikanaꞌaha adani cadeia akadavaꞌava abono,

gora kaijaꞌarini vihiki.

Jesus Cristo kaijaꞌari vihina kaimoni karajomihi ida kanai.

34 Oniaroa,

cadeia akadavaꞌava abono vaꞌora avikhaꞌaha adani Paulo gorana,

ꞌbaia vaꞌora noꞌaꞌaha.

Deu-ra vakajariꞌdaravini mani ida cadeia akadavaꞌava abono-ra vaꞌora khai niꞌaja,

gorana kaijaꞌarini vihiki khama.

35 Oniaroa,

mahi vagani vani ijaꞌari vanasohiva abono vaꞌora vahonariaha adani sorara:

—Vahonaria bana ada cadeia akadavaꞌava abono mahija vaꞌora arakhaonanivini adani Paulo — sorara-ra vaniꞌaha.

Oniania,

cadeia kania avikhaꞌaha adani sorara,

akadavaꞌahi abono-ra vanavaꞌisohihavini vaathia.

36 Cadeia akadavaꞌava abono vaꞌora niꞌaha adani Paulo:

—Ijaꞌari vanasohiva abono hora vahonariavini aꞌonira oarakhaonanivini.

Ba ai vihiꞌa.

Jokoa aꞌonira vanajahariharijanariha adani.

37 Paulo vaꞌora niꞌaha adani sorara:

—Roma sidaji kaijaꞌarini hari.

Badani jaharikia akabadanirina kabaꞌi,

sidaji vavakaꞌdaꞌdiva haria vahonariahiꞌihi dafi arihiꞌina.

Sidaji kaijaꞌarini vaipohikia vanokiꞌiki ida haria vidavini.

Ni-jahapaꞌitxiki ida Roma sidaji kaijaꞌarini jahani kabaꞌi kidai hini.

Haria vidavini naothinia cadeia haria avibaiꞌaha.

Hidakabaꞌi haria vakaronavini ahojaia ai arihina.

Ni-nikia aꞌajihina-ra anofiki.

Vikhava adani sidaji kaijaꞌarini vanasohiva abono mahija haria avarakhaonanivini cadeia — Paulo vaꞌora niꞌaha adani sorara.

38 Oniaroa,

sorara avajoiꞌaha,

ijaꞌari vanasohiva abono-ra vaꞌora vanavaꞌisohihavini hiꞌihi ida Paulo athi.

Vaꞌora vaniꞌaꞌaha:

—Hiꞌadani Paulo,

Silas khama Roma sidaji kaijaꞌarini adani — vaꞌora vaniꞌaha.

Mitha vaniꞌahi ida sorara vakadivarani,

vaofiniꞌaha.

39 Oniaroa,

cadeia avikhaꞌaha adani ijaꞌari vanasohiva abono,

vaꞌora vaniꞌaꞌaha adani Paulo:

—Ni-jahapaꞌitxiki ida kidai avihini-ra avahonariahiꞌavini.

Avakavaꞌiꞌbiriniꞌa bana ida akadibadani jaharikaꞌoaki.

Oniaroa,

vaꞌora vaaniꞌaha cadeia.

Vaꞌora vaniꞌaha adani Paulo:

—Sidaji hoariha avikhaꞌa bana.

40 Oniaroa,

cadeia ai vihiꞌaha adani Paulo,

Lídia gorania avikhaꞌaha.

Vaꞌora vakaragaꞌaha adani vaigamina Jesus kaniaja vajoroniki.

Vara vaꞌora vaniꞌaꞌaha:

—Vanaabajahaki bana ida Jesus athi.

Hariꞌa vakajoni ida Jesus kaijaꞌari avihini — vaꞌora vaniꞌaha.

Paulo athi khai vaꞌora niꞌaha adani Lídia gorania vahojaki ijaꞌari.

Oniaroa,

sidajia ai vihiꞌaha adani Paulo,

ibavi hoariha-ra avanikhahaꞌavini.